IZaga 23

₁Uma uhlezi etafuleni

udla nombusi,

qaphelisisa ukuthi yini ephambi kwakho;

₂uma uyisiminzi uzithibe,

ubeke ummese emphinjeni wakho.

₃Ungazihaheli izilovela ezivela kumbusi,

ngokuba ziwudobo lokukuyenga.

₄Ungazikhandli ukuze ucebe;

hlakanipha ngokwanele, ulinde.

₅Usathi phayiphayi amehlo, akusekho,

ngokushesha sekumile amaphiko njengokhozi,

kwajubalalela emazulwini.

₆Ungadli ukudla koneso elibi,

ungafisi izilovela zakhe,

₇ngokuba ungozicabangelayo,

athi kuwe:

“Yidla uphuze,”

kepha inhliziyo yakhe ayikho kuwe.

₈Umthamo owudlileyo uyakuwuphalaza,

udlale ngamazwi akho okuncoma.

₉Ungasikhuzi isiwula,

ngoba siyakudelela ukuhlakanipha kwamazwi akho.

₁₀Ungasusi isikhonkwane esidala,

ungangeni emasimini ezintandane,

₁₁ngokuba umhlengi wazo unamandla;

uyakuyimela indaba yazo.

₁₂Beka inhliziyo yakho ekuyalweni,

nezindlebe zakho emazwini olwazi.

₁₃Ungayeki ukumyala umntwana,

ngokuba uma umshaya ngoswazi akayukufa.

₁₄Uma umshaya ngoswazi,

uhlenga umphefumulo wakhe

endaweni yabafileyo.

₁₅Ndodana yami,

uma inhliziyo yakho ihlakanipha,

inhliziyo yami iyakuthokoza,

yebo, eyami.

₁₆Izibilini zami ziyakujabula,

lapho izindebe zakho zikhuluma okulungileyo.

₁₇Inhliziyo yakho mayingabi nomhawu ngezoni,

kunalokho mesabe njalo uSimakade.

₁₈Impela likhona ikusasa,

nethemba lakho aliyukushatshalaliswa.

₁₉Ndodana yami,

lalela uhlakaniphe,

inhliziyo yakho uyihole ngendlela enhle.

₂₀Ungabi mdibimunye

nezinkolotshe zewayini namakloza,

₂₁ngokuba inkolotshe nesiminzi bagcina bempofu,

ukozela kubenze bagqoke amanikiniki.

₂₂Lalela uyihlo owakuzalayo,

ungamdeleli unyoko lapho esemdala.

₂₃Thengisisa iqiniso, ukuhlakanipha,

ukuyalwa, nokuqonda,

ungathengisi ngakho.

₂₄Uyise wohlakaniphileyo uyethaba nokwethaba,

nozala ohlakaniphileyo uyathokoza ngaye.

₂₅Mabathokoze oyihlo nonyoko,

ethabe owakuzalayo.

₂₆Ndodana yami,

ngiphe inhliziyo yakho,

amehlo akho enamele izindlela zami.

₂₇Ngokuba isifebe singumgodi ojulileyo,

nowesifazane ondindayo uligodi eliminyeneyo.

₂₈Ucutha njengomphangi,

andise inani labantu abambuluzayo.

₂₉Ngubani othi:

“Maye!”

Ngubani onosizi na?

Ngubani onengxabano na?

Ngubani okhonondayo na?

Ngubani olimele kungenasisusa na?

Ngubani onamehlo aklwelileyo na?

₃₀Yilabo abahlalela iwayini,

abaphuza noma yiliphi iwayini elixutshiweyo.

₃₁Ungabolibuka iwayini ulibone libomvu,

licwebezela endebeni,

lehla kalula emphinjeni,

₃₂ekugcineni liluma njengenyoka;

lihlaba njengebululu.

₃₃Amehlo akho azobona imihlola,

inhliziyo yakho ikhulume okuphambeneyo.

₃₄Uyakuba njengolele ekujuleni kolwandle,

nohlezi esihlokweni sensika yomkhumbi.

₃₅Uyakuthi:

“Bagadlile, angalimala;

bangishayile, ngangaqonda ukuthi kwenzekeni.

Ekuvukeni kwami, ngisayobuye ngilifune.”