IZaga 5

₁Ndodana yami,

lalela ukuhlakanipha kwami,

ubeke indlebe yakho ekuqondeni kwami.

₂Amasu nokwazi makukugcine,

khona kuyakulonda izindebe zakho.

₃Izindebe zowesifazane ondindayo ziconsa uju;

umlomo wakhe ubushelelezi kunamafutha,

₄kodwa ekugcineni uyababa njengenhlaba,

ubukhali njengenkemba ekhaliphe nhlangothi zombili.

₅Izinyawo zakhe zehlela ekufeni;

izinyathelo zakhe zibheke endaweni yabafileyo.

₆Akayiqikeleli indlela yokuphila,

funa ukwenza kwakhe kuguquke engazelele.

₇Ngakho-ke madodana ami, ngilaleleni,

ningachezuki emazwini omlomo wami.

₈Dedisela kude naye indlela yakho,

ungasondeli emnyango wendlu yakhe,

₉funa unikele ngodumo lwakho kwabanye,

neminyaka yakho kwabanonya,

₁₀funa abafokazi badle

basuthe ngamandla akho,

kuthi umsebenzi wakho owukhandlekele

uye endlini yomfokazi.

₁₁Uyobubula ekugcineni,

lapho umzimba wakho

nenyama yakho sekuphela,

₁₂uthi:

“Yeka ukuzonda kwami ukuyalwa,

nokwedelela kwenhliziyo yami ukusolwa!

₁₃Angililalelanga izwi labafundisi bami;

angibekanga indlebe yami kubo ababengifundisa.

₁₄Ngacishe ngabhubha ngaphela

phakathi kwebandla nasenhlanganweni.”

₁₅Phuza amanzi kowakho umthombokwakhiwa,

amanzi agobhozayo esuka

kowakho umthombo.

₁₆Ngabe imithombo yakho

isisabalele yonke indawo,

nemifula yamanzi ezigcawini na?

₁₇Mayibe ngeyakho wedwa nje kuphela,

ingabi ngeyabafokazi abahlala phakathi kwakho.

₁₈Mawubusiswe umthombo wakho,

uthokoze ngomfazi wobusha bakho.

₁₉Uyindluzelekazi ethandayo, negogokazi elihle;

amabele akhe mawakwenelise njalo,

uhlale ugajwe uthando lwakhe.

₂₀Ndodana yami,

yini ekwenza uhlanyiswe ngumfazi ondindayo,

ugone umfazi ongamazi esifubeni na?

₂₁Ngokuba izindlela zomuntu

ziphambi kwamehlo kaSimakade;

uyayilinganisa yonke imikhondo yakhe.

₂₂Isikhohlakali siyakubhajwa ekukhohlakaleni kwaso,

sibhajwe yizintambo zesono saso.

₂₃Siyakufa ngenxa yokweswela ukuyalwa,

nangenxa yobukhulu bobuwula baso, siyoduka.