AMahubo 18

₁Ngiyakuthanda, Simakade, ongamandla ami.

₂Simakade, uyidwala lami nenqaba yami,

noMkhululi wami,

uNkulunkulu wami;

uyidwala engikhosela kulo,

isihlangu sami, nophondo lwensindiso yami,

inqaba yami.

₃Ngikhala kuSimakade omele ukudunyiswa,

ngisindiswe ezitheni zami.

₄Izintambo zokufa zangizungeza,

izikhukhula zembubhiso zangikhungatha.

₅Izintambo zendawo yabafileyo zangibamba.

Izihibe zokufa zangehlela.

₆Ekuhluphekeni kwami ngakhala kuSimakade,

ngakhala, uNkulunkulu walizwa izwi lami

esethempelini lakhe;

ukukhala kwami, kwafinyelela ezindlebeni zakhe.

₇Umhlaba wazamazama, wathuthumela,

izisekelo zezintaba zanyakaza,

zashukumela emuva naphambili, wavutha.

₈Ukhafula intuthu ngamakhala akhe,

kuthaphuke umlilo oqothulayo emlonyeni wakhe,

akhafule amalahle avuthayo.

₉Uqhekeza isibhakabhaka

bese ehla emi ngezinyawo zakhe,

phezu kwesigayegaye sobumnyama.

₁₀Uza endiza, egibele ikherubhi,

eshweza ngamaphiko omoya.

₁₁Uzisonge ngobumnyama,

wazemboza ngemvula yamafu amnyama bhuqe!

₁₂Wendulelwa ngumbani,

amafu akhe ehlisa isichotho

namalahle avuthayo.

₁₃USimakade uyaduma esibhakabhakeni;

Ophezukonke uyabhodla,

wehlisa isichotho namalahle ankemuzelayo.

₁₄Uciba ngemicibisholo yakhe,

izitha zihlakazeke;

umbani ulokhu uthi nyazi,

uzidudulela kude.

₁₅Ngenkathi Wena, Simakade, uzithethisa,

lapho uzifutha ngamakhala akho,

umphefumulo wakho uziqumbe phansi.

Izinzulu zolwandle zavela obala,

nezisekelo zomhlaba zaba kwabha.

₁₆USimakade welule isandla sakhe

esezulwini, wangixhakathisa,

wangidonsa, engikhipha ezikhukhuleni ezesabekayo.

₁₇Wangisindisa ezitheni zami ezinamandla;

bezinamandla kunami,

kodwa Yena wangihlenga.

₁₈Zingihlasele ngacishe ngabhubha,

kodwa uSimakade wangivikela.

₁₉Ungikhululile kuzona;

wangisindisa ngoba engithanda.

₂₀USimakade ungiklomelisile,

ngoba ngenza intando yakhe,

ungenzele okuhle,

ngoba ngimsulwa.

₂₁Ngihlala ngihamba ezinyathelweni zikaSimakade,

angikuvumeli ukuziphatha kwababi,

kungehlukanise noNkulunkulu wami.

₂₂Ngigcina yonke imithetho yakhe,

futhi izimiso zakhe angizishayi indiva.

₂₃Ngangingenasici phambi kwakhe,

ngaziqhelelanisa nesono.

₂₄USimakade wangivuza ngokwenza intando yakhe,

ngoba ukubonile ukuthi ngimsulwa.

₂₅Uhlala ethembekile kulabo abethembekile kuye,

abangenasici ubavuza ngezipho ezipheleleyo.

₂₆Konenhliziyo emhlophe

uzibonakalisa ehlanzekile,

kowonakele uzibonakalisa eyisigwegwe.

₂₇NguWena osindisa abazithobayo,

ujabhise abaqhoshayo.

₂₈USimakade uNkulunkulu wami,

ukhanyisa isibani sami,

akhanyise ubumnyama bami.

₂₉Ngokuba ngawe ngingahlasela impi,

ngoNkulunkulu wami, ngingeqa ugange.

₃₀Indlela yakho, Nkulunkulu, iphelele,

izwi likaSimakade lihlanzekile,

uyisihlangu sabo bonke abaphephela kuye.

₃₁Ngokuba ngubani onguNkulunkulu

ngaphandle kukaSimakade na?

Ngubani oyidwala ngaphandle kukaNkulunkulu wethu na?

₃₂UNkulunkulu ongibhincisa amandla,

owenza indlela yami iphelele.

₃₃Wenza izinyawo zami zibe njengezendluzele,

angimise ngiqine ezindaweni zami eziphakemeyo.

₃₄Uqeqesha izandla zami,

ukuze ngikwazi ukulwa;

izingalo zami zibe namandla okugobisa

umnsalo wethusi.

₃₅Wena unginike isihlangu

sensindiso yakho,

isandla sakho sokunene singiphasile,

ubukhona bakho bungenze ngaba mkhulu.

₃₆Wandisile izinyathelo zami phansi kwami,

namaqakala ami awabhinyikanga.

₃₇Ngazixosha izitha zami, ngazifica,

angibuyanga ngaze ngaziqede nya.

₃₈Ngazilimaza, azakwazi ukuvuka,

zawa phansi kwezinyawo zami.

₃₉Wena ungibhincisa amandla

ukuze ngimelane nempi,

abangivukelayo ubenze bangikhothamela.

₄₀Unikele ngezitha zami kimi,

nabangizondayo ngabaqothula.

₄₁Bakhala, kodwa akubangabikho obasindisayo,

bakhala nakuSimakade, kepha akaze abaphendula.

₄₂Ngibacolisisa okothuli lupheshulwa yisiphepho,

ngibashabalalisa okodaka emgwaqweni.

₄₃Wangikhulula kubantu abangivukelayo.

Wangimisa ngaba yinhloko yezizwe,

abantu engingabazi bangikhonza.

₄₄Banele ukungizwa nje, bangilalela;

abantwana babafokazi bayathoba phansi kwami.

₄₅Abafokazi babuna,

baphuma ezinqabeni zabo begubhazela.

₄₆USimakade uyaphila, malidunyiswe idwala lami.

Makaphakanyiswe uNkulunkulu wensindiso yami.

₄₇UNkulunkulu owangiphindiselela,

wenza izizwe zakhonza phansi kwami.

₄₈UNkulunkulu ungiphindiselele,

wenza abantu bazithobe phansi kwami.

Wangikhulula kumuntu oyisidlwangudlwangu.

₄₉Ngakho-ke ngiyakumbonga phakathi kwezizwe;

Simakade, ngiyakulihubela igama lakho.

₅₀Uyenza ibe nkulu insindiso enkosini,

wenza isihe kogcotshiweyo wakhe,

kuDavide nabozalo lwakhe

kuze kube phakade.