AMahubo 39

₁Ngithe:

“Ngizoqaphela izindlela zami,

ukuze ngingoni ngolimi lwami;

umlomo wami ngizowufaka isimfonyo,

inkani nje uma kunababi

phambi kwami.”

₂Bengizithulele, ngingasho lutho,

ukuthula akungisizanga,

inhlupheko yaya ngokuya ikhula.

₃Inhliziyo yami yabila ngaphakathi,

kwaphembeka umlilo ngisazindla,

ngakuphumisela ngolimi lwami.

₄“Simakade, ngazise isiphetho sami,

nokuthi zingakanani izinsuku zami;

mangazi ukuthi ngingodlulayo.

₅Bheka, izinsuku zami wazenza zaba

ngangobubanzi besandla,

imihla yokuphila kwami ayilutho kuwe,

impela yilowo nalowo muntu

ungumoya nje,

noma eqine kangakanani. Sela

₆“Impela umuntu uhamba njengesithunzi nje,

impela uzikhathaza ngokuyize nje;

unqwabela imfuyo,

kepha akazi ukuthi ngubani ozakuyibutha.

₇“Manje, Nkosi, ngisalindeleni na?

Ithemba lami likuwe.

₈Ngihlenge kuzo zonke izinhlupheko engikuzo.

Ungangenzi inhlekisa yesiwula.

₉Ngithule, angiwuvuli umlomo wami,

ngokuba nguwe okwenzile lokho.

₁₀Susa inhlupheko ongehlisele yona,

ngenxa yokucindezelwa yisandla sakho, ngiyaphela.

₁₁Umuntu uyamjezisa ngenxa yesono sakhe,

lokho okuligugu kuye,

ukudla njengobuvunya, kuphele nya,

wonke umuntu ungumoya nje. Sela

₁₂“Simakade, yizwa umkhuleko wami,

ubeke indlebe ekunxuseni kwami,

izinyembezi zami mazingakuniki ukuthula.

Ngokuba kuwe ngingumfokazi,

isihambi, njengokhokho bami.

₁₃Yeka ukungigqolozela,

ukuze ngibuye ngimamatheke,

ngaphambi kokuba ngemuke,

ngingabe ngisaba khona.”