AMahubo 45

₁Inhliziyo yami iyaphuphuma ngenxa yendaba enhle,

ngikhuluma ngegama engiliqambe ngenkosi,

ulimi lwami lulusiba lobhala ngokushesha.

₂Wena umuhle kunabo bonke abantu,

umusa uthululelwe ezindebeni zakho.

Ngakho-ke uNkulunkulu ukubusisile

kuze kube phakade.

₃Gaxa inkemba yakho enqulwini, wena qhawe,

ngodumo nobukhosi bakho.

₄Gibela ebukhosini bakho ngokunqoba,

ngenxa yeqiniso, ukuthobeka nokulunga;

isandla sakho sokunene

masikufundise izenzo ezimangalisayo.

₅Imicibisholo yakho icijile,

ingena enhliziyweni yezitha zenkosi,

izizwe ziwa phansi kwakho.

₆Nkulunkulu, isihlalo sakho sobukhosi

simi kuze kube phakade.

Intonga yokulunga iyintonga yombuso wakho.

₇Uthanda ukulunga, uzonde ububi.

Yingakho uNkulunkulu,

uNkulunkulu wakho, ekugcobe ngamafutha entokozo

ngaphezulu kwabangani bakho.

₈Zonke izingubo zakho ziqholwe ngemure

nenhlaba nekhasiya.

Imiqangala evela ezigodlweni

zophondo lwendlovu iyakwethabisa.

₉Amadodakazi amakhosi

aphakathi kwabesifazane bakho abadumileyo,

indlovukazi imi

ngakwesokunene sakho, ihlobe ngegolide lase-Ofiri.

₁₀Lalela-ke, ndodakazi,

qaphela, ubeke indlebe yakho,

ukhohlwe ngabantu bakini

nangendlu kayihlo,

₁₁khona inkosi izokhangwa ngubuhle bakho,

ngokuba yona

iyinkosi yakho, uboyikhothamela.

₁₂Indodakazi yaseThire nabantu abacebileyo

bancenga umusa wakho ngesipho.

₁₃Indodakazi yenkosi yinhle kakhulu

ilapho phakathi;

ingubo yayo ifekethiswe ngegolide.

₁₄Iyiswa enkosini igqoke izingubo ezifekethisiweyo,

ikhashwa yizintombi ezingabangani bayo,

zilethwa kuwe.

₁₅Ngenjabulo nangentokozo,

bayazihola njengoba zingena esigodlweni senkosi.

₁₆Amadodana akho ayohlala esikhundleni sawoyihlomkhulu,

uwabeke abe yizikhulu emhlabeni wonke.

₁₇Igama lakho ngizolenza likhunjulwe

yizizukulwane ngezizukulwane,

ngakho-ke izizwe ziyokubonga

kuze kube phakade.