AMahubo 73

₁UNkulunkulu umnene impela ku-Israyeli,

kulabo abanenhliziyo ehlanzekileyo.

₂Kepha mina izinyawo zami

zicishe zakhubeka,

kwasala kancane

ukuba izinyathelo zami zishibilike.

₃Ngaba nomhawu ngabazidlayo,

lapho ngibona ababi bephumelela.

₄Ngokuba abanazinhlungu,

kuze kube sekufeni kwabo, bayizitetelegu.

₅Abahlupheki njengabanye abantu,

futhi abehlelwa wubhubhane

njengabanye abantu.

₆Ngakho-ke ukuqhosha ngumgexo wabo,

indluzula bayembethe njengengubo.

₇Amehlo abo aphinqekile ngukunona,

imicabango yenhliziyo iyachichima.

₈Baklolodela abanye,

bakhulume okubi, baziqhenye,

bahlongoze ukubacindezela.

₉Umlomo wabo bawuphakamisela ezulwini,

ulimi lwabo luhamba emhlabeni.

₁₀Ngakho-ke isizwe sakhe sibuyela lapha,

amanzi amaningi bazimuncela wona.

₁₁Bathi:

“UNkulunkulu wazi kanjani?

Imbala kukhona yini ukwazi koPhezukonke na?”

₁₂Bheka, laba bayizikhohlakali,

bahlala bekhululekile, bandisa imfuyo.

₁₃Impela inhliziyo yami ngiyigcinele ize, ihlanzekile,

nezandla zami ngazihlamba ngingenacala,

₁₄ngokuba ngahlushwa usuku lonke,

kwasa ngijeziswa.

₁₅Uma bengithe ngizakukhuluma kanjalo,

ngabe ngisikhohlisile isizukulwane sabantwana bakho.

₁₆Kwathi ngicabanga ukuba ngikuqonde lokho,

kwaba luhlupho emehlweni ami,

₁₇ngaze ngangena endlini engcwele kaNkulunkulu,

ngaqaphelisisa ukugcina kwabo.

₁₈Impela ubabeka ezindaweni ezibushelelezi,

ubawise babe yincithakalo.

₁₉Maye, bachithwa ngokuphazima kweso!

Bafa, babhubha benovalo.

₂₀Njengephupho ekuphaphameni, Nkosi,

uyakuwedelela umfanekiso wabo ekuvukeni kwakho.

₂₁Kwathi lapho inhliziyo yami iba nomunyu,

nezinso zami zibhokodwa,

₂₂ngaba yisiphukuphuku,

angaze ngazi lutho,

ngaba yisilwane kuwe.

₂₃Kepha mina ngiyakube nginawe njalo,

ungibambile ngesandla sami sokunene.

₂₄Uyakungihola ngesiluleko sakho,

andukuba ungamukele enkazimulweni.

₂₅Nginobani ezulwini na?

Uma nginawe, angifuni lutho emhlabeni.

₂₆Umzimba wami nenhliziyo yami kuyaphela,

nokho uNkulunkulu uyidwala lenhliziyo yami

nesabelo sami

kuze kube phakade.

₂₇Ngokuba abakude nawe bayakubhubha,

uyabachitha bonke abahlubuka kuwe ngokuphinga.

₂₈Kepha mina kungilungele

ukusondela kuNkulunkulu,

ngiyenzile iNkosi uSimakade

ibe yisiphephelo sami,

ukuze ngishumayele zonke izenzo zakho.