AMahubo 81

₁Halalisani kuNkulunkulu ongamandla ethu,

nimemeze ngenjabulo kuNkulunkulu kaJakobe.

₂Hubani iculo,

nithathe isigubhu nohabhu;

imiqangala ekhala kahle.

₃Shayani icilongo ngokwethwasa kwenyanga

nangokugcwala kwayo,

ngosuku lomkhosi wethu.

₄Ngokuba kuyisimiso kwa-Israyeli,

nomthetho kaNkulunkulu kaJakobe.

₅Wakwenza kwaba ngubufakazi obumileyo kwaJosefa,

mhlazana ephuma eGibhithe.

Ngezwa ulimi engingalwazi luthi:

₆“Ngasusa ihlombe lakhe emthwalweni,

nezandla zakhe zakhululeka eqomeni.

₇Wakhuleka usosizini, ngakukhulula;

ngakuphendula ngisekusithekeni kokuduma,

ngakuvivinya ngasemanzini eMeribha. Sela

₈“Bantu bami, yizwani,

ngizofakaza kini

ngokuthi: Israyeli, sengathi ungangilalela!

₉Makungabi bikho kuwe omunye uNkulunkulu,

ungakhuleki kunkulunkulu wabezizwe.

₁₀Mina nginguSimakade uNkulunkulu wakho

owakukhuphula eGibithe;

khamisa umlomo wakho, ngiwugcwalise.

₁₁“Kepha abantu bami

abalilalelanga izwi lami,

u-Israyeli wangishaya indiva.

₁₂Ngase ngibayekelela enkanini yenhliziyo yabo,

bahamba ngokuthanda kwabo.

₁₃“Kwangathi abantu bami bangangizwa,

u-Israyeli ahambe ezindleleni zami.

₁₄Izitha zabo bengizozithobisa ngokushesha,

abamelene nabo ngibashaye ngesandla sami.

₁₅Abazonda uSimakade bayakuzithoba kuye,

ukubhujiswa kwabo kube phakade.

₁₆Ngizonondla ngokusanhlamvu kwekhethelo,

yebo, nginisuthise ngoju oluvela edwaleni.”