AMahubo 98

₁Hubelani uSimakade ihubo elisha,

ngokuba wenze izimangaliso,

esokunene sakhe nengalo yakhe engcwele

kumzuzele ukunqoba.

₂USimakade uyenze yaziwa insindiso yakhe,

ukulunga kwakhe wakwembula emehlweni abezizwe.

₃Uwukhumbulile umusa wakhe

nokwethembeka kwakhe kwabendlu yakwa-Israyeli.

Yonke imikhawulo yomhlaba

iyibonile insindiso kaNkulunkulu wethu.

₄Hlokomelani uSimakade mhlaba wonke,

qhumukani, nihlabelele ngenjabulo,

nihube amahubo.

₅Mhubeleni uSimakade ngehabhu,

ngehabhu nangezwi lehubo,

₆ngamacilongo nangokukhala komtshingo,

hlokomani ngezwi lokuhalalisa

phambi kweNkosi uSimakade.

₇Ulwandle maludume nakho konke okukulo,

nezwe nabakhileyo kulo.

₈Imifula mayishaye ihlombe,

izintaba zihube ndawonye ngentokozo,

₉phambi kukaSimakade,

ngokuba uyeza, uzokwehlulela umhlaba.

Uzolehlulela ngokulunga izwe,

nezizwe ngobuqotho.