USirakhi 22

₁Umuntu oyivila ufana netshe elingcolile, futhi bonke banyenyeza ngehlazo lakhe. ₂Umuntu oyivila ufana nobulongwe, noma ngubani othuka ebuthatha ngesandla uyakubudicila ngokushesha esandleni sakhe.

₃Kuyihlazo ukuba nguyise wendodana engahloniphi, kanti ukuzalwa kwentombazane kufana nokulahlekelwa. ₄Indodakazi ehlakaniphile ifumana umyeni okungowayo, kodwa leyo eyenza okubi iyisinengiso kuyise. ₅Indodakazi eyisiphoxi, iphoxa uyise nomyeni wayo, futhi iyobukelwa phansi yibo bobabili. ₆Inkulumo egaxela kungesikhathi ifana nomculo ngesikhathi sokulila, kodwa ukuzibamba kungukuhlakanipha sonke isikhathi. ₇Izingane ezikhuliswe kahle ziyabugqiba ubuntukazana babazali bazo ₈Izingane eziphakeme ngendlela ecasulayo nenobudlova zingcolisa ukuhlonipheka komndeni. ₉Lowo ofundisa isilima ufana nalowo ozama ukuhlanganisa ndawonye izingcezu zokhamba olufileyo, noma ovusa olele ebuthongweni obunzima. ₁₀Oxoxela isilima indaba, ufana noxoxela umuntu owozelayo, ekugcineni siyakuthi: “Konje ubuthini?”

₁₁Mlileleni ofileyo, ngokuba usekushiye ngemuva ukukhanya; futhi silileleni isiphukuphuku, ngokuba sikushiye ngemuva ukuhlakanipha. Mkhaleleni ofileyo kodwa hhayi ngobuhlungu ngokuba usekuphumuleni, kepha impilo yesiphukuphuku idlula ukufa uqobo. ₁₂Ukulilela ofileyo kuba yizinsuku eziyisikhombisa, kodwa okwalowo oyisilima nabangena nkulunkulu kuba yizo zonke izinsuku zokuphila kwabo.

₁₃Ungakhulumi kakhulu nomuntu ongenangqondo noma uvakashele umuntu ongahlakaniphile. Deda kuye, hleze uzithole usotakwini, uzithole uchaphazeleka lapho ezithuntutha. Mbalekele ukuze uthole ukuphumula, futhi ungakhathazwa ukungabi nangqondo kwakhe. ₁₄Kuyini okusinda ukwedlula umthofi futhi liyini igama lakho ngaphandle “kweSiwula?” ₁₅Isihlabathi, nosawoti kanye nebazela lensimbi kulula ukukuthwala kunomuntu oyisiwula. ₁₆Insika yogodo uma iboshelwe yaqina endlini kayinakunyibiswa ngukuzamazama komhlaba; kanjalo nengqondo ethathe isinqumo emva kokucabangisisa ayesabi noma isibhekene nenhlekelele. ₁₇Ingqondo ezinzile ekucabangeni okunokuhlakanipha ifana nobonda oluqinileyo olugudlwe ngobuciko. ₁₈Uthango olusendaweni ephakemeyo alunakuma ngesikhathi sesivunguvungu; injalo nengqondo engenakuzethemba ithatha izinqumo okwesiwula, ayikwazi ukuma iqine lapho ibhekene nakho konke okwesabisayo.

₁₉Lowo ohlokoza iso uletha izinyembezi kanti ohlaba inhliziyo wenza imizwa yayo ivele obala. ₂₀Lowo ojikijela izinyoni ngetshe uyazethusa zibaleke, nalowo othuka umngane uyobubulala ubungani. ₂₁Uma uke wahoshela umngani wakho inkemba, ungaphelelwa yithemba, ngokuba ikhona indlela yokukuguqula lokho. ₂₂Uma ukhuluma umelene nomngani wakho, ungakhathazeki ngokuba likhona ithuba lokubuyisana. Kodwa ukumthuka, nokuba negqabho, nokudalula izimfihlo, noma ukumgwaza efulathele, akukho mngani ongamelana nakho konke lokhu ngaphandle kokuba aziqhelelanise nawe. ₂₃Thembeka kumakhelwano wakho ngesikhathi sobuphofu bakhe, ukuze uthokoze naye ngesikhathi sokuceba nokunethezeka kwakhe. Yima naye ngesikhathi sobunzima bakhe, ukuze uhlanganyele naye efeni lakhe. ₂₄Umusi nentuthu yesithando somlilo kwandulela ikloba lomlilo; kanjalo nokujivaza kwandulela ukuchitheka kwegazi. ₂₅Anginamahloni okukhoselisa umngani, futhi anginakumcashela. ₂₆Kepha uma ngithola ukulinyazwa ngenxa yakhe, wonke umuntu ozwa ngaye uyakumxwaya.

₂₇Ngubani ozakufaka isimfonyo emlonyeni wami, noma yini enye enokunqinda izindebe zami, ukuze ngingawi ngenxa yakho futhi ngingabhujiswa lulimi lwami?