USirakhi 24

₁Ukuhlakanipha kuyazidumisa, kulanda ngobuhle bakho phakathi kwabantu bakho. ₂Emhlanganweni woPhezukonke, kuvula umlomo wakho, naphambi kwezinkumbi zezulu, kuyazigabisa: ₃“Ngavela emlonyeni woPhezukonke, ngawemboza umhlaba njengomlalamvubu. ₄Ngahlala emazulwini aphakeme, isihlalo sami sasiphezu kwensika yefu. ₅Ngingedwa, ngazungeza izingoxi zezulu, ngadabula ukujula kotwa. ₆Ngibe namandla ngaphezu kwamagagasi olwandle, naphezu komhlaba wonke, nangaphezu kwabantu bonke kanye nezizwe zonke.

₇“Phakathi kwakho konke lokhu ngafuna indawo yokuphumula; nokuthi kukuphi lapho ngingahlala khona na? ₈Wase uMdali wakho konke enginika umyalo, futhi wangikhethela indawo yokugogobala. Wathi: ‘Yakha phakathi kukaJakobe, kuthi kwa-Israyeli uthole ifa lakho.’ ₉Ngaphambi kwezikhathi, ekuqaleni, wangidala, futhi ngiyohlala ngikhona ingunaphakade. ₁₀Ethendeni eliNgcwele ngakhonza phambi kwakhe, ngakho-ke ngazinza eZiyoni. ₁₁Wanginika indawo yokuphumula emzini othandekayo, umbuso wami wawuseJerusalema. ₁₂Ngazinza phakathi kwabantu abahloniphekile, engxenyeni yeNkosi, nasefeni layo. ₁₃Ngakhula ngaba ngumdondoshiya okomsedari waseLebanoni, nanjengomsayipresi ezintabeni zaseHermoni. ₁₄Ngaba ngumdondoshiya okwesundu lase-Eni-gedi, nanjengesihlahla samarosi saseJerikho; njengesihlahla esihle somhlwathi emadlelweni, ngakhula kakhulu njengesihlahla esihle ngasemanzini. ₁₅Ngakhipha amakha njengekhasiya nanjengomuthi ophunga lawo liheha amakameli, ngasabalalisa iphunga lami njengenhlaka, nanjenge galibanumi ne-onisha nestakhe, nanjengephunga lemphepho etendeni. ₁₆Ngendlala amagatsha ami njesihlahla seteberinth, futhi amagatsha ami mahle azolile. ₁₇Njengomvini ngiqhakaza injabulo, ukuqhakaza kwami kuhle kugcwele izithelo.

₁₉“Wozani kimi, nina eningilangazelelayo, nidle nisuthe izithelo zami. ₂₀Ngokuba inkumbulo yami imnandi kunoju, nokungifumana kumnandi kunoju emakhekhebeni alo. ₂₁Labo abanginambithile bayongilambela, nalabo abaphuze kimi bayongomela kakhulu. ₂₂Ongilalelayo kasoze ajabhiswe, nosebenza nami kasoze ona.”

₂₃Konke lokhu kuyincwadi yesivumelwano sikaNkulunkulu oPhezukonke, umthetho uMosi asiyala ngawo njengefa lebandla likaJakobe. ₂₅Kugcwalisa umuntu aphuphume inhlakanipho okomfula iPishoni, nanjengeTigrisi ngesikhathi sezithelo zokuqala. ₂₆Kugcwalisa umuntu achichime ukuqonda njenge-Ewufrathe nanjengeJolidani ngesikhathi sokuvuna. ₂₇Ithulula iziyalo njengomfula iNayili.

₂₈Umuntu wokuqala kayazanga inhlakanipho ngokupheleleyo, kanjalo nowokugcina kasoze ayiqonda neze. ₂₉Ngokuba imicabango yakho miningi kunolwandle, nezeluleko zakho zijule ukwedlula umgodi omkhulu wakwalasha. ₃₀Kepha mina, ngangifana nenkasa esuka emfuleni, nginjengomsele wamanzi oya esivandeni. ₃₁Ngathi: “ngiyakunisela isivande nesiqinti sami sezimbali. Kodwa bheka, umsele wami waphenduka umfula, kwathi umfula wami waba lulwandle. ₃₂Ngiyakuphinda ngenze iziyalo ziqhakaze okwentathakusa, ziyakukhanya ziqhakaze kude. ₃₃Futhi ngizakuphinda ngithulule imfundiso yami njengesiphrofetho, ngiyishiyele izizukulwane ezizayo. ₃₄Qaphela lokhu, ukuthi angizisebenzelanga mina nje kuphela kodwa bonke abafuna inhlakanipho.”