UZakhariya 9

₃IThire lazakhela inqaba,

lanqwabela isiliva njengothuli,

negolide elicolekileyo njengodaka emigwaqweni.

₄Uyabona, iNkosi iyakuwuthatha kulo

umcebo walo,

iwuphonse olwandle,

lona lingqongqiswe ngomlilo.

₅I-Ashikeloni liyakukubona lokho, lesabe,

iGaza liyobayobe kakhulu

ezinhlungwini kanye ne-Ekhroni,

ngokuba ithemba lalo liyakuphela,

inkosi ishabalale eGaza,

kungahlali muntu e-Ashikeloni.

₆E-Ashidodi kuyakuhlala izinhlanga ezahlukeneyo.

Ngiyakukuqeda nya ukuzigqaja kwamaFilisti.

₇Ngiyakukhipha igazi labo emlonyeni wabo,

nokunyanyekayo emazinyweni abo,

nabo bayakuba yinsali kuNkulunkulu wethu,

babe ngababusi kwaJuda

nase-Ekhroni njengamaJebusi.

₈Ngiyakuyivikela indlu yami,

ukuze kungabi bikho mabutho

adlulayo nabuyayo;

akusayukudlula mcindezeli kubo,

ngokuba manje sengizibonele ngawami amehlo.

₉Thokoza kakhulu ndodakazi yaseZiyoni,

hlokoma ngenjabulo ndodakazi yaseJerusalema.

Uyabona-ke, iNkosi yakho iza kuwe,

ilungile, inqobile, ithobekile,

igibele imbongolo,

ithole, inkonyane yembongolokazi.

₁₀Ngiyakususa inqola yempi kwa-Efrayimi,

nehhashi eJerusalema,

ngisuse nomnsalo wempi.

Iyakukhuluma ngokuthula ezizweni,

ukubusa kwayo kuyakusukela olwandle

kuze kufike olwandle,

kusukele emfuleni

kuze kufinyelele emaphethelweni omhlaba.

₁₁Kodwa wena-ke,

ngenxa yegazi lesivumelwano sami nawe,

ngiyakubakhulula abakini ababoshiweyo

emgodini ongenamanzi.

₁₂Buyelani enqabeni nina baboshiweyo abanethemba.

Ngiyanitshela namhlanje

ukuthi ngiyakunibuyisela okungokwenu

ngokuphindwe kabili.

₁₃Ngokuba ngizonweba uJuda njengomnsalo,

u-Efrayimi abe njengomcibisholo.

Ngiyakwenza amadodana akho Ziyoni

avukele amadodana akho Javani.

Ngikwenze ube njengenkemba yeqhawe.

₁₄USimakade uyakubonakala phezu kwabo,

umcibisholo wakhe ushweze njengonyazi.

INkosi uSimakade iyakushaya impalampala.

Ihambe ngezivunguvungu zaseNingizimu.

₁₅USimakade Wamabandla uyakubavikela,

bayakudla, banyathele amatshe endwayimane.

Bayakuphuza igazi labo njengewayini,

bagcwale baphuphume njengesitsha sigcwele,

nanjengamakhona e-althare.

₁₆USimakade uNkulunkulu wabo

uyakubahlenga ngalolo lusuku,

njengomhlambi wabantu bakhe,

ngokuba bangamatshe omqhele

amenyezela phezu kwezwe lakhe.

₁₇Laze labusiseka bo!

Yeka ubuhle balo!

Okusanhlamvu newayini kuyokwenza

izinsizwa nezintombi babe yimiqemane.