AMAKHOSI I 4

₁Inkosi uSolomoni yabusa uIsrayeli wonke.

₂Yilezi izikhulu eyayinazo: uAzariya indodana kaSadoki wayengumpristi;

₃oElihorefi noAhiya amadodana kaShisha babengababhali, noJehoshafati indodana ka-Ahiludi wayengumabhalana;

₄uBenaya indodana kaJehoyada wayephezu kwempi; oSadoki noAbiyathara babengabapristi;

₅uAzariya indodana kaNathani wayephezu kwezinduna; uZabudi indodana kaNathani wayengumpristi nomngane wenkosi;

₆uAhishari wayephezu kwabendlu; uAdoniramu indodana ka-Abida wayephethe ezemali.

₇USolomoni wayenezinduna eziyishumi nambili phezu kwabo bonke abakwaIsrayeli ezazifunela inkosi nabendlu yayo ukudla; yileyo naleyo yayifuna ukudla inyanga inye ngomnyaka.

₈Nanka amagama azo: oBeni-Huri ezintabeni zakwaEfrayimi,

₉noBeni-Dekeri eMakhasi, naseShahalabimi, naseBeti-Shemeshi, nase-Eloni-Beti-Hanani,

₁₀noBeni-Hesedi eAruboti, okwakungelakhe iSoko nalo lonke izwe laseHeferi,

₁₁noBeni-Abinadaba kulo lonke iNafati-Dori; uThafati indodakazi kaSolomoni wayengumkakhe;

₁₂uBahana indodana ka-Ahiludi eThahanaki, naseMegido, nakulo lonke iBeti-Sheyani elingaseceleni kweSaretani, ngenzansi kwaseJizreyeli, kusukela eBeti-Sheyani kuze kube-seAbela-Mehola nangaphesheya kweJokimeyamu,

₁₃noBeni-Geberi eRamoti-Gileyadi, okwakungeyakhe imizi kaJayire indodana kaManase ekwaGileyadi, nezwe laseArigobi eliseBashani, imizi engamashumi ayisithupha enezingange nemigoqo yethusi,

₁₄noAhinadaba indodana kaIdo eMahanayimi,

₁₅noAhimahasi kwaNafetali, yena owathatha uBasemati indodakazi kaSolomoni abe-ngumkakhe,

₁₆noBahana indodana kaHushayi kwa-Asheri naseAloti,

₁₇noJehoshafati indodana kaPharuwa kwaIsakare,

₁₈noShimeyi indodana kaEla kwaBenjamini,

₁₉noGeberi indodana kaUri ezweni lakwaGileyadi, izwe likaSihoni inkosi yama-Amori no-Ogi inkosi yaseBashani, ngokuba kwakuyinduna eyodwa kulelozwe.

₂₀OJuda noIsrayeli babebaningi ngangesihlabathi solwandle ngobuningi, bedla, bephuza, bejabula.

₂₁USolomoni wabusa phezu kwemibuso yonke kusukela eMfuleni* kuze kube-sezweni lamaFilisti nasemkhawulweni waseGibithe; bathela intela, bamkhonza uSolomoni zonke izinsuku zokuhamba kwakhe.

₂₂Ukudla kukaSolomoni ngosuku olulodwa kwakungamakhora* angamashumi amathathu empuphu ecolekileyo, namakhora angamashumi ayisithupha empuphu,

₂₃nezinkabi eziyishumi ezikhuluphalisiweyo, nezinkabi ezingamashumi amabili zasemadlelweni, nezimvu eziyikhulu ngaphandle kwezindluzele, namanxala, nezinsephe, nezinkuku ezikhuluphalisiweyo.

₂₄Wabusa ezweni lonke ngaphesheya koMfula* kusukela eThifisa kuze kubeseGaza phezu kwawo onke amakhosi ngaphesheya koMfula; wayenokuthula nxazonke zakhe.

₂₅OJuda noIsrayeli bahlala belondekile, kwaba-yilowo nalowo phansi komvini wakhe nomkhiwane wakhe, kusukela kwaDani kuze kube-seBeri-Sheba, zonke izinsuku zikaSolomoni.

₂₆USolomoni wayenezipani* eziyizinkulungwane ezingamashumi amane zamahashi ezinqola zakhe nabamahashi abayizinkulungwane eziyishumi nambili.

₂₇Izinduna lezo zafunela ukudla inkosi uSolomoni nabo bonke abasondela etafuleni lenkosi uSolomoni, kwaba-yileyo naleyo ngenyanga yayo; kwakungasweleki-lutho.

₂₈Nebhali*, nefoliji* lamahashi, namahashi anejubane zakuletha endaweni lapho zikhona, kwaba-yileyo naleyo njengokunqunyelwe yona.

₂₉UNkulunkulu wamnika uSolomoni ukuhlakanipha nengqondo ebanzi kakhulu, nenhliziyo enkulu ngangesihlabathi esisogwini lolwandle.

₃₀Ukuhlakanipha kukaSolomoni kwadlula ukuhlakanipha kwabantu bonke basempumalanga nakho konke ukuhlakanipha kwaseGibithe.

₃₁Ngokuba wayehlakaniphile kunabo bonke abantu: kunoEthani umEzra, noHemani, noKalikoli, noDarda amadodana kaMaholi, negama lakhe lalisezizweni zonke nxazonke.

₃₂Waqamba izaga eziyizinkulungwane ezintathu; amaculo akhe ayeyinkulungwane nanhlanu.

₃₃Wakhuluma ngemithi kusukela kuwo umsedari* oseLebanoni kuze kubekulo ihisopi* elimila odongeni; wakhuluma nangezinkomo, nangezinyoni, nangezilwanyana ezinwabuzelayo, nangezinhlanzi.

₃₄Kwafika abantu basezizweni zonke ukuzwa ukuhlakanipha kukaSolomoni bevela emakhosini onke abezwile ukuhlakanipha kwakhe.