II KWABASEKORINTE 8

₁Kepha siyanazisa, bazalwane, ngomusa kaNkulunkulu awuphiweyo amabandla aseMakedoniya

₂ukuthi ekuvivinyweni okukhulu kosizi ukuthokoza kwawo okuvamileyo nobumpofu bawo obukhulu kwenza ukuba avame kakhulu ekuphaneni okupheleleyo;

₃ngokuba ngokwawo anikela njengamandla awo, yebo, ngiyafakaza ngithi, nangaphezu kwamandla awo;

₄asinxusa kakhulu ecela umusa wokuhlanganyela ekukhonzeni abangcwele;

₅futhi akubanga-njengokwethemba kwethu kuphela, kepha bazinikela bona uqobo kuqala eNkosini nakithi futhi ngentando kaNkulunkulu,

₆saze samncenga uThithu ukuba, njengalokho wayeseqalile ngaphambili, kanjalo afeze futhi kini lowomsebenzi womusa.

₇Kepha njengalokho nivamile kukho konke: ukukholwa, namazwi, nokwazi, nokukhuthala konke, nothando enisithanda ngalo, manivame nakuwo lowomsebenzi womusa.

₈Angikusho njengomyalo, kodwa ukuze ngokukhuthala kwabanye ngivivinye ubuqotho bothando lwenu;

₉ngokuba niyawazi umusa weNkosi yethu uJesu Kristu ukuthi, nakuba ecebile, waba-mpofu ngenxa yenu, ukuze ngobumpofu bakhe nicebe nina.

₁₀Kulokhu nginitshela ukubona kwami; ngokuba lokhu kulungele nina enaqala nyakenye, kungekwenza kuphela kepha nokuthanda;

₁₁kepha manje fezani nokwenza, ukuze njengalokho kwaba-khona inhliziyo ethandayo, kanjalo kube-khona nokufeza njengeninakho.

₁₂Ngokuba uma uthando lukhona, kwamukeleka njengalokho umuntu anakho, kungenjengalokho angenakho.

₁₃Ngokuba angikusho lokhu ukuba abanye bakhululeke, nina nikhathazeke, kodwa kube-ngokulinganayo,

₁₄ukuze kuthi ngalesisikhathi inala yenu isize bona ekusweleni kwabo ukuba nenala yabo isize nina ekusweleni kwenu, kube-khona ukulingana,

₁₅njengalokho kulotshiwe ukuthi:

₁₆Kepha makabongwe uNkulunkulu obeka enhliziyweni kaThithu lenkuthalo ngani,

₁₇ngokuba wamukela umyalo wethu, kepha naye ekhuthele kakhulu waphuma eza kini ngokuzithandela.

₁₈Sithumele kanye naye umzalwane oludumo lwakhe ngevangeli lwandile kuwo onke amabandla,

₁₉kungesikho lokho kuphela, kodwa ukhethiwe futhi yiwo amabandla ukuba ahambisane nathi ngendaba yalomnikelo osetshenzwé yithi, kube-ludumo kuyo iNkosi, kubonakalise ukukhuthala kwethu,

₂₀sigwemele lokhu ukuthi kungabakhona osisolayo ngalesisipho esikhulu esisetshenzwé yithi;

₂₁ngokuba sinakekela okuhle, kungesemehlweni eNkosi kuphela kodwa nasemehlweni abantu.

₂₂Kepha sithumele kanye nabo umzalwane wethu esimfumene kaningi ekhuthele ezintweni eziningi, kepha manje ukhuthele kakhulu ngenxa yokunethemba kwakhe okukhulu.

₂₃Uma kubuzwa ngoThithu, yena ungumhlanganyeli nesisebenzi kanye nami kini; noma kubuzwa ngabazalwane bethu, bayizithunywa zamabandla, bayinkazimulo kaKristu.

₂₄Ngakho manibonakalise kubo phambi kwamabandla ubufakazi bothando lwenu nokuzincoma kwethu ngani.