UHOSEYA 10

₁UIsrayeli wayengumvini owenabileyo,

wazithelela izithelo;

ngokobuningi bezithelo zakhe

wandisa ama-altare akhe;

ngokobuhle bezwe lakhe

wenza izinsuku ezinhle.

₂Inhliziyo yabo yayahlukene;

manje sebeyakuzitholela icala;

uyakuwaphula ama-altare abo,

achithe izinsika zabo.

₃Yebo, manje bayakuthi: Asinankosi,

ngokuba asimesabanga uJehova;

kepha inkosi ingasenzelani na?

₄Bakhuluma amazwi nje,

befunga amanga, benza isivumelwano;

besekumila ukwahlulela njengenhlungunyembe emiseleni yamasimu.

₅Abakhileyo eSamariya bayakuba-novalo

ngenxa yamathole aseBeti-Aveni,

ngokuba abantu balo bayakulila ngawo,

abapristi bezithombe bakhale ngawo ngenxa yodumo lwawo

ukuthi lumukile kuwo.

₆Iyakuyiswa eAsiriya ibe-yisipho kuyo inkosi uJarebi;

uEfrayimi uyakwamukela ihlazo,

uIsrayeli ajabhe ngeziluleko zakhe.

₇Inyamalele inkosi yaseSamariya

njengebazelo ebusweni bamanzi.

₈Izindawo eziphakemeyo zaseAveni, isono sakwaIsrayeli, ziyakuchithwa;

ameva namakhakhasi ayakukhuphukela ema-altare abo;

bayakuthi kuzo izintaba: Sisibekeleni,

nakuwo amagquma: Welani phezu kwethu.

₉Kwasezinsukwini zaseGibeya wonile, Israyeli;

bema khona;

impi nabo abobubi ayiyikubafica eGibeya na?

₁₀Lapho ngithanda, ngiyabajezisa;

abantu babahlanganyele

ekubabopheleni ebubini obubili.

₁₁UEfrayimi uyisithole esifundisiweyo,

esithanda ukubhula amabele;

kepha mina ngiyekile intamo yaso enhle;

sengiyakumbophela uEfrayimi,

uJuda alime,

uJakobe azidubele.

₁₂Zihlwanyeleleni ngokulunga,

niyakuvuna ngomusa;

gathani umqatho wenu;

sekuyisikhathi sokumfuna uJehova,

aze afike, anise ukulunga phezu kwenu.

₁₃Nilimé ububi,

navuna okubi;

nidlile izithelo zamanga,

ngokuba nethemba endleleni yenu

nakubo ubuningi bamaqhawe enu.

₁₄Kuyakuvela ukuxokozela phakathi kwabantu bakho,

zichithwe zonke izinqaba zakho,

njengalokho uShalimani achitha iBeti-Aribeli ngosuku lokulwa,

unina echotshozwa phezu kwabantwana.

₁₅Kanjalo iBethele liyakwenza kini

ngenxa yobubi benu obukhulu;

ekuseni inkosi yakwaIsrayeli

iyakunqunywa nokunqunywa.