UISAYA 21

Njengokudlula kwezivunguvungu eningizimu

kuvela ehlane ezweni elesabekayo.

₂Ngitshelwé umbono olukhuni:

umphangi uyaphanga, umchithi uyachitha.

Yenyuka, Elamu, vimbezela, Mediya;

konke ukukhala kwalo ngikwenza kuphele.

₃Ngalokho ukhalo lwami lugcwele imihelo;

inkwantshu ingibambile njengenkwantshu yobelethayo;

ngikhonkobele ukuba ngingezwa,

ngiphelé amandla ukuba ngingaboni.

₄Ngadukelwa yingqondo,

ngashaywa luvalo;

ukuhwelela engakulangazelela

kwaphenduka ukuthuthumela kimi.

₅Ngukulungisa itafula yini?

Ngukwendlala izindwangu,

ukudla nokuphuza, na?

Hayi, sukumani, zikhulu,

nigcobe izihlangu.

₆Ngokuba ishilo kanje iNkosi, yathi:

Hamba umise umlindi

ozakubika akubonayo.

₇Lapho ebona abamahashi,

amahashi amabili ngamabili,

nezinkweli zezimbongolo,

nezinkweli zamakamela,

uyakuqaphela nokuqaphela ngesineke esikhulu.

₈Obonayo wayesememeza, wathi:

Nkosi yami, ngimi njalo emini embhoshongweni wami,

ngihlezi ngisemlindelweni nasebusuku bonke.

₉Bheka, kuyeza isigaba samadoda,

amahashi amabili ngamabili.

Wathatha wathi: Liwile, liwile iBabele,

nazo zonke izithombe ezibaziweyo zawonkulunkulu balo zidilizwé phansi.

₁₀Wena ongokubhuliweyo kwami kwesibuya sami,

engikuzwileyo kuJehova-Sebawoti,

uNkulunkulu kaIsrayeli,

khona ngiyanazisa.

Ukhona ongimemeza ngiseSeyiri, ethi:

Mlindi, yisikhathi sini sobusuku na?

Mlindi, yisikhathi sini sobusuku na?

₁₂Umlindi wathi: Kuyeza ukusa,

kepha kusesebusuku.

Uma nithanda ukubuza, buzani;

buyani nize.

Hlalani ebusuku ehlathini laseArabiya

nina-mahele aseDedanimi.

₁₄Owomileyo bamlethela amanzi

abakhileyo ezweni laseThema,

bahlangabeza ababalekayo nesinkwa.

₁₅Ngokuba babalekela izinkemba,

izinkemba ezihoshiweyo,

neminsalo ensaliweyo,

nobunzima bempi.