NGOKUKAMARKU 10

₁Wasuka lapho, weza emikhawulweni yaseJudiya nangaphesheya kweJordani; izixuku zabuye zabuthana kuye, waphinda wabafundisa abantu njengokujwayela kwakhe.

₂Kwase kusondela kuye abaFarisi, bambuza ukuthi kuvunyelwe yini ukuba indoda ilahle umkayo, bemlinga.

₃Waphendula, wathi kubo: UMose waniyala ngokuthini na?

₄Bathi: UMose wavuma ukuba kulotshwe incwadi yesahlukaniso, alahlwe.

₅UJesu wayesethi kubo: Ngenxa yobulukhuni benhliziyo yenu wanilobela lowomyalo.

₆Kepha kusukela ekuqaleni kokudalwa uNkulunkulu wabenza owesilisa nowesifazane.

₇Ngenxa yalokho umuntu uyakushiya uyise nonina, anamathele kumkakhe;

₈labo ababili bayakuba-nyamanye; ngakho abasebabili, kepha sebenyamanye.

₉Ngakho-ke lokho akuhlanganisileyo uNkulunkulu makungahlukaniswa ngumuntu.

₁₀Besendlini abafundi babuye bambuza ngalokho.

₁₁Wathi kubo: Yilowo nalowo olahla umkakhe, aganwe ngomunye, uyaphinga kuye.

₁₂Naye, uma elahla indoda yakhe, agane enye, uyaphinga.

₁₃Khona baletha kuye abantwanyana ukuba abaphathe; kepha abafundi babakhuza.

₁₄Kodwa uJesu ekubona wathukuthela, wathi kubo: Vumelani abantwana beze kimi, ningabenqabeli, ngokuba umbuso kaNkulunkulu ungowabanjalo.

₁₅Ngiqinisile ngithi kini: Yilowo nalowo ongamukeli umbuso kaNkulunkulu njengomntwana kasoze angena kuwo.

₁₆Wabagona, wababusisa ebeka izandla phezu kwabo.

₁₇Ekuphumeni kwakhe ukuya endleleni umuntu wagijimela kuye, waguqa ngamadolo phambi kwakhe, wambuza wathi: Mfundisi omuhle, ngiyakwenzani ukuba ngidle ifa lokuphila okuphakade na?

₁₈Kepha uJesu wathi kuye: Ungibizelani ngokuthi ngimuhle na? Kakho omuhle, munye kuphela, uNkulunkulu.

₁₉Uyayazi imiyalelo ukuthi: Ungabulali, ungaphingi, ungebi, ungafakazi amanga, ungamamuki umuntu utho, yazisa uyihlo nonyoko.

₂₀Kepha wathi kuye: Mfundisi, konke lokho ngikugcinile kwasebusheni bami.

₂₁UJesu wayesembheka, emthanda, wathi kuye: Usasilalelwe into inye; hamba uthengise ngakho konke onakho, uphe abampofu, khona uzakuba-negugu ezulwini; uze ungilandele.

₂₂Kepha wanyukumala ngalelozwi, wamuka edabukile, ngokuba wayenengcebo enkulu.

₂₃UJesu waqalaza, wathi kubafundi bakhe: Kulukhuni kangakanani kwabanomnotho ukungena embusweni kaNkulunkulu.

₂₄Kepha abafundi bethuka ngamazwi akhe. UJesu wabuye waphendula, wathi kubo: Bantwana, kulukhuni kangakanani kwabethemba umnotho ukungena embusweni kaNkulunkulu.

₂₅Kulula ukuba ikamela lingene ngentunja yosungulo kunokuba onothileyo angene embusweni kaNkulunkulu.

₂₆Bamangala kakhulu, bathi omunye komunye: Pho, kungasindiswa-bani na?

₂₇UJesu ebabheka wathi: Kubantu akunakwenzeka, kepha kuNkulunkulu akunjalo; ngokuba kuNkulunkulu kungenzeka konke.

₂₈UPetru wathatha, wathi kuye: Bheka, thina sishiyé konke, sakulandela.

₂₉UJesu wathi: Ngiqinisile ngithi kini: Akukho-muntu oshiyé indlu, noma abafowabo, noma odadewabo, noma unina, noma uyise, noma abantwana, noma amazwe ngenxa yami nangenxa yevangeli,

₃₀ongayikwamukeliswa ngekhulu: manje kulesisikhathi izindlu, nabafowabo, nawodadewabo, nawonina, nabantwana, namazwe kanye nokuzingelwa, nasenkathini ezayo ukuphila okuphakade.

₃₁Kepha abaningi abokuqala bayakuba-ngabokugcina, nabokugcina babe-ngabokuqala.

₃₂Babesendleleni bekhuphukela eJerusalema; uJesu wayehamba phambi kwabo; ababelandela babethukile, besaba. Wayesethatha futhi abayishumi nambili, waqala ukubatshela okuzakumehlela, ethi:

₃₃Bhekani, sikhuphukela eJerusalema; iNdodana yomuntu izakukhashelwa kubapristi abakhulu nababhali; bazakuyinqumela ukuba ife, bayikhaphele kwabezizwe;

₃₄bazakuyiklolodela, bayikhafulele ngamathe, bayishaye, bayibulale; kepha emva kwezinsuku ezintathu izakuvuka.

₃₅Kwase kusondela kuye oJakobe noJohane amadodana kaZebedewu, bathi kuye: Mfundisi, siyathanda ukuba usenzele lokhu esizakukucela kuwe.

₃₆Wathi kubo: Nifuna ukuba nginenzeleni na?

₃₇Bathi kuye: Siphe ukuba sihlale, omunye ngakwesokunene sakho, omunye ngakwesokhohlo sakho enkazimulweni yakho.

₃₈Kepha uJesu wathi kubo: Anikwazi enikucelayo. Ningasiphuza yini isitsha engisiphuza mina, nibhapathizwe ngombhapathizo engibhapathizwa ngawo na?

₃₉Bathi kuye: Singakwenza. UJesu wathi kubo: Isitsha engisiphuza mina niyakusiphuza, nibhapathizwe ngombhapathizo engibhapathizwa ngawo mina;

₄₀kepha ukuhlala ngakwesokunene sami nangakwesokhohlo akusikho okwami ukuphana ngakho, kodwa kungokwalabo abakulungiselweyo.

₄₁Bathi ukuzwa lokho abayishumi, baqala ukuthukuthelela oJakobe noJohane.

₄₂UJesu wayesebabiza, wathi kubo: Niyazi ukuthi abathiwa babusa izizwe bazenza amakhosi phezu kwazo, nezikhulu zazo ziphethe amandla phezu kwazo.

₄₃Kepha akunjalo phakathi kwenu, kodwa yilowo nalowo ofuna ukuba-mkhulu phakathi kwenu makabe-yisikhonzi senu,

₄₄nalowo ofuna ukuba-ngowokuqala phakathi kwenu makabe-yinceku yabo bonke.

₄₅Ngokuba nayo iNdodana yomuntu ayizelanga ukukhonzwa kepha ukukhonza nokunikela ukuphila kwayo, kube-yisihlengo sabaningi.

₄₆Khona bafika eJeriko. Kwathi esaphuma eJeriko nabafundi bakhe nesixuku esikhulu, indodana kaThimewu uBartimewu, isinxibi esiyimpumputhe, wayehlezi ngasendleleni.

₄₇Wathi ukuba ezwe ukuthi nguJesu waseNazaretha, waqala ukumemeza ethi: Jesu, Ndodana kaDavide, ngihawukele!

₄₈Abaningi bamkhuza, bathi kathule; kepha kwayikhona wamemeza kakhulu, ethi: Ndodana kaDavide, ngihawukele!

₄₉Wayesema uJesu, wathi: Mbizeni. Bayibiza impumputhe, bathi kuyo: Yima isibindi, usukume; uyakubiza.

₅₀Yayisilahla ingubo yayo, yagxuma, yaya kuJesu.

₅₁UJesu washo kuyo, wathi: Ufuna ukuba ngikwenzeleni na? Impumputhe yathi kuye: Rabuni, ukuba ngibone.

₅₂UJesu wathi kuyo: Hamba-ke; ukukholwa kwakho kukusindisile. Yayisibona khona-lapho, yamlandela endleleni.