AMAHUBO 12

₁Siza, Jehova, ngokuba owesaba uNkulunkulu akasekho,

ngokuba banyamalele abathembekileyo kubantwana babantu.

₂Bakhuluma amanga, kwaba-yilowo nalowo kumakhelwane wakhe;

ngezindebe ezithophayo bakhuluma nganhliziyombili.

₃UJehova uyakunquma zonke izindebe ezithophayo,

ulimi olukhuluma amazwi amakhulu,

₄abathi: Siyakunqoba ngolimi lwethu;

izindebe zethu zinathi; ngubani oyinkosi phezu kwethu na?

₅Ngenxa yokubandezeka kwabahluphekileyo nangokububula kwabampofu

ngizakuvuka kalokhu, usho uJehova,

ngimbeke ekusindisweni akulangazelelayo.

₆Amazwi kaJehova angamazwi ahlanzekileyo,

anjengesiliva elihlanjululwé esithandweni emhlabathini,

lihlanjululwé kasikhombisa.

₇Wena-Jehova uyakubagcina,

ubavikele kulesisizukulwane kuze kube-phakade.

₈Abangamesabi uNkulunkulu bayashanguza nxazonke,

lapho amanyala ephakeme kubantwana babantu.