Bible Reading Plan – Day 103

₁Ndiyakuthanda, Ndikhoyo, mandla am.

₂NguNdikhoyo iliwa lam; nguye inqaba yam; nguye umkhuseli wam.

Xa ndizimele ngoThixo wam ndihlala ndikhuselekile.

Nguye ikhaka lam, nguye ondigcina ndifihlakele.

₃Ndithi ndakukhala kuNdikhoyo,

asuke andithi hlasi kwiintshaba zam.

Ngenene, makabongwe uNdikhoyo!

₄Bendirhintyelwe ziintambo zokufa,

amaza arhaxayo endigubungele.

₅Ukufa bekundirhangqile,

ingcwaba selivuleke lithe ng'aa.

₆Ndazibika kuNdikhoyo ndikuloo ngxingongo,

ndalucela uncedo kuThixo wam.

Wandiva engqendeve ebhotwe lakhe,

savakala kuye isikhalo sam.

₇Suka wagungqa wanyikima umhlaba,

nditsho neziseko zeentaba zashukuma,

kuba uThixo wayenomsindo.

₈Kwathi phoko umsi emathatheni akhe,

walephuza amadangatye ngomlomo,

kuliqika amalahle avuthayo.

₉Wasikrazula isibhakabhaka, wehla,

ethe zukuva phezu kwelifu elimnyama.

₁₀Wandanda ngenqwelo *yezithunyw' ezimaphiko

itshebeleza ngesantya emoyeni.

₁₁Wayethiwe gqume sisithokothoko, kumnyama thsu;

engqingwe ziingqimba zamafu anemvula.

₁₂Kwaw' isichotho namalahl' avuthayo,

ziphuma kumban' ongaphambi kwakhe,

zagqobhoza kuloo ntshinyela yamafu.

₁₃Wazongoma esibhakabhakeni uNdikhoyo,

lavakal' ilizwi loPhezukonke,

satsho isichotho nemibane.

₁₄Wadubula ngeentolo zakhe, zee qhu saa iintshaba,

eziswantsulisa ngokugqekreza kwemibane.

₁₅Ewe, watsho zoma qoko iilwandle,

kwatsho kwavela neziseko zelizwe,

wakukhalima, wena Ndikhoyo,

ugragramela iintshaba unomsindo.

₁₆Wehla, wandithi hlasi uNdikhoyo,

wandihlangula kumanzi enzonzobila.

₁₇Wandihlangula kwiintshaba zam

nakwabo bandichasayo, bendivuyelela.

₁₈Bandihlasela ndisengxingweni,

wandikhusela yena uNdikhoyo.

₁₉Wandihlangula ndisengozini,

wandisindisa kuba ekholisekile ndim.

₂₀Wandivuza uNdikhoyo, kuba ndandilungisa;

wandithamsanqela, kuba ndimsulwa.

₂₁Umthetho kaNdikhoyo ndiyawuthobela;

andimfulathelanga uThixo wam.

₂₂Yonke imiyalelo yakhe ndiyigcinile;

andiyaphulanga imithetho yakhe.

₂₃Uyandazi ukuba andonanga;

ndiyazilumla ekwenzeni ububi.

₂₄Ngoko ke uyandivuza, kuba ndisenza okulungileyo;

uyandivuza, kuba akukho sikhwa kum.

₂₅Uthembekile, Ndikhoyo, kwabo bathembekileyo;

ubenzela ububele abo bandlela zithe tse.

₂₆Umsulwa kwabo bamsulwa;

uchasene nabo bangamatshijolo.

₂₇Ungumsindisi wabathobekileyo;

uyabathoba abo banekratshi.

₂₈Usisibane sokundikhanyisela, wena Ndikhoyo;

undigxothela ubumnyama, wena Thixo.

₂₉Ewe, ngawe ndingawuchitha-chitha nomkhosi,

ngamandla akho ndilutsibe nongqameko lwawo.

₃₀Hayi bo, zigqibelele izinto azenzayo lo Thixo!

Hayi ukuthembeka kwelizwi lakhe!

Uyabakhusela bonke abo bathembela ngaye.

₃₁NguNdikhoyo yedwa uThixo;

nguye kuphela osikhuselayo.

₃₂Ewe, nguThixo ondinika amandla;

nguye oyenza iphumelele indlela yam.

₃₃Undicondobisa kuhle njengenxala,

ndichankcathe emaweni ndingatyibiliki.

₃₄Undiqhelisa ukulwa edabini,

andifundise ukugoba isaphetha esomeleleyo.

₃₅Ndikhoyo, undinike ikhaka lokuhlanganisa,

wandixhasa ngesandla sakho esinamandla;

undibonelele ndatsho ndazimaseka.

₃₆Undimise endaweni ephangaleleyo;

azinakutyibilika kuyo iinyawo zam.

₃₇Ndizisukela ndizifumane iintshaba zam;

andijiki ndide ndizitshabalalise.

₃₈Ndizithi ntshinte-ntshinte zingavuki tu,

ziqungquluze apho phambi kwam.

₃₉Undinika amandla edabini,

undoyisele iintshaba zam.

₄₀Ziyandoyika iintshaba zam;

abandithiyileyo ndibatshabalalisile.

₄₁Ziba ngafuna uncedo, zingancedwa bani;

ziba ngazibika kuNdikhoyo, angaphenduli.

₄₂Mna ndizicumza zibe njengothuli luphetshethwa ngumoya,

ndizinyhashe okodaka endleleni.

₄₃Wandihlangula kubavukeli,

walimisa igunya lam ezizweni,

ndada ndaphatha nabo bendingabazi.

₄₄Bayandithobela bakuwuva umthetho wam;

ndikhahlelwe nangabasemzini abantu,

₄₅bephuma kwiinqaba zabo begubha,

bephelelwe sisibindi xa bebonke.

₄₆Huntshu! Khul' ud' ukhokhobe, Ndikhoyo!

Mawubongwe, wena mkhuseli wam,

Thixo ongumhlanguli wam!

₄₇Wena undoyisela iintshaba zam;

wena ugoba iintlanga zitsho zindikhahlele;

₄₈wena undihlangula kwabandichasayo!

Ewe, undoyisele iintshaba zam,

wandikhusela kubaphalazi-gazi.

₄₉Ngoko ke ndiya kukubonga phakathi kwezizwe,

ndityibele ndivuma umbongo wakho, Ndikhoyo.

₅₀NguThixo omnika uloyiso ukumkani,

omenzele izibele umthanjiswa wakhe,

uDavide nayo yonke inzala yakhe kude kuse ephakadeni.

₁Amazulu abalisa ngobungangamsha bukaThixo,

nesibhakabhaka sixela umsebenzi wezandla zakhe.

₂Imini ixelela imin' elandelayo,

nobusuku bubikela ubusuk' obulandelayo.

₃Akukho ntetho namazwi nasandi sivakalayo;

₄kodwa kukho intlokoma kulo lonk' elimiweyo,

nebali lazo liwugqibe wonk' umhlaba.

UThixo ulakhele esibhakabhakeni ilanga.

₅Liphuma linyalasa njengomyen' ephum' entangeni,

nanjengembalek' engxamel' ukubalek' elugqatsweni.

₆Liphum' emaphethelwen' esibhakabhaka,

liye kutshw' emaphethelweni kwelinye icala;

akukho nto inokusinda kwingqatsini yalo.

₇Ugqibelele won' umyalelo *kaNdikhoyo:

uhlaziya amandla.

Uthembekile wona,

kub' unik' isiyatha

ubulumko.

₈Imimiselo kaNdikhoyo ilungile: ivuyis' intliziyo.

Imithetho kaNdikhoyo inyulu: ikhanyisel' amehl' indlela.

₉Kulungil' ukunqul' uNdikhoyo; koba njalo nanini-nini.

Ziyinyanis' izigqibo zakhe, yaye zilunge kwaphela.

₁₀Zinqweneleka ngaphezu kwegolide,

nditheth' igolid' engcwengileyo;

zimnandi ngaphezu kobusi,

ewe, ndixel' ikhephelele lenqatha lobusi.

₁₁Ngaphezu koko ziyasilulek' isicaka sakho,

yaye ngumvuz' omkhulu ukukuthobela.

₁₂Kambe ke ngubani oziqiqayo iziphoso zakhe?

Ndikhulul' ezonweni endingaziqondiyo.

₁₃Ndikhusel' ezonwen' ezibangwa likratshi,

hleze zindongamele.

Ndiyakwandul' ukuba msulwa

ndakuba ndikhululekil' ezonweni ezoyikekayo.

₁₄Ngamana angamkeleka kuwe, Ndikhoyo,

amazwi am neengcamango zentliziyo yam,

wena mkhuseli wam nomkhululi wam.

₁Wanga *uNdikhoyo angakuphulaphula ngemini yeembandezelo!

Wanga angakukhusela uThixo kaYakobi!

₂Wanga angakuthumela uncedo luvel' ebhotwe lakhe,

akuxhase esentabeni yeZiyon.

₃Wanga angayamkela iminikelo yakho uThixo,

akholiseke ngamadini omenzela wona.

₄Wanga angakunika umnqweno wentliziyo yakho,

aziphumelelise zonk' iinquleqhu zakho.

₅Sokwandul' ukuba nemincili ngoloyiso lwakho,

siphakamis' izindwe, simbong' uThixo.

Wang' uNdikhoyo angaziva izicelo zakho!

₆Kaloku ndiyaz' ukuba uNdikhoyo uyamnceda umthanjiswa wakhe,

uyamva ekwibhotwe lakhe elilodwa ezulwini,

umnik' uloyiso ngamandla akhe.

₇Baqhayisa ngeenqwelo zokulwa abanye, abanye ngamahashe;

thina siqhayisa ngoNdikhoyo uThixo wethu.

₈Bona babhukuqwa bawe;

thina sisuka sime ngxishi.

₉Ndikhoyo, mnike amandla oloyiso ukumkani;

sive naxa sizibika kuwe!

₁Uyavuya ukumkani ngenxa yamandla akho, *Ndikhoyo,

uyachulumacha kuba umnike uloyiso.

₂Umnikile umnqweno wentliziyo yakhe;

usivile isicelo sakhe.

₃Umhlangabeze ngeentsikelelo ezingathethekiyo,

wamthi jize ngesithsaba segolid' entloko.

₄Wacela ubomi kuwe;

wampha ubom' obude obuhlala buhleli.

₅Ufumene imbeko enkulu ngenxa yoncedo lwakho;

umnike udumo nobungangamela.

₆Ewe, umnike uyolo olungapheliyo;

kwanobukho bakho buyamchwayitisa.

₇Kaloku ukumkani uthembele ngoPhezukonke,

yaye ngenxa yenceba kaNdikhoyo uya kuhlal' engukumkani.

₈Zonk' iintshaba zakho uya kuzibhaqa;

uya kubafumana bonk' abakuthiyileyo.

₉Úya kubatshisa ngesihogo somlil' akufika;

uNdikhoyo wobatshabalalisa ngomsindo, abaqwele ngomlilo.

₁₀Uya kuyiphelisa inzala yabo ehlabathini,

bangabikho abantwana babo phakathi kwabantu.

₁₁Nokuba bayila ububi ngawe,

nokuba benza iyelenqe,

abanakuphumelela.

₁₂Kaloku úya kubadubula ebusweni ngeentolo zakhe,

abachithe babe ziintsalu.

₁₃Mawubongwe, Ndikhoyo, ngenxa yobugorha bakho;

thina sokubonga sikudumise ngenxa yamandla akho.