Bible Reading Plan – Day 108

₁Intliziyo yam suke yaphuphuma;

kuthi mandibonge ndityibele.

Ulwimi lwam lona luqule lwaligangatha,

ndanga ndingumbhali ongenadyudyu.

Kaloku ndingqungel' ukubhekisa kuMntwan' omhle.

₂Kubo bonke wen' uyinzwan' engenasiphako;

uliciko elicikoza kuvokotheke.

Kaloku uThixo ukuthamsanqele

ngezingaphele ndawo iintsikelelo.

₃Yithi hlas' ikrel' uqule, Somagorha!

Qula ngesidima nobungangamsha!

₄Nyantsul' uye kuqhawuk' unobathana!

Qula uyilwele inyaniso nobulungisa!

Ngobungangamsha bakho dubula ugeqa!

₅Iintolo zakho zibukhali;

ziyazihlabanisela iintshaba zakho,

izizwe zitsho zibe phantsi kwakho.

₆Kambe ulawulo lwakho, Thixo, aluphele ndawo;

owakho umsimbithi ngowobulungisa.

₇Ungumathand' ubulungisa; uyithiyil' inkohlakalo.

Ngenxa yaloo nto ke, Thixo,

uThixo wakho ukuthambisile.

Ewe, ukuthe jize ngesihomo nesithozela

esisigqwesayo esoogxa bakho.

₈Iminweba yakho iqholwe ngomtsalane

wemore, ikhala, nekasiya.

Kwizixeko ezihonjiswe ngamabamba eendlovu

wonwatyiswa ngezeentambula.

₉Phakathi kwezo zikuphahlileyo

zikho neentombi zookumkani.

Kufuphi nawe kuthe zinzi inkosazana

ethe thande ecikiziweyo igolide yaseOfire.

₁₀Khawundiphe iindlebe, uphulaphule, ntombam.

Uze ulincame ikhaya, ngokunjalo nendlu kayihlo.

₁₁Kaloku wena uyinzwakazi;

ke yena ukumkani uyakulangazelela.

Phofu ke yena ungumhlekazi, ngoko ke wena mthobele.

₁₂Wena ntombi yaseTire, baya kukucenga bakunyobe;

ewe, izinhanha ngeendidi zonke zobutyebi.

₁₃Phaya entangeni bubuyokoyoko,

inkosazana ivath' ezegolide.

₁₄Nantso irhuqisa ngamawezaweza,

irholwa isiwa kukumkani.

Nâzo neentombi eziyikhaphileyo

ziyiphahlile zisiya nayo kuye.

₁₅Ziyaduda, ziyavuya, ziyamemelela;

tsotsololo zagaleleka ebhotwe!

₁₆Ngxatsho ke, mntwan' omhle!

Ezihlangwini zooyihlo kuya kungena abakho oonyana.

Wena uya kubathi jize ngobungangamsha,

babe zizinxiba-mxhaka ehlabathini liphela.

₁₇Ke mna ndiya kulubhengeza udumo lwegama lakho.

Uya kudunyiswa zizizukulwana ziphela.

Ewe, zonke izizwe ziya kutyibela,

zikubonga kude kube ngunaphakade.

₁UThixo ulihlathi nenqaba yethu;

ngexesha leenkathazo uluncedo oluhlala lulungile.

₂Ngoko ke asoyiki lutho, nokuba ihlabathi lingazama-zama,

nokuba iintaba zingaphoswa enzulwini yolwandle.

₃Hayi, amanzi alo angade agqume alephuze amagwebu,

iintaba zingcangcazeliswe kukulephuza kwawo.

₄Kukho umlambo omisinga isivuyisayo isixeko sikaThixo,

esilikhaya elingcwele likaPhezukonke.

₅UThixo uthe zinzi apho kuso.

Ngoko ke asinakuze sitshabalale,

kuba yena usinceda kwasekuseni.

₆Izizwe ziyaphithizela;

izikumkani ziyabhukuqwa.

Lakuhlokoma ilizwi lakhe

ihlabathi litsho linyibilike.

₇*UNdikhoyo uSomandla ungakuthi;

ihlathi lethu nguThixo kaYakobi.

₈Yizani nibone akwenzileyo uNdikhoyo.

Ewe, uliphanzisile ihlabathi.

₉Ngumaphelis' iimfazwe ehlabathini jikelele.

Uyasiqoboza isaphetha,

awuvikive umkhonto,

amakhaka awantumek' umlilo.

₁₀Uthetha ngelizwi athi:

“Phezani, ndim uThixo.

Ndizivelele izizwe;

nehlabathi ndilikrobele.”

₁₁UNdikhoyo uSomandla ungakuthi;

ihlathi lethu nguThixo kaYakobi.

₁Qhwaban' izandla, nonke zizwe;

dandulukani, niculel' uThixo nivuya.

₂*UNdikhoyo unguPhezukonke,

ufanelwe kukuhlonelwa.

Yena uyingangalala yokumkani

elawula ihlabathi jikelele.

₃Yena wasithi jize ngoloyiso,

izizwe sazinyathela ngeenyawo;

kungaye sizilawula nje izizwe.

₄Yena wasikhethela ilifa,

iqhayiya lakwaYakobi amthandayo.

₅UThixo unyuke ephelekwa yimikhwazo yovuyo;

uNdikhoyo ukhawulelwe ngexilongo elihlokomayo.

₆Khanimemelele niculele uThixo;

ntyilozani nibong' ukumkani wethu.

₇Kaloku uThixo ngukumkani;

ewe, ngowehlabathi jikelele.

Ngoko ke memelelani nibongisele.

₈UThixo ungqendeve kwibhotwe lakhe elingcwele;

uThixo ngumakhonya phezu kwezizwe.

₉Amatshawe ezizwe aqukene ngeentloko;

nawo amatwa nabendlu yoThixo ka-Abraham.

Amagorha ehlabathi ngakaThixo;

yena nguMongameli ovelele bonke.

₁*UNdikhoyo mkhulu kakhulu;

masimbonge simdumise,

esixekweni sikaThixo wethu, entabeni yakhe engcwele.

₂Ngamalengalenga, ikwayinzwakazi,

izisa imihlali kwihlabathi jikelele.

Ewe, leyo yiNtaba iZiyon.

Emantla emalandalahla

silaph' isixeko sengangalala yokumkani.

₃Kanye kwezo zakhiwo zinendili uThixo uzibalule,

yena nqaba ingafikelelwayo.

₄Nâzo izikumkani zihlanganisana;

nâzo zidibana zimanyana.

₅Kambe zithe zakuyalama, zasuka zamangaliswa,

zasuka zankwantya, zasaba zingabhungisanga.

₆Ngoko nangoko zahlaselwa kukungcangcazela,

zatsho zazibhija-bhija njengonenimba.

₇Iinqanawa zaseTashishe

wena wazintlitha ngomoya wasempuma.

₈Sivile, futhi ngoku sizibonele

esixekweni sikaNdikhoyo uSomandla.

Nditsho isixeko sikaThixo wethu,

isixeko asizinzise unaphakade uThixo.

₉Phakathi endlwini yakho, Thixo,

siyakwetyisa ukubalasela kothando lwakho.

₁₀Ukudunyiswa kwakho, Thixo,

kukwanjengegama lakho,

kuthi xhaxhe ngeziphelo zehlabathi.

Ulawulo lwakho lunobulungisa.

₁₁Mabavuye abemi beNtaba iZiyon;

mazidlokove izixeko zelakwaJuda.

Kaloku kulungile ukugweba kwakho.

₁₂Khanihamba-hambe nijikeleze iZiyon;

zibaleni iinqaba zayo eziphakamileyo.

₁₃Ewe, zigqaleni iindonga zayo.

Khanizihlole izakhiwo zayo,

ukuze nibalisele izizukulwana.

₁₄Ewe, yena uThixo nguThixo wethu, ngoku nanini na.

Yena uya kusikhapha kude kuse ephakadeni.

₁Phulaphulani, nonke zizwe!

Yivani, nonke bemi behlabathi!

₂Iindidi zonke maziphulaphule,

izityebi ngokunjalo namahlwempu!

₃Ngoku ndiza kuphokoza ubulumko,

iingcamango zam zizal' ukuqiqa.

₄Ndiza kujongana nentsonkotha;

ndiza kuyichaza ngengoma yehapu.

₅Ndingoyika ntoni ngemihla yobubi,

xa ndingqongwe yinkohlakalo yabakhohlisi,

₆abantu abaqamele ngobutyebi,

abaqhayisa ngentabalala yobutyebi?

₇Umntu akanako ukusindisa umntu;

akanako ukunika uThixo ixabiso lobomi bakhe.

₈Nakanye! Kaloku ixabiso lobomi bomntu likhulu.

Alifikeleleki mpela-mpela

₉elo linokumenza abe sisimakade,

angaze alibone ingcwaba.

₁₀Uyabona, kaloku nezilumko ziyafa,

izidenge kwanezityhakala!

Ubutyebi babushiya kwabakhoyo.

₁₁Amangcwaba likhaya labo naphakade.

Baya kuhlala khona njalo-njalo,

nakuba babefudula benemihlaba ebizwa ngabo.

₁₂Umntu akanako ukukuphepha ukufa ngokuba esisinhanha.

Hayi bo! Uyatshabalala njengezilwanyana.

₁₃Nâso ke isiphelo sabasweli-kuqonda,

abo bakhohliswa ziingcinga zabo.

₁₄Bamiselwe ukufa njengeegusha;

bona baxhatshazwa kukufa.

Bathi ngqo behlele engcwabeni,

onke amathambo abo avuthuluke,

kuba kaloku bona abasekho.

₁₅Ke mna ke, uThixo uya kundikhulula;

uya kundihlangula andithathele kuye.

₁₆Sukuxhala wakubona umntu ehluma,

wakubona ubutyebi bakhe bukhula.

₁₇Akanakuhamba nabo xa afayo;

ubutyebi buya kusala ngasemva.

₁₈Nakuba ebezicingela ukuba wonwabile ngokuya ebesaphila,

nokuba ebenconywa ngempumelelo,

₁₉wohamba aye kuhlala namanyange

angaze abonane nokukhanya.

₂₀Umntu osisinhanha, kodwa engenangqiqo,

uyafana nje nezilwanyana ezi zitshabalalayo.

₁*UNdikhoyo, uThixo uSomandla, uyathetha;

ubhekisa kwihlabathi jikelele,

ukususela empumalanga kuye entshonalanga.

₂UThixo ubengezela eZiyon,

isixeko esibalaseleyo ngobuhle.

₃Uyeza uThixo wethu;

yena akayi kuthi tu.

Phambi kwakhe kudangazela umlilo;

uphahlwe sisitshu sesivungu-vungu.

₄Umema amazulu kwanehlabathi,

xa aza kugweba abantu bakhe.

₅Uthi: “Bahlanganiseleni kum abam abathembekileyo,

abanqophisene nam ngombingelelo.”

₆Amazulu ngokwawo abalisa ngobulungisa bukaThixo;

kaloku umgwebi ikwanguye ngokwakhe.

₇“Khaniphulaphule, bantu bam, ndithethe;

ndiyakumangalela, Sirayeli.

Mna Thixo ndinguThixo wakho.

₈Andiyigxeki imibingelelo yakho;

amadini akho atshiswayo asoloko ephambi kwam.

₉Kambe azisamkeleki iinkunzi zakho zeenkomo;

ngokunjalo neebhokhwe zemihlambi yakho.

₁₀Kaloku zezam zonke izilwanyana

neenyamakazi ezikumawaka-waka eenduli.

₁₁Xa zizonke iintaka ndiyazazi;

nezinambuzane zamathafa zezam.

₁₂“Xa bendingalambayo, bendingayi kukubikela.

Kaloku lelam ihlabathi nezinto zalo.

₁₃Ngaba ndiyayitya inyama yeenkunzi?

Khona, ndiyalisela igazi leebhokhwe?

₁₄Umbingelelo wakho kuThixo mayibe kukubulela,

uzifezekise izithembise zakho kuPhezukonke.

₁₅Zibike kum xa usengxakini;

mna ndiya kukuhlangula, ke wena undidumise.”

₁₆Kambe ke kwabo bakhohlakeleyo uThixo uthi:

“Ngani ukuba niyicengceleze imithetho yam,

nincokole ngomnqophiso wam?

₁₇Kaloku niyayenyanya ingqeqesho;

aniyithobeli nemiyalelo yam.

₁₈Nakudibana nesela, nihlobana nalo;

abakrexezi niyevana nabo.

₁₉“Usoloko uthetha kakubi;

uqhelene nentlebendwane.

₂₀Uncokola kakubi ngamawethu;

uhleba nomntakanyoko lo.

₂₁Ndinibukele nizenza ezi zinto,

andathetha nada nacinga ukuba nam ndifana nani.

Kodwa ke ngoku ndiyakhalima;

ndilaneka phambi kwenu ityala.

₂₂“Phulaphulani, nina bangandikhathalelanga,

hleze ndiniqwenge, angabikho nonqandayo.

₂₃Obingelela ngokubulela uyandidumisa;

uzilungiselela ukusindiswa nguThixo.”