Bible Reading Plan – Day 111

₁Khanitsho ngentsholo nidumisa,

nibong' uThixo, nonke bemi behlabathi!

₂Culani nidumise isidima sakhe;

khanimtyibele nimemelele!

₃Dandulukani, nithi kuThixo:

“Iyamangalisa imisebenzi yakho;

ubungangamsha bakho bunabile;

buzitsho neentshaba zakho zinkwantye.

₄Ihlabathi liphela likhahlela kuwe,

livum' amaculo, lidumisa wena;

liyamemelela, libong' igama lakho.”

₅Yizani niyibone imisebenzi kaThixo;

izenzo zakhe ziyalumangalisa uluntu.

₆Ulwandle walujika lwayinkangala.

Umlambokazi bawuwela betabhata.

Ngenene sachulumacha ngenxa yakhe.

₇Igunya lamandla akhe alinamida.

Iliso lakhe lizalusile izizwe;

nezibhoja mazingajambalazi.

₈Mncomeni uThixo wethu, nonke zizwe!

Izibongo zenu maziviwe nangabakude.

₉Yena wasithundeza wasixhasa;

akasiyekelanga ekutyibilikeni.

₁₀Kaloku, wena Thixo, usivavanyile;

usicikide njengesiliva.

₁₁Wasiyeka sagaxeleka elubobeni;

wasiyekela sathandelwa ziinkxwaleko.

₁₂Wasivula, iintshaba zasityakatya,

sadada emililweni nasemanzini;

wabuya wasithi jize ngendyebo.

₁₃Ndoya endlwini yakho,

ndikuphathele amadini atshiswayo;

ndiza kuzifezekisa izithembiso zam,

₁₄ndizenze izinto endazithethayo

mhla kwakugos' okwaphukayo.

₁₅Ndiza kukwenzela amadini ngezityebileyo,

ndiqhumise ngombingelelo weenkunzi zeegusha,

ndibingelele ngeenkunzi zeenkomo nezeebhokhwe.

₁₆Nonke nina nimhlonelayo uThixo,

yizani ndinibonise izinto andenzele zona.

₁₇Ndadanduluka kuye ndizibika;

ndandipheth' iindumiso nemibongo.

₁₈Ukuba ndandizigushile izono zam

uMhlekazi ebengayi kundiphulaphula.

₁₉Kambe ke uThixo undivile;

uwuphendule umthandazo wam.

₂₀Ngenene ngowokubongwa uThixo.

Yena akakhalalanga ndakuzibika kuye;

akazibandezanga izibele zothando lwakhe.

₁Ngamana wanesisa wasithamsanqelisa, Thixo!

Ewe, ngamana ungenza kube hele kube chosi kuthi,

₂ukuze yaziwe intando yakho emhlabeni,

izizwe ziluxhamle usindiso lwakho.

₃Zonk' iintlanga mazikubonge, Thixo;

bonk' abantu mabakudumise.

₄Mazidanduluk' izizwe zicule ngemincili,

kuba wena ulawula ngobulungisa,

zaluswa nguwe zonk' izizwe.

₅Zonk' iintlanga mazikubonge, Thixo;

bonk' abantu mabakudumise.

₆Ilizwe liphuphum' indyebo.

UThixo usithamsanqele; nditsho uThixo wethu.

₇Ngenene uThixo uyasithamsanqela;

ngamana lamthobela ihlabathi jikelele.

₁Ngamana waphakam' uThixo,

waziswantsulis' iintshaba zakhe.

Banga bangaba ziintsali abamthiyileyo.

₂Mabaphaphatheke; bavuthele, bathi shwaka, baxel' umsi.

Mabanyibilike, baxel' umthwebeba emlilweni.

Mababhubhe phantsi koThixo abakhohlakeleyo.

₃Ke wona amalungisa makonwabe.

Wona makavuye phambi koThixo.

Ewe, makabe nemihlali nemincili.

₄Culelani uThixo, nibong' igama lakhe.

Ewe, mbongeni lowo ucand' emafini.

Igama lakhe *nguNdikhoyo, vuyani ngenxa yakhe.

₅UThixo usendlwini yakhe engcwele.

Nguyise weenkedama, umthetheleli wabahlolokazi.

₆Abangenabani ubenzela izihlobo.

Amabanjwa uwakhokelela enyhwebeni;

ke bona abavukeli bohlala kwelingumqwebedu.

₇Ke wena, Thixo, wabakhokela abantu bakho;

wanyantsula, wacanda entlango.

₈Umhlaba watsho wanyikima, yagalelek' imvula,

ngokufika kukaThixo waseSinayi;

ewe, nditsho uThixo wamaSirayeli.

₉Wena, Thixo, wathulula izandyondyo zemvula,

walinyanga ilizwe lakho elibharhileyo.

₁₀Abantu bakho watsho bazuza umhlaba wokuma;

ngenceba yakho wabazelelela abahlelelekileyo.

₁₁INkosi inika umyalelo,

batsho babe baninzi abavakalisa iindaba.

₁₂Iinjengele zomkhosi nâzo zibaleka;

ke bona abafazi basala besab' amaxhoba.

₁₃Sebengathi ngamahobe ahonjiswe ngesiliva;

amaphiko ehonjiswe ngegolide.

₁₄Wathi uSomandla ukubasarhaza ookumkani,

kwatsho kwalal' ikhephu eZalmon.

₁₅Iphakamile ke kambe intaba iBhashan;

yintaba encopho zininzi.

₁₆Zintabandini, ngani ukuba niyigxeleshe intaba,

nditsho intaba enqwenelekayo kuThixo,

apho wohlala khona ngonaphakade uNdikhoyo!

₁₇UNdikhoyo weza ngeenqwelo ezimawaka-waka,

ephuma eSinayi, esiza ebhotwe.

₁₈Wantinga, wanyukela phezulu,

erhuqa umngcelele wabathinjwa,

wamkela izipho ebantwini,

ewe, nditsho nakwabamvukelayo,

ukuze uNdikhoyo uThixo ahlale khona.

₁₉Yibongeni iNkosi!

Mihla le iyasazelelela, uThixo ngumsindisi wethu.

₂₀UThixo wethu ungosindisayo;

uMhlekazi uNdikhoyo uyasihlangula ekufeni.

₂₁Kodwa ke uThixo uya kuzintlekeza iintshaba zakhe,

abo bathene nca nenkohlakalo.

₂₂INkosi yathi: “Ndiya kuzibuyisa eBhashan;

ndiya kuzirhola enzonzobileni yolwandle;

₂₃ukuze nina nigxampuze egazini lazo,

zona izinja zihluthe kukuxhaph' igazi.”

₂₄Umngcelele wakho, Thixo, uyabonakala,

umngcelele oya esibingelelweni,

nditsho okaThixo, ukumkani wam.

₂₅Phambili ngabantyilozayo, belandelwa ngabangqungqayo;

phakathi kwabo iintombi zibeth' iingqongqo.

₂₆Mbongeni uThixo embizweni yakhe;

mbongeni, nina bandla likaSirayeli!

₂₇Zikhokelwa nguBhenjamin inci.

Nâlo neqela lamatshawe akwaJuda.

Ayalandela awakwaZebhulon nawakwaNafetali.

₂₈Bonakalìsa ubungangamsha bakho, Thixo;

loo mandla wasinceda ngawo, Thixo.

₂₉Ngenxa yesidima sendlu yakho eJerusalem

izikumkani ziza zipheth' imirhumo.

₃₀Bakhalimele abo bahlala eJiputa,

isizwe esiziphetheleyo izizwe,

esicinezela ezinye ngenxa yomrhumo.

Isizwe esingumnqay' ulambile

sizichitha-chithile ezinye izizwe.

₃₁Imirhumo mayize iphuma eJiputa;

amaKushe makaphakamele kuThixo azibike.

₃₂Culelan' uThixo, zizwe zehlabathi;

memelelani nimbonge uMhlekazi;

₃₃kulowo ucanda amazulu,

nditsho amazulu amandulo,

otsho ngelizwi ngathi liyazongoma.

₃₄Wancomeni amandla kaThixo

obungangamsha buphezu koSirayeli,

omagunya akhe asesibhakabhakeni.

₃₅Uyamangalisa uThixo kwikomkhulu lakhe;

ewe, nditsho uThixo kaSirayeli.

Abantu bakhe ubabela amandla nokomelela.

Huntshu-u-u, mbongeni uThixo!

₁Awu, khawundihlangule, Thixo!

Ndithe gabhu ngentamo emanzini.

₂Ndiyazika eludakeni olubizelayo,

apho kungekho nokuxhathisa.

Ndithe dyumpu esizibeni;

umsinga uyandintywilisela.

₃Sendikhale zada zoma,

kungokunje ndom' umqala;

amehlo afiphele kukujong' enkalweni,

ndilangazelela wena, Thixo wam.

₄Abo bandithiyileyo ngaphandle kwesizathu

bagqitha inani leenwele zentloko yam.

Zizigantsontso ezifuna ukunditshabalalisa,

ezindihlasela ngokundityhola.

Ndingathini ukuhlawula ndingebanga nje?

₅Ke wena, Thixo wam, uyasazi isono sam;

amatyala am' aselubala kuwe.

₆Awu, *Ndikhoyo, Thixo onamandla onke,

mandingabahlazisi abo bakholosa ngawe;

abakulangazelelayo mabangangcikivwa

ngenxa yam, Thixo kaSirayeli.

₇Kaloku kungenxa yakho ndinyeliswa nje;

ngoku sendintywil' ehlazweni.

₈Sendaba yintlanga kumawethu;

ndingumhambi kwiinto zikabawo.

₉Ke kona ukuzondelela indlu yakho kundongamele;

izithuko zabakunyelisayo ziphezu kwam.

₁₀Ndalila ezimathontsi, ndizila ukutya,

kodwa naleyo yaba sisingcikivo.

₁₁Ndithi ndakunxiba ezirhwexayo zokuzila

ndisuke ndibe ngundaba-mlonyeni.

₁₂Bancokola ngam ezimbuthweni;

sendide ndayingoma yamanxila.

₁₃Kambe ke, Ndikhoyo, mna ndiyakuthandaza.

Ngeli xesha lifanelekileyo, Thixo,

nangenxa yendyebo yezibele zothando lwakho,

khawuncede undiphendule.

Ngenxa yokuthembeka kwakho ndihlangule;

naku sendizika eludakeni.

₁₄Ndisindise ezintshabeni zam;

ndikhuphe emanzini anzongonzongo.

₁₅Ewe, mandingantywiliselwa ngumsinga;

mandingarhaxwa kwisiziba esimnyama;

mandingaginywa yinzonzobila.

₁₆Hayi ubuhle bezibele zakho!

Ndikhoyo, ndivelele undiphendule;

ewe, ngokobuninzi beenceba zakho ndive!

₁₇Musa ukusifulathela isicaka sakho.

Ndibandezelekile; nceda undiphendule.

₁₈Sondela undisindise;

ndikhulule ezintshabeni zam.

₁₉Uyayazi indlela endingcikivwa ngayo;

uyazi ukuba andinto yanto, ndihlazekile;

uyazazi zonke iintshaba zam.

₂₀Izinyeliso ziwaphule umoya wam;

kungokunje ndivikivekile.

Ndathemba ukukhuzwa, kodwa nya!

Nokuthuthuzelwa andakufumana.

₂₁Ndaweni yokutya ndanikwa ityhefu;

endaweni yamanzi yaba yiviniga.

₂₂Mabenzakaliswe kwakukutya kwabo,

amatheko abo abe ngumgibe kubo.

₂₃Mabamfanyekiswe bangaboni;

umzimba wabo mawutyhutyhwe lidumbe.

₂₄Mabagutyungelwe yingqumbo yakho;

mabatshiswe ngumsindo wakho.

₂₅Mawube linxuwa umzi wabo,

makungahlali nabani kuwo,

₂₆kuba bayamtshutshisa ombethileyo,

baphoxise ngaye omenzakalisileyo.

₂₇Bancine ngesona sohlwayo;

mabaphoswe yinceba yakho.

₂₈Mabacinywe kwincwadi yoludwe lwabaphilayo,

mabangadweliswa namalungisa.

₂₉Kambe ke ndiyajwaqeka yintlungu;

ndonyule undisindise, Thixo.

₃₀Ndiya kumemelela ndibonge uThixo;

ndiya kumncoma ndidomboze.

₃₁Lo ke wona umbulelo ubalasele;

ungaphezulu kokubulela ngethole kuNdikhoyo,

uyidlula lee inkunzi yenkomo.

₃₂Ke bona abahlelelekileyo baya kuvuya;

abamlangazelelayo uThixo bokhuthazeka.

₃₃Kaloku uNdikhoyo uyabeva abahlelelekileyo;

akabacekisi abakhe ababanjiweyo.

₃₄Dandulukani, mazulu nani hlabathi, nimbonge,

nani zilwandle nako konke okushukumayo kuni!

₃₅Kuba uThixo uya kuyisindisa iZiyon,

aphinde azakhe izixeko zakwaJuda.

Izicaka zakhe ziya kuba ngabemi bakhona,

₃₆izizukulwana zona zidle ilifa,

bathi nabamthandayo bahlale khona.