Bible Reading Plan – Day 116

₁Usoloko ulikhaya lethu, wena Nkosi,

izizukulwana ngezizukulwana.

₂Zingekadalwa iintaba, ungekalenzi ilizwe nehlabathi,

ubusel' ukade unguThixo wena kwanini-nini.

₃Umbuyisela kwaseluthulini umntu, usithi:

“Buyela apho ubuvela khona, mntundini!”

₄Linjengemini enye iwaka leminyaka kuwe,

lona liyafana nemini yezolo,

lifutshane okwexesha labalindi ebusuku.

₅Uphephetheka njengephepha umntu;

uphela okobuthongo, abune njengengca,

₆yona iba luhlaza kusasa,

ithi kwakuhlwa ibe selintshwenyile.

₇Siyaphela kaloku yingqumbo yakho,

uyasigqiba umsindo wakho.

₈Izono zethu zaziwa nguwe,

nezifihliweyo zisekuhleni kuwe.

₉Uyinqumle imihla yethu ngenxa yomsindo,

yadlula ngathi kukuqhwanyaza.

₁₀Iminyaka yomntu iba ngamashum' asixhenxe,

xa ngaba womelele ibe ngamashum' asibhozo;

kodwa iza neenkxwaleko neentsizi,

imihla yethu ithi tshe iphele.

₁₁Ngubani owaziyo umsindo wakho;

ingubani oluqondayo unkwantyo oluza nengqumbo yakho?

₁₂Sifundise ukuyiqingqa imihla yethu,

ukuze sizuze ubulumko.

₁₃Yiba nebuyambo, *Ndikhoyo;

koda kube nini usifulathele?

Yiba nenceba kuthi zicaka zakho.

₁₄Sithululele izibele zakho kwangentseni,

size sonwabe, simemelele yonke imihla yobomi bethu.

₁₅Sithuthuzele kaloku wakuba usohlwayile;

sonwabe kangangoko ubusibandezele.

₁₆Bubonakalise ububele bakho kuthi zicaka zakho,

ukuze nesizukulwana sethu sisazi isihomo sakho.

₁₇Nkosi, Thixo, sithamsanqelise!

Siphumelelise kuyo yonke imizamo yethu;

ewe, yiphumelelise yonke imizamo yethu.

₁Lowo uhleli ekhuselwe nguPhezukonke,

uhlala esemthunzini kaSomandla.

₂Yena uya kuthi: “*Ndikhoyo, ungumkhuseli wam;

uyinqaba yam, wena Thixo, ndiya kuthembela kuwe.”

₃Kuba nguye okuhlangula emgibeni wabakugcayiseleyo

nakubhubhani wesifo,

₄akwambathise ngamaphiko akhe, akufihle ekhusini lakhe,

kube likhaka nekhuselo lakho ukuthembeka kwakhe.

₅Akuyi koyika zingozi zasebusuku,

nakuhlaselwa ngequbuliso emini,

₆nabhubhani wangobusuku,

nasifo sigqugqisayo emini emaqanda.

₇Nokuba kungawa iwaka ecaleni kwakho,

neshumi lamawaka liwe likungqonge,

akusayi kuchukunyiswa nto wena.

₈Uya kuqwalasela ukubone ngamehlo akho

ukohlwaywa kwawo amatshijolo.

₉Ngenxa yokuba uthembele ngoNdikhoyo,

wamenza umkhuseli wakho uPhezukonke,

₁₀akuyi kuhlelwa bubi;

akuyi kusondela nasibetho emzini wakho.

₁₁Kaloku woziwisela umthetho ngawe izithunywa zakhe

wokuba zikugcine endleleni yakho,

₁₂zikufunqule hleze ukhubeke elityeni.

₁₃Wonyathela phezu kweengonyama neenyoka,

unyhashe amathol' eengonyama noogqoloma.

₁₄Ngenxa yokuba endithanda, ndomhlangula;

ndimphakamise, kuba elazi igama lam.

₁₅Akuzibika kum, ndiya kumva;

ndiya kuba naye ezimbandezelweni,

ndimhlangule, ndimbek' ezimbekweni,

₁₆ndimvuze ngobomi obude,

ndimbonise ukuba ndiyasindisa.

₁Yinto entle ukumbulela *uNdikhoyo;

yinto entle ukubonga igama loPhezukonke.

₂Kulungil' ukubalisa ngezibele zakhe kusasa,

nangokunyaniseka kwakhe ngokuhlwa,

₃kuvakala uncuthu lwengoma yeentambula,

nehapu itsho ngesongo sengom' emyoli.

₄Kub' undivuyisile, Ndikhoyo, ngezinto ondenzele zona;

ndokubonga ndinemincili ngenxa yemisebenzi yakho.

₅Hay' ukubaluleka kwemisebenzi yakho, Ndikhoyo!

Hay' ukuba nzulu kweengcamango zakho!

₆Isidenge asinakuyazi loo nto,

nesiyatha asinako ukukuqiqa:

₇le yokuba amatshijolo aya kubhangiswa,

nokuba selede amila njengokhula,

nokuba selede aphumelela.

₈Kaloku wena, Ndikhoyo, unguPhezukonke;

wena unguye nanini-nanini.

₉Iintshaba zakho, Ndikhoyo, zotshabalala kuphele,

kananjalo abhangiswe onke amatshijolo.

₁₀Undomeleze ndanga ndiyinyathi;

undithe jize ngombhiyozo nolonwabo.

₁₁Ndikubone ngala wam amehlo ukuwa kweentshaba zam;

ndiyive ngezi zam iindlebe intshabalalo yâbo bandizungulayo.

₁₂Amalungisa achuma njengesundu,

akhula njengemisedare yaseLibhanon.

₁₃Amilile emzini kaNdikhoyo;

ayakhula endlwini kaThixo.

₁₄Avelisa iziqhamo naxa selaluphele,

aqhelezele omelele.

₁₅Kutheth' ukuthi ke uNdikhoyo ulilungisa,

yena ngumkhuseli wam, akukho khwiniba kuye.

₁*UNdikhoyo ungukumkani;

uthe wambu isihomo nesithozela namandla.

Ewe, ulimise zinzi ihlabathi, aligungqi.

₂Isihlalo sakho, Ndikhoyo,

sasekwa kwantlandlolo;

wena wawukho kwanini-nini.

₃Iyagquma imilambo, Ndikhoyo,

ivakalisa isandi sayo;

iyavakala imigqumo yayo.

₄UNdikhoyo yingangalala yaphezulu;

unamandla kunamaza alephuzayo,

nangaphezu kwamaza agqumayo.

₅Imiqondiso yakho ayiguquki, Ndikhoyo;

iyingcwele ngenene indlu yakho, Ndikhoyo,

kuya kuda kube nini-nini.

₁*Ndikhoyo, Thixo ongumgwebi,

wena Thixo ophindezelayo, zibonakalise.

₂Lamla, wena mgwebi woluntu;

babuyekeze kwangezitya zabo abantw' abazingcayo!

₃Koda kube nini na, Ndikhoyo,

koda kube nini kakade esivuyelela amatshijolo?

₄Koda kube nini eqhayisa;

koda kube nini ezidla ngokungcola kwawo?

₅Ayababulala abantu bakho, Ndikhoyo;

ayawucinezela umzi wakho amatshijolo.

₆abandezele abahlolokazi neenkedama,

abulale nabantu basemzini.

₇Ade athi: “Akaboni nto uNdikhoyo;

akaqondi konke uThixo kaYakobi.”

₈Lumkani, bantundini bazizidenge!

Noda niqiqe nini, zityhifilindini?

₉Nithini? Nithi uThixo owadala iindlebe akeva?

Nithi lo wenza amehlo enu akaboni?

₁₀Lo ulawula zonk' iintlanga nithi akanakuzohlwaya?

Lo ufundise abantu nithi akazi nto?

₁₁Ulogocagoca iingcinga zabantu,

uyazi ukuba zibubuvuvu nje bodwa.

₁₂Unoyolo lowo uyalwa nguwe, Ndikhoyo;

nditsho ofundiswa nguwe umyalelo wakho.

₁₃Umnika inzolo ngemihla yobubi,

lo gama amatshijolo ombelwa umhadi.

₁₄Kaloku akayi kubafulathela abantu bakhe uNdikhoyo;

akasoze ayilahle indlu yakhe.

₁₅Kobakho ubulungisa ezinkundleni,

abulandele onke amalungisa.

₁₆Azi, ngubani owondilwela kumatshijolo?

Yoba ngubani na ongakum?

₁₇Ukuba bendingancedwanga nguNdikhoyo,

ngesele ndikwantsonga-nyawana.

₁₈Xa ndandisendisithi ndiyoyisakala,

wandixhasa ngezibele zakho wena, Ndikhoyo.

₁₉Xa ndandinxubile, ndixhalabile,

wandithuthuzela, wandonwabisa wena.

₂₀Akunabudlelana nabalawuli abakhohlakeleyo,

bona bayenza umthetho intswela-bulungisa.

₂₁Bayalihlanganyela ilungisa bona,

bamgwebele ukufa umnt' engenatyala.

₂₂Kodwa ngumkhuseli wam yena uThixo;

yinqaba endizimela ngayo.

₂₃UNdikhoyo wobohlwaya ngenxa yenkohlakalo yabo,

batshabalalele kobo bugwenxa babo;

wobabhangisa kuphele tu uThixo.

₁Yizani sombelele *uNdikhoyo,

simculele sigcobile umkhuseli nomsindisi wethu!

₂Masiye kuye sinombulelo,

simombelele iingoma zokubonga.

₃Kaloku uNdikhoyo nguThixo onamandla,

ngukumkani omkhulu *kwizithixo zonke.

₄Lisesandleni sakhe ihlabathi liphela;

iinzulu neencopho zilawulwa nguye.

₅Ulawula ulwandle kuba walwenza;

nomhlaba wawudala ngezandla zakhe.

₆Yizani siqubude simnqule,

siguqe phambi koNdikhoyo umdali wethu,

₇kuba yena nguThixo wethu.

Thina singumhlambi awalusayo,

iigusha ezondliwa nguye.

Namhla liveni ilizwi lakhe elithi:

₈“Musan' ukuba neenkani, njengookhokho benu eMeribha,

njengemihla yaseMasa entlango,

₉apho bandilingayo,

naxa babezibona izinto endandibenzela zona.

₁₀Iminyaka emashumi mane bandikruqula,

ndada ndathi: ‘Hay' ukungeva kwabo;

abayithobeli imiyalelo yam.’

₁₁Ngoko ke ndafunga ngomsindo, ndathi:

‘Abasoze bangene ekuphumleni kwam.’ ”

₁Mombeleleni ingoma entsha *uNdikhoyo!

Mombelel' uNdikhoyo, hlabathi lonke!

₂Mombelelen' uNdikhoyo, nibonge igama lakhe;

zivakaliseni mihla le iindaba zakhe zosindiso.

₃Zibaliseleni ngesihomo nesithozela sakhe iintlanga;

zixeleleni ngemimangaliso ayenzileyo zonke izizwe.

₄Kaloku yingangalala uNdikhoyo, ufanelwe yimbeko enkulu;

ufanelwe kukoyikwa ngaphezu *kwezithixo zonke,

₅kuba yimifanekiso nje izithixo zeentlanga,

kodwa yena uNdikhoyo wadal' oomazulu.

₆Yena unobungangamsha nesithozela;

kukho isihomo nendili apho akhoyo.

₇Mbongeni uNdikhoyo, nina bemi bomhlaba;

mbongeni kuba unewonga namagunya.

₈Mnikeni imbeko efanele igama lakhe;

sondezani amadini, ningene endlwini yakhe.

₉Mnquleni uNdikhoyo, yena unesihomo nesithozela;

malingcangcazele lonk' ihlabathi phambi kwakhe.

₁₀Zixeleleni iintlanga ukuba uNdikhoyo nguKumkani;

nguye olizinzisayo ihlabathi, aliyi kugungqa;

nguye oya kubagweba ngobulungisa bonke abantu.

₁₁Gcobani, mazulu, lichwayite ihlabathi;

gquma, wena lwandle, nako konke okwakho;

₁₂makayeyezele amadlelo nezinto ezikuwo;

mayombele imithi emahlathini;

₁₃kuba uyeza uNdikhoyo;

uza kuligweba ihlabathi,

alilawule ngobulungisa,

azigwebe ngokomthetho izizwe.