Bible Reading Plan – Day 120

₁Aa! Bayethe, Mhlekazi!

Hayi uyolo lomntu omthobelayo *uNdikhoyo,

oyilangazelelayo imiyalelo yakhe.

₂Inzala yakhe iya kuba nobungangamsha elizweni;

isizukulwana samalungisa sothamsanqeleka.

₃Kweyakhe indlu yindyebo nobutyebi;

uya kuhlala esenza ubulungisa.

₄Yena uyawakhanyisela amalungisa;

unjengesibane ebumnyameni,

kuba unobubele, inceba, nokulunga.

₅Unethamsanqa umntu onika ngesisa,

lowo ungayiqhubi ngobuqhetseba imicimbi yakhe.

₆Ilungisa alisoze ligungqe,

laye lingasoze lilibaleke.

₇Iindaba ezimbi azilirhwaqelisi;

kaloku lomelele, kuba liqamele ngoNdikhoyo.

₈Alitatazeli, laye lingenadyudyu,

zide zoyisakale iintshaba zalo.

₉Lona linezinwe kumahlwempu;

liya kuhlala lisenza ubulungisa.

Ewe, liyahlonitshwa, futhi linesidima.

₁₀Abangendawo bathi bakuyibona le nto bakhathazeke;

bathwal' umlomo bajijitheke bancame.

Ewe, iminqweno yabo ayizi nanto.

₁Aa! Bayethe, Mhlekazi!

Ewe, mbongen' *uNdikhoyo, zicaka zakhe;

khanityibele nibong' igama likaNdikhoyo.

₂Ewe, lelokubongwa lidunyiswe igama likaNdikhoyo,

kusukela kalokunje kude kube nini-nini.

₃Kusukela empuma kude kuye entshonalanga

uNdikhoyo makabe ngokhahlelwayo.

₄UNdikhoyo ungaphaya, uzivelele zonk' izizwe;

isihomo sakhe siwakrobel' amazulu.

₅Yaz'ba singamfanisa nabani n' uNdikhoyo uThixo wethu,

umahlal' emalandalahla kweliphezulu?

₆Ngumagob' umnqonqo alengetyeke,

eqwalasel' amazulu nehlabathi.

₇Amahlwempu uyawaphakamisa, awavuthulul' uthuli;

ewe, nabagqub' eluthuthwini uyabaphakamisa.

₈Batsho bangqendeve ndawonye namatshawe;

ewe, babe matwa namatshawe abantu bakhe.

₉Nomfazi ongaphathiyo umzimasa ngomzi,

atsho abe ngunobantwana onemincili.

Huntshu-u-u!

Bayethe, Mhlekazi!

₁Ke kaloku ekuphumeni kwamaSirayeli eJiputa,

ewe, ekundulukeni kwendlu kaYakobi kwelasemzini,

₂uJuda waba libango *likaNdikhoyo,

ke yena uSirayeli waba luhlanga lwakhe.

₃Luthe lungabona lwaswantsula ulwandle;

kanti ke yona iJordan suka yahlehla.

₄Iintaba zadloba, zaxel' amankonyana;

ke zona iinduli zataka-taka, zaxel' amatakane.

₅Lwandle, ngani ukuba ubaleke?

Jordan, ngani uhlehl' umva nje?

₆Ngani ukuba zidlob' okwamankonyana iintaba?

Kungan' ukub' iinduli zitaka-take okwamatakane?

₇Ewe, hlabathi, khawurhwaqele, uyeza uNdikhoyo;

rhwaqela phambi koThixo kaYakobi,

₈umajik' ulwalwa luntywil' emanzini,

inyengan' impompoz' umthombo.

₁Hayi bo! Mayingabi sithi, *Ndikhoyo;

ewe, makudunyiswe igama lakho,

ngenxa yezibele nokunyaniseka kwakho!

₂Ngani ukuba iintlanga zide zithi:

“Uphi na lo Thixo wabo kakade?”

₃UThixo wethu usemazulwini;

yena wenza loo nto ayithandayo.

₄Kanti ke *izithixo zabo ziyisiliva negolide;

bazenza ngezandla ngokwabo.

₅Ewe, zinemilomo nje, azithethi;

zinawo amehlo, kodwa ziimfama.

₆Nakuba zineendlebe, aziva kodwa;

zineempumlo, kodwa azikwazi ukusezela.

₇Ewe, zinezandla ezifileyo;

zineenyawo, kodwa azikwazi ukuhamba;

imiqala yazo ayikwazi kwenza sandi.

₈Ew', abenzi bazo bofana nazo,

bekwanjalo nabo bonke abaqamela ngazo.

₉Ke wena, Sirayeli, kholosa ngoNdikhoyo!

Uluncedo nomkhuseli wakho.

₁₀Nani, ndlu ka-Aron,

kholosani ngoNdikhoyo!

Uluncedo nomkhuseli wenu.

₁₁Nabo bonke abamthobelayo uNdikhoyo mabakholose ngaye!

Uluncedo nomkhuseli wabo.

₁₂UNdikhoyo wosithamsanqelisa, kuba uyasazelelela;

uya kuyithamsanqela indlu kaSirayeli,

ayithamsanqele indlu ka-Aron.

₁₃Bothamsanqeleka abamthobelayo uNdikhoyo;

ewe, nditsho abancinci kwanabakhulu.

₁₄Ngamana wanandisa uNdikhoyo,

nina kunye nezizukulwana zenu.

₁₅Ngamana wanithamsanqela uNdikhoyo

ongumenzi wamazulu nehlabathi.

₁₆Kambe ke wona amazulu ngakaNdikhoyo;

ke lona ihlabathi walabela oonyana babantu.

₁₇Abafileyo abamdumisi uNdikhoyo,

bengacingi nâbo behlela kwelabathe cwaka.

₁₈Kambe ke thina somdumisa uNdikhoyo

kusukela ngoku kude kuse ephakadeni.

Huntshu-u-u! Sithi: “Bayethe, Mhlekazi!”

₁*UNdikhoyo ndiyamthanda, kuba uyandiva;

uyasabela ndakuzibika kuye.

₂Njengoko endiphulaphula nje,

ndobhenela kuye xa ndisadl' ubomi.

₃Izabatha zokufa zandibhijela,

izoyikiso zelabafileyo zandikhonkxa;

latsho laxubayela ndangcungcutheka.

₄Ke kaloku ndabhenela kuNdikhoyo, ndathi:

“Awu, Ndikhoyo, ndiyakubongoza, ndisindise!”

₅Unesisa kambe uNdikhoyo, ulungile;

hayi ke bethu, inceba yoThixo wethu!

₆UNdikhoyo uyabakhusela abaxakiweyo;

nam ndandingenamandla wandihlangula.

₇Musa ukuxhalaba, mphefumlo wam,

kuba uNdikhoyo undivelele.

₈UNdikhoyo undihlangule ekufeni;

yena undosule iinyembezi,

wandikhusela andakhubeka.

₉Kungoko ndihamba noNdikhoyo

kweli lizwe labaphilayo.

₁₀Ndancekelela, ndathemba,

nakuba ndandisithi sendivuthulukile.

₁₁Ekuncameni ndakhala ndathi:

“Abathembekanga kambe abantu.”

₁₂Yaz'ba ndingambuyisela ngantoni na uNdikhoyo

ngezibele ezingaka andenzele zona?

₁₃Ndothatha indebe yosindiso,

ndibize igama likaNdikhoyo.

₁₄Izithembiso zam ndozifezekisa kuNdikhoyo;

ewe, nditsho phambi kwabantu bakhe.

₁₅Ayithandeki kambe kuNdikhoyo

into yokufa kwabantu bakhe.

₁₆Awu, Ndikhoyo, ndisisicaka sakho;

ewe, ndingunyana wesicakazana sakho;

ndilapha nje ndakhululwa nguwe.

₁₇Ndiya kukwenzela idini lombulelo;

ewe, ndobiza igama likaNdikhoyo.

₁₈Izithembiso zam ndozifezekisa kuye;

ewe, nditsho phambi kwabantu bakhe,

₁₉enkundleni yendlu kaNdikhoyo,

kanye phakathi eJerusalem.

Huntshu-u-u! Sithi: “Bayethe, Mhlekazi!”

₁Dandulukani nibong' *uNdikhoyo, nonke nina zintlanga!

Mtyibeleni nimncome, nonke nina zizwe!

₂Kaloku izibele zakhe zibalasele ngakuthi;

ibe ke uNdikhoyo wohlala enyanisekile kude kuse ephakadeni.

Kungoko sisithi: “Bayethe, Mhlekazi!”

₁Mdumiseni *uNdikhoyo, kuba elungile;

izibele zakhe zohlala zihleli.

₂Ewe, makatsho uSirayeli athi:

“Izibele zakhe soze zitshitshe.”

₃Ngokunjalo nendlu ka-Aron mayithi:

“Ngenene izibele zakhe soze zithini.”

₄Ewe, abamthobelayo uNdikhoyo mabathi:

“Izibele zakhe zifikelela ephakadeni.”

₅Xa ndandisebunzimeni ndabhenela kuNdikhoyo,

waza yena wasabela wandihlangula.

₆Andinadyudyu, kuba uNdikhoyo ungakum;

okokwakhe yena umntu akanakundenza nto konke.

₇Ngenene uNdikhoyo ungakum, uyandinceda;

ngoko ke ndiya kuboyisa abandithiyileyo.

₈Into ebhetele kukuzimela ngoNdikhoyo,

kunokuba uthembele ngomntu.

₉Kubhetele ukholose ngoNdikhoyo,

ndaweni yokukholosa ngamanene.

₁₀Ndakha ndarhawulwa ziintlanga,

kodwa egameni likaNdikhoyo ndaziqwakanisa.

₁₁Ewe, zazindirhawule mbombo zone,

kodwa ngamandla kaNdikhoyo ndalalisa ugodo.

₁₂Wena wakha wagutyungelwa libubu leenyosi?

Hayi, zazidangazela njengomlilo wameva,

kodwa ngamandla kaNdikhoyo ndaziswantsulisa.

₁₃Zazindityhala ndaphantse ndakhahlelwa phantsi,

kodwa nalapho uNdikhoyo wandinceda.

₁₄Ingoma yam namandla am nguNdikhoyo;

ewe kaloku, ndisindiswa nguye.

₁₅Nantso intsholo yoloyiso ivakala;

kaloku amalungisa ayamemelela,

athi: “Ubungangamsha bukaNdikhoyo bugqwesile;

₁₆amandla kaNdikhoyo abalasele;

ewe, ubungangamsha bukaNdikhoyo bugqwesile!”

₁₇Mna andiyi kufa; ndiya kudla ubomi,

ndibalise ngezenzo zikaNdikhoyo.

₁₈Yena undohlwaye kabukhali;

kambe ke akandiyekelanga ekufeni.

₁₉Khanindivulele amasango endlu kaThixo,

khon' ukuze ndingene ndidumise uNdikhoyo.

₂₀Nali isango lokungena kwaNdikhoyo;

ngamalungisa odwa angenayo ngalo.

₂₁Ndiyabulela kuba undivile;

kaloku wena ungumhlanguli wam.

₂₂Kaloku ilitye abalidelayo abakhi

laba lelona libalulekileyo lesiseko.

₂₃Ewe, lo ngumsebenzi kaNdikhoyo;

kambe ke thina uyasimangalisa.

₂₄Namhla kunamhla, yimini kaNdikhoyo;

masizonwabise sibe nemihlali ngayo.

₂₅Sisindise, siyakubongoza, Ndikhoyo!

Awu, siyatarhuzisa, Ndikhoyo; masiphumelele ngawe!

₂₆Banoyolo abangena ngegama likaNdikhoyo;

siyanithamsanqela thina sisendlwini kaNdikhoyo.

₂₇UNdikhoyo nguThixo, usikhanyisele.

Yenzani umngcelele wokubulela, niphethe amahlamvu,

ningqungqe, nilijikeleze iqonga lamadini.

₂₈UnguThixo wam, ndiyakubulela;

ubungangamsha bakho, Thixo, ndiya kububhengeza.

₂₉Mdumiseni uNdikhoyo, kuba elungile;

izibele zakhe zohlala zihleli.

₁Hay' inyhweba yabantu abamsulwa;

nditsho abo baziphatha ngokwemiyalelo *kaNdikhoyo.

₂Banoyolo abo bayithobelayo imfundiso kaNdikhoyo,

abayilulamelayo ngomxhelo wabo wonke,

₃abantu abangabenziyo ububi,

koko abahamba endleleni kaNdikhoyo.

₄Kaloku wena, Ndikhoyo, wasinika imimiselo yakho,

ukuze siyithobele ngenyameko.

₅Akwaba bendingachul' ukunyathela,

ndiyinonophele imithetho yakho.

₆Ukuba ndizibambile iziyalo zakho,

andisoze ndibhaqwe lihlazo.

₇Ndakusazi isigwebo sakho esingenagobe,

ndiya kukuncoma ngenene nangenyaniso.

₈Mna ndiya kuyithobela imithetho yakho;

awu, nceda ungandilahli kuphele.

₉Lungaziphatha kanjani ulutsha ukuze ihambo yalo ibe nyulu?

Ngokuthobela ilizwi lakho.

₁₀Ndizimisele ukukulandela ngokupheleleyo;

ndincede ndingaze ndizidele iziyalo zakho.

₁₁Ndihamba ngokomlomo wakho,

khon' ukuze ndingoni.

₁₂Awu! Bayethe, *Mhlekazi!

Khawundifundise imithetho yakho.

₁₃Mna ndiya kuzibhengeza zonke izigqibo zakho.

₁₄Kum ziluyolo izithethe zakho;

zingaphezu kwabo bonke ubutyebi.

₁₅Ndiya kucamngca ngemimiselo yakho,

ndizinyamekele iindlela zakho.

₁₆Ndiyayithakazelela imithetho yakho;

soze ndilityeshele ilizwi lakho.

₁₇Ndazelele, mna sicaka sakho,

ukuze ndibudle ubomi, ndilithobele ilizwi lakho.

₁₈Nceda undivule amehlo,

ndiziqonde iintsonkotha ezisemyalelweni wakho.

₁₉Ndilundwendwe apha emhlabeni;

ndicacisele imiqathango yakho.

₂₀Umoya wam uhlala wonganyelwe

kukulangazelela isigwebo sakho.

₂₁Wena uyabakhalimela abaziphakamisayo;

baseshweni abanxaxhayo kwiziyalo zakho.

₂₂Ndihlambe kwizinyeliso nezigculelo,

kuba ndiyayithobela imfundiso yakho.

₂₃Nokuba zingade zindibhunge iziphathamandla,

mna sicaka sakho ndiya kucamngca ngemithetho yakho.

₂₄Kambe ke andiziva ngezithethe zakho,

kuba ziyintonga yam yasekhosi.

₂₅Awu, ndiphelelwe, ndiyimvuthuluka;

ndihlaziye ngokwesithembiso sakho.

₂₆Undivile ndakuzandlala;

nceda undifundise imithetho yakho.

₂₇Ndifundise amasolotya emimiselo yakho,

khon' ukuze ndicamngce ngemimangaliso yakho.

₂₈Iinzingo ziwuvikivile umoya wam;

khawundomeleze ngokwelizwi lakho.

₂₉Ndihlangule kuyo inkohliso;

ewe, ndibabale undifundise imiyalelo yakho.

₃₀Ndenze isigqibo sokuba ndinyaniseke;

ndizimisele ukusithobela isigwebo sakho.

₃₁Ndinamathele kwizithethe zakho, *Ndikhoyo,

ngoko ke mandingaphoxeki.

₃₂Ndiya kuhamba ngokwemiqathango yakho,

kuba wena uyivulile ingqiqo yam.