Bible Reading Plan – Day 137

₁Umfazi onobulumko uyawakha umzi wakhe;

kanti ke yena ongenangqondo uyawuchitha ngezakhe izandla.

₂Ohlonela uNdikhoyo uhamba ngokuthe tye;

ke yena omdelayo iindlela zakhe ziphambukile.

₃Umntu onekratshi ukuthetha kwakhe kumhlisela ukohlwaywa;

ke wona amazwi esilumko ayasikhusela.

₄Apho kungekho nkabi zankomo umkhombe wesitali uba zé;

ngamandla enkabi yenkomo kunokuzuzwa ingeniso eninzi.

₅Ingqina elinyanisekileyo alibuthethi ubuxoki,

kodwa ke lona elixokayo liphuphuma lulwimi.

₆Umgxeki ubufuna ancame ubulumko,

kanti ke yena umntu oqiqayo uluzuza lula ulwazi.

₇Musa ukutshomana nomntu osisiyatha,

kuba awuyi kuzuza nto ibhadlileyo emlonyeni wakhe.

₈Ubulumko bomntu onengqondo bumenza ayichane indlela yakhe;

ukumatha komntu osisityhakala kubanga inkohliso.

₉Idini letyala elenziwa zizimathane yintlekisa,

kanti ke abathe ngqo baxhamla imvisiswano.

₁₀Intliziyo nganye iyabazi obayo ubukrakra,

kanti akukho bani wahlulelana nayo ngovuyo lwayo.

₁₁Umzi womntu okhohlakeleyo uya kutshatyalaliswa;

ke wona umzi womntu othe ngqo uyabalasela.

₁₂Kukho indlela ebonakala ngokungathi ilungile emntwini,

kodwa isiphelo sayo sisa ekufeni.

₁₃Nokuba ubani uyahleka usenokuba nomva-ndedwa,

nesiphelo soko kuchwayita sibe sisingqala.

₁₄Umntu onganyanisekanga uvuna loo nto ayilimileyo,

kanti nomntu olungileyo utya isimilo sakhe.

₁₅Umntu ongaqondiyo ukholelwa yinto yonke;

kanti ke yena oqiqayo uhlab' ekhangele.

₁₆Umntu onengqondo uhlala egcisile, ayiphephe inkathazo;

ke sona isityhakala asikhathali, siyatyhuthuza.

₁₇Umntu ocaphuka msinya wenza izinto zobudenge;

umntu onobuqhophololo uyathiywa.

₁₈Umntu ongaqondiyo uvuna ubutyhakala;

ke yena onengqondo uthiwa jize ngolwazi.

₁₉Abantu abagwenxa baya kuqubuda phambi kwabo balungileyo,

bakhahlele emasangweni amalungisa.

₂₀Ihlwempu libukulwa nditsho nangummelwane;

kanti ke yena umntu omi kakuhle unezihlobo ezininzi.

₂₁Umntu omdelelayo ummelwane wakhe uyona,

kambe ke olenzela ububele ihlwempu, hayi inyhweba yakhe!

₂₂Abayi kulahleka na abo bayila ububi?

Inceba nenyaniso ikwabo baceba okulungileyo.

₂₃Ekubulalekeni kukusebenza kukho umvuzo;

ke yena olibala kukuncokola wambathwa bubuhlwempu kuphela.

₂₄Abantu abazizilumko bathiwa jize ngobutyebi;

ke bona ubutyhakala beziyatha buvelisa ubutyhakala.

₂₅Ingqina elinyanisekileyo liyabasindisa abantu;

kodwa ke lona elixokayo liyakhohlisa.

₂₆Umntu omhlonelayo uNdikhoyo unenqaba eluqilima;

nabantwana bakhe bazimela kuyo.

₂₇Isiseko sobomi kukuthobela uNdikhoyo;

umntu kuyamphephisa kwizirhintyelo zokufa.

₂₈Ubuhandiba bokumkani buxhomekeke kubuninzi babantu bakhe;

kambe bengekho abantu bokulawulwa itshawe alinto.

₂₉Umntu onomonde uba nengqiqo;

kambe ke yena ocaphuka msinya usuka enze ubudenge.

₃₀Umntu ozolileyo uba nempilo;

ke lona ikhwele yimpehla emathanjeni.

₃₁Umntu ocinezela ihlwempu ugxeka uMdali walo;

ke yena obalungiselelayo abahlelelekileyo udumisa uMdali.

₃₂Umntu okhohlakeleyo ubhangiswa bububi bakhe;

kanti ke yena olilungisa unenqaba azimela ngayo nasekufeni.

₃₃Ubulumko busekhaya kumntu obhadlileyo;

kanti buyazibika naphakathi kweziyatha.

₃₄Ubulungisa buyasiphakamisa isizwe;

ke sona isono lihlazo nakwesiphi na isizwe.

₃₅Ukumkani uyakholiswa liphakathi elilumkileyo,

kodwa umsindo wakhe uyavutha kowenza okuziintloni.

₁Impendulo ethambileyo iyawuthibaza umsindo,

kanti ke wona amazwi akrwempayo ahlobisa igazi.

₂Izilumko ziphokoza ulwazi xa zithethayo;

kanti ke zona izityhakala zithulula ubudenge.

₃UNdikhoyo uyazibona zonke izinto ezenzekayo;

ubakhangele abenza okubi nokulungileyo.

₄Amazwi axolelanisayo angumthi wobomi;

ke wona awenkohlakalo ayawaphula umoya.

₅Umntu ongaqiqiyo akayikhathalele imfundiso kayise;

kambe ke yena ozamkelayo iziluleko unengqondo.

₆Ubutyebi buyagcinakala emzini womntu olungileyo;

kanti ke yona ingeniso yesikhohlakali isiphathela inkathazo.

₇Umlomo wesilumko usasaza ulwazi;

phofu ke akunjalo kwintliziyo yesityhakala.

₈Amadini omntu okhohlakeleyo alisikizi kuNdikhoyo,

kambe ke uyayamkela imithandazo yabantu abathe ngqo.

₉UNdikhoyo uyazicaphukela iindlela zabantu abakhohlakeleyo,

kodwa uyabathanda abo bathene mbende nezinto ezifanelekileyo.

₁₀Umntu ophambukayo endleleni wohlwaywa qatha;

ke yena okuthiyileyo ukululekwa uya kufa.

₁₁Ingcwaba nelabafileyo azifihlakalanga kuNdikhoyo;

zibeka phi ke ukungafihlakali iingcamango zomntu kuye?

₁₂Abagxeki abafuni kucetyiswa,

bengafuni nokuya nakwizilumko.

₁₃Umntu oxolileyo ukhangeleka enemihlali,

kanti ke yena oneenzingo uyanxuba.

₁₄Umntu onengqondo usoloko elangazelela ukufunda;

kanti ke sona isidovela saneliswa kukumatha.

₁₅Yonke imihla yomntu olusizana ngamabona-ndenzile,

kambe ke kumntu ochwayithileyo ubomi busoloko bufana netheko.

₁₆Kubhetele ukuba lihlwempu elihlonela uNdikhoyo

kunokuba sisinhanha esiphethwe ngamaxhala.

₁₇Xa ukho umoya wobudlelwana akunani nokuba utya imifuno,

ndaweni yokutya inyama yenkomo etyetyisiweyo ikhatshwa yintiyo.

₁₈Umntu onephuku uphembelela uqhushululu;

kanti ke yena onomonde uyayiphelisa ingxabano.

₁₉Indlela yevila soloko ibekelwe ameva;

phofu ke yona eyabathe ngqo iphangalele.

₂₀Unyana olumkileyo uyamvuyisa uyise;

ke yena umntu osisiyatha uyamdela unina.

₂₁Umntu ongabhadlanga engqondweni uvuyiswa bubi,

ke yena onengqondo ihambo yakhe ithe ngqo.

₂₂Apho kungekho kucebisana izicwangciso ziyabhanga,

kanti ke apho kukho abacebisi abaninzi ziyaphumelela.

₂₃Hayi ukuvuya komntu oyaziyo impendulo echanekileyo!

Ewe, ilizwi elithethwe ngexesha elililo lihle kunene.

₂₄Indlela yomntu onengqondo isinga phezulu ebomini;

yena uyayiphepha indlela ehlayo eya kwelabafileyo.

₂₅UNdikhoyo uyayidiliza imizi yabantu abanekratshi;

kanti ke uyawukhusela umhlaba womhlolokazi.

₂₆UNdikhoyo uyazicaphukela iingcinga zabantu abagwenxa;

kanti ezabanyulu zamkelekile kuye.

₂₇Umntu onyolukileyo uyihlisela inkathazo indlu yakhe;

ke yena okuthiyileyo ukunyotywa uya kudla ubomi.

₂₈Umntu olilungisa uyacinga phambi kokuba aphendule;

ke wona umlomo womntu okhohlakeleyo uphuphuma ububi.

₂₉UNdikhoyo ukude kubantu abakhohlakeleyo;

phofu ke uyayiphulaphula imithandazo yamalungisa.

₃₀Imbonakalo echwayitileyo izisa ulonwabo entliziyweni;

ibe ke zona iindaba ezimnandi ziyahlaziya emathanjeni.

₃₁Umntu ophulaphula ukucetyiswa uya kudla ubomi,

azive esekhaya phakathi kwezilumko.

₃₂Umntu ongayifuniyo ingqeqesho uyazilimaza yena ngokwakhe:

kanti ke yena ovayo akululekwa uzuza ukuqonda.

₃₃Ukuhlonela uNdikhoyo kufundisa ubulumko;

indlela eya ewongeni yintobeko.

₁Umntu uyazenza izicwangciso,

kodwa lona ilizwi lokugqibela lelikaNdikhoyo.

₂Zonke iindlela zomntu zilungile kwawakhe amehlo,

kodwa nguNdikhoyo ocikida iinjongo zazo.

₃Kunikele kuNdikhoyo konke okwenzayo,

yaye ke yena uya kuziphumelelisa izicwangciso zakho.

₄UNdikhoyo unenjongo ngayo yonke into;

ewe, kwanomntu lo ukhohlakeleyo umenzele imini yobubi.

₅UNdikhoyo umthiyile umntu ontliziyo inekratshi;

ngokuqinisekileyo ngekhe agwetyelwe.

₆Ngako ukuthembeka nokunyaniseka isono siyacanyagushelwa;

ngokuhlonela uNdikhoyo umntu uyabucezela ububi.

₇Ukuba uNdikhoyo uyakholiswa yihambo yomntu

neentshaba zakhe zitsho zihlalisane naye ngoxolo.

₈Akunani kwaintwana engephi oyizuze ngendlela elungileyo

kunentabalala yengeniso oyifumene ngondlela-mnyama.

₉Umntu uyalucwangcwisa uhambo lwakhe,

kodwa nguNdikhoyo olawula ukunyathela kwakhe.

₁₀Ukuthetha kukakumkani kuba ludaba olundilisekileyo;

umlomo wakhe mawungabi naxanasi xa agwebayo.

₁₁UNdikhoyo ufuna kusetyenziswe isilinganiso nesikali esingenagobe;

ubunzima bamatye okuveyisha mabube ngokwezigqibo zakhe.

₁₂Ookumkani bayabucekisa ubugwenxa;

kaloku uburhulumente buzinziswa bubulungisa.

₁₃Ookumkani bayakholiswa ngumntu onyanisekileyo;

ewe, bayamxabisa umntu othetha inyaniso.

₁₄Umsindo kakumkani sisigidimi sokufa;

ke yena umntu olumkileyo uyamthomalalisa.

₁₅Xa bukhululekile ubuso bukakumkani kudliwa ubomi;

ukwamkeleka kuye nqwa nemvula entlakohlaza.

₁₆Kulungile ukuzuza ubulumko kunokufumana igolide;

kungcono ukukhetha ulwazi kunokwamkela isiliva.

₁₇Umntu othe ngqo uhamba ngendlela ebucezelayo ububi;

ewe, oyalusayo indlela yakhe ulondoloza ubomi bakhe.

₁₈Ikratshi lilandelwa yimbubho;

ke kona ukudelela kutshayelela ukuwa.

₁₉Akunani kwaukugqush' eluthulini nabahlelelekileyo

kunokuxhaphaza amaxhoba nabakhukhumeleyo.

₂₀Umntu oyinonophelayo imfundiso uyaphumelela;

ewe, yimihlali yodwa kokholosa ngoNdikhoyo.

₂₁Isilumko esizinzileyo siduma ngengqondo;

ubuciko baso busenza silandelwe ngabantu.

₂₂Ingqiqo ngumthombo wobomi kwabo banayo;

kambe ke imfundiso yeziyatha bubudenge.

₂₃Isilumko siyawabala amazwi esiwathethayo;

intetho yaso isenza silandelwe ngabantu.

₂₄Amazwi amyoli nqwa nobusi;

ayanandipheka emphefumlweni, ephilisa emathanjeni.

₂₅Kukho indlela ebonakala ngokungathi ilungile emehlweni abantu,

kodwa isiphelo sayo sisa ekufeni.

₂₆Indlala imenza umntu ukuba asebenze;

ewe, iphango limtyhalela ekuxelengeni.

₂₇Itshijolo lihlala liqingqa ububi;

kwa-amazwi nje alo agqatsa njengomlilo.

₂₈Umntu onobugwenxa udala ingxabano;

umntu ohlebayo wahlukanisa izihlobo.

₂₉Indlavini iyamkhukulisa ummelwane,

imkhokelele kwimikhuba ephuthileyo.

₃₀Omana ewancina amehlo uceba ubugwenxa;

ohlala eluma umlomo utyekele ebubini.

₃₁Izimvi sisithsaba sobuhandiba;

zizuzwa ngabaphila ngobulungisa.

₃₂Onomonde ulungile kunegorha;

olawula umsindo wakhe ungcono kunothimba isixeko.

₃₃Abantu basenokulenza *iqashiso,

kanti ke ngumnwe kaNdikhoyo ofezekisayo.