Bible Reading Plan – Day 139

₁Iwayini ngumgxeki; utywala yingxolo;

umntu ohexiswa bubo akanabo ubulumko.

₂Ukumkani xa enomsindo nqwa nengonyama enengcwangu egragramayo;

umntu omcaphukisayo ubeka ubomi bakhe emngciphekweni.

₃Umntu onesidima uyasicezela isiphithi-phithi;

kanti ke sona isiyatha siyathanda ukuphemba uqhushululu.

₄Ivila alilimi ngexesha lokulima;

ngoko ke ngexesha lokuvuna liyafuna lingazuzi nto.

₅Iingcinga zomntu zifana nequla elinzulu;

ke yena umntu oqiqayo ukha ulutho kuzo.

₆Baninzi abantu abazincoma ukunyaniseka;

kodwa ke ungamzuza phi umntu othembekileyo?

₇Umntu olilunga uphila ubomi obungenabala;

bayathamsanqeleka abantwana bakhe abamlandelayo.

₈Ukumkani ohleli kwisihlalo sokugweba

uhluza ububi bonke ngamehlo akhe.

₉Ngubani ongatshoyo athi:

“Intliziyo yam ihlambulukile;

ndinyulu, ndaye ndingenasono”?

₁₀Amatye okuveyisha anobuqhetseba nezilinganiso ezinegobe,

zombini ezo zinto uyazicekisa uNdikhoyo.

₁₁Nditsho kwaumntwana waziwa ngokuziphatha kwakhe –

zizinto azenzayo ezixela ukusulungeka nokuthi ngqo kwesimilo sakhe.

₁₂Indlebe evayo neliso elibonayo,

zombini ezo zinto zenziwe nguNdikhoyo.

₁₃Sukuzinikela ebuthongweni hleze ube lihlwempu!

Umntu ophaphamileyo akasweli kutya.

₁₄“Hayi bo, ayilunganga kwaphela,” utsho othengayo,

kodwa asuke emke alilisele ngesisulu asifumeneyo!

₁₅Ikho igolide, ngokunjalo namatye amaninzi axabisekileyo;

kanti ke eyona nto ixabisekileyo kukuthetha ulwazi.

₁₆Zithathe iimpahla zomntu omele ityala londwendwe;

ewe, bambisa ngazo, kuba umele umntu wasemzini.

₁₇Ukutya okufunyenwe ngobuqhetseba kuhla kamnandi,

kanti ke kamva kusuka kulumeze okomlomo ozele yintlabathi.

₁₈Xa ufuna ukuphumelela qokelela amacebo;

ewe, cwangcisa uqokelele amacebo phambi kokuba uqhwaye imfazwe.

₁₉Umntu onolwimi uyawadiza amahlebo,

ngoko ke sukudlelana nabantu abathetha gqitha.

₂₀Umntu othuka uyise nonina

ubomi bakhe busuka buthi pam njengesibane esicime kwisithoko-thoko sobumnyama.

₂₁Ilifa lisenokuzuzwa buphuthu-phuthu ekuqaleni,

kodwa ekugqibeleni alingekhe likuzisele amathamsanqa.

₂₂Musa ukuthi: “Ndiya kuziphindezela ngenxa yobu bugwenxa.”

Yekela kuNdikhoyo ibe nguye okuhlangulayo.

₂₃UNdikhoyo uyawacekisa amatye okulinganisa abunzima bungafaniyo;

isikali sobuqhetseba asilunganga.

₂₄Umntu akanako ukuyiqonda indlela ayihambayo,

kuba amabakala obomi bakhe axhomekeke kuNdikhoyo.

₂₅Kufana nomgibe emntwini xa enikezele ngento kuNdikhoyo buphuthu-phuthu,

aze kamva acinge ngenye indlela ngezibhambathiso zakhe.

₂₆Ukumkani olumkileyo uyabahluza abantu abakhohlakeleyo,

abanyhashe oku kwevili lokubhula.

₂₇Isazela somntu sisibane sikaNdikhoyo;

ngaso uphicotha konke okufihlakeleyo ngaphakathi emntwini.

₂₈Ukumkani ukhuselwa kukunyaniseka nenceba;

isihlalo sakhe sobukhosi sixhaswa bububele.

₂₉Isihomo samadoda amatsha ngamandla awo;

kanti ke sona isithozela samadod' amakhulu zizimvi.

₃₀Imivumbo neenduma zahlukanisa umntu nobubi;

ukubethwa kuhlambulula ububi obungaphakathi emntwini.

₁Ingqondo kakumkani isesandleni sikaNdikhoyo;

uyilawula ngokuthanda kwakhe, ngathi kukuhamba komlambo.

₂Zonke iindlela zomntu zibonakala zilungile kwawakhe amehlo,

kanti ke nguNdikhoyo oyibeka esikalini intliziyo yomntu.

₃Ukwenza ubulungisa nokuthe ngqo

kwamkelekile kuNdikhoyo kunamadini.

₄Amehlo azigwagwisayo nentliziyo ezidlayo,

nditsho isibane sezikhohlakali, sisono.

₅Amacebo omntu okhutheleyo amnika indyebo,

kodwa ke yena umntu otyhuthuzayo uzibizela ubuhlwempu.

₆Ubutyebi obufumene ngobuqhetseba buphephetheka njengenkungu,

futhi bukubeka emngciphekweni wokufa.

₇Ubundlobongela bezikhohlakali buyaziqweqwedisa,

kuba azivumi ukwenza okufanelekileyo.

₈Iindlela zomntu onetyala zigoso-goso,

kodwa ke yena umntu omsulwa wenza imisebenzi efanelekileyo.

₉Akunani kwaukuhlala wedwa, noba kuphezu kwendlu,

ndaweni yokuhlala ndlwini-nye nomfazi ongunogqwashu.

₁₀Umntu okhohlakeleyo usoloko elambele ukwenza into embi;

ummelwane wakhe akafumani nceba kuye.

₁₁Akohlwaywa umgxeki, nabangaqondiyo batsho bafumane isifundo;

sakufundiswa isilumko, sizuza ukwazi.

₁₂UThixo olilungisa uyazazi izinto ezenzeka kwimizi yabantu abakhohlakeleyo,

yaye ke eya kuzibhangisa izikhohlakali ngenxa yobubi bazo.

₁₃Umntu ongaphulaphuliyo xa amahlwempu ezibika

naye akayi kuhoywa xa esengxakini.

₁₄Isipho umntu asinikwa ngasese sithomalalisa umsindo;

ewe, isicengo esigushiweyo sithothisa ingqumbo.

₁₅Umntu olungileyo uyavuya xa izinto ziqhutywa ngokusemthethweni,

kambe ke abenzi bobubi baya kunkwantya.

₁₆Umntu obhadulayo, emke kwiindlela zengqiqo,

uzifumanisa selekwisikhungu sabafileyo.

₁₇Umntu othanda iziyolo uya kuba lihlwempu;

kanti ke yena umntu othanda iwayini namafutha omnquma soze abe sisityebi.

₁₈Kulula ukuncama umntu okhohlakeleyo ngenxa yolungileyo,

othembekileyo athathe isikhundla songathembekanga.

₁₉Kubhetele ube lilolo entlango,

kunokuhlala nomfazi onochuku okhalazayo.

₂₀Endlwini yesilumko kusoloko kukho ubuncwane namafutha omnquma,

kodwa sona isiyatha sizavaza konke.

₂₁Umntu oxunela ubulungisa nenceba

ufumana ubomi nobulungisa nodumo.

₂₂Isilumko siqabela ngaphaya kweendonga zesixeko samagorha,

siyidilize inqaba athembele kuyo.

₂₃Lowo uwubambayo umlomo wakhe nolwimi lwakhe

ukhusela ubomi bakhe kwiinkxwaleko.

₂₄Umntu ozigwagwisayo enendelelo kuthiwa ngumgxeki –

usisityhuthu-tyhuthu esingakhathalele mntu.

₂₅Ivila elingafuni kusebenza lizibulala ngokwalo;

kaloku izandla zalo ziqhokriwe ekusebenzeni.

₂₆Umntu onjalo ulibala imini yonke kukucinga ngezinto azifunayo;

kanti ke yena umntu olungileyo unezinwe uyapha.

₂₇Idini elenziwa ngumntu okhohlakeleyo liyanyanyeka,

ngakumbi xa elenza eneenjongo ezigwenxa.

₂₈Ingqina elixokayo liyabhanga;

kanti ke lona ilizwi lomntu onyanisekileyo lihlala lihleli.

₂₉Umntu okhohlakeleyo unobuganga bokuzicingela ukuba uyayazi into ayenzayo,

onyanisekileyo uyayicingisisa ihambo yakhe.

₃₀Ubulumko nengqondo kunye namacebo omntu

akanakumelana nentando kaNdikhoyo.

₃₁Amahashe angayiqeqeshelwa imfazwe,

kodwa nguNdikhoyo onika uloyiso.

₁Igama elihle lilungile ngaphezu kwentabalala yobutyebi;

ukuba nesidima kungaphezu kwayo isiliva negolide.

₂Umntu osisityebi nomntu olihlwempu ikho into ebadibanisayo:

kaloku bobabini badalwe nguNdikhoyo.

₃Umfo ohlakaniphileyo uthi akuyibona isiza ingozi ayiphephe;

ke yena ongaqondiyo uthwabaza aye kungena kuyo, aze ke ave ubuhlungu yiloo nto.

₄Ukuba uyazithoba, umhlonela uNdikhoyo,

uya kuxhamla ubutyebi, isidima, nobomi.

₅Indlela yamatshijolo iphahlwe ngameva nemigibe;

ke yena umntu okhusela ubomi bakhe uyayicezela.

₆Ukuba umntwana umqeqeshile ngendlela yokuziphatha,

soze ahlukane nayo naxa selekhulile.

₇Umntu osisityebi uyalilawula ihlwempu;

nalowo ubolekayo likhoboka lalowo ubolekisayo.

₈Umntu ohlwayela inkohlakalo uvuna iinkxwaleko,

nentonga yomsindo wakhe iya kwaphuka.

₉Umntu onezinwe uyathamsanqeleka,

kuba kaloku uyawapha amahlwempu kukutya anako.

₁₀Wakumgxotha umgxeki itsho iphele ingxabano,

ngokunjalo zitsho zinqamke iingxwaba-ngxwaba nokunyelisa.

₁₁Umntu onyanisekileyo nontetho inambithekayo

uyathandwa nditsho nangukumkani.

₁₂Amehlo kaNdikhoyo ayalwalusa ulwazi;

ke zona iintetho zabantu abaphixanisayo uyaziphanzisa.

₁₃Ivila lithi: “Kukho ingonyama phandle!

Ndobulawa ezitalatweni!”

₁₄Umlomo womfazi ongakwaziyo ukuziphatha nqwa nenzonzobila yomhadi;

ke bona abashwatyulelwe nguNdikhoyo batshona kuyo.

₁₅Ingqondo yomntwana idla ngokunxaxha,

kodwa ke into emlulekayo luswazi.

₁₆Omnye ucinezela amahlwempu ngeenjongo zokwandisa ubutyebi bakhe,

wumbi anikezele ngezipho kwizinhanha, kodwa bobabini baphelela ebuhlwempini.

₁₇Wabazele iindlebe uwaphulaphule amazwi ezilumko,

imfundiso yam uyibethelele entliziyweni yakho.

₁₈Kaloku kumnandi xa unawo engqondweni yakho,

ube nako ukumana ucaphula kuwo ungathintilizi.

₁₉Ndikwazisa wona ke namhlanje,

ukuze wena kanye ube nako ukukholosa *ngoNdikhoyo.

₂₀Ngoko ke nazi iingongoma endikubhalele zona zimashumi mathathu,

ziqulethe ubulumko namacebiso.

₂₁Ezi ngongoma ziya kukunceda ukwazi ukuyicalula inyaniso,

utsho ukwazi ukunika ingxelo enyanisekileyo xa uthunyiwe.

₂₂Musa ukuthi kuba umntu elihlwempu umxhaphaze;

futhi sukumcinezela umntu ohlelelekileyo xa esematyaleni.

₂₃Kaloku uNdikhoyo ngokwakhe uya kuba ngummeli wabo,

abaphange abo babaphangayo.

₂₄Musa ukuhlobana nomntu onephuku;

sukuhambisana nonkom' iyahlaba.

₂₅Kaloku xa usenjenjalo uya kugcayiseleka,

nawe uzibhaqe sesikusulele eso simo sakhe.

₂₆Sukuyenza into yokubamba isandla ubhambathisa,

umele ityala lomnye umntu.

₂₇Kaloku xa ungasenako ukuhlawula

uya kuthinjwa wohluthwe nditsho kwanebhedi olala kuyo.

₂₈Ungaze uwugudlule umlima-ndlela wakudala

owamiswa ngookhokho bakho.

₂₉Ungazibonela ngokwakho: umntu olichule emsebenzini usebenzela ukumkani,

akasoze asebenzele abantu abangenagama.