Bible Reading Plan – Day 142

₁Umntu okhalinyelwa njalo, kodwa abe neenkani,

wosuka aphalale ngephanyazo, angaze abe nabuyambo.

₂Wakuba sezandleni zamalungisa umbuso, batsho bavuye abantu;

kambe ke kwakulawula isikhohlakali iba ziincwina zodwa.

₃Othanda ubulumko uvuyisa uyise,

kodwa ke yena othene nca namahenyukazi uchitha impahla yakhe.

₄Xa ukumkani elawula ngobulungisa litsho lizinze ilizwe lakhe;

kambe ke yena orhwiphiliza irhafu uyalibhuqa.

₅Umntu onyhwalaza ummelwana wakhe

uzenzela umgibe iinyawo zakhe.

₆Umntu ogwenxa uthiyelwa sisono sakhe;

kambe ke yena olilungisa uyaziculela onwabile.

₇Umntu olilungisa unemfobe ngâbo bahlelelekileyo,

ke yena umntu okhohlakeleyo akayiqondi nokuyiqonda into enjalo.

₈Abagxeki baphembelela udushe esixekweni,

kambe ke zona izilumko ziyawuthomalalalisa umsindo.

₉Umntu osisilumko xa emangalelene nesiyatha

sisuka sivuke umnyele siphoxise, kungabikho mvisiswano.

₁₀Izibulala-mntu zimthiyile umntu onyanisekileyo,

ke bona abathe ngqo bayamkhusela umntu onjalo.

₁₁Isiyatha asiwulawuli umsindo;

kambe ke sona isilumko siyaphola sizibambe.

₁₂Ukuba umlawuli nguthoba-sikutyele,

onke amaphakathi akhe oba ngoongcothoza.

₁₃Ihlwempu ndawonye nalowo ulingcungcuthekisayo

bafana ngale nto yokuba bobabini banikwe amehlo abonayo nguNdikhoyo.

₁₄Ukumkani ogweba ityala lehlwempu ngokunyanisekileyo

ulawulo lwakhe luya kuhlala luzinzile.

₁₅Uswazi lokululeka ludala ubulumko;

kambe ke umntwana ongaqeqeshwayo umzisela ihlazo unina.

₁₆Xa kulawula izikhohlakali siyanda isono,

kambe ke wona amalungisa aya kukubona ukuwa kwazo.

₁₇Umntwana olulekwayo uya kukunika ukuxola,

aze ayivuyise intliziyo yakho.

₁₈Abantu abangenawo umbono kaThixo baba ziindlobongela;

phofu ke unoyolo umntu owuthobelayo umthetho kaThixo.

₁₉Akuncedi nto ukulingxolisa ikhoboka,

kuba nokuba liyaqonda aliyi kuphulaphula.

₂₀Uyambona na umntu othetha nje engaqiqanga?

Akunani kwaisityhakala kunaye.

₂₁Ukuba uyalitefisa ikhoboka kwasebutsheni balo,

ekugqibeleni liya kukudela.

₂₂Umntu ofan' acaphuke udala ingxabano;

umfo onephuku uwa ewile esonweni.

₂₃Ikratshi liyamwisa umntu;

kambe ke othobekileyo uba nesidima.

₂₄Ihlakani lomntu olisela lizibeka emngciphekweni;

nakuba lisazi ukuba liza kohlwaywa nguThixo noko lithe cwaka.

₂₅Ukuxhalela abantu kusenokuba ngumgibe;

kambe ke othembela kuNdikhoyo ukhuselekile.

₂₆Baninzi abazithandekisa kwiziphathamandla,

kambe ke bona ubulungisa bufumaneka kuNdikhoyo.

₂₇Umntu onobuqhetseba uyacekiswa ngamalungisa;

ngokunjalo nomntu othe ngqo uyacekiswa ngabakhohlakeleyo.

₂“Kaloku ndisesona sidenge ebantwini;

kwaye ingqondo yomntu ayikho kum.

₃Zange ndabufunda ubulumko;

andimazi lowo uyiNgcwele kanye.

₄Kanti ke, ngubani oselekhe waya ezulwini wabuya wehla;

ingubani owakha wawubamba ngezakhe izanda umoya?

Khona, ngubani owakha wabamba amanzi wawaqhinela ngesondo lengubo yakhe;

ingubani khona owamisa imida yehlabathi?

Khawutsho kaloku, ukuba unolwazi!

Ngubani igama lakhe;

ingubani unyana wakhe?

₅“Yonke into ayithethayo uThixo ithembekile;

ulikhaka kwabazimela ngaye.

₆Musa ukongeza kwintetho yakhe,

hleze akukhalimele, budandalaze ubuxoki bakho.”

₇Awu, Bawo, zimbini nje qha izinto endizicelayo kuwe;

ewe, ndiphe zona ndingekafi!

₈Ndikhwebule kubuqhetseba nokuxoka;

mandingade ndibe sisityebi okanye ndihlwempuzeke,

nto nje ndiqhekezele isonka sam semihla ngemihla,

₉hleze ndikukhanyele ndakuhlutha,

ndisuke ndithi: “Kuxa engubani yena *uNdikhoyo?”

Ukanti ke naxa ndihlwempuzekile ndingasuka ndibe,

ndihlazise igama likaThixo wam.

₁₀Isicaka sukusigxeka enkosini yaso,

hleze sikushwabulele ube nobutyala.

₁₁Abanye abantu bayamshwabulela uyise,

bangamthamsanqelisi nonina.

₁₂Bona bazicingela ukuba banyulu,

kodwa babe bengazange bahlambuluka.

₁₃Aba bantu bazicingela bhetele.

Awu, baziphakamisile kambe!

₁₄Basisizukulwana esimazinyo aziingxavula okwekrele,

esimabamba abukhali okwemela,

khon' ukuze baxhaphaze amahlwempu ehlabathini,

ewe, nditsho abasweleyo phakathi kwabantu.

₁₅Ikhalane lineentombi ezimbini;

zithi: “Ndiphe! Ndiphe!”

Ewe, zintathu izinto ezingahluthiyo,

gxebe, zine ezingasoze zithi: “Kwanele!”:

₁₆elabafileyo;

umfazi ongafumani bantwana;

umhlaba onxaniweyo;

nomlilo ongatshoyo ukuthi: “Kwanele!”

₁₇Amehlo omntu ophoxisa ngoyise nocekisa ukuthobela unina

aya kuxholwa ngamahlungulu, anqwamzwe ngamaxhalanga.

₁₈Kukho izinto ezintathu eziyintsonkotha kum;

gxebe, zine endingaziqondiyo:

₁₉ukubhabha kokhozi esibhakabhakeni;

ukurhubuluza kwenyoka elulwalweni;

ukuhamba kwenqanawa enzulwini yolwandle;

ukuthandana komfana nentombi.

₂₀Inje indlela yomfazi okrexezayo:

Uyadla, asule umlomo,

athi: “Andenzanga nto imbi!”

₂₁Zintathu izinto ezilishukumisayo ihlabathi;

gxebe, zine elingenako ukuzinyamezela:

₂₂kukuba phantsi kwekhoboka eliye laba ngukumkani,

okanye isiyatha xa sithe sahlutha kukutya;

₂₃kukuba phantsi kwebhinqa ebelingafunwa elide latshata,

okanye isicakazana xa sithe sathatha indawo yenkosikazi yaso.

₂₄Kukho izinto ezine ezincinane emhlabeni,

kodwa zilumke gqitha.

₂₅Iimbovane ziluhlanga oluethe-ethe,

kodwa ziqokelela ukutya ehlotyeni.

₂₆Iimbila zisisizwe esingenamandla,

kanti zimisa izindlu zazo emaweni.

₂₇Iinkumbi azinankosi,

kodwa zihamba amaqela ngamaqela.

₂₈Icikilishe yinto ongayibamba nangesandla sakho,

kodwa liyafumaneka nakumabhotwe ookumkani.

₂₉Zintathu izinto ezibukelekayo xa zihamba;

gxebe, zine ezichul' ukunyathela:

₃₀yingonyama, igorha phakathi kwezilwanyana,

yona ingahlehliyo nakweyiphi na into;

₃₁ngumqhagi ondolosayo;

yinkunzi yebhokhwe;

ngukumkani ephahlwe ngumkhosi wakhe.

₃₂Ukuba wenze izinto zobudenge waziphakamisa,

okanye ukuba uthe waceba ububi,

khawuthi xha!

₃₃Wakulucofa ucwambu kuvela ibhotolo,

wakuyixhimfa impumlo isuka yophe,

wakuxhokonxa umsindo kugqabhuka imbambano.

₂“Awu, mtanam, sana lwesizalo sam,

nyana wezibhambathiso zam,

₃amandla akho musa ukuwaqoba ngamankazana,

iindlela zakho ungazilahleli kwabo babhangisa ookumkani!

₄“Lemweli, iwayini ayibafanelanga ookumkani,

ewe, ookumkani ayibafanelanga;

iziphathamandla akulunganga zizinikele etywaleni.

₅Kaloku zakusela zitsho ziwulibale umthetho,

zingabi sawakhathalela amalungelo abantu abahlelelekileyo.

₆Utywala bufanele abo kungasekho thuba kubo,

abo baminxekileyo ziinzingo.

₇Kaloku bona bakusela bayabulibala ubuhlwempu babo,

bangabi sazikhumbula neengxaki zabo.

₈“Thetha ubamele abantu abangakwaziyo ukuzithethelela;

ncedisana nabo uwakhusele amalungelo eendwayinge.

₉Bamele ubabonelele ngokwasemthethweni;

ncedisana nabo abahlelelekileyo nabasweleyo.”

₁₀Awu, akanqabe ngako umfazi onesidima!

Lingaphezulu lee nakumatye anqabileyo ixabiso lakhe!

₁₁Onjalo uthenjiwe mpela yindoda yakhe,

futhi ke ayihlelelekanga nganto.

₁₂Uyiphatha kakuhle, kungabi kakubi,

yonke imihla yobomi bakhe.

₁₃Uthatha umqhaphu newulu,

asebenze ngenkuthalo ngezandla zakhe.

₁₄Uhamba njengeenqanawa zabarhwebi,

efuna ukutya kosapho nakwelikude.

₁₅Uvuka kusathi qhekre ukusa,

alungiselele usapho ukutya,

anike izicakazana zakhe imiyalelo.

₁₆Uyayigqala intsimi, aze ayithenge,

athathe kwimali ayisebenzeleyo, atyale isidiliya.

₁₇Usoloko ebhinqa omfutshane;

iingalo zakhe zimelana nawo wonke umsebenzi.

₁₈Uyayiqwalasela inzuzo yokushishina kwakhe;

isibane sakhe asicimi ebusuku.

₁₉Izandla zakhe aziyeki ukuphotha,

neminwe yakhe ayisuki kumashini wokuluka.

₂₀Isandla sakhe sisoloko sivulekile kumahlwempu;

ewe, izinwe zakhe zifikelela nakwabasweleyo.

₂₁Akanaxhala noba selikhithika,

kuba kaloku usapho lwakhe lunezingayiwayo iimpahla zobusika.

₂₂Uzenzela iingubo zokwandlala ezihonjisiweyo kunene;

unxiba ezelaphu elihle elimsobo.

₂₃Nendoda yakhe iyaziwa enkundleni ngasemasangweni,

apho ihlala khona namadoda amakhulu elizwe.

₂₄Uthunga impahla entle yokunxiba, athengise ngayo;

wenza imixwayo ayithengise kubarhwebi.

₂₅Uthiwe jize ngamandla nesidima,

ibe ke akanaxhala ngengomso.

₂₆Xa evula umlomo uthetha ngobulumko;

xa enika iziluleko oko ukwenza ngenceba.

₂₇Ulalusile ikhaya lakhe;

akasidli isonka sobuvila.

₂₈Abantwana bakhe bayamhlonela, bathi unoyolo;

nendoda yakhe ungayiva imncoma, isithi:

₂₉“Baninzi abafazi abenza imisebenzi emihle;

kodwa wena ubagqwesa bonke!”

₃₀Umfazi onomtsalane angakukhohlisa, ke bona ubuhle buyatshitsha;

kuphela ngumfazi ohlonela *uNdikhoyo oya kubongwa.

₃₁Ncoma umwonge ngenxa yoko kwenziwa zizandla zakhe;

ewe, makutyibelwe kudombozwe ngemisebenzi yakhe naphaya emasangweni.