Bible Reading Plan – Day 185

₁Kunyembelekile kuwe, mtshabalalisi;

wena ungatshatyalaliswanga!

Yeha ke, wena tshijolondini;

ke wena siqu awuqhathwa mntu!

Uya kuze upheze ukutshabalalisa,

ibe nguwe otshatyalaliswayo.

Boze bupheze ubuqhophololo bakho,

nawe ke ube lixhoba lokuqhathwa.

₂*Ndikhoyo, khawube nenceba kuthi;

asisakulangazeleli ngako!

Ntsasa zonke yiba ngamandla ethu;

sihlangule sakungena enkathazweni.

₃Lakuzongoma izwi lakho batsho basabe;

wakuphakama ziyasarhaka izizwe.

₄Izizwe zojika zibe ngamaxhoba,

zixhatshazwe ngathi zingenelwe ziinkumbi.

₅Mkhulu kambe uNdikhoyo,

yena umi kweliphezulu!

IJerusalem woyizalisa ngolungelelwano nobulungisa.

₆Maxa onke uya kuba sisiseko esingahexiyo,

isisele sosindiso, ubulumko, nolwazi.

Umthombo wale ndyebo kukuhlonela uNdikhoyo.

₇Nango amagorha abo ezibika;

oonozaku-zaku abaphath' uxolo nâbo besitsho ngesikrakra.

₈Ngoku koohola sekuthe bhe;

abahambi abavakali ndawo konke.

Izivumelwano ziyakrotyozwa;

ke izixeko zideliwe,

akusekho mntu uhlonitshwayo.

₉Umhlaba ulele, ngamafusi nje,

amahlathi aseLebhanon atshazile;

ngoku iSharon ifana nentili yasentlango,

imithi ibunile eBhashan naseKarmele.

₁₀*UNdikhoyo uthi:

“Ngoku ke ndosuka ndiphakame;

niza kububona ubungangamsha bam;

ewe kaloku, ndiza kuzimaseka.

₁₁Nikhawul' umququ, nizal' inkintshi-nkintshi;

kaloku nizitshabalalisa kwangokwenu.

₁₂Izizwe ziya kutshiswa okwamatye ekalika;

ziya kufakwa umlilo okwezihlahla zameva.

₁₃Nina bantu bakude, phulaphulani;

ewe, yiveni into endiyenzileyo;

nina bakufuphi, wavumeni amandla am.”

₁₄Aboni baseZiyon bayagubha liphaphu,

abangakhathalele Thixo bayangcangcazela.

“Ngubani ke kuthi ongamelana nomlilo olenyayo?

Ngubani onganyamezela umlilo ongacimekiyo?”

₁₅Ngondlela zithe ngqo nothetha kakuhle,

nongafuni kungenelwa ngengcinezelo,

noyingcathu ongazamkeliyo izicengo,

ongahambisaniyo nabafutha amayelenqe,

umntu ongafunaniyo nezinto ezimbi.

₁₆Onjalo ke uza noloyiso;

ukhuseleke ngathi usemqolombeni

apho ukutya namanzi kuhlala kuhleli.

₁₇Ke amehlo enu oze ambone ukumkani

ethiwe jize ngesihomo nesithozela;

owakhe umhlaba uthe gabalala.

₁₈Ngeenkumbulo nocamanga ngehambo-nzima yamandulo:

“Waya phi umphicothi-ncukacha;

ephi ke yena umvavanyi?

Kanti uphi yena umhloli weenqaba?”

₁₉Ezo ntlanga zidelelayo zophel' emehlweni,

abantu abantetho ingacacanga,

abapitiliza ulwimi eningaluqondiyo.

₂₀Khangelani iZiyon, isixeko samatheko amisiweyo;

zisuka nje nokhangwa yiJerusalem,

ikhaya lenzolo, umzi ongashukumiyo;

ezawo izikhonkwane soze zancothuka,

neentsontelo zawo soze ziqhawuke.

₂₁Apho ke uNdikhoyo woba nguThixo wethu onamandla,

soba ngathi siphakathi kweentlambo nemilambo;

kodwa akukho sikhephe siya kuhamba khona,

kungekho nanqanawa ingangcambaza apho.

₂₂Kaloku umgwebi wethu nguNdikhoyo;

ewe, uNdikhoyo yena uyasilawula.

Ikumkani yethu nguNdikhoyo;

nguye oya kusisindisa.

₂₃Zona iintambo zenqanawa ziyeke-yeke;

azisenako ukuyibamba intsika yayo,

zingenako ukuyiqinisa neseyile.

Boxhaphaz' amaxhoba bazanelise;

kuya kuhlomla nesiqhwala esi sembala.

₂₄EZiyon akusayi kubakho ugulayo;

zonke izono zabemi bayo ziya kuxolelwa.

₁Sondelani, zizwe, niphulaphule;

inzwi kaloku nakuni, zintlanga.

Maliphulaphule ihlabathi nenzaliseko yalo;

ihlabathi nemveliso yalo yonke malimamele.

₂Kalok' *uNdikhoyo ulwa nazo zonke izizwe,

uxabene nayo yonk' imikhosi yazo.

Wozibhubhisa xa zizonke,

zonke azixhaxhe kuphele.

₃Izidumbu aziyi kungcwatywa;

zothi xakalala ziqungquluze – mh-mh-mh!

Iintaba zonyepha ligazi labo.

₄Iinkwenkwezi nemikhosi yazo zonke zosuka zisumke zinyamalale;

isibhakabhaka sosongwa ngathi ngumqulu,

iinkwenkwezi zivuthuluke okwamagqabi,

zitshaze ngathi ngamagqab' omdiliya nomkhiwane.

₅Emazulwini umkhonto wam uxhaphile;

nanko usihlela e-Edom,

abantu abagwetyw' intshabalalo.

₆Umkhonto kaNdikhoyo wodad' egazini;

ewe, utsho waxhapha ngamanqatha

ngathi ligazi lamatakane neebhokhwe,

namanqatha ezintso zenkunz' egusha.

EBhozera uNdikhoyo uya kwenza idini;

ewe, yoba ngamatyadidi kwaEdom.

₇Abantu baya kuwa njengenqu;

bafane neenkunzi ezindala nezingamathole.

Umhlaba uya kufuma ligazi,

nothuli lunyephe ngamafutha.

₈Ngemini yakhe uNdikhoyo wophindezela,

unyaka wembuyekezo ngenxa yeZiyon.

₉Imilamb' e-Edom yoba mnyama,

umhlaba ufane nesalfure;

umhlaba wofana netha evuthayo.

₁₀Wodangazela imini nobusuku,

umsi utsho ngomlembelele othunquzayo,

kube zizizukulwana ngezizukulwana libharhile,

kungaze kunqumle mntu khona,

₁₁ilizwe limiwe sisikhova nesihulu-hulu,

limiwe ngookhwalimanzi namahlungulu.

UThixo wolibharhisa kwakhona elakwaEdom,

libe njengelamandulo kungekadalwa nto.

₁₂Sobe kubekho kumkani ulawulayo;

izinxiba-mxhaka zophel' emehlweni.

₁₃Izakhiwo zomila ameva nobobo,

iinqaba zambathwe lutshungu nesinama.

Yoba sisikhululo soodyakalashe,

ibe likhaya lezikhova.

₁₄Koba lapho angqungqa khona amarhamncwa,

zikhwazane khona neendimoni.

Yoxhwarha khona nerhorho yobusuku,

izula-zule iphathe kuphumla.

₁₅Isikhova siya kwakha sizalele khona;

zofukama zide ziqandusele,

ziwakhulisele khona amathole azo.

Oontloyiya boqokelelana bonwabisane khona.

₁₆Khangela encwadini kaNdikhoyo ufunde:

Kwezi zilo akukho singekhoyo,

kungekho nesingenaqabane laso,

kuba lowo ngumlomo kaNdikhoyo,

nguMoya wakhe oya kuziqokelela.

₁₇Isekwanguye oya kuzabela

azinike inxaxheba ngazinye ngazinye.

Elo yoba likhaya lazo naphakade,

zime khona izizukulwana ngezizukulwana.

₁Intlango nomqwebedu ziya kuchulumacha;

elibharhileyo loba nemihlali liqhakraze njengentyatyambo.

₂Intlango yomemelela idlokove luvuyo;

yoba yinzwakazi enjengeentaba zaseLebhanon,

yochuma njengamasimi aseKarmele naseSharon.

Bonke bobubona ubungangamsha *bukaNdikhoyo,

bucace ubuhandiba nokomelela koThixo wethu.

₃Izandla ezinomkhinkqi mazomelele,

namadolo anengevane atsho adlamke.

₄Thetha namagwala, uthi:

“Qinani, ningabi nentaka!

Kaloku uyeza uThixo wenu;

uza epheth' impindezelo.

Nank' egush' imbuyekezo;

ewe, uza kunihlangula.”

₅Kaloku ke kobona nemfama le yembala,

zitsho zivuleke neendlebe zesithulu,

₆nesiqhwala sidlobe sitsiba-tsibe okwempunzi;

nezimumu zomemelela ngemihlali.

Kaloku kompompoza amanzi nasentlango,

kugqabhuke imilambo nakwelibharhileyo.

₇Intlabathi evuthayo yojika ibe lichibi,

umhlab' okhothekileyo uphanjwe yimithombo.

Asisathethi ke ngeendawo zikadyakalashe,

kuba zona zoba yimigxobhozo yemizi neengcongolo.

₈Apho ke kothi tyaba uhola;

leyo ke kothiwa yindlela yobungcwele

ekungekho namoni woze athi cakatha kuyo,

nasiyatha solahlekisa mntu kuyo.

₉Kuyo soze kubekho ngonyama,

ingasoze ihanjwe narhamncwa;

kuphela ngabakhululwe nguNdikhoyo

abaya kudakasa kuloo ndlela.

₁₀Abasindisiweyo nguNdikhoyo bobuyela eZiyon benemihlali,

bengqungqa bememelela ngochulumacho.

Soze babe sazana neentsizi nenkxwaleko;

boxhamla ulonwabo naphakade.