Bible Reading Plan – Day 199

“Musani ukulinganisa inkqubo yezinye iintlanga;

musani ukothuswa yimiqondiso esesibhakabhakeni,

naxa zona zisothuka iintlanga.

₃Amasiko eentlanga angamampunge nje.

Bagawula umthi ehlathini,

ziwuqingqe ngesixholo iingcibi,

₄uhonjiswe ngesiliva nangegolide,

ubethelelwe ngezikhonkwane ukuze ungagungqi.

₅*Oothixo abanjalo bafana nonomgogwana

oxhonywe entsimini yentyabontyi:

abakwazi kuthetha,

bayathwalwa kuba abakwazi kuhamba.

Musani ukuboyika:

akukho nto imbi banganenza yona,

kungekho nanto banokunceda ngayo.”

₆Ngubani onjengawe, Ndikhoyo?

Umkhulu wena;

igama lakho lithe ndii, lidume ngobungangamsha.

₇Ngubani ongakuhloneliyo, wena Kumkani weentlanga?

Ewe, ufanelwe yimbeko;

akakho onjengawe,

nditsho phakathi kwezilumko

naphakathi kwezizwe nookumkani bazo.

₈Ziziyatha nezityhifili xa bebonke;

bangafundiswa ntoni ngoothixo abaqingqwe ngomthi?

₉Baqingqwe ngesiliva yaseTashishe,

nangegolide evela eUfazi.

Okuxhonkxwe ziingcibi nabakhandi

kwambeswa ngeengubo ezibomvu nezimfusa ezalukwe ngamagcisa.

₁₀Kodwa nguNdikhoyo onguThixo ngenene;

yena unguThixo ophilayo,

uKumkani oya kuhlala ehleli.

Akuqumba yena umhlaba uyankwantya;

izizwe azinakumelana nengqumbo yakhe.

₁₂Ke yena *uNdikhoyo ulidale ngamandla akhe ihlabathi,

walizinzisa ngobulumko ilizwe,

wasitwabulula ngengqondo isibhakabhaka.

₁₃Uthi akuduma kuyaluzele amanzi asesibhakabhakeni,

kufunquke amafu emaphethelweni omhlaba.

Uthumela umbane kunye nemvula,

athulule umoya koovimba bakhe.

₁₄Bonke ziziyatha ezingenalwazi.

Ababumbi *boothixo bayahlazeka ngezithixo zabo,

kuba oothixo abababumbayo bayinkohliso,

kuba abanawo umphefumlo.

₁₅Zizinto ezingento,

izinto zokuphoxisa,

izinto eziya kubhanga ngemini yomgwebo.

₁₆Akanjengabo yena uNxaxheba kaYakobi:

nguye owabumba iinto zonke.

AmaSirayeli ngabantu bakhe ncakasana.

USomandla-onke nguNdikhoyo igama lakhe.

₁₉Athi ke mna, ukwenzakala kwam!

Amanxeba am akanakuphila.

Ke mna bendisithi:

“Sisifo sam esi; mandisinyamezele.”

₂₀Intente yam ibhukuqiwe;

sele kuqhawuke nezo ntambo zayo.

Bemkile oonyana bam;

akusekho namnye useleyo.

Akukho nokuba abe mnye onokuvusa intente yam;

akukho namnye wokuxhoma umkhusane.

₂₁Abelusi baba bantu ziziyatha,

ababuzi nto kuNdikhoyo.

Yiyo loo nto bengenampumelelo nje,

nemihlambi yabo ithe qhu saa.

₂₂Phulaphulani, kufika udaba.

Kuvakala intshukumo ivela ngasentla.

Luza kutsho kube senkangala kwiidolophu zakwaJuda,

zitsho zibe zizikhundla zoodyakalashe.

₂₃Ndikhoyo, ndiyazi ukuba akukho bani ulawula ikamva lakhe,

nokuba akukho mntu uphethe ubomi bakhe.

₂₄Ndiluleke, Ndikhoyo,

kodwa kube ngobulungisa,

kungabi ngomsindo wakho,

hleze ndingabi nto.

₂₅Ingqumbo yakho yikhuphele kwiintlanga ezingakuvumiyo,

naphezu kwezizwe ezingalinquliyo igama lakho,

kuba zimdlile uYakobi zamgqiba,

aza amadlelo akhe aba yinkangala.

₁₈*UNdikhoyo wandityhilela, khon' ukuze ndiqonde;

wawavula amehlo am, ndazazi iinjongo zabo.

₁₉Ndandifana nqwa nexhwane elimbuna lisiya kuxhelwa.

Bekungekho nto ndiyaziyo.

Bendingaqondi ukuba baceba amayelenqe ngam,

besithi: “Masiwutshabalalise umthi uselula,

simcime igama, angabi sakhunjulwa ngabaphilayo.”

₂₀Ndibhenela kuwe, Ndikhoyo Somandla-onke,

wena mgwebi olilungisa,

wena mgocagoci weentliziyo neengqondo zabantu.

Wonke lo mcimbi wam ndiwuxhoma kuwe;

mandikubone ke ukundiphindezela kwakho kubo.

₁Ulilungisa, wena *Ndikhoyo, xa ndixambulisana nawe,

xa ndibhenela kuwe ngeendawo ezinxulumene nobulungisa.

Ngaba ibangwa yintoni impumelelo yezibhoja?

Kungani amaqhophololo ehleli ethe zava nje?

₂Batyalwe nguwe, zendela iingcambu zabo;

bahlumile, bavelisa iziqhamo.

Usoloko usemilebeni yabo,

kodwa ezintliziyweni zabo ukude lee.

₃Ke wena, Ndikhoyo, uyandibona;

uyazigocagoca iingcamango zam ngawe.

Barhuqe abantu abagwenxa, baxele iigusha eziya kuxhelwa.

Bakhethele bucala, ide ifike imini yokubulawa.

₄Koda kube nini uzilile umhlaba?

Koda kube nini itshile ingca emadlelweni?

Izilwanyana neentaka ziyafa ngenxa yenkohlakalo yabantu bakowethu.

Kanti bathi: “UThixo akasazi isiphelo sethu.”

₇“Ndoyishiya indlu yam,

ndisibukule isizwe esililifa lam,

ndimnikele othandwe ndim ezandleni zeentshaba zakhe.

₈Ilifa lam nqwa nengonyama egquma ehlathini: liyandivukela.

Kungoko ke ndilithiyile nje.

₉Ilifa lam lifana nengcuka engqingwe ngamakhozi;

bizani onke amarhamncwa, eze esidlweni.

₁₀Kofika abelusi abaninzi,

bawuchithe umdiliya wam,

basinyhashe isabelo sam esinqwenelekayo,

basenze sibe ngumqwebedu.

₁₁Isabelo sam senziwe inkangala,

satsho sangumqwebedu phambi kwam.

Umhlaba uphela ulil' ibhungane;

akukho bani uwukhathaleleyo.

₁₂Abatshabalalisi bavele eluqayini entlango.

Ikrele likaNdikhoyo liyawutshabalalisa umhlaba macala onke.

Akukho namnye uya kusinda.

₁₃Baya kuhlwayela ingqolowa, bavune ameva.

Baza kufumana babulaleke, kodwa bangazuzi lutho.

Ngenxa yobushushu bengqumbo kaNdikhoyo niya kuba nesivuno esidanisayo.”