Bible Reading Plan – Day 237

₁Vuka! Vuka, Ziyon!

Khawuvath' amandla nokomelela;

khawufak' ezingayiwayo ngokundileka.

Awu, Jerusalem, sixekondini esingcwele,

kula masango soze babe sangena abangalukanga nâbo *bagqwalisekileyo.

₂Vuk' uvuthulul' uthuli olo;

mbanjwandini Jerusalem, khululeka.

Thukulul' amakhamandel' akukhonkxileyo,

ungqendeve, mthinjwandini Ziyon.

₃UNdikhoyo uthi:

“Ukungena kwenu ebukhobokeni zange nihlawulelwe,

ngoko ke naxa nikhululekayo akuyi kwenziwa mrhumo.”

₄Ewe, uMhlekazi uNdikhoyo uthi:

“Kuqala abantu bam bâya kuhlala eJiputa;

kamva ke bangena phantsi kwedyokhwe yama-Asiriya.

₅Ngoku ngaba yiyiphi ke le imeko?” utsho uNdikhoyo.

“Kaloku abantu bam baqweqwedisiwe

bangena ebukhobokeni ngaphandle kwentlawulo,

nabaphathi babo baphoxisa ngabo.

Igama lam lihlala linyeliswa imihla yonke.

₆Kwithuba elizayo abantu bam baya kulazi igama lam,

baqonde ukuba ndim owatshoyo,

ewe, ndim kanye!”

₇Hayi ubuhle beenyawo zesigidimi sibhijel' iintaba,

sipheth' iindaba ezimnandi,

sibhengeza sisithi: “Uxolo lufikile!

Yonk' intw' ilungile! Nal' usindiso!”

Ewe, sibhekisa kwiZiyon sisithi:

“UThixo wakho uyalawula.”

₈Abalindi batsho ngentswahla,

batsho ngenzwinini yovuyo ngazwi-nye.

Kaloku ngoku sebebona ngamehlo;

nanko uNdikhoyo engena eZiyon!

₉Dandulukani ngemivuyo nemincili

nani ke, mabhodlo aseJerusalem.

UNdikhoyo wobathuthuzela abantu bakhe,

ayikhulule iJerusalem.

₁₀Yena wosebenza ngamandla awodwa,

zibone zonke izizwe,

usindiso loThixo wethu lutyhileke kuzo zonke iintlanga.

₁₁Ke nina phumani, hambani nimke apho,

ningachukumisi nento le *enomlaza.

Phumani ningenabala nimsulwa,

baphathi bobuncwane bendlu kaThixo.

₁₂Namhla aniyi kuphuma magxabha-gxabha.

Kaloku animki ngakuba nibhaca,

koko nikhokelwa nguNdikhoyo.

UThixo kaSirayeli wonikhusela ngeenxa zonke.

“Isicaka sam sophumelela;

siya kuphakamela phezulu ngendumasi.

₁₄Ke abaninzi bomangaliswa bakusibona;

suka santleke-ntleke asazeka,

imbonakalo yaso ingachazeki,

singasafani nanyana wamntu.

₁₅Nangoku ke wochaphazela izizwe ezininzi,

izikumkani zikhumnqe zisik' umlomo.

Kaloku zobona zide ziqondisise nento ezingazange zayazi.”

“Ngubani ongékholiwe ludaba esiluvileyo?

Ngubani ongéwuqondile umnwe kaNdikhoyo?

₂Kaloku isicaka sikhule njengesithole kwelibharhileyo,

suke asabi namfaneleko nabunganga,

saba ngasijonga asabi namtsalane.

₃Abantu basidelile basibukula,

saba ngumntu wenkxwaleko nentlungu.

Saba njengalowo ufulathelwayo, engasiwa so;

saba ngulowo udeliweyo, nathi asasikhathalela.

₄“Kanti ngenene buthwelwe nguye ubuthathaka bethu,

inkxwaleko yethu yâsemagxeni akhe.

Ngenene thina besiba ubandezelekile,

sisithi uyabethwa nguThixo.

₅Phofu ke ungxwelerhwe ngenxa yokukreqa kwethu;

ewe, ubulewe ngenxa yobugwenxa bethu.

Ukohlwaywa kwakhe kusiphathele uxolo;

thina sinyangwe ngamanxeba akhe.

₆Sonke salahleka njengeegusha,

elowo wabhadula ngeyakhe indlela;

ke yena uNdikhoyo wamwisela ngobugwenxa bethu sonke.

₇“Ewe, yena waphathwa gadalala,

kodwa wathi cwaka, akakhalaza tu.

Waba njengexhwane eliya kuxhelwa,

wathi cwaka njengegusha ichetywa;

ewe, akawuvulanga umlomo wakhe.

₈Wanqanyulwa ngengcinezelo nesigwebo.

Kwisizukulwana sakhe ngubani oyiqondileyo le nto?

Inene, wanqanyulwa kwelabaphilayo;

wabethwa ngenxa yezikreqo zamawethu.

₉Engcwabeni walala nezikhohlakali,

ngokunjalo nesityebi ekufeni kwakhe,

nakuba wayengenzanga lugonyamelo,

engazange waba ngokhohlisayo.”

₁₀Kanti yintando kaNdikhoyo ukuba abandezeleke abulawe,

khon' ukuze ukufa kwakhe kube lidini lokungxengxezela izono.

Ngoko ke wobona nezizukulwana;

uya kukhula ade akhokhobe;

ngaye intando kaNdikhoyo yofezekiswa.

₁₁Ngenxa yembandezelo yakhe

wobuya axhamle ulonwabo.

Uthi uNdikhoyo:

“Ngokwazana nesi sicaka sam sindikholisayo

abaninzi bofumana ubulungisa.

Kaloku sona sibuthwele ubugwenxa babo.

₁₂Yena ndomabela isahlulo phakathi kweendwalutho,

abe nenxaxheba kumaxhoba ndawonye namagorha.

Kaloku waziqongqothela ekufeni,

wada wabalwa nabakreqi.

Kaloku usithwele isono sabaninzi,

wenza isingxengxezo ngenxa yabakreqileyo.”

₁Danduluka utyibele, ludlolondini Jerusalem!

Ewe, hlabel' ingoma umemelele kaloku,

nawe, wen' ungazange wayiva inimba.

Kaloku lona usizana loba ngunobantwana;

loba ngaphezu kwakhe umfaz' onendoda.

Ewe, *nguNdikhoyo oyithethileyo loo nto.

₂Yandise loo ndawo uhlala kuyo;

sukuthandabuza, yolule nemikhusane yentente yakho;

zandise iintsontelo, uzibethelele ziqine izikhonkwane.

₃Kaloku uza kunabela macalana onke;

isizukulwana sakho siya kuzithimba izizwe,

umhlaba ubuyele kuso,

size sime kwezo zixeko zingamabhodlo.

₄Musa ukuxhala, awuyi kungena hlazweni;

ungaphithizeli, awusayi kuthotywa.

Ihlazo lobutsha bakho lona lolibaleka,

ungabi sasikhumbula nesingcikivo sobuhlolokazi.

₅Kaloku nguMenzi wakho indoda yakho;

igama lakhe ke nguNdikhoyo uSomandla.

NguYedwa kaSirayeli uMkhululi wakho;

kuthiwa nguThixo wehlabathi jikelele.

₆Ngoku uNdikhoyo uphinde wakubuyela,

njengomfazi osel' enomvandedwa kukushiywa,

nditsho umfazana owaliweyo.

Kodwa ke uThixo wakho uthi:

₇“Ndakulahla okomzuzwana nje kuphela;

ngoku ke ndikubuyisa sendiyimvuze-mvuze luthando.

₈Ndakufulathela ndinengqumbo okomzuzwana nje;

ngoku ke ndikuthanda ngothando olungenabuyambo;

ewe, ndiyavakalelwa ngenxa yakho.”

Utsho ke uNdikhoyo uMkhululi wakho.

₉“Ngexesha likaNowa ndenza isifungo

sokungaphindi ndilintywilisele ihlabathi.

Nangoku ke ndithi soze ndiphinde ndicaphuke;

andiphindi ndikukhalimele ngoburhalarhume.

₁₀Ewe, iintaba zingadilika,

ke zona iinduli zinyamalale,

kodwa izibele zothando lwam soze zinqamke kuwe,

nomnqophiso wam woxolo soze ushukume.”

Utsho ke yena uNdikhoyo okukhathaleleyo.

₁₁“Jerusalem exhwalekileyo, sixekondini siselusizini,

nkedamandini engenaye nomthuthuzeli,

mna ndiza kukwakha ngamatye odidi,

iziseko zakho ndizizinzise ngamatye anqabileyo.

₁₂Iinqaba zakho ndozakha ngeerubhi,

amasango ndiwakhe ngamatye abengezelayo,

iindonga ndizijikeleze ngamatye anqabileyo.

₁₃Oonyana bakho baya kufundiswa *nguNdikhoyo,

ikamva labo ndilithi jize ngenkqubela noxolo.

₁₄Ndokuxhasa ngobulungisa nolungelelwano;

ingcinezelo sobe ibe sakuchukumisa,

futhi akusayi kugrogriswa mntu konke.

₁₅Nabani na okuhlaselayo uchasene nam;

umntu olwa nawe akasayi kuphumelela.

₁₆“Kaloku umtyhidi udalwe ndim lo;

ubasa umlilo aze atyhide izixhobo.

Kwankqu nejoni elitshabalalisayo lidalwe kwandim lo,

nditsho elo lisebenzisa ezo zixhobo.

₁₇Nezo zixhobo zixonxwe ngenxa yakho soze zikutshabalalise,

uya kumphendula nabani na okumangalelayo.

Lilo ke elo ilifa lezicaka zikaNdikhoyo;

ewe, mna ndozithi jize ngoloyiso.”

Etshilo nje ke uNdikhoyo utshilo!

“Yizani nonke nina ninxaniweyo;

yizani xa ninonke, nanga amanzi.

Yizani nonke, nabo bangenamali;

thengani, naku ukutya nitye.

Yizani nizenzele kwiwayini nobisi;

xa iyonke loo nto sisimahla.

₂Sanukuchitha imali ngento engahluthisiyo.

Ngani ukuba nibulaleke ninganeli noko?

Ndiphulaphuleni nize nindithobele,

khon' ukuze nixhamle ubuncwane obanelisayo.

₃Bekani indlebe, nize kum;

phulaphulani, nixhamle ubomi.

Ndonenzela umnqophiso waphakade,

ndiniphathe ngezibele endazithembisa uDavide,

₄endammiselayo waba lingqina lam ezizweni,

inkokheli nomlawuli ezintlangeni.

₅Ngoku niya kumema iintlanga eningazaziyo;

izizwe ezinganaziyo ziya kunilangazelela

ngenxa kaNdikhoyo uThixo wenu.

Lowo ke nguYedwa kaSirayeli.

Kaloku yena unithe jize ngesihomo.”

₆Funani uNdikhoyo esenokufumaneka;

bhenelani kuye ngoku asekufutshane.

₇Umntu okhohlakeleyo makahlukane nobubi,

netshijolo maliyeke ukuyila ubutshijolo.

Maliguquke, lize kuNdikhoyo;

yena wosuka abe novelwano lilo.

Malize kuThixo wethu,

kuba yena uxolela kangangoko.

₈“Kaloku ingcinga zam azifani nezenu,

neendlela zenu azifani nezam,”

utsho yena uNdikhoyo!

₉“Njengokuphakama kwezulu emhlabeni

ziphakamile neendlela zam kunezenu,

kanti ke zikwanjalo neengcinga zam.

₁₀Ilizwi lam nqwa nekhephu nemvula:

ziphuma esibhakabhakeni,

kanti ke azigoduki ngaphandle kokumanzisa umhlaba,

zikhulise izityalo,

umlimi zimnike imbewu,

olambileyo zimnike ukutya.

₁₁Likwanjalo ke nelizwi endilithethayo:

alibuyi lilambatha,

koko liyawufezekisa umnqweno wam,

liliqaqambise icebo lam.

₁₂Nophuma nimemelela ngovuyo,

nihambe ningumngcelele owonwabileyo.

Iintaba neenduli phakathi kwenu

zosuka zingqokole zitsho ngengoma,

amahlathi nemithi atsho ngentswahla luvuyo.

₁₃Endaweni yomqaqoba kovela imipayini,

kukhule imetlani endaweni yobobo.

Loo nto ke yoba ludumo lukaNdikhoyo –

umqondiso ongasoz' uthini!”

“Yenzani okusemthethweni noko kulungileyo.

Kaloku usindiso lwam lukufuphi,

nobulungisa bam buza kutyhileka.

₂Unoyolo ke umntu owenjenjalo,

nditsho umntu oyibambisisayo,

lowo uwuhlonelayo *uMhla wokuPhumla,

umntu ongawudeliyo awuxabhele,

nditsho ozigcinayo angenzi bubi konke.”

₃Intlanga ezibandakanya noNdikhoyo mayingathi:

“Inene uNdikhoyo wondikhetha kubantu bakhe.”

Nendoda elithenwa mayingakhalazi ithi:

“Mna ndinjengomthi ongenahlumela.”

₄Kumathenwa uNdikhoyo uthi:

“Ukuba niyawuhlonela *uMhla wokuPhumla,

ukuba nizimisele ukwenza izinto ezindikholisayo,

niwugcine ngokupheleleyo umnqophiso wam,

₅ndonenzela isikhumbuzo negama endlwini yam,

elingaphezu kokuba noonyana neentombi,

nditsho igama elingasoze litshitshe.

₆Iintlanga ezizibandakanya noNdikhoyo,

ezizinikeleyo kuye zimsebenzela,

ezizimiseleyo ukuba zizicaka zakhe,

lowo uwuhloneleyo uMhla wokuPhumla,

umntu ongawudeliyo awuxabhele,

owuthobelayo pheleleyo umnqophiso wam –

₇abanjalo ndobasa kwintaba yam eyodwa,

bonwabe endlwini yam yokuthandaza.

Amadini abo atshiswayo kunye neminikelo

aya kwamkeleka kwiqonga lam lamadini.

Kaloku indlu yam kothiwa yindlu yokuthandaza iintlanga zonke.”

₈Utsho ke uMhlekazi uNdikhoyo,

nditsho umqokeleli weembacu zikaSirayeli:

“Ndisaza kuqokelela nabanye

ngaphandle kwâbo sendibaqokelele.”

₉Yizani nonke, marhamncwa, nibaqwenge,

nina zinyamakazi nezilo zamahlathi.

₁₀Kaloku iinkokheli zabo aziboni,

zizonke nje zititsekile

nqwa nezinja ezimumekileyo,

nditsho izinja ezingakhonkothiyo,

ezibhuqa-bhuqeka zide ziphuphe,

ezilangazelela ubuthongo kuphela.

₁₁Zifana nqwa nezinja ngokunyoluka;

zizingxala ngokutya, kodwa azihluthi.

Zinjalo nezi nkokheli, zivaleke mba;

zonke zenza ngokuzithandela;

ngulowo nalowo usemva kwenzuzo.

₁₂Ungaziva zisithi:

“Yizani sihambe siye etywaleni;

masibutye sibuphathe ngeembambo.

Nangomso yiloo nto – okanye kothi kratya!”