Bible Reading Plan – Day 250

₂Hoyina, zingwevu zakowethu!

Yivani, nonke bemi beli lizwe!

Nikhonje nakha nayibona into enje?

Khona kwimihla yamanyange yakhe yakho phi?

₃Ke, yixeleni kubantwana benu;

nabo ze bayixelele abantwana babo,

ukuze nabo bayixelele isizukulwana esizayo.

₄Oko kushiywe ngumqikela kudliwe yinkumbi;

okushiywe yinkumbi kudliwe ngumkhothululi;

ukanti okushiywe ngumkhothululi kudliwe ngumnqunquthi!

₅Vukani, nitshw' esofelweyo, manxila;

lilani nonke nigixe, baseli bewayini.

Ewe, bhombolozani ngenxa yewayini entsha –

kaloku sobe nibe saphinda niyirhabule.

₆Kaloku eli lizwe lihlaselwe ngumkhosi;

ewe, ziingwanyalala eziyinyambalala.

Ngenene zizinto ezimazinyo angxavula okwengonyama.

Ngonyamakazi yakwabani emabamba anje?

₇Isidiliya sam usibhuqe bhuqiyane,

imithi yam yomkhiwane wayitshabalalisa.

Ewe, uyixoze wada wayixobula,

wageqa noomaxolo ejuba phaya.

Ewe, iziphunzi zasala zimhlophe wee.

₈Ngoko ke hlahlambani nixel' umfazana ozilayo

eswelekelwe ngumyeni wakhe.

₉Okokwayo iminikelo yeenkozo,

ngokunjalo neminikelo yewayini,

inqamkile endlwini *kaNdikhoyo.

Ngoko ke ababingeleli bayagixa;

nditsho abo bangabalungiseleli bakaNdikhoyo.

₁₀Kaloku nanko amasimi eze,

nomhlaba ngokwawo uyabhomboloza.

Kaloku ingqolowa itshabalele,

newayini yembala inqamkile.

Asisathethi ke ngamafutha omnquma.

₁₁Ewe, ncamani, nina balimi,

nihlahlambe, batyali bomdiliya,

nangenxa yengqolowa nerhasi.

Ngenene isivuno samasimi sitshatyalalisiwe.

₁₂Umdiliya usuke woma khwahla;

kanti wona umkhiwane uswamile.

Oomirharnati, isundu, nom-apile,

suka yabharha yonk' imithi.

Nasebantwini imivuyo iphelile.

₁₃Ke nina, babingeleli, fakan' ezokufelwa nizile;

bhombolozani, balungiseleli baseqongeni.

Yambathani ezokuzila nasebusuku,

nditsho nina, balungiseleli bakaThixo wam,

ngenxa yeminikelo yeenkozo nethululwayo.

Kaloku yona inqamkile endlwini yoThixo wenu.

₁₄Bhengezani ithuba lokuzila;

ewe, miselani imbizo eyodwa.

Waqokeleleni amadod' amakhulu;

xa bebonke abemi beli lizwe

mabeze endlwini kaNdikhoyo uThixo wenu,

bakhale kuye.

₁₅Hay' ukoyikeka kwaloo mini!

Ewe, imini kaNdikhoyo isemnyango!

Yogaleleka ipheth' intshabalalo evela kuSomandla.

₁₆Kaloku kona ukutya suka kwanqanyulwa phambi kwamehlo ethu.

Asisathethi ke ngemivuyo nolonwabo –

alusekho nasendlwini kaThixo wethu.

₁₇Imbewu isuka ingunde phantsi kwamagade.

Udladla ngokwalo seludlakadlaka,

noozisele ngokwazo zidibekile.

Kaloku ingqolowa itshile.

₁₈Nâzo izilwanyana zigxwala,

imihlambi yeenkomo ikhohliwe.

Kaloku amadlelo azo akaphethe nto,

ukanti ke neegusha zixhwithekile.

₁₉Ewe, Ndikhoyo, ndibhenela kuwe.

Kaloku amadlelo ethu atshile;

nemithi yonke irhawuke yaphela,

kwanga ilenywa lidangatye.

₂₀Abhenele kuwe amarhamncwa nezilwanyana.

Kaloku imithombo yamanzi itshe qoko;

ewe, amadlelo asuke abharha.

₁Hlokomisan' ixilongo eZiyon;

hlaban' umkhosi kwintaba yam engcwele.

Mabankwantye bonke abemi beli lizwe.

Kaloku imini kaNdikhoyo isemnyango;

ayifikanga, koko igalelekile.

₂Ngumhla othi thsu, imini yesithokothoko;

lusuku olurhuqis' amafu, nditsho amafu amnyama,

imini enjengongcwalazi phezu kwentaba.

Nank' umkhosi omkhulu owomeleleyo!

Nowamanyange awuzange ube nje;

nowezizukulwana awusoze ube njalo.

₃Phambi kwawo kulenyez' umlilo;

ngasemva kudangazel' idangatye.

Phambili phaya umhlaba ngathi ngumyezo we-Eden,

kodwa emkhondweni wawo yinkangala.

Ubetha kungasindi nto konke-konke.

₄Mbonakalo yawo ngathi ngamahashe;

ewe, uphala oku kwawomkhosi.

₅Nanko utsiba-tsiba ezintabeni.

Yingxokolo engathi kukugaxaza kweenqwelo zokulwa,

ngathi kukunqanqaza komququ otshiswa ngumlilo.

Unqwa nomkhosi oqulele imfazwe.

₆Ewe, wona nguvela-barhwaqele;

phambi kwawo ubuso bezizwe buyambatsha.

₇Uhlasela okwamagorha;

ugwencel' iindonga okwamajoni;

ungqala phambili ungajika-jiki.

₈Ewe, awugxalathelani, uhlala uthe mbo;

nokuba sewubulawa loo nto ayiwuthibazi.

₉Usuka uphoseke phakath' esixekweni,

uqakathe phezu kwezo ndonga.

Usuka utsho phakathi ezindlwini

nangeefestile ngathi ngamasela.

₁₀Wakuvela suka kunyikim' umhlaba;

ke sona isibhakabhaka singcangcazele,

ilanga nenyanga zijike zibe mnyama,

ke zona iinkwenkwezi zitsho zifiphale.

₁₁UNdikhoyo uzongomisa ngelo lizwi,

endolosa phambi komkhosi wakhe.

Awakhe amabutho yinkungu nelanga;

ewe, yena uthotyelwa ngamagorha.

Hay' ubukhulu bemini kaNdikhoyo!

Awu, hay' ukoyikeka kwayo!

Yaz'ba ngubani na onokumelana nayo?

₁₂Ewe kaloku, utsho uNdikhoyo,

yena uthi: “Qalisani kwangoku.

Buyelani kum ngamxhelo mnye

ngokuzila, ngeenyembezi, nangesingqala.”

₁₃Ndithi sanukuzikrazula izinxibo,

koko zisoleni kukrazuk' iintliziyo.

Buyelani kuNdikhoyo uThixo wenu;

kaloku yena unesisa kwanemfobe,

uza kade umsindo,

yimvuze-mvuze ngobubele;

ewe, unebuyambo, akananqala.

₁₄Ngubani ke owaziyo?

Noko mhlawumbi angabuya asivele,

asithululele iintsikelelo –

umnikelo weenkozo kunye nothululwayo

uziswe kuNdikhoyo uThixo wakho.

₁₅Khanihlokomise ixilongo eZiyon.

Bhengezani umhla owodwa wokuzila;

ewe, qokelelan' ibandla ibe yimbizo.

₁₆Bahlanganiseni abantu,

niyihlambulule loo ntlangano.

Waqokeleleni amadoda amakhulu;

kananjalo qokelelani nabantwana,

nize naye nalowo usebeleni.

Nomyeni makalishiye igumbi lakhe,

aze nomtshakazi aphume entangeni.

₁₇Ababingeleli abalungiselela kwaNdikhoyo mabantywizise;

ewe, mabalile phakathi kwegumbi lokungena neqonga,

bathi: “Khawube nebuyambo, Ndikhoyo!

Abantu abalilifa lakho mabangabi sisigculelo.

Mabangabi ngundaba-mlonyeni wezizwe.

Abantu mabangathethi ngabo besithi:

‘Ud' abe phi na lo Thixo wabo?’ ”

₁₈*UNdikhoyo woba nekhwele ngelizwe lakhe,

abenzele inceba abantu bakhe.

₁₉UNdikhoyo wobaphendula athi:

“Ewe, ndiza kuninika ingqolowa,

newayini entsha, namafutha omnquma.

Ngenene niya kutya nihluthe,

ndingaze ndiphinde ndinenze intlekisa phakathi kwezizwe.

₂₀Ndosigxotha isibetho esivela ngasentla,

ndisidudulele kwinkangala yentlango.

Amabutho aphambili ndiwase kulwandle lwasempuma,

asemva wona ndiwase kolwasentshonalanga.

Hayi ke ukubopha kwevumba lazo!

Kuba kambe iziphakamisile ngokwenza izinto ezinkulu.

₂₁Musa ukoyika, mhlabandini;

ewe, yiba nemihlali wonwabe

ngenxa yemisebenzi emikhulu ayenzayo uNdikhoyo.

₂₂Sanukoyika nani, zilwanyana zasendle.

Kaloku amadlelo asentlango ayahluma,

imithi nayo ithwala iziqhamo zayo,

ngokunjalo umkhiwane nomdiliya uyavuza zizo.

₂₃Vuyani nani, bemi baseZiyon.

Yonwabani kuNdikhoyo uThixo wenu,

kuba uninike ngobulungisa imvula yasekwindla,

wanithululela izandyondyo zomvimbi ekwindla nasentlakohlaza,

natsho nadla ngendeb' endala.

₂₄Izanda ziya kuzala yingqolowa,

iifatyi ziphuphume yiwayini entsha namafutha omnquma.

₂₅Mna ndiya kunibuyekeza ngelahleko yeminyaka yeenkumbi –

nditsho umkhothululi, nomqikela, nomnqunquthi,

loo mkhosi wam omkhulu ndanithumela ngawo.

₂₆Niya kutya nizibethe zibe bomvu,

nitsho nilidumise igama likaNdikhoyo uThixo wenu

onenzele imimangaliso engaka.

Soze baphinde badeleke abantu bam nanini na.

₂₇Niya kuqonda ukuba ndinaye uSirayeli,

nazi ukuba ndinguNdikhoyo uThixo wenu,

niqonde ukuba akukho wumbi.

Ewe, soze baphinde badeleke abantu bam nanini na.”

₂₈“Kothi ke emva koko ndithulule uMoya wam kulo lonke uluntu,

bashumayele oonyana neentombi zenu,

amaxhego aphuphe amaphupha,

abafana babone imibono.

₂₉Ewe, nezicaka nezicakazana

ndiya kuzigalela ngoMoya wam ngaloo mihla.

₃₀Ndiya kwenza imiqondiso esibhakabhakeni nasemhlabeni,

kube ligazi, umlilo, nentshinyela yomsi.

₃₁Ilanga liya kujika libe bubumnyama,

inyanga ibe bomvu njengegazi,

phambi kokufika kwaloo mhla mkhulu woyikekayo kaNdikhoyo.

₃₂Kananjalo nabani na othe wabiza igama likaNdikhoyo uya kusindiswa,

kuba kaloku kwintaba iZiyon naseJerusalem kuya kubakho ukuhlangulwa,

njengoko atshiloyo uNdikhoyo –

nditsho ukuhlangulwa kwâbo babiziweyo nguNdikhoyo.”

₁“Ke kaloku ngaloo mihla,

ngalo kanye elo xesha,

ekuyibuyiseleni kwam iJerusalem noJuda

kwimeko yayo yangaphambili,

₂ndoziqokelela zonke izizwe,

ndizithobele kwintili kaYoshafati,

apho ke ndozigweba khona

ngenxa yelifa lam abantu bam amaSirayeli.

Kaloku bawasarhaze aziimbacu ezizweni,

bawahlula-hlula umhlaba wam.

₃Benze *amaqashiso ngabantu bam;

ngenxa yamahenyukazi bathengisa ngamakhwenkwe,

ngenxa yewayini bathengisa ngamantombazana,

khon' ukuze babe nento yokusela.

₉Le nto yivakaliseni ezizweni.

Ndithi hlaban' umkhosi.

Ewe, waxhokonkxeni amajoni.

Onke amadoda emfazwe makasondele ahlasele.

₁₀Amakhuba wajikeni abe ngamakrele,

izitshetshe zokuthena imithi zibe yimikhonto.

Negwala malithi: “Ndilikroti.”

₁₁Phuthumani, yizani nonke, zizwe ezijikelezileyo;

yizani niqokelelane apho.

Thoba umkhosi wakho, Ndikhoyo.

₁₂“Ke zona izizwe mazishukunyiswe

zingene kwintili kaJoshafati.

Ke mna ndohlala khona,

ndizigwebe iintlanga ezijikelezileyo.

₁₃Ewe, khawufake irhengqe;

kaloku isivuno sivuthiwe ngoku.

Ngena uxovule iidiliya;

sona isixovulelo sizele,

kananjalo nemiphanda iyaphuphuma.

Kaloku inkohlakalo yabo inkulu.”

₁₄Nâbo beyinyambalala yesihlwele phaya kwintili yesigqibo.

Kaloku imini kaNdikhoyo isemnyango;

ewe, iyifikele intili yesigqibo.

₁₅Loba mnyama ilanga nenyanga;

iinkwenkwezi zosuka zifiphale.

₁₆UNdikhoyo wobhavuma eZiyon,

izwi lakhe lizongome eJerusalem,

umhlaba nesibhakabhaka utsho ungcangcazele.

Ke abakhe bazimela ngaye uNdikhoyo;

ewe, yena ulixhadi labantu bakhe amaSirayeli.

₁₇“Ke kaloku nina notsho niqonde

ukuba mna *Ndikhoyo ndinguThixo wenu.

Ndaye ke ndihlala eZiyon,

ndawo leyo iyintaba yam engcwele.

IJerusalem yoba sisixeko esingcwele,

ingaze iphinde yoyiswe ziintlanga.

₁₈“Ngaloo mihla iintaba zovuz' iwayini entsha,

ke zona iinduli ziphalale ubisi,

iintlambo zonke zakwaJuda zimpompoze amanzi.

Kwindlu kaNdikhoyo kogqabhuk' umthombo,

kunkcenkceshelwe intili yaseShitim.

₁₉IJiputa yojika ibe yintlango,

iEdom ibe yinkangala ebharhileyo,

kuba zisuke zamgonyamela uJuda,

ezweni lakhe zaphalaza igazi elingenatyala.

₂₀UJuda uya kumiwa naphakade,

iJerusalem imiwe zizizukulwana ngezizukulwana.

₂₁Ityala labo legazi endilibambileyo mna ndiya kulixolela.”

Kaloku uNdikhoyo umi eZiyon.