Bible Reading Plan – Day 263

₈“Kambe ke, ukuba ibindim, bendiya kubhenela kuThixo,

ndiyaneke phambi kwakhe imeko yam.

₉Kaloku nguye owenza izigigaba ezingenakugoca-gocwa;

imimangaliso yakhe ayiphele ndawo.

₁₀Nguye onisa imvula emhlabeni,

amasimi awanyakamise ngamanzi.

₁₁Yena ngumphakamisi wabadelekileyo;

ke bona abasezinyembezini uyabathuthuzela.

₁₂Kaloku yena uyaliphuthisa icebo lesindwebi,

ize imizamo yaso ibuye nemband' esikhova.

₁₃Izilumko uzitsho zixakane nobuqhokolo bazo,

ize imizabalazo yazo yobuqhophololo ibhange ngesaquphe.

₁₄Kwakuba njalo ke kutsho kuhlw' emini kuzo;

kuthi kusemin' emaqanda, zona zitotobe ziphampathe ngathi kukwabhadakazi!

₁₅NguThixo obakhuselayo abahlelelekileyo ekutyholweni;

nguye obahlangula esandleni sabomeleleyo.

₁₆Ngoko ke likhona ithemba nakumahlwempu;

ke zona izikhohlakali zitsho zisikw' umlomo!

₁₇“Ewe, unenyhweba umntu olulekwa nguThixo;

ngoko ke sukuyidela ingqeqesho kaSomandla!

₁₈Kaloku yena uyenzakalisa, abuye abophe;

kanti kwayena uyabetha, abuye aphilise ngezandla zakhe.

₁₉Yena uyaphinda-phinda ukukuhlangula ezinkathazweni,

kanti ke ekugqibeleni akuyi kuba sachukunyiswa bubi.

₂₀Ngexesha lendlala uya kukuhlangula ekufeni;

ukanti emfazweni uya kukusindisa ekreleni.

₂₁Ngokunjalo uya kukukhusela kwintlebendwane,

ungabi naxhala ngexesha lonxunguphalo.

₂₂Unxunguphalo nendlala ziya kuba yimfeketho kuwe,

ungawaxhaleli namarhwamncwa ehlabathi.

₂₃Uya kunqophisana namatye asemathambekeni,

kubekho uxolo phakathi kwakho namarhamncwa asendle.

₂₄Umzi wakho uya kuhlala ukhuselekile,

nasesibayeni uthi wakukhangela ufike ziphelele.

₂₅Inzala yakho iya kuba yinyambalala,

isizukulwana sakho sinabe njengengca emhlabeni.

₂₆Uya kudla ubomi ude ukhokhobe,

nqwa nengqolowa engavunwayo lingekafiki ixesha.

₂₇“Uyabona, siziphicothile ezi zinto, yaye zinjalo;

yiva ke, uziqonde ubunyaniso bazo kuwe.”

₂“Akwaba iinkxwaleko zam beziveyishwe kakuhle,

iinzingo zam zalinganiswa esikalini.

₃Ubunzima bazo bebuya kudlula nakobentlabathi yaselwandle;

ewe, yiyo loo nto amazwi am asuke aba rhabaxa.

₄Kaloku iintolo zikaSomandla zindibinzile,

ubuhlungu bazo butyhutyh' umzimba;

izoyikiso zikaThixo zindiphahlile.

₅Ngaba likhe likhonye na iqwarha ikho ingca eluhlaza?

Khona, yona inkomo uthi inganxakama zikho iindiza?

₆Into emtyuba ingatyiwa na ngaphandle kwetyuwa?

Inayo na incasa incindi yomxoxozi?

₇Mna ukutya okunjalo andikuchukumisi;

ndingathi khe ndayenza loo nto kubuye.

₈Akwaba uThixo angandiphendula,

awufezekise umnqweno wam

₉wokuba uThixo avume ukundixusha,

asiyekele isandla sakhe, abunqamle ubomi bam.

₁₀Into enjalo ke ingandithuthuzela;

ewe, naphakathi kweentlungu ndingavuya ndichulumache,

kuba andizange ndaphikisana namazwi alowo uNgcwele.

₁₁“Ngaba ndisenawo na amandla okuqhubela phambili ndiphila?

Khona, siphelo sini sona eso ukuba ndingade ndinyamezele?

₁₂Bendililitye na kakade?

Ngaba ndisisinyithi?

₁₃Ngenene mna ngokwam andisenawo amandla okuzinceda,

futhi nempumelelo yam ndiphuncukene nayo.

₁₄“Intlungu yomntu imelwe kukukhathalelwa zizihlobo zakhe,

nditsho nokuba yena selekutyeshele ukumhlonela uSomandla.

₁₅Kambe amawethu anobuqhokolo,

afana nentlambo emanzi atshayo.

₁₆Iba namanzi amdaka anomkhenkce,

apho linyibilikela khona ikhephu,

₁₇kodwa lithi lakubalela aphele,

lakuba shushu asuke ome qoko!

₁₈Iinqwelo ziyaphambuka endleleni yazo, ziye kuyo,

kodwa zifike zife namthanyana kuba kusenkangala.

₁₉Iinqwelo zaseTema zikhangela amanzi,

nabahambi baseShebha baphunguza benethemba.

₂₀Kambe ke basuka badane ngenxa yelo themba labo,

kuba bathi bakuya kule ntlambo bafike baphoxeke.

₂₁“Ngoku ke nani ninjalo,

kuba nithe nakusibona isibetho endisifumeneyo

nasuka nathi rhubaxa noyika.

₂₂Ngaba ndikhe ndathi kuni: ‘Ndipheni into,’

okanye ndathi: ‘Khanindinyobele ubani ngaloo ndyebo yenu’?

₂₃Ngaba ndikhe ndathi: ‘Ndihlanguleni esandleni sotshaba,’

okanye ndathi: ‘Ndihlawuleleni koongalo-nkulu’?

₂₄Hayi ke, khanindifundise; ndothi cwaka!

Ewe, ndiboniseni apho ndiphambuke khona!

₂₅Kambe ke wona amazwi athe ngqo aluncedo;

ukanti ke ezi ngxoxo zenu ngaba ziphuhlisa ntoni?

₂₆Ngaba nifuna ukulungisa oko ndikuthethileyo,

amazwi omntu oselencamile niwenze intetho engumoya?

₂₇Nina nixolele ukwenza amaqashiso nangenkedama,

nisenge inzuzo nangesona sihlobo senu.

₂₈“Kambe ke ngoku khanindijongisise,

kuba andisoze ndinixokise ndijongene nani.

₂₉Ngoku ndiyanithandaza, khanibuyeke ubugqwetha;

sanukundisingela phantsi – ndililungisa kule nto.

₃₀Ngaba nithi kunesikhwa na ukuthetha kwam?

Nithi andisakwazi ukwahlukanisa phakathi kokubi nokuhle?”

₁“Ke bona ubomi bomntu yimbulaleko emhlabeni;

imihla yakhe ngumzabalazo onjengobomi bomqeshwa.

₂Imihla yakhe injengeyekhoboka elisoloko lilangazelela ukuhlwa;

injengeyomqeshwa olangazelela umvuzo wakhe.

₃Ewe, esam isabelo ziinyanga ngeenyanga zokulambatha;

mna ndabelwe ubusuku beenzingo.

₄Xa ndilalayo ndithi: ‘Yaz'ba kuya kusa nini na?’

Nobo busuku ke busuka bube bude gqitha,

ke mna ndibe ndimbola-mboleka kude kuse.

₅Umzimba wam wambethe iimpethu nothuli;

ulusu lona lucandekile, luyabhidla.

₆“Imihla yam ikhawuleza okomatshini wokuluka;

iya kufikelela esiphelweni ingaginyisi mathe.

₇Khawukhumbule ke, kuba ubomi bam bunjengomphunga;

amehlo am akasoze aphinde akubone okuhle.

₈Nâbo bandibonayo ngoku soze babe sandibona;

ndiya kuphel' emehlweni undijongile.

₉Njengokuqhabalakana nokunyamalala kwamafu

unjalo ofayo, akaphindi abuye.

₁₀Akaphindi eze ekhayeni lakhe,

angabi sazana nendawo yakhe.

₁₁“Hayi khona, andiyi kuthi cwaka!

Ndiya kuwuphalaza umva-ndedwa wam, ndikhale ndibindekile!

₁₂Ngani ke ukuba ude undimisele umlindi?

Ngaba ndilulwandle, okanye isilo solwandle?

₁₃Ndakulala ndiye ndicinge ukuba umandlalo wam wondithuthuzela,

ndithi ubuthongo bondithomalalisa.

₁₄Kodwa wena usuka undirhwaqelise ngamaphupha;

usuka undivingcele ngemibono.

₁₅Ndide ke mna ndikhethe ukukrwitshwa;

kanye ndinyula ukufa kunokuphila kulo mzimba wam.

₁₆Ewe kambe, ndidikiwe bobu bomi;

kakade andiyi kuphila ngonaphakade.

Hayi ndiyekeni, kuba ubomi bam bunjengomphunga.

₁₇“Yaz'ba uyintoni na umntu, le nto umxabise kangaka;

ngani ukuba umzondelele kangaka?

₁₈Ewe, yonke imihla uyamphicotha;

ngayo yonke imizuzu uyamvavanya.

₁₉Hayi kaloku, khawuthi gu kancinci;

khawundiyeke ndikhe ndiginy' amathe!

₂₀Ke ukuba ndiyona, ikukhathaza ngani loo nto, wena Malusi woluntu?

Ngani ukuba ndibe selisweni lakho kangaka?

Ngaba ndingumthwalo ongako kuwe?

₂₁Ngaba awungendixoleli na isono sam,

ubulibale ubutyala bam?

Kuba ke ngoku ndiza kulala kobandayo;

uthi undifuna ndibe ndingasekho!”

₂“Mfondini, koda kube nini ushwaqa,

usenza imbudede yamazwi afana nomoya obhudlayo?

₃Uthi uThixo angakujika okulungileyo?

Uthi uSomandla angabugqwetha ubulungisa?

₄Ukuba abantwana bakho bawaphule ummiselo wakhe,

yena ke ubawisele isohlwayo esibafaneleyo.

₅Into omawuyenze wena kukuzibika kuThixo,

ubuse umbongoze uSomandla.

₆Ukuba ungumntu onyanisekileyo omsulwa,

ngenene uya kukuva, akubuyekeze ngomzi wakho.

₇Ewe, ubunayo inkqubela ngaphambili,

kodwa ayinakulinganiswa nendyebo owoba nayo esiphelweni.

₈Khawuphonononge ulande imbali yemihla yamandulo;

phicotha ufunde kumava amanyange.

₉Kaloku thina singabayizolo, asazi nto,

nemihla yethu emhlabeni idlula njengesithunzi.

₁₀Ke bona baya kukululeka, bathethe nawe;

ewe, bangakuphokozela kuloo vimba wolwazi lwabo, bathi:

₁₁‘Ngaba ingaphuma na imizí apho kungekho mgxobhozo?

Uthi ingakhula ingcongolo apho kungekho manzi?

₁₂Zithi zingekalungeli kukhiwa,

zimbatshe kuqala kunezinye izityalo.’

₁₃Iba njalo indlela yabo bonke abamlibalayo uThixo;

ewe, ithemba lâbo bangamnquliyo uThixo liyadaka.

₁₄Kaloku bona bangqiyama ngentambo yesigcawu,

lisuke ke elo themba labo linqamke.

₁₅Bayama ngendlu yesigcawu, ibe ke yona ingaqinanga;

babambelela kuyo ngoku yona igqashu-gqashu.

₁₆Bahluma okwesityalo esinamanzi esibethwa yimitha yelanga,

sona esinwenwa siphinyele egadini.

₁₇Iingcambu zaso zibhijela amatye,

zibambelele kuwo.

₁₈Phofu ke uthi wakusincothula,

kungabi sabonakala ukuba sasikhe sakho.

₁₉Uyabona, injalo indlela yokukhula kwaso:

indawo yaso ithathwa sesinye.

₂₀“Ewe, uThixo akamlahli umntu othembekileyo,

kodwa akangeke azomeleze izandla zabenzi bokubi.

₂₁Ngoko ke úya kulubuyisela uncumo emlonyeni wakho,

nemilebe yakho ibobotheke yimincili.

₂₂Ke bona abakuthiyileyo baya kwambathwa lihlazo;

kanti ke yona imizi yabakhohlakeleyo iya kubhanga.”

₂“Ewe, ndiyazi ukuba kunjalo;

kambe ke umntu angaphumelela njani xa emi enkundleni noThixo?

₃Noba ungade uzimisele ukuxoxa,

awungebi nako ukuphendula nomnye kwiwaka lemibuzo yakhe.

₄Kaloku yena sisilumko esibalaseleyo ngamandla;

akukho mntu unokumelana naye aze aphumelele.

₅Kaloku yena neentaba ezi usuka azisiphule zingazi zona;

ewe, ngaloo ngqumbo yakhe usuka azibhukuqe.

₆Yena nomhlaba lo uyawugungxula,

neentsika zawo zitsho ziqhaqhazele.

₇Nelanga uthetha nalo litsho lingaphumi,

ke zona iinkwenkwezi uzigubungela zitsho zingaveli.

₈Nguye owawatwabululayo amazulu,

waza wandolosa phezu kwawo amaza olwandle.

₉Nguye umenzi weendidi zeenkwenkwezi,

oozibhere noomakroza, isilimela nomthala wasezantsi.

₁₀Yena ngumenzi wezinto ezinkulu ezingaphicothekiyo;

kanti nemiqondiso yakhe ayinakubalwa.

₁₁Nokuba selegqitha ngakum andinako ukumbona;

uthi tshe ndingaqondanga mna.

₁₂Khona selengade athathe into, ngubani ongamnqandayo?

Akekho nongabuzayo athi: ‘Wenza ntoni ke?’

₁₃Kaloku uThixo akabuyi ngamva ngengqumbo yakhe;

neentshaba zakhe ezazithelela uRahabhi isilo saselwandle wazinyhasha.

₁₄“Bendingubani ke mna ukuba ndingade ndiphendulane naye?

Khona, ndingawazuza phi amazwi okuxoxa naye?

₁₅Nditsho sendimsulwa, andingeze ndamxoxisa;

nto endingayenzayo kukuzibika ndimbongoze uMgwebi wam.

₁₆Nokuba sendizibika kuye, naxa angade andiphendule,

anditsho ukuba angakuva ukuzithethelela kwam.

₁₇Kaloku yena undintlitha ngenzwinini yesaqhwithi,

anditsho imivumbo ixananaze ngaphandle kwesizathu.

₁₈Akandiniki neli lokukhok' umoya ithuba,

koko unditsho ndanengcwangu.

₁₉Xa kuthethwa ngamandla, nguye onawo;

xa kuthethwa ngobulungisa, nguye onokundimangalela.”

₂₀“Ndimsulwa ndinjalo, kodwa ndigwetywa kwangumlomo wam.

Nangona ndingade ndibe andinabala, yena angandifumana ndinetyala.

₂₁Ewe, andinabala, kodwa andizibaleli ntweni;

nto nje ndikruqukile bobu bomi.

₂₂Kuba kaloku kuyafana;

yiyo loo nto ke ndithi:

‘Yena utshabalalisa bonke,

abamsulwa ngokunjalo nezaphula-mthetho.’

₂₃Isithwakumbe sithi sakuzisa ukufa

yena aphoxise ngaso isibetho sabamsulwa.

₂₄Ihlabathi lisezandleni zezikhohlakali;

ke bona abagwebi ubamfamekisile.

Xa ingenguye ke uthi ngaba ngubani?