40 DAYS – Time with God – Day 38

“Hayi ilishwa lomntu obek' ithemba emntwini,

akholose ngamandla ento eyinyama negazi,

abe entliziyweni enxaxhile kuNdikhoyo.

₆Loo mntu unjengetyholo lasentlango;

akanakuze abe nempumelelo.

Uya kuma ezinkqantosini, kumhlaba ongumqwebedu,

umhlaba onetyuwa, apho kungahlali mntu.

₇Hayi ithamsanqa lomntu othembela ngoNdikhoyo,

lowo ukholosa ngaye!

₈Unjengomthi otyalwe ngasemfuleni,

ongcambu zinabela emanzini.

Awoyiki naxa ilanga lishushu;

amagqabi awo ahlala eluhlaza.

Ngexesha lembalela awunaxhala;

uhlala uvelisa iziqhamo.

₉“Intliziyo yomntu inenkohliso ngaphezu kweento zonke.

Akukho nto inokuyinyanga,

kungekho bani uyiqondayo.

₁₀Ndim, mna Ndikhoyo, umgocagoci weentliziyo zabantu,

nomvavanyi weengcinga zabo.

Ulowo ndimvuza ngokuziphatha kwakhe,

ndimdlise iziqhamo zezenzo zakhe.”

₁₁Lowo uzuza ubutyebi ngobuqhetseba

ufana nesakhwatsha esiqandusela amaqanda angengawo awaso.

Uya kulahlekwa bobo butyebi eselula ngeminyaka,

ekugqibeleni abe sisityhamtyham, esingento.

₁₂Indawo yethu yokunqula libhotwe eliqaqambileyo,

elathi zinzi phezulu kwantlandlolo.

₁₃Nguwe, Ndikhoyo, ithemba lamaSirayeli.

Bonke abo bakushiyayo bohlazeka.

Bothi shwaka oku kwamagama abhalwe eluthulwini,

xa beshiya wena, Ndikhoyo.

Kaloku wena ungumthombo wamanzi obomi.

₁₄Ndiphilise, *Ndikhoyo, ndiphile qete.

Ndisindise, khon' ukuze ndisinde.

Kaloku nguwe udumo lwam.