To The Word – Day 102

₁“Thuthuzelani, bathuthuzeleni abantu bam,”

utsho kaloku uThixo wenu.

₂“Thethani kakuhle neJerusalem;

dandulukani niyixelele ukuba umzabalazo wayo ufezekile.

Kaloku izono zayo zixolelwe;

*uNdikhoyo uyibonelele ngaphezu kunobugwenxa bayo.”

“UNdikhoyo mhlahleleni indlela entlango;

uThixo wethu mgeceleni uhola kwelibharhileyo.

₄Zonke izigingqi mazidityelelwe,

iintaba neenduli zidilizwe zibe ngamathafa,

ke zona izixhobo zigqalwe zibe ziintili,

amageduka aletyelwe abe zizithabazi.

₅Ke ubungangamsha bukaNdikhoyo buya kutyhileka,

lonke uluntu lububone.

Kaloku lowo ngumlomo kaNdikhoyo.”

₆Ndeva ilizwi lisithi:

“Suka udanduluke uthethe.”

Ndibuze ndathi: “Ndithethe ndithini na?”

“Yithi: ‘Bonke abantu banjengengca;

ubomi babo bulingana nobeentyatyambo.

₇Kaloku ingca iyabuna, ivuthuluke intyatyambo

yakubethwa ngumoya kaNdikhoyo.

Ngenene uluntu nqwa nengca.

₈Ingca iyatshaza, yona ke intyatyambo ibune,

ke lona ilizwi loThixo wethu lohlala lihleli.’ ”

₉Phakama unyukele entabeni, wena Ziyon,

sigidimi seendaba ezimnandi.

Danduluka umemeze, wena Jerusalem,

mvakalisi weendaba ezimnandi.

Sukoyika, danduluka umemeze.

Yithi kwiidolophu zelakwaJuda:

“Nanko ke uThixo wenu.”

₁₀Kaloku iNkosi uNdikhoyo iza ngokomelela;

iya kutsho ngolawulo olungqongqo.

Kananjalo iphethe neziqhamo zomsebenzi wayo;

ewe, ihamba nebuyambo lemigudu yayo.

₁₁Yona njengomalusi iyawulondoloza umhlambi;

amatakane iwaqokelela iwafunqule,

ke zona ezanyisayo izithundeze.

₁₂Ngubani okhe alinganise amanzi ngethende lesandla,

okanye olinganisa isibhakabhaka ngesandla?

Mlinganiselo mni ongavalela uthuli lomhlaba,

isisiphi isikali sokulinganisa iinduli neentaba?

₁₃Ngubani ongaze amazi ncam uNdikhoyo,

ingubani khona omcebisayo?

₁₄Kakade uThixo lo ubhenela kubani,

ingubani ongamfundisa okusesikweni?

Ngubani ke omphokozela ulwazi,

aze ambonise indlela yobulumko?

₁₅Ngenene izizwe zifana nethontsi lamanzi ethungeni,

nqwa nothuli azivakali nasesikalini;

neziqithi ngokukwanjalo.

₁₆Amahlathi aseLebhanon akawanele umlilo,

neenyamakazi zakhona azilanele idini elitshiswayo.

₁₇Izizwe zonke azinto kuThixo;

yena akazazele nto konke-konke.

₁₈Angalinganiswa nabani na uThixo?

Khona, angafanekiswa nantoni?

₁₉Akafani nomfanekiso oqingqwa yingcibi,

uze utyatyekwe ngegolide ngumnyibilikisi,

uhonjiswe ngamakhonkco esiliva.

₂₀Ihlwempu elingenasiliva nagolide

lithatha umthi ongàdliwayo yimpehla,

lifune ichule lomchweli,

lona loqingqa umfanekiso ongashukumiyo.

₂₁Ngaba anazi na?

Ngaba zange nive na?

Zange nixelelwe na kwamandulo?

Anikuqaphelanga ukusekwa kwehlabathi?

₂₂Kaloku ladalwa ngulo ungqendeve esihlalweni

emajukujukwini ngaphaya kwesibhakabhaka;

kuye uluntu olu lunjengentothoviyane.

Ngumtwabululi-sibhakabhaka njengomkhusane,

asaneke njengentente yokuhlala.

₂₃Iinkosi uzitsho zigqush' eluthulini,

izithwala-ndwe azivuthulule zingabi nto yanto.

₂₄Zithi zingekatyalwa nokutyalwa,

ewe, zingekamili nokumila oku,

suka azibhudle ngomoya zibune,

isaqhwithi simke nazo njengomququ.

₂₅“Ngubani ke eningandilinganisa naye,

ingubani endingade ndifane naye?”

Uyabuza uThixo onguYedwa.

₂₆Khawujonge phezulu esibhakabhakeni;

zidalwe ngubani ezi zinto?

Lo uzikhokela njengomkhosi iinkwenkwezi

yena uyalazi nenani lazo.

Uzibiza ngamagama zonke ngazinye;

ewe, akanganganto amandla akhe,

ngoko akunakulahleka nob' ibe nye.

₂₇Ngani ke, Yakobi, ukuba ukhalaze,

nditsho wena, Sirayeli, ukuba uthi:

“UNdikhoyo akabuqondi ubume bam;

uThixo wam akandazeleleli nganto”?

₂₈Kanti ngaba awazi na?

Ngaba zange uve na?

UNdikhoyo nguThixo onguSonini-nanini;

yena ngumdali wehlabathi jikelele.

Yena soze adinwe atyhafe,

nengqiqo yakhe ayiphengululeki.

₂₉Yena ngumhlaziyi wâbo batyhafileyo,

umomelezi wâbo bangenamandla.

₃₀Kanti ke nolutsha luyadinwa lutyhafe,

abafana bakhubeke bawe,

₃₁kambe ke bona abakholosa ngoNdikhoyo

bosuka bahlaziyeke bomelele.

Bosuka bantinge baxel' ukhozi;

noba sebebaleka, soze badinwe;

ewe, baya kuhamba bangaze batyhafe.

₁“Yithini cwaka niphulaphule, ziqith' ezikude;

lungelani ukuxoxa, nina zizwe.

Sondelani nizithethelele;

yizani ke sihlangane, sinik' isigwebo.

₂“Ngubani lo uqhway' iqhaji empumalanga,

lo ulinik' indwe konke nje jikelele?

Nguban' olenza loyis' izizwe nezikumkani,

omkhonto wakh' uzenza zifane nothuli?

Iintolo zakhe zibatsho bathi saa,

basarhake okomququ emoyeni.

₃Libasukelisa libaleqe lula nje.

Asimendu! Ntaka yakwabani!

₄Yaz'ba ngubani na umphembi wale ntlekele?

Ngubani owasimiselayo esi sishiqi?

Mna *Ndikhoyo, yaba ndim kwasekuqaleni;

ewe, yoba isendim nasekugqibeleni.”

₅Iziqith' ezikude nazo zibonile;

ewe, iziphelo zomhlaba zitsho zarhwaqela zangcangcazela.

Nâzo ziqokelelana zisiza.

₆Ziyancedana esinye nesinye;

ewe, zikhuthazana ngelithi: “Yomelelani!”

₇Umchweli ukhuthaza umnyibilikisi,

nàlo ugudisa umfanekiso ukhuthaza lo uwudibanisayo.

Uthi: “Hayi, ngunonca!”

Batsho babethelele isikhonkwane, uqine nkqi umfanekiso.

₈“Ke wena, sicaka sam Sirayeli,

nditsho wena, ndlu kaYakobi,

wena uluhlanga endilunyulileyo,

uyinzala yesihlobo sam uAbraham.

₉Ndakulanda eziphelweni zehlabathi,

ndakubiza kwiindawo ezisekudeni,

ndaza ndathi: ‘Usisicaka sam.’

Andikubukulanga; ndakunyula.

₁₀Ngoko ke ndinawe, sukoyika;

ndinguThixo wakho, sukuphakuzela.

Ndiza kukomeleza ndikusize,

amandla am asindisayo akuxhase akukhusele.

₁₁“Ke bona abo bakusunduzayo baya kuhlaziswa;

ewe, abakulwayo soze babe nto.

₁₂Iintshaba zakho uya kuzifuna,

kambe ke sobe uzifumane.

Abalwa nawe bophel' emehlweni.

₁₃Mna ndinguNdikhoyo, uThixo wakho;

ndokugcina ndikomeleze,

ndithi kuwe: ‘Sukuphaphazela, ndiza kukunceda.’

₁₄“Ewe, mna Ndikhoyo ndithi:

‘Ubuthathak' unjalo, Yakobi,

nimbalwa ninjalo, Sirayeli,

kodwa sukoyika, ndiza kukusiza.

Mna Yedwa, Thixo kaSirayeli,

ndim okukhululayo.’

₁₅Ndokutsh' ube ngathi usisileyi sokubhula

esinangayiway' amazinyo amatsha.

Wozicol' iintaba uzivuthulule,

iinduli uzicole zibe luthuli.

₁₆Uya kuzijiwuza emoyeni,

ke won' umoya uzitsho ziphephetheke;

uqhwithelo lozithatha lumke nazo.

Ke wena utsho wonwatyiswe nguNdikhoyo,

undidumise mna Yedwa kaSirayeli.

₁₇“Abahlelelekileyo bam bofuna amanzi bancame;

sebekhothekile bona lunxano.

Ke mna Ndikhoyo ndosisabela isikhalo sabo –

mna Thixo kaSirayeli soze ndibalahle.

₁₈Ndogqabhuz' imilambo emqwebedini,

kutsho kumpompoz' imithomb' ezintilini,

intlango ndiyijike ibe yimigxobhozo,

umqwebedu utsho unkcenkcez' amanzi.

₁₉Entlango kokhul' imisedare,

ibe ngumngampunzi, umnquma, nemetile.

Elibharhileyo lokhula ipayini,

isipresi, nomgalagala.

₂₀Boyibona abantu le nto baqonde,

baqaphele bazi,

bathi nguNdikhoyo lo uyenzileyo.

Ewe ngenene, botsho baqonde ukuba oku kudalwe nguYedwa kaSirayeli.”

₂₁“Nina *zithixo zeentlanga, ethe ubungqina benu;” utsho *uNdikhoyo.

Ewe, uKumkani kaSirayeli uthi: “Khaniyibeke apha ingxoxo yenu, sive.

₂₂Yizani kaloku, xelani izinto ezizayo;

chazelan' inkundla iziganeko zamandulo;

ewe, zichazeni nentsingiselo yazo.

₂₃Khanisixelele ngekamva kaloku;

khona nathi sotsho sithi ningoothixo.

Yenzani noba yentle okanye ebuhlungu;

nathi sitsho sirhwaqele, soyike.

₂₄Okokwenu nina niyinkunkuma,

nemisebenzi yenu yimfitshi-mfitshi.

Bangamasikizi abo banichongayo.

₂₅“Ke mna ndixhokonxe umfo wasentla; uyeza –

ondihloniphayo nanko evela empumalanga.

Iziphathamandla uzixovula ngathi ludongwe,

ngathi ngumbumbi exonxa udongwe.

₂₆Le nto ngubani oyazise kwantlandlolo kuni,

owasilumkisayo ukuze siningqinele?

Akukho namnye wakha wayixela,

engekho nowakha wayithi thupha.

₂₇Ndim mna kuqala owayixelelayo iZiyon,

ndathi: ‘Nâbo besiza.’

Ndathumela isigidimi eJerusalem,

umvakalisi weendaba ezimnandi.

₂₈Ndakuzikhangela ke izithixo ezo

zonke ndifika zisik' umlomo,

kungekho nasinye sinako ukundiphendula.

₂₉Zonke ziyimfeketho nje.

Hayi, azinakwenza nto mpela-mpela;

ngamabhetye-bhetye nje emifanekiso.”

“Nasi isicaka sam endisixhasayo.

Yena ngumnyulwa wam ondikholisayo;

ndimthe jize ngoMoya wam,

izizwe zonk' uziphakel' ubulungisa.

₂Yena akakhwazi amemeze;

hayi, akadanduluki ezitalatweni.

₃Ingcongolo ecekethekileyo soze ayaphule,

nesibane esilozisayo soze asicime,

koko uphak' ubulungisa ngokunyaniseka.

₄Yena ke soze atyhafe adangale,

de aphak' ubulungisa ehlabathini;

nezizw' ezikude zilindel' umthetho wakhe.”

₅Nalu udaba lukaThixo uNdikhoyo,

umdali owatwabulula amazulu;

nguye owalaneka ihlabathi nako konk' okwalo;

abemi balo wabaphakel' ubomi,

abantu balo wabanik' ukuphefumla:

₆“Mna Ndikhoyo ndikubizile;

ewe, ndingothembekileyo.

Kaloku ndosoloko ndinawe,

ndikulondoloze,

ndikwenze umnqophiso nabantu bam,

ube kukukhanya ezizweni.

₇Wena uza kuvula amehlo eemfama;

nguwe oza kukhulula amabanjwa;

nguwe oza kuvula intolongo emnyama.

₈“Mna *ndinguNdikhoyo – igama lam ncakasana.

Ubungangamsha bam andinikisi ngabo;

udumo lwam aluzuzwa *yimifanekiso enqulwayo.

₉Zinto endazixelayo zenzekile,

futhi nezintsha ngoku ndiyazibhengeza;

ewe, ndizixela zingekathungululi.”

₁₀Ntyilozani niculele *uNdikhoyo ingoma entsha.

Malimdumise limbonge ihlabathi jikelele;

nditsho nani nonke abahamba phezu kolwandle.

Mazingathi cwaka nezilwanyana zolwandle;

nezikud' izizwe mazibonge zibongisele.

₁₁Mayidumise nentlango nezixeko zayo;

nabaseKedare mabadumise uThixo;

nabaseSela mabamemelele ngemincili;

ewe, mabamemeze naphezu kweentaba.

₁₂Nabo bemi kwizizwe ezikude

mabamdumise uNdikhoyo.

₁₃UNdikhoyo yena ufunza njengegorha;

yena selequle wada waligangatha.

Nankw' esitsho ngentlaba-mkhosi,

nto leyo idiza ukutshatshela kwakhe.

₁₄*UNdikhoyo uthethe wathi:

“Kaloku sekumzuzu ndithe cwaka;

suka ndadl' imu ndazibamba.

Ngoku ke okomfazi osikwa yinimba

ndozibhija-bhija ndide ndibhonge.

₁₅Iinduli neentaba ndosuka ndizibhulule,

okwakuyingca nemithi ndikomise.

Imilambo ndoyibharhisa yome khonkqo,

imigxobhozo nezadunge zitshe khothe.

₁₆Iimfama ndozihambisa ngeendlela ezingazaziyo;

ewe, ndozikhokela ngomendo ongaqhelekanga.

Kubo ubumnyama ndobujika bube kukukhanya;

iingxondorha zojika zibe ngamathafa.

Ezo zinto ndiya kuzenza;

futhi ke soze ndizityeshele konke.

₁₇Ke bona abakholosa *ngemifanekiso,

abo bayinqulayo besithi: ‘*Ningoothixo bethu,’

ngenene baya kuphoxeka bahlazeke.”

₁₈*UNdikhoyo uthethe wathi:

“Khaniphulaphule ke, nani zithulu;

khangelani nibone, nani zimfama.

₁₉Kakade ngubani oyimfama kunesicaka sam?

Sithulu saphi esidlula isigidimi sam?

Ngubani oyimfama okwalowo ungowam;

nditsho oyimfama njengesicaka sikaNdikhoyo?

₂₀Ewe, ubonile kambe, Sirayeli;

nto nje ayikuncedanga nto loo nto;

uvile kambe nangeendlebe zakho,

kodwa suka awaphulaphula.”

₂₁UNdikhoyo othembekileyo yena ulangazelel' ukunceda;

imfundiso yakhe uyayiqaqambisa.

₂₂Kambe ke aba bantu zizisulu zokuxhatshazwa;

sebatshixelwa kwamnyama-ndawo,

bade baya kufihlwa ezintolongweni.

Ziindwayi ezingamaxhob' ukuxhatshazwa;

ziintw' ezingenabani wakuzihlangula.

Akakho othi: “Godukani ngoku.”

₂₃Yaz'ba ngubani na ozimiseleyo ukuphulaphula

ukuze aqonde kwixa elizayo?

₂₄Nguban' ophise ngoYakobi kubaphangi,

onikele ngoSirayeli kubaxhaphazi?

IkwanguNdikhoyo lo sikreqe kuye,

sisuke asahamba ngendlela yakhe,

suka asaphulaphula simthobele.

₂₅Suka ke wavulela umsindo wakhe,

ukuze thina sidad' emfazweni.

Utsho ngomsind' odangazelayo,

koko uSirayeli tu ukuqonda;

suka wavaleka mpela-mpela,

akahoya nokuhoya.

“Uze ungaxhali wena, ndikuhlawulele;

ndikubize ngegama, ungowam ncakasana.

₂Noba sewucand' emanzini,

mna ndiya kuba nawe;

noba sowuwela imilambo,

ayisoze ibe nako ukukukhukulisa;

nditsho sowucand' emlilweni, soze urhawuke;

amadangatye akanakukutshisa wena.

₃Kaloku mna Ndikhoyo ndinguThixo wakho,

uYedwa kaSirayeli, uMhlanguli wakho.

Ndinikezela ngeJiputa ukukuhlawulela;

iKushe neSebha zothath' indawo yakho.

₄Kum uxabisekile ke kambe;

yeka elo wonga, andikuthandi ngako!

Ndincam' izizwe ngenxa yakho;

ndinikezel' iintlanga, ndizuze wena.

₅Uze ungaxhali, ndinawe mna;

inzala yakho ndoyiqokelela empumalanga,

nina ndiniphuthume nasentshonalanga.

₆Kwelasentla ndothi: ‘Bakhulule bagoduke,’

kwelasezantsi ndithi: ‘Ungabathinteli.’

Oonyana bam babuyise kwelikude,

neentombi zam eziphelweni zehlabathi,

₇nditsho wonke umntu obizwa ngegama lam,

wonke endamdalela udumo lwam,

wonke endambumbayo ndamenza.”

₈Yiza nâbo bantu bangaboniyo benamehlo,

uze nâbo bangaphulaphuliyo beneendlebe.

₉Zibizeni zonke izizwe;

mazihlanganisane iintlanga.

*Koothixo bazo nguwuphi owayixelayo le nto yenzekayo namhlanje,

wasazisa nangezinto ezenzeke mandulo?

Ewe, mazize nawazo amangqina,

khon' ukuze abevayo bathi: “Axel' inyaniso.”

₁₀“Ke nina ningamangqina am,” utsho uNdikhoyo,

“izicaka zam endazinyulayo,

ukuze nindazi nikholose ngam,

niqonde ukuba ndinguye endinguye.

Ngaphambi kwam akukhange kubekho thixo;

ewe, yaye engasoze abekho.

₁₁Mna ndim uNdikhoyo,

ndim ndedwa ohlangulayo.

₁₂Mna andingothixo wasemzini kuni.

Kaloku ndaxela, ndahlangula, ndavakalisa.

Nina ngokwenu ningamangqina am ukuba ndinguThixo,”

utsho uNdikhoyo.

₁₃“Ewe, bendingokhoyo kwamandulo;

akukho kuphuncuka esandleni sam;

endikwenzayo akujikwa mntu.”

₁₄*UNdikhoyo uMkhululi wenu,

yena uYedwa kaSirayeli, uthi:

“Ngenxa yenu ndothumela eBhabheli,

atsho amaKaledi asabe ngezo nqanawa zawo zeqhayiya.

₁₅Mna ndinguNdikhoyo, uYedwa wenu,

uMdali noKumkani wakho, Sirayeli.”

₁₆Utsho uNdikhoyo,

umavul' indlela enqumla elwandle,

nditsho indlela ecanda kumsinga olephuzayo;

₁₇umkhosi wamagorha wawurholela enzonzobileni,

uwonke nje iinqwelo namahashe;

wafadalala, soze uphinde uthini,

wafuthaniselwa mpela njengekhandlela:

₁₈“Kambe ke sanukubambelela kwisiganeko sezolo;

hayi bo, sanukunokoza ezamandulo.

₁₉Khangelani ke, ngoku ndenza entsha;

ewe, seyisenzeka, nani niyayibona.

Ndiza kuvul' indlela enkangala,

kutsho kuqukuqele imilambo entlango.

₂₀Neenyamakazi ngokwazo zondihlonela,

oodyakalashe neenciniba zindincome,

xa sendimpompozis' amanz' entlango,

kubalek' imilambo enkangala,

khon' ukuze lusel' usapho lwam,

nditsho usapho olukhethiweyo,

₂₁bantu abo ke ndazidalelayo,

khon' ukuze bandidumise.”

₂₂*UNdikhoyo uthi:

“Suka ke wena, Yakobi, akwandinqula;

ewe, suka akwaziduba ngam, wena Sirayeli.

₂₃Akuwenzelanga mna amadini atshiswayo;

ewe, akundiwonganga ngeminikelo.

Phofu akuxhanyulwanga ndim ngamadini;

andikukhathazanga nangaziqhumiso.

₂₄Akundenzelanga siqhumiso sivumba limnandi,

ungandanelisanga nangamanqatha ezilwanyana;

suka wandisinda ngezono zakho,

wandikruqula ngemikhuba oyenzayo.

₂₅“Ukanti mna ndim ozisusayo izono zakho.

Ndenjenjalo ngenxa yesidima sam;

ukundivukela kwakho sobe ndibe sakukhumbula.

₂₆Yiza ke undimangalele;

yiza kaloku sixoxe,

ukuze kucace onetyala.

₂₇Kaloku ukhokho wenu wôna,

neenkokheli zenu zandivukela.

₂₈Mna ndozihlazisa izithwala-ndwe zesibingelelo senu,

ngoko ke uYakobi ndomzisela intshabalalo;

ewe, amaSirayeli ndiwayekele abe sisigculelo.”

“ ‘Naso isigidimi sam esiya kukwandulela,

sikugabulele izigcawu.’

₁₇“ ‘Sanombelela, naza nina anaxhentsa;

sanihlabelela ingoma yesililo, naza nina analila!’