To The Word – Day 125

₂Koda kube nini na, *Ndikhoyo,

ndidanduluka ndisithi: “Nceda!”

ube wena uthe cwaka?

Koda kube nini na ndizibika kuwe ndisithi: “Ugonyamelo!”

ube wena ungahlanguli?

₃Yini na ukuba undibonise inkohlakalo?

Ngani ukuba ujongane nobugwenxa?

Naku sendiphahlwe yimbubho nogonyamelo;

imbambano nesidube-dube zixananazile.

₄Okwakungumthetho sekuyingxwelerha;

ke bona ubulungisa abuvakali ndawo.

Izikhohlakali zidobelel' amalungisa;

ke bona ubulungisa buyagqwethwa.

₅“Khanizikhangele izizwe nibukele:

ewe, nosuka nikhwankqiswe,

kuba kuyo le mihla yenu ndiza kwenza isimanga,

into eningasoze niyikholelwe noba ningade niyibaliselwe.

₆Kaloku ndiza kuvusa amaKaledi,

uhlanga olugenalusini noluzizityhuthu-tyhuthu,

izinto ezilityhutyha ngobubanzi balo ilizwe,

zithimbe imizi engeyoyazo.

₇Hayi kambe ukoyikeka kweso sizwe!

Zizinto ezenza unothanda;

ewe, aphuhlisa isidima sawo.

₈Ziintw' ezimahashe ashiy' ihlosi;

oyikeka ngaphezu kweengcuka zamarhatya.

Iinkweli-mahashe zawo zifunz' emsini;

ewe, ngabafo abaphuma ekudeni.

Ziintw' ezirhiwula ngathi lukhozi,

₉zifike zizele lugonyamelo;

izinto ezizilahlela mpela kwinjongo yazo,

ziqokelel' intimbo ngathi yintlabathi.

₁₀Iikumkani ahlekisa ngazo;

bona abalawuli ayabagcolodela.

Ke zona iinqaba awazazele nto;

enza iinduli zokuhlasela azithimbe.

₁₁Asisitshu esigqotsa njengomoya;

ngoonomatyala abanqula amandla abo.”

₁₂Akunguye na owamandulo, *Ndikhoyo,

Thixo wam, wena Yedwa wam?

Ke thina asiyi kufa.

Ndikhoyo, amaKaledi uwamisele ukuze usigwebe ngawo;

Ngxondorha yam, wena uwabekele ukusohlwaya ngawo.

₁₃Kaloku amehlo akho amsulwa,

akangede ajongane nobubi,

ungenako nokunyamezela ubugwenxa.

Ngani ukuba ubabukele abakreqi?

Kutheni wathi cwaka xa kunje,

xa izikhohlakali ziginya abantu abangamalungisa kunazo?

₁₄Kutheni abantu ubafanisa neentlanzi?

Ngani kuwe babe njengezinambuzane ezingenamlawuli?

₁₅Kaloku xa bebonke amaKaledi abatsala ngehaki;

ewe, ababambisa ngomnatha.

Nango ebaqokelela ebarhuqa,

nto leyo iwavuyisa ngochulumacho.

₁₆Loo mnatha ke awenzela amadini,

umnatha otsalwayo awenzele isiqhumiso.

Kaloku ethe gcobho nje, ngulo mnatha;

ngenxa yawo atya ooni nooni.

₁₇Ngaba ohlala eqongqotha umnatha,

etshabalalisa izizwe engenalusini?

₁Ndophuma ndime emboniselweni yam,

ndothi ngxishi phaya enqabeni,

ndibonisele ndive oko akuthethayo kum,

nempendulo yakhe kwisimangalo sam.

₂*UNdikhoyo undiphendule esithi:

“Wubhale lo mbono –

wukrole ngokucacileyo emacwecweni,

ube nokufundwa nangogqitha ebaleka.

₃Lo mbono ubhekiselele kwixesha elimisiweyo,

kwaye uxhinele ixesha lesiphelo,

ibe ke awuyi kuphosisa.

Noba ngathi uyalibazisa, wulindele;

ewe, uya kufika ngokuqinisekileyo ungenakuthintelwa nto.

₄“Uyabona, lowo ukhukhumeleyo unentliziyo embi enxaxhileyo;

ke yena olilungisa wophila ngokuthembeka kwakhe.

₅Yona iwayini iyakhohlisa;

umntu imenza azidle angazinzi.

Sisinyolu-nyolu esikhamise njengengcwaba,

nqwa nokufa soze ahluthe,

nokuba uzihlanganisela kuye zonke iintlanga,

azibuthele kuye izizwe zonke.

₆“Abazi kuphoxisa ngaye kodwa,

bahlekise ngaye bemenza isigculelo,

besithi: ‘Mawoo ke, maqokelel' okungekuko okwakho,

wena ozityebisa ngokuphanga impahla ekubanjiswe ngayo!

Yaz'ba koda kube nini na kunje?’

₇Abanamatyala kuwe bosuka bakuvukele ngequbuliso;

bokujikela bakutsho ungcangcazele,

ibe nguwe kanye lowo uphangwayo.

₈Kaloku uxhaphaze izizwe ezininzi;

wena ke woxhatshazwa ngamasalela azo.

Kaloku uliphalazile igazi lomntu;

ewe, uyitshabalisile imihlaba,

wabhuq' iidolophu nabemi bazo.

₉“Mawoo kowakha umzi ngenzuzo yobuqhophololo,

ayimise indlu yakhe kwiindawo eziphezulu

ukuze asinde nakweyiphi inkxwaleko.

₁₀Uzifuthele imbubho izizwe ezininzi,

nkqu nendlu yakho wayigalela ngehlazo,

wabeka ubomi bakho esichengeni.

₁₁Amatye odonga osuka abhomboloze,

imiqadi yophahla ithelele.

₁₂“Mawoo kowakha isixeko ngokuphalaza igazi,

kulowo useka iidolophu ngobugwenxa!

₁₃Akatshongo na uNdikhoyo uSomandla

ukuthi imigudu yeentlanga lilifa lomlilo?

Nezizwe ke zifumana zibulaleka.

₁₄Ke wona umhlaba uya kuphuphuma kukubuqonda ubungangamsha bukaNdikhoyo,

okwamanzi agubungele ulwandle.

₁₅“Mawoo ububi bomntu oseza ummelwane wakhe,

lowo umkhelela utywala kumphanda wakhe,

amseze ade ayayatheke kukunxila,

aze ke abukele ihlazo lobuze bakhe.

₁₆Uya kugutyungelwa lihlazo, ingebubo ubungangamsha.

Nawe sela unxile ugxadazele.

Iyahamba ibhekile yomgwebo kaNdikhoyo;

yofika nakuwe,

ubungangamsha bakho bugutyungelwe lihlazo.

₁₇Ugonyamelo olwenze eLebhanon lokufikela;

uya kunkwantya yimbubho oyenzele izilwanyana.

Kaloku uliphalazile igazi labantu;

ewe, uyitshabalalisile imihlaba,

wabhuq' iidolophu nabemi bazo.

₁₈“Unaxabiso lini umfanekiso,

into eqingqwe yingcibi?

Sinceda ntoni isithixo esifundisa inkohliso?

Umenzi waso uqamela ngobuchule,

aze enze into engathethiyo.

₁₉Mawoo kothi emthini: ‘Vuka!’

othetha nelitye elifileyo, athi: ‘Phakama!’

Ungakufundisa ntoni umfanekiso,

into etyatyekwa ngegolide nesiliva?

Hayi, ayinamphefumlo tu!

₂₀Ke yena uNdikhoyo usendlwini yakhe engcwele;

malithi cwaka phambi kwakhe lonke ihlabathi.”

₂*Ndikhoyo, ndiluvile udaba olungawe;

ewe, ndithe khamnqa zizenzo zakho.

Nakule mihla yethu khawuhlaziye loo misebenzi yakho yamandulo;

ewe, ukusebenza kwakho

makubonakale nakule yethu iminyaka.

Nokuba unomsindo, mus' ukuyilibala inceba yakho.

₃UThixo uyeza ephuma eTeman;

uYedwa uvela kwintaba iParan.

Ubuqaqawuli bakhe bambathisa amazulu;

ihlabathi lizele ludumo lwakhe.

₄Ukuqaqamba kwakhe kunjengokukhanya;

isandla sakhe siphanjwa yimitha;

azimel' apho amandla akhe.

₅Yaba sisibetho phambi kwakhe;

emkhondweni wakhe wee chu ubhubhani.

₆Uthi angema lishukum' ihlabathi,

azijonge zitsho zinkwantye izizwe.

Iintaba zamandulo ziyaqhaqhamba;

iinduli zakudala zona ziyatshona.

Ewe, le yindlela yakhe yasephakadeni.

₇Ndibona iintente zakwaKushan zisenkathazweni,

izikhuselo zelizwe lakwaMidiyan zingcangcazela.

₈Ucatshukiswa yimilambo na, Ndikhoyo?

Ngaba uqunjiswa ziintlambo na?

Ngaba wenziwa umsindo lulwandle na,

le nto uqhuba amahashe akho nje,

ukhwele kwiinqwelo zakho zoloyiso?

₉Wena utyhila isaphetha sakho,

uziqinise ngeziqalekiso iintolo zakho,

ihlabathi uliphambe ngemilambo.

₁₀Iintaba zithi zingakubona zibhinyalaze,

imisinga yamanzi iqukuqele.

Ke zona iinzonzobila ziyagquma;

amaza ayalatyuza okwezandla eziphakanyisiweyo.

₁₁Zithi zakumenyez' iintolo zakho ezikhawulezayo,

wakuba umkhonto wakho umenye-menyeza,

suka lingabonakali ilanga nenyanga esibhakabhakeni.

₁₂Ihlabathi ulicanda unengqumbo,

nezizwe uzinyhasha unomsindo.

₁₃Uphuma uye kubahlangula abantu bakho,

ukuze usindise umthanjiswa wakho.

Uyaludiliza uphahla lomzi wabakhohlakeleyo,

kutyhileke iindonga kuye kutsho kwilitye lesiseko.

₁₄Uyigwaza ngomkhonto wayo inkokheli,

bakuba abomkhosi wayo bephume okoqhwithela beze kusisarhaza,

bezidla ngathi bobaqwenga ngasese abahlelelekileyo.

₁₅Ugxampuza elwandle ngamahashe akho,

aze ayaluzele amanzi amaninzi.

₁₆Ndithe ndakuva satsho saxuxuzela isisu sam,

imilebe yatsho yabebezela;

amathambo atsho angenelwa yimpehla,

nemilenze yam yasuka yagevezela.

Kambe ke ndowulinda ngomonde umhla wenkxwaleko;

nditsho umhla oya kufikela olu hlanga lusihlaselayo.

₁₇Noba ungade ungadubuli umkhiwane,

umdiliya ungabi nazo neziqhamo,

nokuba awungevelisi nto umnquma,

namasimi ngokwawo angabi nasivuno,

zingade zingabikho iigusha esibayeni,

nobuhlanti bungabi nazo nazinkomo,

₁₈ewe, khona kungade kube njalo,

kodwa mna ndochwayita kuNdikhoyo,

ndibe nemihlali kuThixo ondisindisayo.

₁₉Amandla am nguMhlekazi uNdikhoyo;

uzenza iinyawo zam zibe njengezenxala;

ngaye ndihamba kweziphezulu iindawo.

₂*UNdikhoyo nguThixo onekhwele nophindezelayo.

UNdikhoyo ngumbuyekezi; yena ngumalawul' inqumbo.

Ewe, uyaziphindezela kwabamchasayo;

ingqumbo yakhe ihlala ihleli kwiintshaba zakhe.

₃Umsindo kaNdikhoyo uza kade,

kodwa ke yena ngumandla-makhulu.

Umntu owonileyo akaphuncuki kwisohlwayo sakhe.

Indlela yakhe sisivungu-vungu noqhwithela;

amafu luthuli lweenyawo zakhe.

₄Ulwandle ulukhalimela lome qoko,

imilambo itshe ikhotheke.

IBhashan neKarmele iyatshaza;

iintyatyambo zaseLebhanon ziyeketheke.

₅Phambi kwakhe iintaba ziyaqhaqhamba;

ke zona iinduli zitsho zinyibilike.

Akuvela umhlaba uyarhwaqela,

ngokunjalo nehlabathi nabemi balo.

₆Ngubani onokumelana nengqumbo yakhe,

ingubani onokujongana nomsindo wakhe ovuthayo?

Ingqumbo yakhe iphokoka njengomlilo;

phambi kwakhe namawa ayaqhaqheka.

₇Ewe, uNdikhoyo ulungile:

ungumqolomba ngamaxesha eenkathazo;

ubakhathalele abo bathembele kuye.

₈Ngeempuphuma ezikhukhulisayo uyayigubungela iNiniva,

aye kuzitshonisa ebumnyameni iintshaba zakhe.

₉Nimjikeleza ngantoni uNdikhoyo?

Wosuka yena anitshabalalise;

inkathazo soze iphindelele.

₁₀Noba sebebhijeleke okobobo,

noba sebemanzi ngokwamanxila,

bofana nomququ owomileyo,

bovutha baphele kuthi nya.

₁₁Apho kuwe kuthe gqi umfo

owenzela uNdikhoyo ubugwenxa,

umfo ofutha inkohlakalo.

₁₂Utsho uNdikhoyo ukuthi:

“Nangona bomelele beyinyambalala,

baya kunqanyulwa bathi shwaka.

Nangona ndakubandezelayo, Juda,

ngoku andiyi kuphinda.

₁₃Idyokhwe yabo ndiza kuyaphula;

ewe, ndoyisusa entanyeni yakho,

ndiziqhawule iimbophelelo zakho.”

₁₄UNdikhoyo umisele umyalelo ngawe, Niniva:

“Wena akuyi kuba nasizukulwana;

igama lakho aliyi kuhlwayeleka.

Ndoyitshabalalisa imifanekiso eqingqiweyo netyhidiweyo

apho kuloo ndlu yothixo wakho.

Sendikumbela ingcwaba,

kuba uphuthile.”

₁₅Khawukhangele phaya ezintabeni;

nazo iinyawo zalowo uzisa iindaba ezimnandi,

lowo uvakalisa uxolo.

Xhamlani imibhiyozo yenu, maJuda;

zifezekiseni izibhambathiso zenu.

Anisayi kuphinda nihlaselwe sisikhohlakali;

sona sitshatyalaliswe kwaphela.

₁Nanko umchitha-chithi esiza, Niniva!

Khusela inqaba yakho!

Nendlela mayihlale yalusiwe.

Xhoba uhlale ugcisile.

Yomelela uzimisele kangangoko!

₂*UNdikhoyo uyasibuyisa isidima sikaYakobi;

ewe, uyasibuyisa isidima sikaSirayeli,

nakuba iintshaba zambhukuqayo,

zatshabalalisa nesidiliya sembala.

₃Amakhaka amajoni akhe abomvu;

ziinto ezivathe ngezimsobo.

Iinqwelo zawo ziyamenyezela

mhla sekusithiwa lifile;

alekuza ngemikhonto.

₄Nazo iinqwelo zigaleleka ezintilini,

zibetha zibuyelela emathafeni,

zimenyeza ngathi zizibane,

ziqhwanyaza ngathi yimibane.

₅Izinxiba-mxhaka ziyabizwa;

zihamba zigxalathelana.

Nazo zigaleleka kudonga lwesixeko;

ewe, zitwabulula ikhaka lokuzikhusela.

₆Gengelele – avulwa amasango omlambo!

Hi-i-i – lawa ibhothwe!

₇Kumiselwe ukuthinjwa kweNiniva;

izicaka zayo nazo zililisela.

Zitsho ngozungu ngathi ngamahobe,

zibek' izandl' entloko.

₈INiniva suka yanjengechibi elimanzi atyhobozayo.

Bathi: “Kahleni, kahleni!”

kodwa abanyeki nokunyeka.

₉Nantso isiliva, zithathele.

Zenzele, nantso negolide.

Hayi, asipheli esi sitha;

ubutyebi yimfumba koovimba.

₁₀Bayivuthulule bayithimba bayibhodloza.

Waphukile umoya wabantu;

suka bangenelwa yingevane;

ewe, babanjwe kukungcangcazela,

ubuso butsho bambatsha.

₁₁Iphi ke indlu yengonyama?

Siphi isikhundla apho ebesondlelwa khona amathole,

apho bezihamba khona iinkunzi neemazi namathole,

zingaphazanyiswa nto?

₁₂Ingonyama iwazingelele amthole ayo,

oogxa bayo yabaqwengela amaxhoba;

imingxuma yayo iyizalise ngenyama,

isikhundla sayo siphuphuma okuqwengiweyo.

₁₃Nanku umlomo kaNdikhoyo onamandla onke:

“Uyabona, ndikuchasile.

Iinqwelo zakho zokulwa ndozifaka umlilo;

iingonyama zakho eziselula zodliwa likrele.

Ndoliphelisa ehlabathini ixhoba lakho;

ilizwi lezigidimi zakho soze libuye livakale.”

₁Mawoo, sixekondini samagazi,

ntondini ephuphuma ubuxoki,

into emaxhoba maninzi kunene,

ekuxhaphaza kungenalo nekhefu!

₂Naso sihlwahlwaz' isabhokhwe,

atsho akraxalaza namavili.

Ewe, ayagqabadul' amahashe;

zigoqoza ngamandla iinqwelo.

₃Umkhosi wabamahashe ugalelekile,

utsho ngaloo makrele akhazimlayo.

Hayi ukumenyezela kwemikhonto!

Ewe, kujub' ugodo ngapha nangapha.

Hayi, akuzidumbu zibelekene!

Yinyambalala imizimba yabafi;

uba ngahamba ukhubeka kuyo.

₄Yonke loo nto kukuphum' izandla kobuhenyu behenyukazi elinombizane,

igcisa lemilingo elazikhobozayo izizwe,

ngobuthi balo lazichan' iintlanga.

₅Nanku umlomo kaNdikhoyo onamandla onke:

“Ndichasene nawe, Niniva!

Ndokuhluba izambatho zakho ziye kufika ebusweni,

iintlanga ndizivezele ubuze bakho,

izikumkani zilibone ihlazo lakho.

₆Ndiza kukubhaxeka ngobunyhuku-nyhuku,

Ewe, ndokuphatha ngolunya,

ndikutsho ube sisigculelo.

₇Abakubonayo bongcachela phaya,

besithi: ‘Kaloku iNiniva seyingamabhodlo.

Yaz'ba ingalilelwa ngubani na?

Ndingambhaqa phi onokukuthuthuzela?’ ”

₈Ngaba wena ungcono kuneNo-amon

eyayimi phezu kweNayile,

leyo yayijikelezwe ngamanzi

afana nolwandle olulixhadi layo,

manzi lawo aludonga lwayo?

₉Amandlakazi ayo inguKushe noJiputa,

intong' esekhosi inguPuti noLibhiya.

₁₀Nakuba kunjalo yathinjwa,

bahamba baya kutshona ebukhobokeni,

ke bona oozimveku yaba ziziqwenga;

ube ngajikela kule kona ibe zizo.

Izikhulu zaqashwa oku kwenyama,

amadoda azivayo suka akhonkxwa.

₁₁Nawe kambe uza kushusha,

uzame ukuzimela,

ufune ukuzikhusela ezintshabeni zakho.

₁₂Iinqaba zakho zofana nemikhiwane;

nditsho leyo ilulibo luvuthiweyo.

Umthi lowo uthi ungashukunyiswa

amakhiwane adibane nokutyiwa.

₁₃Khawujonge imikhosi yakho!

Awu, bafazi bakwabani!

Amasango elizwe lakho avulwe gabalala;

usesichengeni seentshaba zakho;

imivalo ilenywe ngumlilo.

₁₄Zikhelele amanzi – ilizwe lifile!

Khawuzomeleze iinqaba zakho;

ewe, xonkxa udongwe,

uxovule udaka,

wenze izitena ezomeleleyo.

₁₅Wokutshisela apho umlilo,

ikrele likungqengqise phantsi.

Lokugeqa ngathi ziinkumbi,

noba unganda njengeentothoviyane,

unyakazele njengeentethe.

₁₆Abarhwebi bakho bandile;

bangaphezu kwazo neenkwenkwezi.

Njengeenkumbi banqunqa konke, bemke.

₁₇Abalindi bakho nqwa neenkumbi;

amagosa akho anjengebubu leentethe

elihlala eludongeni mhla ngengqele,

kwakuvela ilanga lisabe,

lingaze laziwe mntu.

₁₈Ke wena, kumkani waseAsiriya,

abelusi bakho bona balele,

izikhulu zakho zilel' obentlombe.

Abantu bakho bathe saa ezintabeni;

ewe, abanaye namqokeleli.

₁₉Uduma lwakho alunakunyangeka;

awenzakalanga ungxwelerhekile!

Abazivayo iindaba zokuwa kwakho basuka baqhwabe izandla.

Ngubani ongayingcamlanga inkohlakalo yakho engenasiphelo?