To The Word – Day 166

₂“Ngaba ukhona na umntu oluncedo kuThixo?

Ngaba angazuza lutho na kwinkintsela yesilumko?

₃Uthi ngaba uSomandla unolutho aluzuzayo ukuba wena ulilungisa?

Khona sekusithiwa awunabala, imnceda ntoni loo nto?

₄“Ngaba uThixo angakohlwaya na ngenxa yokuba umthobela,

aze akumise enkundleni?

₅Akungebi ngokuba wone gqitha,

nobugwenxa bakho bungenasiphelo?

₆Kaloku wena amawenu uwamisele isibambiso ngaphandle kwesizathu;

ude uwohluthe nempahla yawo yokunxiba, asale eze.

₇Abadiniweyo benxaniwe awuluthobanga unxano lwabo,

nabalambileyo ubavimbile ukutya.

₈Wena ubusisinhanha esinemihlaba;

ubungummi obekekileyo.

₉Kanti awanelanga kukungancedi bahlolokazi,

koko ude waxhaphaza wacinezela neenkedama ezi!

₁₀Ngoko ke ngoku ubhijelwe zizabatha;

uminxwe naliphaphu.

₁₁Ngoku ukhulelwe bubumnyama, awuboni;

ugutyungelwe naziimpuphuma.

₁₂“Andithi na kaloku uThixo yena uhlala emajukujukwini amazulu?

Neenkwenkwezi ngokwazo kuloo malenga-lenga zikuwo yena uzivelele.

₁₃Ube ke wena usithi: ‘Wazi ntoni uThixo?

Esithwe ziingqimba zamafu nje, angasigweba njani?’

₁₄Uthi: ‘Akaboni; uvalelwe ngamafu;

kuphela uhamba-hamba phaya esibhakabhakeni.’

₁₅Ngaba usazimisele ukuhamba indlela yamandulo,

ulandele ikhondo labantu abakhohlakeleyo?

₁₆Kaloku bona baxhwilwe kwangaphambi kwexesha labo;

izikhukula zemka neziseko zabo.

₁₇Aba ngabo babesithi kuThixo: ‘Suka kuthi.

Angasenza ntoni na uSomandla?’

₁₈Kambe ke ikwanguye ozalisa imizi yabo ngobuqhele-qhele.

Phofu ke mna andihambisani neqhinga lezikhohlakali.

₁₉“Amalungisa ayakubona ukutshabalala kwezikhohlakali, asuke avuye;

abamsulwa bahlekisa ngazo besithi:

₂₀‘Inene, iintshaba zethu zitshatyalalisiwe,

nobutyebi bazo budliwe ngumlilo.’

₂₁“Ngoko ke wena zilahlele kuThixo, ube noxolo kunye naye;

kwakuba njalo ke uya kuzuza okulungileyo.

₂₂Yamkela imfundiso ephuma emlonyeni wakhe,

uwamilisele entliziyweni yakho amazwi akhe.

₂₃Ewe, ukuba uyabuyela kuSomandla uya kwakheka;

nto nje wena lahla la manyondololo aqhubeka kulo mzi wakho.

₂₄Igolide yakho yilahle,

neyona yodidi yaseOfire yithathe njengamatye nje aphaya entlanjeni.

₂₅Kuphela igolide yakho mayibe nguSomandla,

neengqumba zesiliva yakho mayibe kwanguye.

₂₆Wakuba wenjenjalo ke uya kukholosa ngoThixo uSomandla,

ubujongise kuye ubuso bakho.

₂₇Uya kuthandaza kuye eve;

ngokunjalo ke nezibhambathiso zakho uzifezekise.

₂₈Izigqibo zakho ziya kuphumelela,

ngokunjalo nendlela yakho ibe mhlophe.

₂₉Xa abantu bekhahlelwe phantsi uze uthi: ‘Nceda ubaphakamise.’

UThixo uya kubahlangula abazithobileyo;

₃₀ewe, ude ahlangule nongekho msulwa,

emsindisa ngobunyulu bezandla zakho.”

₂“Nanamhlanje ndisamkhalazela ndikrakra uThixo,

kuba undiphethe gadalala nakuba sendincwina kangaka nje!

₃Akwaba bendimazi apho akhoyo,

ndiyazi nendlela eya apho ahlala khona.

₄Bendiya kusibeka isikhalo sam phambi kwakhe,

ndixoxe ndizithethelele.

₅Bendiya kukhe ndimve ukuba uthini na;

ndive ukuba uthetha ntoni na.

₆Ngaba angasunduzana nam ngaloo mandla akhe?

Hayi, uThixo ngeke akwenze oko.

₇Kaloku enkundleni yakhe amalungisa aphuma phambili.

Ke ngoko uMgwebi wam ebeya kundigwebela kuphele.

₈“Ndikhangele ndamfuna empumalanga, kodwa andimfumani;

ukanti nasentshonalanga andimbhaqanga.

₉Nokuba usebenza kwelasentla andimboni;

xa ebuyela kwelasezantsi usithele emehlweni am.

₁₀Phofu ke uThixo uyayazi indlela endiyihambayo;

ukuba unokukhe andivavanye ndingafumaneka ndimsulwa okwegolide.

₁₁Kaloku iinyawo zam zilandela emkhondweni wakhe;

indlela yakhe ndiyigcinile, andaphambuka kuyo.

₁₂Andiyishiyanga imiyalelo yemilebe yomlomo wakhe;

andenzanga ngokufuna kwam, koko ndiwathobele amazwi akhe.

₁₃Xa enze isigqibo ngubani ongamjikayo?

Oko afuna ukukwenza uyakwenza.

₁₄Ngoko ke uya kukufezekisa konke oko andimisele kona,

nditsho nokuba yintoni na ayicebileyo ngam.

₁₅Ngoko ke ndisuka ndirhwaqele phambi kwakhe;

ewe, ndithi ndakucinga ngaye ndinkwantye.

₁₆NguThixo lo unditsho ndoyika kangaka!

Ewe, nguSomandla lo undirhwaqelisayo.

₁₇Phofu bona ubumnyama abundivalanga umlomo,

nditsho esi sithokothoko sigqume ubuso bam.”

₁“Ngani ukuba uSomandla angalimisi ixesha lokugweba?

Kutheni ukuba nâbo bamaziyo bangayiboni loo mini?

₂Abantu bayawushenxisa umlima-ndlela.

Ewe, beba iigusha bazifuye emadlelweni.

₃Bayayohlutha idonki yenkedama;

babambisa ngenkabi yenkomo yomhlolokazi.

₄Amahlwempu bayawagila aphume endleleni,

babanyanzelisele ekuzimeleni abaziintsizana belizwe.

₅Ewe, abahlelelekileyo bavuka kusasa, bexelengela ukutya kwabo,

oku kweqwarha elibhadula ezindle lifuna ukutya koozintlango;

yinkqantosi kuphela ebonelela abantwana babo ngokutyiwayo.

₆Ukutya kwabo bakuvuna efusini,

bakhwahlaze izidiliya zezikhohlakali.

₇Ebusuku balala ngengub' esele;

abanazo iingubo zokubakhusela engqeleni.

₈Ezintabeni phaya iimvula zibatsho babe manzi tixi,

bemana bezikhusela ngokuncathama emaweni.

₉Abakhohlakeleyo bathimba iintsana eziziinkedama ezisesebeleni;

bathatha iintsana zamahlwempu zibe sisibambiso.

₁₀Ewe, amahlwempu ahamba ze engenampahla;

athwala izithungu izisu zithe nca!

₁₁Akhama ioyile eminqumeni,

axovule newayini ezidiliyeni;

kodwa wona ngokwawo abe enxaniwe.

₁₂Ezixekweni kuncwina amadoda,

iingxwelerha ziyahlahlamba zicela uncedo,

kodwa yena uThixo akazisi enkundleni izikhohlakali.”

₁₃“Kukho abantu abangafunaniyo nokukhanya,

abangafuni nokuziqonda iindlela zako,

futhi bengahambisani nako mpela!

₁₄Izikrelemnqa zivuka ekuseni ziye kugebenga abahlelelekileyo,

kuze kuthi kwakuhlwa zijike zibe ngamasela.

₁₅Ke bona abakrexezi balinda ungcwalazi,

ufike sebefihl' ubuso, besithi: ‘Andiyi kubonwa.’

₁₆Ebusuku amasela aqhekeza izindlu,

aze kwakuba semini azimele angafunani nokukhanya.

₁₇Isithoko-thoko sobumnyama sifana nemini kubo;

ubusuku oboyikekayo bunjengomhlobo kubo.

₁₈“Isikhohlakali sikhukuliswa sisikhukula;

amasimi asisabelo saso ashwatyulelwe,

akusekho bani usebenzayo ezidiliyeni zaso.

₁₉Ikhephu liyanyibilika lakudibana nobushushu nembalela;

ngokunjalo naboni bayavuthuluka kwelabafileyo.

₂₀Nditsho nonina uyamlibala;

kaloku umemethwe ziimpethu, akabi sakhunjulwa.

Ewe, isikhohlakali sinkumka oku komthi owomileyo.

₂₁Kaloku sona siphanga abafazi abaziindlolo,

singabenzeli inceba abahlolokazi.

₂₂Ngamandla akhe uThixo uyazishenxisa izihandiba;

ewe, uThixo uthi akusebenzisa amandla akhe zitsho ziphelelwe lithemba lokudla ubomi.

₂₃UThixo noba angaziyeka zihlale zithe zava,

kodwa usoloko ezijongile ukusuka nokuhlala kwazo.

₂₄Abantu abakhohlakeleyo bahluma babe nenkqubela okwexeshana,

kodwa yonke loo nto iphela ngokukhawuleza;

bayadaka bafe njengamntu wonke,

bayabuna oku kwesikhwebu sengqolowa esivuniweyo.

₂₅“Ngubani ongayiphikisayo le nyaniso?

Makavele ongandiphikisayo, athi nditheth' amampunge!”

₂“Kaloku uThixo nguSomagunya, nguDuma-barhwaqele;

yaye ke ulugcinile ucwangco kweliphezulu.

₃Ngaba ukhona na ongazibalayo izinxiba-mxhaka zakhe?

Khona ngaba kuphi apho lungabonakaliyo ukhanyiso lwakhe?

₄Ngaba kungenzeka ukuba umntu afumaniseke emsulwa enkundleni kaThixo?

Uthi ingenzeka into yokuba umntu ozelwe ngumfazi angabi nabala?

₅Kaloku nenyanga ngokwayo ayiqaqambanga kangako phambi kwakhe;

kanti neenkwenkwezi ezi azingcwenganga kangako kuye.

₆Kuxa engubani ke yena umntu, eyimpethu nje?

Uthi unaxabiso lini unyana womntu kuThixo, engumbungu nje?”

₂“Kuthi mandivume ndithi ùluncedo kwababhetye-bhetye!

Hayi kambe ukubahlangula kwakho abo baswele amandla!

₃Ewe, uzicebise kakuhle izityhakala;

hayi, ubulumko obubonakalisileyo!

₄Phofu uthi ngubani ongade aweve la mazwi akho?

Khona futhe lini eli uthetha uphantsi kwalo?”

₅“Abafileyo bayabhinyalaza kukunkwantya,

kanti ke nelo lamanzi liyazibhija-bhija kunye nabemi balo.

₆Ewe, elabafileyo lityhilekile phambi koThixo;

ayinasigqubuthelo inzonzobila.

₇Kaloku uThixo wasitwabulula isibhakabhaka ngasentla phaya,

waza umhlaba wawujingisa enyanyeni.

₈Nguye ofaka amanzi kwiingqimba zamafu,

aze loo mafu awabophe angagqajuzwa bobo bunzima bamanzi.

₉Uyayifihla inyanga ingabonakali;

ewe, utwabulula ilifu lithi zinzi, itsho ifihlakale.

₁₀Wakwahlula ukukhanya ebumnyameni

ngeso sazinge sizotywe elundini lolwandle.

₁₁Uthi angakhalima zitsho zihexe iintsika ezixhase isibhakabhaka;

ewe, zitsho zizama-zame zingcangcazele kukoyika.

₁₂Kaloku yena ngaloo mandla akhe waluthomalalisa ulwandle,

waza kwangobo buchule bakhe wamvikiva uRahabhi isilo saselwandle.

₁₃Ngomoya wakhe ufutha sitsho sicwenge isibhakabhaka;

kanti ke ikwasisandla sakhe esangxwelerha inyoka enyubelezayo.

₁₄Kambe ke la ngamagqabantshintshi nje amandla akhe.

Thina esikuvileyo lumingi-mingi nje!

Ibingubani ke ongade akuqonde ukuzongoma kwamandla kaThixo?”

₂“Ekho nje uThixo, lo undivimb' ubulungisa,

nditsho uSomandla lo uwenze umphefumlo wam wangcamla ubukrakra:

₃Ukuba ndisaxomoloza ndisadl' amazimba,

xa ngaba ndisaphila ndinomphefumlo kaThixo emathatheni am,

₄imilebe yam ayisokuze ithethe inkohlakalo,

ngokunjalo nolwimi lwam alusoze luthethe inkohliso.

₅Andisoze ndithi ninyanisile,

futhi ndiya kude ndife ndibambelele kwinyaniso yokuba ndimsulwa.

₆Ndiya kuthi nca kwinto yokuba ndililungisa;

andisoze ndibe nasazela yonke imihla yam.

₇“Akwaba utshaba lwam lwafumana isohlwayo sabakhohlakeleyo,

ngokunjalo nombandezeli wam azuze isiphelo sabangenabulungisa.

₈Liyintoni na ithemba labangenaThixo

mhla wabunqumla ubomi babo uThixo?

₉Xa sele kunyembelekile kubo,

uthi uThixo angaze asive isikhalo sabo?

₁₀Khona bangaziyolisa na ngoSomandla?

Bangamnqula na uThixo ngamaxesha onke?

₁₁“Makhe ndinifundise ngobukhulu bamandla kaThixo;

mandingazifihli izicwangciso zikaSomandla.

₁₂Hayi gxebe, senizibonele nje ngokwenu;

ngani ke ukuba nibe sathetha imfungu-mfungu enje?

₁₃“Naso ke isabelo sezikhohlakali kuThixo;

elo ke lilifa lezibhoja kuSomandla.

₁₄Noba zingade zibe nenyambalala yoonyana

bosuka babe lilifa lekrele emfazweni;

ewe, inzala yazo yasoloko ithiwe nca liphango!

₁₅Nemingqandanda esindileyo itshayelwa ngubhubhani,

baze nabahlolokazi bazo bangalili nokulila.

₁₆Noba zingade zibe nemfumba yesiliva ngathi luthuli,

zibe nempahla yokwambatha efumbe okodongwe,

₁₇kosuka kuthi gqi lungisa lithile inxitywe lilo loo mpahla;

kosuka kuvele abantu abamsulwa babelane ngaloo siliva.

₁₈Isikhohlakali sakha indlu efana nesingxobo seqonya;

sakha into engathi liphempe labalindi.

₁₉Isikhohlakali silala sinobutyebi, kodwa siyagqibelisa –

sivuka sebuphel' emehlweni.

₂₀Sisuka sirhwaqele ngathi siyarhaxwa;

kaloku sitshayelwa sisaqhwithi ngobhadakazi.

₂₁Kufika umoya wasempuma usitshayele,

usuke usinqukrule singabi sazana nekhaya laso.

₂₂Usuka usilenge ungenalusini tu;

nakanjani kufuneka siwasabe amandla awo.

₂₃Ewe, umoya usiqhwabela izandla,

usihewule isikhohlakali simke endaweni yaso.”