Bible Society of South Africa
Izicwangciso zokufunda
To The Word – Bible Reading Challenge
To The Word – Day 179

To The Word – Day 179

Jeremiah 7–12

Itekisi yeBhayibhile

UJEREMIYA 7

Intshumayelo kaJeremiya endlwini kaNdikhoyo: Umzekelo weShilo

1Kwafika ilizwi *likaNdikhoyo kuJeremiya lisithi: 2“Yiya emasangweni endlu kaNdikhoyo, ufike udanduluke uthi: Nali ilizwi likaNdikhoyo; liveni nina bantu bakwaJuda abangena ngala masango ukuza kunqula uNdikhoyo. 3Utsho uNdikhoyo onamandla onke, onguThixo kaSirayeli, ukuthi: ‘Yilungiseni ihambo yenu, ngokunjalo nezenzo zenu, khon' ukuze ndinizinzise nime kule ndawo. 4Musani ukulahlekiswa ngamazwi obuxoki athi: “Yindlu kaNdikhoyo le; yindlu kaNdikhoyo le; ewe, yindlu kaNdikhoyo le, soze kwenzeke nto kuyo!” ’

5“Kodwa ukuba niyayilungisa ngenene ihambo yenu, ngokunjalo nezenzo zenu, naza nenza ubulungisa omnye komnye, 6ningabacinezeli abangeneleli, okanye iinkedama nabahlolokazi, ningaphalazi igazi elimsulwa apha, ningazenzakalisi ngokunqula izithixo, 7mna ndonizinzisa kule ndawo ingumhlaba endawabela ooyihlo ukuba bawume ngonaphakade.

8“Kodwa naku nina nikholose ngamazwi alambathayo. 9Ningamasela, izigwinta, abakrexezi, abafunga bexoka; ninqula uBhali kunye noothixo basemzini. 10Kanti noko niza apha kule ndlu ibizwa ngegama lam, nifike nithi: ‘Sisindile!’ Nisinde ukuze nenze la manyundululu? 11Ngaba le ndlu ibizwa ngegama lam ingumqolomba wezihange na? Ndinijongile!” Lowo ngumlomo kaNdikhoyo.

12“Khanenjenjeya, niye eShilo apho lalinqulwa khona igama lam mandulo. Niya kuyibona into endayenza yona loo Shilo ngenxa yobugwenxa babantu bam amaSirayeli. 13Ngoko ke, ngenxa yezi zenzo zenu zonke, utsho uNdikhoyo, ndithethile nani amaxesha ngamaxesha, anaphulaphula, ndanibiza anasabela, 14ngako oko le ndlu ibizwa ngegama lam enithembele kuyo ndiza kuyihlisela isehlo esehla eShilo, naxa ndandiyinike nina nooyihlo-mkhulu. 15Ndiza kunigxotha phambi kwam njengoko ndawagxothayo amawenu amaEfrayim.”

Iinkani zamaSirayeli

16“Wena ke uze ungabathandazeli aba bantu, ungabathetheleli, ungabacengeli kum, ungabangxengxezeli kum konke, kuba andisobe ndikuphulaphule. 17Akuziboni ke wena izinto abazenza kwiidolophu zakwaJuda nakwizitalato zeJerusalem? 18Abantwana bayatheza, ooyise baphembe, abafazi bona baxove intlama yokwenzela ukumkanikazi wesibhakabhaka amaqebengwana. Bongezelele ukundidela ngokunikela ngeminikelo ethululwayo *koothixo basemzini. Ngayo yonke loo nto bayandixhokonxa. 19Ngaba ndim ngenene lowo bamphoxayo? Abaziphoxi bona ziqu? Bazenzakalisile!” Lowo ngumlomo kaNdikhoyo.

20Itsho ke ngoko iNkosi *uNdikhoyo ukuthi: “Ndiza kuwuthululela kule ndawo umsindo wam nengqumbo yam, phezu kwabantu nemfuyo, imithi yasendle nemveliso yomhlaba. Uza kuba ngumlilo ongacimiyo umsindo wam.”

21Utsho uNdikhoyo onamandla onke onguThixo kaSirayeli ukuthi: “Qhubani, nongeze amanye amadini kula atshiswayo, nitye inyama. 22Kaloku mhla ndabakhuphayo eJiputa ookhokho benu into endayithethayo kubo ayibanga yimimiselo ngokwenza amadini kunye namadini atshiswayo. 23Hayi, ndabayalela ndisithi: ‘Liphulaphuleni ilizwi lam, khon' ukuze ndibe nguThixo wenu, nina nibe ngabantu bam. Ewe, hambani ngendlela yonke endinimisele yona, nize nilungelwe.’ 24Ke bona abandiphulaphulanga; abandihoyanga kwaphela. Basuka baba nenkani, benza amaqhinga beqhutywa yinkohlakalo yeentliziyo zabo, babuya umva endaweni yokuqhubela phambili. 25Kodwa ukususela mhla baphuma eJiputa, kude kube ngoku, ndisoloko ndithuma izicaka zam abashumayeli kuni imihla ngemihla. 26Kambe aba bantu abandiphula-phulanga, abandihoya nokundihoya; suka baqaqadeka, benza ububi nangaphezu kooyise-mkhulu.

27“Ungawathetha kwaba bantu onke la mazwi, kodwa abasoze bakuve; ungababiza, kodwa abasoze basabele. 28Uze uthi ke kubo: ‘Olu luhlanga olungaliphulaphuliyo ilizwi likaNdikhoyo uThixo walo.’ Abaqeqesheki. Ukuthembeka akukho kubo – akusakhankanywa phakathi kwabo.

29“Cheba intloko yakho, Jerusalem,

ubonakalise ukuzila.

Yenza isimbonono eluqayini,

kuba uNdikhoyo usicekisile wasilahla esi sizukulwana simbange ingqumbo.”

INtili yeNtshabalalo

30“Abantu bakwaJuda benze into embi.” Lowo ngumlomo kaNdikhoyo. “Bamise izithixo zabo ezinezothe endlwini yam, bayixabhela. 31Benze isibingelelo ekuthiwa yiTofeti kulaa ntili kaBhen-hinom, khon' ukuze apho benze amadini ngoonyana neentombi zabo, babatshise. Andizange ndibayalele njalo; andizange ndikucinge nokukucinga oku. 32Kodwa liyeza ixesha xa ingayi kuba sabizwa ngokuba yiTofeti okanye intili kaBhen-hinom, koko ibizwe ngokuba yiNtili yeNtshabalalo, kuba kongcwatywa kude kuphele umhlaba, 33izidumbu zolu hlanga zibe kukutya kweentaka namarhamncwa, angagxothwa bani. 34Ndiya kuyiphelisa ezixekweni zakwaJuda nasezitalatweni zaseJerusalem intsholo yolonwabo kwanemigcobo yomyeni nomtshakazi. Elo lizwe lonke loba yinkangala.”

UJEREMIYA 7XHO96Vula kumfundi weBhayibhile

UJEREMIYA 8

1Nanku umlomo kaNdikhoyo: “Ngelo xesha amathambo ookumkani bakwaJuda, naweendwalutho zalapho, awababingeleli kunye nabashumayeli kwakunye nabemi baseJerusalem, aya kukhutshwa emangcwabeni. 2Aya kubhencwa elangeni nasenyangeni nasezinkwenkwezini ababezithanda bezikhonza, bekhokelwa zizo, bebuzisa kuzo, benqula zona. Aya kuthi saa phezu komhlaba oku kwamalongwe, angafihlwa bani. 3Amasalela olu hlanga lukhohlakeleyo, endiya kuwathi saa elizweni, aya kukhetha ukufa endaweni yokudla ubomi kwezo ndawo akuzo.” Lowo ngumlomo kaNdikhoyo uSomandla-onke.

Isono nesohlwayo

4“Yithi kubo: Utsho *uNdikhoyo ukuthi: Xa umntu ewile, kanene akabuyi avuke na? Xa ebephambukile, akabuyi ayilande indlela? 5Ke, ngabantu abatheni bona aba baseJerusalem bathe rhoqo ukukreqa kum? Ngabatheni aba banamathele kumampunge, besala ukubuyela kum? 6Ndikhe ndabaz' iindlebe, kodwa akwabakho uthetha nto ifanelekileyo, akwabakho namnye uyidaneleyo inkohlakalo yakhe, akwabakho bani uzohlwayayo athi: ‘Bendiyenzela ntoni le nto?’ Ulowo nalowo uhamba ngayibonayo, axel' ihashe lityhudisela edabini. 7Nditsho nengwamza le ibhabh' emafini iyalazi ixesha lokujika. Iinkonjane, amahlankomo, nkqu nendwe le, iyalazi ixesha lokufuduka, kodwa bona abantu bam abazani nezithethe zam.

8“Ningatsho njani ukuthi: ‘Sihlakaniphile; siyawazi umthetho kaNdikhoyo;’ ukanti inyaniso yawo seyigqwethiwe ngababhali-mthetho! 9Izilumko zenu zihlazekile, zibhidekile, kuba zibhaqiwe. Kaloku ilizwi lam zilibukule nje, zinabulumko buvela phi? 10Ngoko ke abafazi babo ndiza kubanikela kwamanye amadoda, ngokunjalo nemihlaba yabo ndiyinikele kwabanye abantu. Kaloku xa bebonke aba bantu, kususela koyena uphantsi kuse kophezulu, basemva kwenzuzo. Abashumayeli nababingeleli bangamamenemene athanda inzuzo ngondlela-mnyama. 11Amanxeba abantu bam baba bangawanyanga ngokuthi: ‘Ngxe, ngxe; akukho ngozi!’ Ukanti alixolanga. 12Zizinto ezingenazo neentloni! Naxa zenze amanyundululu azibi nalo nonyungu olu. Ngoko ke baza kuwa nabawileyo, bakhubeke mhla ndibohlwayayo.” Utsho uNdikhoyo.

13“Ndiya kubaqokelela abantu bam, ndixele umlimi ovunayo.” Nguwo lowo umlomo kaNdikhoyo. “Boba njengomdiliya ongenaziqhamo, nomthi ongenamakhiwane, oseluvuthuluke nkqu namagqabi la. Ewe, ndobanikezela kwabanye.”

14“Sisahlalele ntoni?” Kubuza abantu. “Masihlangane siye kufela kwizixeko ezinqatyisiweyo kube kanye. Kaloku uNdikhoyo uThixo wethu selesigwebele ukufa ngokusinika amanzi anetyhefu, kuba simonile. 15Besilindele inzolo, suka kwavela ububi; besijonge ukuphiliswa, nako kuvela unxunguphalo. 16Amahashe eentshaba avakala ebetha ithatha phaya kwaDan. Iinkunzi zamahashe abo zikhonya kushukume umhlaba. Bayeza beze kuwutshabalalisa lo mhlaba nento yonke ekuwo, nditsho isixeko ngasinye sinabemi baso.”

17“Ndiza kunithumela iinyoka ezinobuhlungu, amarhamba angenakwenziwa mbuna, anilume.”

UJeremiya ulilela amawabo

18Umva-ndedwa undongamele;

ibuhlungu intliziyo yam.

19Phulaphula! Ndiva isikhalo samawethu

sihlokoma kwelikude, sisithi:

“Ngaba uNdikhoyo sele wemka na eZiyon?

Ngaba usekho na apho uKumkani waseZiyon?”

Uthi *uNdikhoyo:

“Nina, nindiqumbiseleni ngokunqula izithixo,

niqubude kwizinto ezingento zasemzini?”

20Abantu bona bathi:

“Sekugqityiwe ukuvunwa,

nehlobo sele lidlule,

kodwa ke thina asikasindiswa.”

21Ngenxa yamanxeba amawethu nam ndiziva ndiyingxwelerha.

Ndizilile, ndimatshekile.

22Ngaba akusekho yeza na eGiliyadi?

Akusekho gqirha na khona?

Ngani banganyangwa nje abantu bakowethu?

UJEREMIYA 8XHO96Vula kumfundi weBhayibhile

UJEREMIYA 9

1Akwaba intloko yam ibiliqula lamanzi,

namehlo am engumthombo weenyembezi,

bendiya kukhala imini nobusuku, ndililele amawethu abuleweyo.

2Akwaba bekukho indawo entlango yokulalisa abahambi,

ngendiwashiya amawethu, ndimke,

bengabakreqi nje, imbutho yabangathembekanga.

3“Iilwimi zabo zitsawula ubuxoki okwesaphetha.

Ilizwe longanyelwe bubumenemene;

ayikho intembeko.

Basuka bongeze ububi phezu kobubi.

Kodwa mna abandazi.”

Lowo ngumlomo kaNdikhoyo.

4“Balumkele kwa-abahlobo,

ungathembi nkqu nomntakwenu lo,

kuba bonke abantakwenu ngamamenemene,

abahlobo bayahleba xa bebonke.

5Ewe, abahlobo bayakhohlisana;

akukho uthetha inyaniso.

Baziqhelisa ukuthetha ubuxoki,

bawaqobe amandla abo ngokona.

6Inene, umi phakathi kwabantu abakhohlisayo;

ngenkohliso yabo abavumi ukundazi.”

Lowo ngumlomo kaNdikhoyo.

7Ke ngoko utsho uNdikhoyo onamandla onke ukuthi:

“Ngenxa yale nto abantu bam ndiza kubahluza,

ndibavavanye.

Akukho ndlela yimbi ngenxa yesono sabo.

8Lutolo oluhlabaniselayo ulwimi lwabo;

luthetha inkohliso.

Bayamqhatha ummelwane ngeentetho zabo,

ukanti ezintliziyweni zabo bamcuphile.

9Mandingabohlwayi ke ngenxa yale nto?

Mandingaziphindezeli kubantu abanje?”

Lowo ngumlomo kaNdikhoyo.

10Mna ndiza kugixa,

ndililele iintaba, ndizile,

kuba amadlelo atshile,

akusekho bani uhamba kuwo,

akusanxakami nankomo.

Iintaka zibalekile,

neenyamakazi zimkile.

11“IJerusalem ndiza kuyitsho ibe ngamabhodlo

nesikhundla soodyakalashe,

ndizitshabalalise iidolophu zakwaJuda,

kungahlali bani khona.”

Utsho uNdikhoyo.

12Sisiphi na isilumko esinokuyiqonda le nto? Ngubani oyixelelweyo nguNdikhoyo onokuyichazela abanye? Kungani ukuba lo mhlaba utshatyalaliswe, ube ngumqwebedu wentlango engenakuhanjwa bani?

13UNdikhoyo uthi: “Bawutyeshele umyalelo wam endabanika wona, àbalithobela ilizwi lam ukuze bahambe ngalo, 14koko basuka bona balandela iintliziyo zabo ezinenkani, balandela iindlela zooBhali abazifunda kooyise.” 15Ke ngoko utsho uSomandla-onke uNdikhoyo onguThixo kaSirayeli ukuthi: “Aba bantu ndiza kubanika ukutya okunedliso, ndibaseze amanzi anetyhefu. 16Ndiza kubathi saa phakathi kweentlanga abangazaziyo, ezingaziwayo nangooyise, ndibasukele ngekrele ndide ndibatshabalalise.”

Isililo eZiyon

17Utsho *uNdikhoyo uSomandla-onke ukuthi:

“Qiqani!

Memani abafazi bokuzila,

nditsho awona amacikokazi,

bahlabele iingoma zesililo.

18Mabakhawulezise batsho ngesililo,

side sintywizise iinyembezi,

de amehlo ethu aphalale zizo.

19Phulaphulani, isililo sivela eZiyon sisithi:

‘Awu! Safa saphela!

Hayi, ihlazo esikulo!

Salishiya ilizwe lakowethu;

izindlu zethu zidiliziwe.’ ”

20Bafazindini, liveni ilizwi likaNdikhoyo.

Wabekeleni iindlebe amazwi omlomo wakhe.

Fundisani iintombi zenu isimbonono;

fundisanani ingoma yesililo.

21Ukufa kuthubeleze ngeefestile

kwatsho phakathi ezindlwini ezinqatyisiweyo;

kubanqunqele phantsi abantwana besadlal' esitalatweni,

kwabachitha-chitha abafana ezimbuthweni.

22Kanti ngaphezu koko uNdikhoyo uthi mandithi:

“Izidumbu ziya kudunduluza emadlelweni okwamalongwe,

njengengqolowa esikwe yashiywa ngumvuni ingenabani wakuyiqokelela.”

23Uthi uNdikhoyo:

“Isilumko masingaqhayisi ngobulumko baso;

igorha malingaqhayisi ngobugorha balo;

nesihandiba masingazidli ngobutyebi baso.

24Ke lowo uqhayisayo makaqhayise ngokundazi nokundiqonda;

kuba mna ndinguNdikhoyo owenza izibele emhlabeni,

nokulungileyo, nobulungisa.

Nazo ke izinto ezindikholisayo.”

Lowo ngumlomo kaNdikhoyo.

25Nguwo lo umlomo kaNdikhoyo: “Niyabona, iyeza imihla endiya kubohlwaya ngayo kwanabo bolukileyo enyameni. 26Ndiza kuwohlwaya amaJiputa, namaJuda, namaEdom, nama-Amon, namaMowabhi, kwanâbo bangabemi basentlango abanwele zichetyiweyo ezintlafunweni. Kaloku zonke ezi ntlanga enyanisweni azalukanga. Nkqu indlu kaSirayeli iyonke ayalukanga entliziyweni.”

UJEREMIYA 9XHO96Vula kumfundi weBhayibhile

UJEREMIYA 10

UNdikhoyo nezithixo

1Libekeleni iindlebe ilizwi *likaNdikhoyo, nina bantu bakwaSirayeli. 2Utsho uNdikhoyo ukuthi:

“Musani ukulinganisa inkqubo yezinye iintlanga;

musani ukothuswa yimiqondiso esesibhakabhakeni,

naxa zona zisothuka iintlanga.

3Amasiko eentlanga angamampunge nje.

Bagawula umthi ehlathini,

ziwuqingqe ngesixholo iingcibi,

4uhonjiswe ngesiliva nangegolide,

ubethelelwe ngezikhonkwane ukuze ungagungqi.

5*Oothixo abanjalo bafana nonomgogwana

oxhonywe entsimini yentyabontyi:

abakwazi kuthetha,

bayathwalwa kuba abakwazi kuhamba.

Musani ukuboyika:

akukho nto imbi banganenza yona,

kungekho nanto banokunceda ngayo.”

6Ngubani onjengawe, Ndikhoyo?

Umkhulu wena;

igama lakho lithe ndii, lidume ngobungangamsha.

7Ngubani ongakuhloneliyo, wena Kumkani weentlanga?

Ewe, ufanelwe yimbeko;

akakho onjengawe,

nditsho phakathi kwezilumko

naphakathi kwezizwe nookumkani bazo.

8Ziziyatha nezityhifili xa bebonke;

bangafundiswa ntoni ngoothixo abaqingqwe ngomthi?

9Baqingqwe ngesiliva yaseTashishe,

nangegolide evela eUfazi.

Okuxhonkxwe ziingcibi nabakhandi

kwambeswa ngeengubo ezibomvu nezimfusa ezalukwe ngamagcisa.

10Kodwa nguNdikhoyo onguThixo ngenene;

yena unguThixo ophilayo,

uKumkani oya kuhlala ehleli.

Akuqumba yena umhlaba uyankwantya;

izizwe azinakumelana nengqumbo yakhe.

( 11“Baxelele uthi: ‘Abo thixo bangalidalanga izulu nomhlaba, baza kubhanga emhlabeni naphantsi kwezulu.’ ”)

Ukubongwa kukaNdikhoyo

12Ke yena *uNdikhoyo ulidale ngamandla akhe ihlabathi,

walizinzisa ngobulumko ilizwe,

wasitwabulula ngengqondo isibhakabhaka.

13Uthi akuduma kuyaluzele amanzi asesibhakabhakeni,

kufunquke amafu emaphethelweni omhlaba.

Uthumela umbane kunye nemvula,

athulule umoya koovimba bakhe.

14Bonke ziziyatha ezingenalwazi.

Ababumbi *boothixo bayahlazeka ngezithixo zabo,

kuba oothixo abababumbayo bayinkohliso,

kuba abanawo umphefumlo.

15Zizinto ezingento,

izinto zokuphoxisa,

izinto eziya kubhanga ngemini yomgwebo.

16Akanjengabo yena uNxaxheba kaYakobi:

nguye owabumba iinto zonke.

AmaSirayeli ngabantu bakhe ncakasana.

USomandla-onke nguNdikhoyo igama lakhe.

Ukufuduswa

17Qokelela umthwalo wakho, ulungele ukufuduka, wena uhleli ekungqingweni. 18Uthi *uNdikhoyo: “Ndiza kubalahlela phandle, ndibazisele inkxwaleko, basiwe ekuthinjweni.”

19Athi ke mna, ukwenzakala kwam!

Amanxeba am akanakuphila.

Ke mna bendisithi:

“Sisifo sam esi; mandisinyamezele.”

20Intente yam ibhukuqiwe;

sele kuqhawuke nezo ntambo zayo.

Bemkile oonyana bam;

akusekho namnye useleyo.

Akukho nokuba abe mnye onokuvusa intente yam;

akukho namnye wokuxhoma umkhusane.

21Abelusi baba bantu ziziyatha,

ababuzi nto kuNdikhoyo.

Yiyo loo nto bengenampumelelo nje,

nemihlambi yabo ithe qhu saa.

22Phulaphulani, kufika udaba.

Kuvakala intshukumo ivela ngasentla.

Luza kutsho kube senkangala kwiidolophu zakwaJuda,

zitsho zibe zizikhundla zoodyakalashe.

23Ndikhoyo, ndiyazi ukuba akukho bani ulawula ikamva lakhe,

nokuba akukho mntu uphethe ubomi bakhe.

24Ndiluleke, Ndikhoyo,

kodwa kube ngobulungisa,

kungabi ngomsindo wakho,

hleze ndingabi nto.

25Ingqumbo yakho yikhuphele kwiintlanga ezingakuvumiyo,

naphezu kwezizwe ezingalinquliyo igama lakho,

kuba zimdlile uYakobi zamgqiba,

aza amadlelo akhe aba yinkangala.

UJEREMIYA 10XHO96Vula kumfundi weBhayibhile

UJEREMIYA 11

Ukwaphulwa komnqophiso

1Nali ilizwi elamfikelayo uJeremiya livela *kuNdikhoyo: 2“Phulaphula le miqathango yomnqophiso, uyixelele abantu bakwaJuda kunye nabo bonke abemi baseJerusalem. 3Yithi kubo utsho uNdikhoyo uThixo kaSirayeli ukuthi: Uqalekisiwe lowo mntu ungayithobeliyo imiqathango yomnqophiso, 4leyo ndayiwisela ooyihlo-mkhulu mhla ndabakhupha eJiputa, ilizwe elalinjengeziko lokunyibilikisa isinyithi kubo. Ndathi kubo: ‘Ndiphulaphuleni, nenze konke endiniyalela kona, khon' ukuze nibe ngabantu bam, nam ndibe nguThixo wenu, 5nokuze isifungo endasenza kooyihlo-mkhulu sokubanika ilizwe lobusi nobisi ndisiphumeze.’ Ngulo mhlaba nimi kuwo namhlanje.”

Ndaphendula ndathi: “Ewe, amen, Ndikhoyo.”

6Wathi kum uNdikhoyo: “Hamba ke uvakalise kwiidolophu zakwaJuda nasezitalatweni zaseJerusalem, uthi: ‘Yibekeleni iindlebe imiqathango yomnqophiso, nihambe ngayo. 7Okoko ndabakhupha eJiputa ookhokho benu ndasoloko ndigxininisa izihlandlo ngezihlandlo ndisithi kubo: “Ndithobeleni.” 8Basuka abaphulaphula bona, abandihoya, koko basuka balandela ububi beentliziyo zabo eziqaqadekileyo. Nam ke ndabahlisela zonke iziqalekiso zomnqophiso endathi mabawuthobele, abeva.’ ”

9Uthe uNdikhoyo kum: “Kukho iyelenqe elenziwa ngabantu bakwaJuda nabaseJerusalem. 10Babuyele kwikakade looyise-mkhulu abalayo ukundiphulaphula. Bona bâlandela banqula *thixo bambi. Ewe, uSirayeli kunye noJuda bawaphule umnqophiso endawenza kunye nookhokho babo. 11Utsho ke ngoko uNdikhoyo ukuthi: ‘Ndiza kubahlisela ishwangusha abangayi kuphuncuka kulo. Nokuba sebendibongoza andiyi kubaphulaphula. 12Abantu bakwaJuda nabaseJerusalem baya kuya kwabo thixo bebekade bebenzela iziqhumiso, bakhale kubo becela kubo uncedo. Kodwa abayi kuzuza luncedo kwabo thixo ngomhla weshwangusha. 13Oothixo babantu bakwaJuda baninzi kangangezixeko zalapho, ukanti abantu baseJerusalem bamenzele amaqonga eziqhumiso lowa Bhali unezothe kuzo zonke izitalato zalapho.’

14“Wena ke uze ungabathandazeli aba bantu, ungabathetheleli, ungabacengeli kum, ungabangxengxezeli kum konke, kuba andisobe ndikuphulaphule.”

15Uthi uNdikhoyo: “Wena ntandane yam, ufuna ntoni endlwini yam xa undenzela iyelenqe kunye nabanye? Ngaba amadini owenzayo olinqanda ishwangusha? Xa bekunjalo ngewuchulumacha! 16Ndandidla ngokuthi ufana nomthi womnquma oyokozelayo uthwele iziqhamo ezihle ngembonakalo, kodwa ngoku ndiza kuvuthuza ndixele isaqhwithi, ndiwantumeke umlilo amagqabi aloo mthi, ndiwashiye amasebe eze.

17“UJuda noSirayeli bâtyalwa ndim, mna Ndikhoyo onamandla onke, ke ngoku ndibasongela ngeshwangusha. Sisiphumo sezenzo zabo ezigwenxa esi, kuba bandiqumbisile ngokwenzela uBhali amadini esiqhumiso.”

Iyelenqe lokubulala uJeremiya

18*UNdikhoyo wandityhilela, khon' ukuze ndiqonde;

wawavula amehlo am, ndazazi iinjongo zabo.

19Ndandifana nqwa nexhwane elimbuna lisiya kuxhelwa.

Bekungekho nto ndiyaziyo.

Bendingaqondi ukuba baceba amayelenqe ngam,

besithi: “Masiwutshabalalise umthi uselula,

simcime igama, angabi sakhunjulwa ngabaphilayo.”

20Ndibhenela kuwe, Ndikhoyo Somandla-onke,

wena mgwebi olilungisa,

wena mgocagoci weentliziyo neengqondo zabantu.

Wonke lo mcimbi wam ndiwuxhoma kuwe;

mandikubone ke ukundiphindezela kwakho kubo.

21Ngenxa yoko naku okuthethwa nguNdikhoyo malunga nabantu baseAnatoti abazungula ubomi bakho besithi: “Musa ukuba sashumayela ngegama likaNdikhoyo, hleze sikubulale ngezandla zethu.” 22Ngoko ke uNdikhoyo uthi: “Niyabona, ndiza kuqubisana nabo. Amadodana abo aza kufa ngekrele, oonyana neentombi zabo bona bafe yindlala. 23Akuyi kusinda nempunde le, kuba ndiwazisela ishwangusha amadoda aseAnatoti ngonyaka wokubohlwaya kwam.”

UJEREMIYA 11XHO96Vula kumfundi weBhayibhile

UJEREMIYA 12

UJeremiya uyakhalaza

1Ulilungisa, wena *Ndikhoyo, xa ndixambulisana nawe,

xa ndibhenela kuwe ngeendawo ezinxulumene nobulungisa.

Ngaba ibangwa yintoni impumelelo yezibhoja?

Kungani amaqhophololo ehleli ethe zava nje?

2Batyalwe nguwe, zendela iingcambu zabo;

bahlumile, bavelisa iziqhamo.

Usoloko usemilebeni yabo,

kodwa ezintliziyweni zabo ukude lee.

3Ke wena, Ndikhoyo, uyandibona;

uyazigocagoca iingcamango zam ngawe.

Barhuqe abantu abagwenxa, baxele iigusha eziya kuxhelwa.

Bakhethele bucala, ide ifike imini yokubulawa.

4Koda kube nini uzilile umhlaba?

Koda kube nini itshile ingca emadlelweni?

Izilwanyana neentaka ziyafa ngenxa yenkohlakalo yabantu bakowethu.

Kanti bathi: “UThixo akasazi isiphelo sethu.”

Impendulo kaThixo

5*UNdikhoyo wathi: “Xa ububaleka nabantu abahamba ngeenyawo, waza wadinwa, ungakhuphisana njani namahashe? Xa ukhubeka emhlabeni ophangaleleyo, uya kuthini kwiintshinyela zamatyholo aseJordan? 6Ujikelwe ngabantakwenu nendlu kayihlo, bazimisela ukukwenzakalisa. Uze ungaze ubathembe, nokuba bathetha kamnandi nawe.

7“Ndoyishiya indlu yam,

ndisibukule isizwe esililifa lam,

ndimnikele othandwe ndim ezandleni zeentshaba zakhe.

8Ilifa lam nqwa nengonyama egquma ehlathini: liyandivukela.

Kungoko ke ndilithiyile nje.

9Ilifa lam lifana nengcuka engqingwe ngamakhozi;

bizani onke amarhamncwa, eze esidlweni.

10Kofika abelusi abaninzi,

bawuchithe umdiliya wam,

basinyhashe isabelo sam esinqwenelekayo,

basenze sibe ngumqwebedu.

11Isabelo sam senziwe inkangala,

satsho sangumqwebedu phambi kwam.

Umhlaba uphela ulil' ibhungane;

akukho bani uwukhathaleleyo.

12Abatshabalalisi bavele eluqayini entlango.

Ikrele likaNdikhoyo liyawutshabalalisa umhlaba macala onke.

Akukho namnye uya kusinda.

13Baya kuhlwayela ingqolowa, bavune ameva.

Baza kufumana babulaleke, kodwa bangazuzi lutho.

Ngenxa yobushushu bengqumbo kaNdikhoyo niya kuba nesivuno esidanisayo.”

14Utsho uNdikhoyo ukuthi: “Malunga nabo bonke abamelwane abakhohlakeleyo abawuthathileyo umhlaba endawunika abantu bam amaSirayeli waba lilifa, ndithi: Ndiza kubagungxula ezweni labo, ngokungathi ndincothula umthi, ndiyinyothule indlu kaJuda kubo. 15Kambe ndobe ndibenzele inceba ndakuba ndibanyothule, ndibuyisele umntu ngamnye kwilifa lakhe nakumhlaba wakowabo. 16Kuya kuthi xa bazifundisisile iindlela zabantu bam, bafunge nangegama lam, bathi: ‘Ekho nje uNdikhoyo’ – nanjengoko bebebafundisa abantu bam ukufunga ngoBhali – nabo ndiya kubazinzisa phakathi kwabantu bam. 17Xa kukho uhlanga olungevayo ndolunyothula; ewe, ndolunyothula ndiluphanzise.” Lowo ngumlomo kaNdikhoyo.

UJEREMIYA 12XHO96Vula kumfundi weBhayibhile
Bible Society of South Africav.4.26.9
SIFUMANE KU-