To The Word – Day 219

₁*UNdikhoyo ungukumkani;

uthe wambu isihomo nesithozela namandla.

Ewe, ulimise zinzi ihlabathi, aligungqi.

₂Isihlalo sakho, Ndikhoyo,

sasekwa kwantlandlolo;

wena wawukho kwanini-nini.

₃Iyagquma imilambo, Ndikhoyo,

ivakalisa isandi sayo;

iyavakala imigqumo yayo.

₄UNdikhoyo yingangalala yaphezulu;

unamandla kunamaza alephuzayo,

nangaphezu kwamaza agqumayo.

₅Imiqondiso yakho ayiguquki, Ndikhoyo;

iyingcwele ngenene indlu yakho, Ndikhoyo,

kuya kuda kube nini-nini.

₁*Ndikhoyo, Thixo ongumgwebi,

wena Thixo ophindezelayo, zibonakalise.

₂Lamla, wena mgwebi woluntu;

babuyekeze kwangezitya zabo abantw' abazingcayo!

₃Koda kube nini na, Ndikhoyo,

koda kube nini kakade esivuyelela amatshijolo?

₄Koda kube nini eqhayisa;

koda kube nini ezidla ngokungcola kwawo?

₅Ayababulala abantu bakho, Ndikhoyo;

ayawucinezela umzi wakho amatshijolo.

₆abandezele abahlolokazi neenkedama,

abulale nabantu basemzini.

₇Ade athi: “Akaboni nto uNdikhoyo;

akaqondi konke uThixo kaYakobi.”

₈Lumkani, bantundini bazizidenge!

Noda niqiqe nini, zityhifilindini?

₉Nithini? Nithi uThixo owadala iindlebe akeva?

Nithi lo wenza amehlo enu akaboni?

₁₀Lo ulawula zonk' iintlanga nithi akanakuzohlwaya?

Lo ufundise abantu nithi akazi nto?

₁₁Ulogocagoca iingcinga zabantu,

uyazi ukuba zibubuvuvu nje bodwa.

₁₂Unoyolo lowo uyalwa nguwe, Ndikhoyo;

nditsho ofundiswa nguwe umyalelo wakho.

₁₃Umnika inzolo ngemihla yobubi,

lo gama amatshijolo ombelwa umhadi.

₁₄Kaloku akayi kubafulathela abantu bakhe uNdikhoyo;

akasoze ayilahle indlu yakhe.

₁₅Kobakho ubulungisa ezinkundleni,

abulandele onke amalungisa.

₁₆Azi, ngubani owondilwela kumatshijolo?

Yoba ngubani na ongakum?

₁₇Ukuba bendingancedwanga nguNdikhoyo,

ngesele ndikwantsonga-nyawana.

₁₈Xa ndandisendisithi ndiyoyisakala,

wandixhasa ngezibele zakho wena, Ndikhoyo.

₁₉Xa ndandinxubile, ndixhalabile,

wandithuthuzela, wandonwabisa wena.

₂₀Akunabudlelana nabalawuli abakhohlakeleyo,

bona bayenza umthetho intswela-bulungisa.

₂₁Bayalihlanganyela ilungisa bona,

bamgwebele ukufa umnt' engenatyala.

₂₂Kodwa ngumkhuseli wam yena uThixo;

yinqaba endizimela ngayo.

₂₃UNdikhoyo wobohlwaya ngenxa yenkohlakalo yabo,

batshabalalele kobo bugwenxa babo;

wobabhangisa kuphele tu uThixo.

₁Yizani sombelele *uNdikhoyo,

simculele sigcobile umkhuseli nomsindisi wethu!

₂Masiye kuye sinombulelo,

simombelele iingoma zokubonga.

₃Kaloku uNdikhoyo nguThixo onamandla,

ngukumkani omkhulu *kwizithixo zonke.

₄Lisesandleni sakhe ihlabathi liphela;

iinzulu neencopho zilawulwa nguye.

₅Ulawula ulwandle kuba walwenza;

nomhlaba wawudala ngezandla zakhe.

₆Yizani siqubude simnqule,

siguqe phambi koNdikhoyo umdali wethu,

₇kuba yena nguThixo wethu.

Thina singumhlambi awalusayo,

iigusha ezondliwa nguye.

Namhla liveni ilizwi lakhe elithi:

₈“Musan' ukuba neenkani, njengookhokho benu eMeribha,

njengemihla yaseMasa entlango,

₉apho bandilingayo,

naxa babezibona izinto endandibenzela zona.

₁₀Iminyaka emashumi mane bandikruqula,

ndada ndathi: ‘Hay' ukungeva kwabo;

abayithobeli imiyalelo yam.’

₁₁Ngoko ke ndafunga ngomsindo, ndathi:

‘Abasoze bangene ekuphumleni kwam.’ ”

₁Mombeleleni ingoma entsha *uNdikhoyo!

Mombelel' uNdikhoyo, hlabathi lonke!

₂Mombelelen' uNdikhoyo, nibonge igama lakhe;

zivakaliseni mihla le iindaba zakhe zosindiso.

₃Zibaliseleni ngesihomo nesithozela sakhe iintlanga;

zixeleleni ngemimangaliso ayenzileyo zonke izizwe.

₄Kaloku yingangalala uNdikhoyo, ufanelwe yimbeko enkulu;

ufanelwe kukoyikwa ngaphezu *kwezithixo zonke,

₅kuba yimifanekiso nje izithixo zeentlanga,

kodwa yena uNdikhoyo wadal' oomazulu.

₆Yena unobungangamsha nesithozela;

kukho isihomo nendili apho akhoyo.

₇Mbongeni uNdikhoyo, nina bemi bomhlaba;

mbongeni kuba unewonga namagunya.

₈Mnikeni imbeko efanele igama lakhe;

sondezani amadini, ningene endlwini yakhe.

₉Mnquleni uNdikhoyo, yena unesihomo nesithozela;

malingcangcazele lonk' ihlabathi phambi kwakhe.

₁₀Zixeleleni iintlanga ukuba uNdikhoyo nguKumkani;

nguye olizinzisayo ihlabathi, aliyi kugungqa;

nguye oya kubagweba ngobulungisa bonke abantu.

₁₁Gcobani, mazulu, lichwayite ihlabathi;

gquma, wena lwandle, nako konke okwakho;

₁₂makayeyezele amadlelo nezinto ezikuwo;

mayombele imithi emahlathini;

₁₃kuba uyeza uNdikhoyo;

uza kuligweba ihlabathi,

alilawule ngobulungisa,

azigwebe ngokomthetho izizwe.

₁Ngukumkani *uNdikhoyo, uyalawula;

malichwayite ke ngoko ihlabathi, nani ziqithi vuyani!

₂Ugqubuthele ngentshinyela yelifu,

nesithokothoko sobumnyama simsithile;

ngukumkani ogweba kakuhle, ngobulungisa.

₃Kulephuz' umlilo ngaphambi kwakhe,

uzitshise macal' onke iintshaba zakhe.

₄Imibane yakhe imenyezela kutsho kukhany' ehlabathini;

batsho bangcangcazele kukoyika bakuyibon' abemi balo.

₅Zitsho zinyibilik' iintaba phambi koNdikhoyo, zixel' umthwebeba;

nditheth' ingangalala yehlabathi liphela.

₆Sibonakalis' ubulungisa bakhe isibhakabhaka,

ze zonk' iintlanga ziluqond' udumo lwakhe.

₇Bahlala bedana bonk' abanqula imifanekiso;

nditshw' abo baqhayisa ngemifanekiso eqingqiweyo;

kuba zonk' *izithixo zikhahlela kuNdikhoyo.

₈Beva, bavuya abantu baseZiyon,

nezixeko zakwaJuda zachwayita,

ngenxa yezigqibo zakho, Thixo.

₉Kuba wena, Ndikhoyo, uyingangalal' ehlabathini;

uyingqonyela yazo zonke izithixo.

₁₀Nina bamthandayo uNdikhoyo, buthiyeni ububi;

kaloku yena uyabagcina abantu bakhe,

abahlangule esandleni sabantw' abakhohlakeleyo.

₁₁Ilitha lokukhanya lithe thaa phezu kwamalungisa;

banemincili abantw' abantliziyo zinyulu.

₁₂Gcobani nonke malungisa,

nibulel' uNdikhoyo ngezintw' ezintl' anenzele zona.

₁Mombelelen' ingoma entsha *uNdikhoyo,

kuba unenzele izinto ezintle.

Kaloku woyisile ngamandla akhe nangegunya lakhe.

₂UNdikhoyo ulutyhilile usindiso lwakhe,

wabuveza ezintlangeni ubulungisa bakhe.

₃Wasigcina isithembiso sakhe kumaSirayeli.

Uthe ngcembe ngezibele nangentembeko;

lwabonwa ngumntu wonk' ehlabathini uloyiso lukaThixo wethu.

₄Mombeleleni ngemihlali uNdikhoyo, nonke hlabathi!

Dandulukani, nimemelele, nivum' imibongo!

₅Mbongeni uNdikhoyo ngesandi sengoma yehapu;

mbethelen' uncuthu lwengoma ngehapu.

₆Bethan' amaxilongo, kukhal' isigodlo,

nenz' intshol' emnandi phambi koNdikhoyo ukumkani.

₇Gquma, wena lwandle, nako konk' okukuwe;

nawe hlabathi, hlabel' ingoma!

₈Bethan' izandla, milambo;

nani zinduli, mombelelen' uNdikhoyo!

₉Kuba uza kuligweb' ihlabathi,

alawule konke ngobulungisa, engenamkhethe.