To The Word – Day 221

₁Mbongen' *uNdikhoyo!

Bambani ngazibini kuba ulungile uNdikhoyo.

Kaloku izibele zakhe ziya kuhlala zikho ngonaphakade.

₂Ngubani onokubalisa ngezenzo ezidumileyo zikaNdikhoyo;

ingubani onokumbonga ngokufezekileyo?

₃Hay' uyolo lwabo bathobela imithetho yakhe;

nditheth' abo bahlala besenza okulungileyo.

₄Uzundikhumbule, Ndikhoyo, xa ubonelel' abantu bakho;

ungandishiyi, Ndikhoyo, xa ubahlangulayo.

₅Nam maze ndiyibon' inkqubela yabanyulwa bakho,

ndize ndivuye kunye nabantu bakho,

ndilixhamle ibhongo neqhayiya labantu bakho.

₆Nathi sone njengookhokho,

sikwenzile ukungcola nobubi.

₇Xa babeseJiputa oomawokhulu

zange bazinanze izenzo zakhw' ezidumileyo;

bazilibala izibele zakho,

basuka bamvukel' uPhezukonke kuLwandl' oluBomvu.

₈Kodwa wabahlangula uNdikhoyo ngenxa yegama lakhe,

khon' ukuze bawaqonde amandla akhe.

₉Wawis' izwi, lwaza loma qoko uLwandle oluBomvu;

wabaweza kuloo nzonzobila,

banga bahamb' enkangala.

₁₀Wenjenjal' ukubakhulula esandleni sotshaba;

wabahlangula kubabandezeli babo.

₁₁Zagutyungelwa ngamanzi iintshaba zabo,

akwasinda namnye kuzo.

₁₂Bandul' ukuziqonda ke izithembiso zikaNdikhoyo,

baza badomboza betyibela ngemibongo.

₁₃Kwakamsinya bazilibala izintw' abenzele zona,

benza ukuthanda kwabo bengajonge cebiso kuye.

₁₄Entlango bangenwa kukubawa,

baza bamlinga uThixo kuloo nkangala.

₁₅Wabenzela izicelo zabo,

kodwa wabathumela ngobhubhani wesifo.

₁₆Bammonela uMosis apho entlango,

nditsho naso isicaka sikaNdikhoyo uAron.

₁₇Wavuleka wona umhlaba waginya uDatan,

wagqumelela uAbhiram kunye neqela lakhe.

₁₈Kwagqabhuk' umlilo phakathi kwabo,

awabhuq' onk' amatshijolo amalangatye.

₁₉Babumba ithole eHorebhe,

baza banqula kwaloo mfanekiso bawenzileyo.

₂₀Ngale ndlela isihomo sikaThixo

basinika umfanekiso wenkomo, into edla utyani.

₂₁Bamfulathela uMsindisi wabo,

kanye lo wabenzela izinto ezintle eJiputa.

₂₂Hay' ubukhulu bezinto abenzela zona kwelakwaHam;

hay' ukukhwankqisa kwemimangaliso kuLwandl' oluBomvu!

₂₃Yiyo ke loo nto athe nge-ebabhangisile uThixo

ukuba uMosis isicaka sakhe wayengabamelanga,

athibaz' ingqumbo kaThixo bangatshabalali.

₂₄Balicekisa ilizwe elihle kakhulu,

kuba babengazikholelwa izithembiso zikaThixo.

₂₅Babehlala ezintenteni bekrokra,

bengawuthobeli umyalelo kaNdikhoyo.

₂₆Wamis' isibhozo efung' esithi

wobayeka bafel' aph' enkangala,

₂₇ize inzala yab' ayichitha-chithe phakathi kweentlanga,

ibe ziintsalu apho kumazw' asemzini.

₂₈Basuka bazibandakanya nabanquli bakaBhali wasePehore,

batya nokutya kwamadini *ezithixo.

₂₉Bamcaphukisa uNdikhoyo ngezenzo zabo,

kwabakho ubhubhani wesifo phakathi kwabo.

₃₀Waphakama wabangxengxezela uPineyasi,

saza sathomalala isibetho eso.

₃₁Ngale nto ke wabalelwa kumalungisa,

wahlala ekhunjulwa izizukulwana ngezizukulwana.

₃₂Nangasemithonjeni yeMeribha bamqumbisa uNdikhoyo,

waba sengxakini uMosis ngenxa yabo.

₃₃Bamcaphukisa uMosis

ngangokuba wada wathetha amazwi angemahle konke.

₃₄Abazange bazitshabalalise iintlanga

njengoko babeyalelwe nguNdikhoyo.

₃₅Basuka bendiselana nazo,

bafunda namasiko azo.

₃₆Banqula izithixo abantu bakaThixo,

nto leyo ke yaba ngumgibe wabo.

₃₇Babinga oonyana neentombi zabo,

besenzela iindimoni amadini.

₃₈Baliphalaz' igaz' elingenatyala,

nditheth' eloonyana neentombi zabo

ababebanikela kwizithixo zaseKanana;

labubutyadidi ke elo zwe lelo gazi.

₃₉Benjenjalo ke ukuzixabhela;

benjenjalo ukuzenyelisa bamfulathela uThixo.

₄₀UNdikhoyo wavutha ngumsindo,

waza wabacaphukela abantu bakhe.

₄₁Wabayekela ezandleni zeentlanga,

baba phantsi kolawulo lweentshaba zabo.

₄₂Zababandezel' iintshaba,

bahlala kabuhlungu phantsi kwazo.

₄₃Kwaba kaninzi-ninzi ebahlangula uNdikhoyo,

kodwa bakhetha ukungamva,

beyela zwabha esonweni;

₄₄Kambe ke wabuya wayigqala uNdikhoyo imbandezelo yabo,

wabeva bakuzibika kuye;

₄₅wazikhumbula nezithembiso zakhe kubo,

waba nenceba ngenxa yothando lwakhe olukhulu,

₄₆wabatsho basizelwa ngababandezeli babo.

₄₇Sisindise, Ndikhoyo, Thixo wethu,

siqokelele phakathi kweentlanga, ukuze sikubulele,

silibonge igama lakho elingcwele.

₄₈Makabongwe uNdikhoyo uThixo kaSirayeli

kususela ngoku kude kube nini-nini!

Bonk' abantu mabathi: “Huntshu!”

Mawubongwe wena, Ndikhoyo.

₁Mdumiseni *uNdikhoyo, kuba elungile;

ezakhe izibele zohlala zihleli.

₂Ewe, mabadanduluke batsho abasindisiweyo bakaNdikhoyo,

abo abakhululeyo esandleni sotshaba;

₃nditsho abo baqokelelwe kwizizwe ngezizwe,

empuma nasentshona, emantla nasezantsi.

₄Bambi babebhadula entlango,

bengenaso isixeko sokuma bazinze.

₅Ewe, babelamba benxanwa;

kwakugos' okwaphukayo beyoba.

₆Ke kaloku babhenela kuNdikhoyo bekhohliwe,

waza yena wabakhulula kwezo ngxaki zabo,

₇wabakhokela ngendlela ethe ngqo,

wada wabamisa esixekweni bazinza.

₈Mabambulele uNdikhoyo ngenxa yezibele zakhe ezingatshitshiyo,

nangenxa yezigigaba azenzela oonyana babantu.

₉Andithi kaloku uyamanelisa onxaniweyo,

aze amhluthise ngokulunga olambileyo!

₁₀Abanye babehlala esithokothokweni sobumnyama,

bengamabanjwa akhonkxwe ngemixokelelwane;

₁₁kuba kaloku bawavukela amazwi kaThixo,

bawudela ummiselo kaPhezukonke.

₁₂Babeziinxekenxeke, besebenza nzima;

babezizigede, kungekho bani ubasizayo.

₁₃Ke kaloku babhenela kuNdikhoyo besengxakini,

waza yena wabakhulula kwezo nkxwaleko zabo.

₁₄Wabakhupha esithokothokweni sobumnyama,

waziqhawula iimbophelelo zabo.

₁₅Mabambulele uNdikhoyo ngenxa yezibele zakhe ezingatshitshiyo,

nangenxa yezigigaba azenzela oonyana babantu.

₁₆Kaloku yena uyazifohloza iingcango zesinyithi,

aze azikroboze izibonda zentsimbi.

₁₇Bambi babencithekile ngenxa yezono zabo;

ngenxa yobugwenxa babo babexhwalekile.

₁₈Ukutya babengasafuni nokukubona;

kaloku babesebelikrobile ingcwaba.

₁₉Ke kaloku babhenela kuNdikhoyo besengxakini,

waza yena wabakhulula kwezo nkxwaleko zabo.

₂₀Wathetha ngelizwi, baza baphila;

ewe, wabahlangula ekufeni.

₂₁Mabambulele uNdikhoyo ngenxa yezibele zakhe ezingatshitshiyo,

nangenxa yezigigaba azenzela oonyana babantu.

₂₂Mabenze amadini okubulela,

batsholoze bemdumisa ngemisebenzi yakhe.

₂₃Abanye babehamba elwandle ngeenqanawa;

babephila kukurhweba elwandle.

₂₄Babeyibona imisebenzi emikhulu kaNdikhoyo;

nditsho imimangaliso yakhe elwandle.

₂₅Kaloku wathetha ngelizwi, kwavel' isaqhwithi,

aza ke wona amaza alatyuza.

₂₆Iinqanawa zaphatha kunyuka, zaphatha kuzika;

ke bona abarhwebi banxuba.

₂₇Batatazela badidizel' okwamanxila;

ewe, lalixubayele bexakiwe.

₂₈Ke kaloku babhenela kuNdikhoyo besengxakini,

waza yena wabakhulula kwezo nkxwaleko zabo.

₂₉Wasithothisa ke isaqhwithi,

aza ke amaza olwandle azola.

₃₀Ke kaloku bachulumacha kuba kuzolile,

waza ke wabafikisa kwizibuko ababelinqwenela.

₃₁Mabambulele uNdikhoyo ngenxa yezibele zakhe ezingatshitshiyo,

nangenxa yezigigaba azenzela oonyana babantu.

₃₂Ngoko ke mabamncome ebandleni labakhe,

bamdumise embizweni yamadoda amakhulu.

₃₃Ulojika imilambo ibe yinkangala,

imithombo ibe ngumqwebedu.

₃₄Ngenxa yenkohlakalo yabemi balo

elichumayo ulitsho libe yintlango.

₃₅Umajik' intlango ibe sisithabazi samanzi,

elibharhileyo litsho litsits' imithombo.

₃₆Uzimisa apho ke izilambi,

khon' ukuze zime zizinze.

₃₇Ziyalima, zizityalela izidiliya;

ewe, zivuna intabalala yendyebo.

₃₈Ngentsikelelo yakhe bazala bangayeki,

neenkomo zabo zihlala zisanda.

₃₉Suka ke bancipha ngamanani,

baza ke bathobeka,

ngenxa yengcinezelo, inkxwaleko, neentsizi.

₄₀Amatshawe uwagalele ngehlazo,

aba zizibhadu-bhadu zelibharhileyo.

₄₁Ke bona abahlelelekileyo uyabonyula ezinkathazweni,

abatsho bande ngokwemihlambi.

₄₂Athi akuyibona le nto amalungisa agcobe;

ke bona abangendawo baxakwe.

₄₃Olumkileyo makazigqale ezi zinto;

abantu mabaziqonde izibele zikaNdikhoyo.

₁Awu, Thixo, ndizimisele ngokupheleleyo;

ewe ngenene, andithandabuzi;

ndiza kumemelela nditsholoze!

₂Ndosuka ndiqubul' ihapu nekatala;

ewe, ndovuka xa kumpondo zankomo.

₃Ndiya kukuncoma phakathi kweentlanga, *Ndikhoyo;

ewe, ndokudumisa naphakathi kwezizwe.

₄Izibele zakho zibalasele ezulwini;

ukuthembeka kwakho kurhec' amafu.

₅Awu, Thixo, zimaseka phezulu esibhakabhakeni;

isidima nesihomo sakho masibe phezu kwehlabathi jikelele.

₆Nceda ngamandla akho usivelele,

ukuze basinde abo ubathandayo.

₇UThixo uthethe *esesibingelelweni sakhe,

wathi: “IShekem ndiyayahlula-hlula,

ngoloyiso ndiyayihlahlela;

intili yeSukoti yona ndiyibenge.

₈IGiliyadi yeyam, noManase ngowam;

uEfrayim lelona xhadi lam;

uJuda ngumsimbithi wam.

₉UMowabhi yintili yam yebhongo;

ke yena uEdom ndiyambanga.

EFilistiya ndikhwaza uloyiso.”

₁₀Ngubani onokundisa emzini oxhotyisiweyo?

Ngubani onokundisa e-Edom?

₁₁Noko usilahlile, Thixo?

Akusaphumi nemikhosi yethu?

₁₂Sincedise ezintshabeni zethu;

kaloku olomntu uncedo luphuthile.

₁₃Ukuba uThixo ungakuthi, siya kuphumelela;

uya kuzinyhasha iintshaba zethu.

₁Thixo wam endimncomayo,

ngani ukuba uthi cwaka,

₂ndimangalelwa nje zizikhohlakali namaxoki?

Kaloku bona bandirhintyela ngobuxoki;

₃bathetha izinto ezimasikizi ngam;

bandihlasela ndingenzanga nto.

₄Ndandibathanda ndibathandazela,

kodwa bandibuyekeza ngokundityhola.

₅Ukulunga kwam bakubuyekeza ngobubi;

uthando lwam balubuyekeza ngentiyo.

₆Mmisele isibhoja lo mfo;

misa ofana naye ematyaleni.

₇Ematyaleni makafunyaniswe onile,

nomthandazo wakhe mawumgwebe.

₈Imihla yakhe mayinqanyulwe;

indawo yakhe mayithathwe ngomnye.

₉Abantwana bakhe mababe ziinkedama,

umfazi wakhe abe ngumhlolokazi.

₁₀Abantwana bakhe mababe zizibhadu-bhadu ezingqibayo;

mabajikeleze bazingele ukutya nasemabhodlweni.

₁₁Ombamba ulutho wanga angamthimba;

amandla akhe makaxhatshazwe ngabasemzini.

₁₂Ngamana akungebikho bani uvelana naye,

angabikho ozisizelayo ezo nkedama.

₁₃Ngamana yaphanza nenzala yakhe,

igama lakhe lingaphindi likhankanywe.

₁₄Ngamana wabuxhiba *uNdikhoyo ububi booyise,

buhlale phambi kwakhe nobubi bukanina.

₁₅Ngamana wabugcina njalo uNdikhoyo obu bubi;

igama lakhe malicime kuthi tu emhlabeni.

₁₆Kaloku lo mntu zange abakhathalele abahlelekileyo nabaxakekileyo,

koko wabadobelela abacinezelwa.

₁₇Wayengumqalekisi, naye ke makaqalekiswe;

zange athamsanqele, naye ke makangakuzuzi.

₁₈Ukuqalekisa wayekunxiba njengempahla:

makuthi nca emzimbeni njengamanzi;

makugqobhozele emathanjeni njengamafutha.

₁₉Ewe, makube njengengubo ayambathayo;

mihla le makube yibhanti ayibhinqayo.

₂₀Ndikhoyo, esi mayibe sisohlwayo sâbo bandimangalelayo,

abo bathetha kakubi ngam.

₂₁Kodwa ke, Mhlekazi Ndikhoyo,

ndivelele ngenxa yegama lakho;

ndihlangule ngenxa yezibele zakho.

₂₂Kaloku ndihlelelekile, ndixakekile;

futhi ke ndixhelekile.

₂₃Ndithe shwaka ngokwesithunzi samarhatya;

ndivuthuluke ngokwesinambuzane.

₂₄Nditsho ndanengevane kukungatyi;

andibhityanga, ndingumcinga!

₂₅Iintshaba zam ziphoxisa ngam;

zakundibona zihlunguzel' intloko.

₂₆Khawundincede, Ndikhoyo Thixo wam;

ndisindise ngokwezo zibele zakho!

₂₇Khawubethe baqonde ukuba nguwe lo,

nguwe ondihlangulayo, Ndikhoyo.

₂₈Mabathi bendiqalekisa nje, ube wena undithamsanqela;

bathi ntimfa ngehlazo abo bandihlaselayo.

Mna ke sicaka mandiphuphume yimincili.

₂₉Abandimangalelayo mabavathe ihlazo;

ewe, mabalithi wambu oku komnweba.

₃₀Ndiya kubhomboloza ndidumisa uNdikhoyo;

ndiya kumncoma phakathi kwezihlwele;

₃₁kuba yena uyamxhasa ohlelelekileyo,

amhlangule kwabo bamsingela phantsi.

₁*UNdikhoyo wathi enkosini yam ukumkani:

“Hlala ngakum kweli wonga,

lo gama ndikoyisela iintshaba zakho.”

₂Ulawulo lwakho uNdikhoyo woluqalisa eZiyon.

Ke wena zilawule iintshaba zakho.

₃Amatshawe akho ozincama engaqhutywa,

evethe eziyokoyoko zoloyiso,

mhla wagagana notshaba lwakho.

Kusasa ngejekejeke lobuthelana okombethe ulutsha.

₄UNdikhoyo akayi kujika, kuba wafunga wathi:

“Wena ungumbingeleli wodidi lukaMelkizedeki

oya kuhlala ehleli.”

₅Ke yona iNkosi ingakuwe;

mhla yacaphuka iya kuzibhangisa izikumkani.

₆Iya kuzingenela ngomgwebo izizwe,

zitsho ziqungquluze izidumbu zabantu;

ewe, iya kuzivikiva iziphathamandla jikelele.

₇Ukumkani uya kusela ecaleni kwendlela;

ngako ke aqingqe ethwel' indwe.

₁Huntshu-u-u! Sithi: “Bayethe, Mhlekazi!”

*UNdikhoyo ndiya kumbonga ndiphelelise;

ewe, ndiya kumbonga ndikunye namalungisa ebandleni lakhe.

₂Ewe, mikhulu kambe imisebenzi kaNdikhoyo;

abayilangazelelayo bayayiphicotha bayiqondisise.

₃Imisebenzi yakhe inesidima nobungangamsha;

ubulungisa bakhe buhlala buhleli.

₄Yena uyasikhumbuza imisebenzi yakhe;

uNdikhoyo unobubele enesisa.

₅Uyabondla abo bamthobelayo;

yena akawulibali umnqophiso wakhe.

₆Abantu bakhe ubabonisile amandla akhe

ngokubabèla ilifa leentlanga.

₇Ewe, imisebenzi yakhe mihle, inyanisekile;

umntu angaqamela ngemimiselo kaNdikhoyo.

₈Ke yona iya kuhlala ihleli;

yamiselwa ngentembeko nokunyaniseka.

₉Abantu bakhe wabathi jize ngenkululeko,

waza wabamisela umnqophiso ongatshitshiyo.

Hay' ubunyulu nobungangamsha begama lakhe!

₁₀Isiseko sobulumko kukuthobela uNdikhoyo.

Abayenzayo ke le nto baba nengqiqo eyiyo.

Ewe, makadunyiswe nanini-nanini!