To The Word – Day 98

₁Kunyembelekile kuwe, Ariyeli, sixeko esathinjwa nguDavide!

Mayijikeleze ihambe iminyaka;

mayenjenjalo nemibhiyozo yonyaka.

₂Kodwa mna *Ndikhoyo ndokuhlasela, Ariyeli;

yoba sisijwili nokuyayatheka,

kum ube ngathi liziko elivuthayo.

₃Ndokuhlasela ndikungqinge ngeendonga,

ndikujikeleze ngeemboniselo.

₄Uya kuthotyelwa eluthulini,

uthethe ngelizw' elivumbuluk' emhlabeni,

usebeze ngelezithunzela.

₅Kodwa ke iintshaba zakho zovuthululwa njengothuli,

imikhosi eyomeleleyo itshayelwe njengomququ.

Ngethuba elingephi, ngephanyazo,

₆uNdikhoyo uSomandla-onke uya kukuhlangula;

uya kutsho ngentswahla yeendudumo nenyikima,

ibe sisivungu-vungu esigquthezayo,

umlilo nedangatye elilenyezayo.

₇Yonke imikhosi yezizwe ezihlaselayo,

ezihlasela iAriyeli,

izixhobo nezikrweqe zazo konke nje,

koba njengephupha,

njengombono wasebusuku.

₈Kofana nomfo olambileyo ephupha,

engathi uyatya, kodw' akuvuk' usalambile;

okanye umntu othe khothe lunxano,

ophuph' esela, phof' avuke esanxaniwe.

Koba njalo ke ukuphoxeka kwemikhosi yezizwe

leyo ihlasela intaba yeZiyon.

₉Zithwangeni nitsho nibe zizityhakala;

zimfamekiseni ke, nitsho nimfameke;

nxilani, noba anikhange nibufake;

gxadazelani, ningaselanga tywala.

₁₀*UNdikhoyo unitsho nangamayosi-yosi;

unitsho nayeketheka bubuthongo.

Kaloku amehlo enu avalekile,

neentloko zenu zincithekile;

ewe, abashumayeli benu ababoni, abaqiqi.

“Aba bantu basondela kum ngomlomo,

bandihlonela ngalo umpaku-mpaku;

iintliziyo zabo zona zikude lee,

inkolo yabo imi ngeziqhelo kuphela.

₁₄Ngoko ke mna ndosuka ndiphinde ndibancithe ngesishiqi phezu kwesithwakumbe,

nobulumko beengqondi butsho buthi shwaka,

nobungcaphephe bamaqili butsho bunyamalale.”

₁₅Asazi ke kwabo bazifihlayo –

kunyembelekile kwabafihlela *uNdikhoyo iinjongo zabo,

kwabo benza izinto ebumnyameni,

besithi: “Ngubani oya kusibona? Ngubani oya kusazi?”

₁₆Iinto zonke bona bayazibhukuqa:

kukho udongwe nombumbi – yiyiphi eyona-yona?

Into ebunjiweyo ingamsola na umbumbi isithi: “Andenziwanga nguye”?

Udongwe lungatsho na kumxonkxi ukuthi: “Awunangqiqo”?

₁₇Kaloku kukho isimbo esithi:

“Amahlathi aseLebhanon ojika abe ngumyezo weziqhamo,

ke wona umyezo ube ngamahlathi.”

₁₈Ngaloo mini ke nesithulu siya kuva;

siya kuweva amazwi afundwa encwadini.

Nemfama ehlala esithokothokweni sobumnyama

ovuleka amehlo ayo, itsho ibone.

₁₉Nabo bangazelwe nto uNdikhoyo uya kubavuselela ngolonwabo;

abahlelelekileyo boba nemihlali ngoYedwa kaSirayeli.

₂₀Eso soba sisiphelo seendlobongela,

batsho banqamke abamgxekayo uThixo,

nabaququzeleli bobubi batsho baphele.

₂₁Baya kutshabalala abaphixanisayo;

konyembeleka kwabacupha abantu ngobugqwetha;

abo bajika ubulungisa ngobuxoki,

bacudulele abantu abamsulwa.

“UYakobi akaphindi abe semahlazweni,

engasoze aphinde abuye anxube!

₂₃Akubona inzala endiya kumpha yona,

abantwana abangumsebenzi wam,

uya kutsho avume athi mna ndinguYedwa kaYakobi.

Ngenene, uya kundihlonela,

akhahlele kum, mna Thixo kaSirayeli,

alidumise igama lam elilodwa.

₂₄Nabo banxaxhileyo bofumana ingqiqo,

nabo bambombozelayo bayamkele ingqeqesho.”

₁*UNdikhoyo uthethe wenjenje:

“Libhek' umoya kusapho olunenkani,

abo benza izigqibo ngaphandle kwam,

abenza izivumelwano ngaphandle kwam;

izono zabo ziyelekelana.

₂Bona basuka babhenela eJiputa;

abanaxesha lokubuzisa kum.

Nto bayifunayo kukukhuselwa yiJiputa;

nto bayingxameleyo liphiko lokumkani walapho.

₃Ukhuselo lweJiputa yimpoxo yodwa;

nto ningayizuzayo kukuhlazeka kuphela.

₄Bona banawo amagosa eZowan,

banabo noonozaku-zaku eHanes,

₅kambe ke wonk' umntu uya kuphoxeka

ngenxa yesi sizwe singento yanto,

isizwe esingenaluncedo nacebo

ngaphandle kwamahlazo namanyondololo.”

Oonozaku-zaku bacanda kweleembandezelo neengozi,

kwilizwe abakrotywa ziingonyama,

apho kuphithizel' iinyok' ezinobuhlungu,

zikwalapho nezitshu zamagongqongqo.

Iidonki neenkamela zabo ziyasuntsubala

yimithwalo ezizipho ezixabisekileyo,

ziphiwa isizwe esingento yanto.

₇Kaloku iJiputa ize, ayinaluncedo mpela;

yiyo loo nto ndiyibiza ngokuthi nguRahabhi ongenamsebenzi,

nditsho ikhwang' elinqunyulwe neempondo.

₈UThixo wandiyalela wathi:

“Krola ecwecweni, ubhale encwadini,

obo ibe bubungqina obuhlala buhleli.

₉Aba ngabantu abangalawulekiyo,

sisizukulwana esinenkohliso,

abantu abangazimisele kuphulaphula,

abayichasayo ingqeqesho *kaNdikhoyo.

₁₀Kubashumayeli bathi:

‘Yithini cwaka ngemibono!

Sanukusifundekela ngeemfanelo zethu!

Sithuthuzeleni sihlale sinje;

siboneleni okungamampunge.

₁₁Sudukani, sanukuxaba endleleni;

asifuni nokuva ngoYedwa uThixo kaSirayeli.’ ”

₁₂Ngoko ke uYedwa kaSirayeli uthi:

“Ngokuba ningaluvumanga olu daba,

koko nisuke naqamela ngenkohliso nengcinezelo,

₁₃ngoko ke anikho lityala,

nifana nqwa nodonga oluphakamileyo

olunenkenkewula yethanda;

ewe, sekulindeleke isithonga nanini na.

₁₄Losuka lupharhake ngathi yingqayi entlekeke yaba ziingceba

ezingenakukha malahle eziko namanzi equleni.”

“Nosinda ngenguquko nokuzinikezela kum;

amandla enu kukuzola nokuthembela kum.

Phi ke, nisala nje!

₁₆Ndaweni yaloo nto nithi:

‘Sosuka sisabe ngamahashe.’

Ewe, kungaba njalo.

Nithi: ‘Amahashe ethu angaphala gqitha.’

Ewe, amahashe enu angaphala nakangako

kodwa nofunyanwa ngabanisukelayo.

₁₇Iwaka losukeliswa lijoni elinye;

xa ninonke niya kugxothwa ngamajoni amahlanu qha,

nibaleke nisabe nibe njengendwe emi yodwa entabeni phaya,

nayo ke iyeyentlaba-mkhosi.”

₁₈Kambe ke uNdikhoyo usanilindele,

usazungula ukunibabala ngesisa.

Kaloku yena nguThixo ongajika-jikiyo;

hayi ithamsanqa labo bakholosa ngaye!

₂₇Nango amandla nobungangamsha,

*obukaNdikhoyo buthi gqi kwelikude;

intshinyela yomsi idiza ingqumbo yakhe,

ubebezelis' imilebe ngumsindo,

ulwimi lulatyuzelis' amalangatye.

₂₈Umphefumlo wakhe ukhukulisa njengomlambo,

ngathi ngumlamb' ozele wada watyekeza,

uhluz' izizwe ngentshabalalo,

uzirhintyela ngomkhala wolahlekiso.

₂₉Ke nina niya kuchulumacha,

nintyiloze nimemelele ngathi kungobusuku bamatheko amiselweyo.

Niya konwaba ngathi ningabantu abaya endlwini kaNdikhoyo,

bevuma bekhatshwa ngamaxilongo:

uNdikhoyo ixhadi likaSirayeli.

₃₀Wonke umntu uya kukuva ukuhlokoma kwelizwi likaNdikhoyo,

ngokunjalo azive nezabhokhwe zengqumbo yakhe.

Kuya kubakho amadangatye nogqabhuko-mafu,

isichotho nezandyondyo zemvula.

₃₁Ilizwi likaNdikhoyo liya kumrhwaqelisa uAsiriya,

intonga yakhe imkhahlele phantsi.

₃₂Wothi ephindelela nje uNdikhoyo ukuwohlwaya ama-Asiriya

ngaloo nduku yakhe yesohlwayo,

babe bona abantu bakhe bentyiloza

bengqungqa ngamagubu neekatala,

abe yena esilwa nawo.

₃₃Kambe ke kudala lalungiswayo labaswa iziko,

iziko ekuya kutshiswa kulo ukumkani waseAsiriya.

Yinzongo-nzongo yomngxuma obanzi,

iinkuni zifunjwe zayintaba.

Ke yena uNdikhoyo wosuka avuthele

atsho ngomlambo wedangatye,

unqanqaze umlilo.

₁Kunyembelekile kwabo babhenela kuncedo lweJiputa;

nditsho abo bathembela kumahashe,

abo bakholosa ngeenqwelo eziyinyambalala,

nabaqamele ngobukroti bamajoni,

nditsho amajoni amahashe,

abantu abangamjongele nto uYedwa kaSirayeli,

nditsho abangasifuniyo isiluleko *sikaNdikhoyo.

₂Ukanti yena sisilumko, angasivulela nesithwakumbe;

ewe, elakhe ilizwi alidliwa nja!

Koko wosuka ayivukele indlu yezikhohlakali,

abohlwaye abancedisana nabenzi bobubi.

₃La maJiputandin' asiThixo, koko ngabantu,

namahashe awo asimhlola, koko zizilwanyana.

UNdikhoyo wothi angaphakama ibe ziziqwenga,

ke yena umncedisi atsho akhubeke,

aze ke yena umncedwa awe bhaxa,

bonke bavuthuluke batshabalale.

₄UNdikhoyo uthethe nam wenjenje:

“Abelusi bangafanelana beqobisa ngemikhwazo,

kodwa ngunotshe ukuba bayothuse ingonyama,

ingakumbi xa seyilibambile ixhoba layo.

Ngokunjalo nam ke akukho bani unokundinqanda

ekuyikhuseleni kwam intaba iZiyon,

mna Ndikhoyo uSomandla.

₅Njengentaka ikhusela amathole ayo,

nam, mna Ndikhoyo onguSomandla-onke,

ndiya kwenjenjalo ukuyihlanganisela iJerusalem.

Ewe, ndoyikhusela ndiyikhulule;

ndogqitha kuyo ndiyisindise.”

₈“UAsiriya ke yena wofela emfazweni.

Phofu ke akayi koselwa krele lamntu:

kovela krele limbi, lisuke limngxwelerhe.

Kweso sithuba ke wosuka aswantsule,

abafana bakhe ke bona benziwe amakhoboka.

₉Injengele yakhe yosuka ingenwe bubuphaku-phaku,

nezinxiba-mxhaka zosuka zirhwaqele zoyike,

zide zibaleke zilahle kanye nayo nembasa yomkhosi.”

Etshilo nje ke uNdikhoyo utshilo,

Ndikhoyo lowo omlilo uvuthayo eZiyon,

omsi wamadini utsho ngomlembelele eJerusalem!

₁Woze afike ukumkani olawula ngolungelelwano,

izinxiba-mxhaka zitsho ziphathe ngemfezeko.

₂Zonke ngazinye zoba ngumqolomba mhla ligquthayo,

zibe yinqaba yokuzimela mhla ngoqhwithela.

Zofana nemijelo yamanzi kwelibharhileyo,

zibe lithunzi lamawa kwilizwe eliyinkangala.

₃Zona ziya kuba namehlo,

ziqonde iingxaki zoluntu.

Ziya kuba neendlebe,

zikuphulaphule ukuzibika kwabantu.

₄Yoqonda nengqiqo yezityhuthu-tyhuthu,

nabathintithayo bathethe ngokucacileyo.

₅Isiyatha akusayi kuthiwa ngohloniphekileyo;

neqhophololo akusayi kuthiwa ngonyanisekileyo.

₆Kaloku isiyatha sitheth' ubuyatha,

nengqiqo yaso iqulunqa ubugwenxa.

Sizixakekise ngenkohliso;

*uNdikhoyo sihlala simcukuceza ngengcikivo.

Simshiya enjalo umntu othezwa liphango,

singamkhathalele nganto nokhotheke lunxano.

₇Umntu oyindlavini nezenzo zakhe zinenkohlakalo;

uba soloko efutha ukwenza ububi,

ezama ukubhubhisa amahlwempu ngenkohliso,

khon' ukuze awavimbe amalungelo awo.

₈Ke yena onesidima uneengcingane ezizimasekileyo,

nemisebenzi yakhe ingqinelana nento ayiyo.

₉Phakamani nindiphulaphule ke nani,

nditsho nina, zimazi zingaxhalele nto;

bekan' iindlebe nive xa ndithethayo,

nina zintombi ezingáthi zikhuselekile.

₁₀Ningade nibe ngathi nanelisekile ngoku,

kodwa kozayo unyaka nongcungcutheka,

kuba idiliya yona yosuka iphunze,

singabikho tu isivuno seziqhamo.

₁₁Xhalabani, zimazi ezihlala zingaxhalele nto;

hlahlambani, zintombi ezingenaluvalo;

khululani, nithi gatya ezenzila.

₁₂Yho-o-o amasimi! Kwakhe kwanje phi na?

Awu! Sashiya senzeka ngeediliya!

₁₃Gixani ngenxa yomhlaba wabantu bam,

kuba namhla sowugqunywe ngameva nobobo.

Hlahlambani ngenxa yamakhaya avuyayo;

ewe, silileleni isixeko esixokozelayo.

₁₄Kaloku nekomkhulu lokhal' ibhungane,

nakwisixeko esinyakazelayo kuthi bhe!

Kwandlunkulu koba ngamabhodlo kanaphakade;

koba lapho adloba-dloba khona amaqwarha,

kube lapho itya khona imihlambi,

₁₅ade uThixo asithululele uMoya wakhe,

nentlango itsho ifane nomyezo weziqhamo,

imiyezo yeziqhamo ifane namahlathi.

₁₆Nasentlango kuya kuphuphuma ulungelelwano,

nemiyezo echumayo yambathiswe bubulungisa.

₁₇Ke ubulungisa bozala inzolo,

ize ke ibe lulungelelwano nocwangco njalo-njalo.

₁₈Ke abantu bam bothi zava bahlale ngenzolo

kwimizi ekhuselekileyo nephahlwe luxolo.

₁₉Nokuba amahlathi ebhululwe sisichotho,

nesixeko sivuthuluke kwathi pam,

₂₀yoba luvuyo kuye wonk' ubani,

ingengomanzi ingesosivuno, kuyinto nje,

amadlelo enabe ethe tshitshilili,

iidonki neenkomo zidakasa zikhuselekile.

“ ‘UThixo uya kuziwisela umthetho ngawe izithunywa zakhe;

ziya kukufunqula, hleze ukhubeke elityeni.’”

₁₅“Wena sithili sakwaZebhulon, nawe sithili sakwaNafetali,

nina eningakwindlela yaselwandle, phesheya kweJordan,

nina baseGalili yeentlanga,

₁₆bantu ababehleli ebumnyameni,

niboné ukukhanya okukhulu;

nina enanihleli ezweni nasethunzini lokufa,

nivelelwe kukukhanya.”