UMary Jones kunye neBhayibhile yakhe

Kudala-dala, intombazana encinci egama linguMary yayihlala kwilizwe elikude, elibizwa ngokuba yiWales, kunye nomama noyise. Babengenamali ininzi. Kwakungekho sikolo sikufutshane nalapho wayehlala khona uMary, ngoko wayengafundanga ukulesa nokubhala.

Rhoqo ngeeCawa uMary wayesiya ecaweni nabazali bakhe. Apho, wayedla ngokuphulaphula umfundisi efunda iBhayibhile enkulu. UMary wazama ngamandla ukukhumbula onke amabali awayefundwa ngumfundisi ecaweni, kodwa kwakunzima kakhulu.

Ngenye imini, utata kaMary wafika ekhaya neendaba ezimnandi. Kwakuvulwa isikolo kwilali yabo!

“Ekugqibeleni ndiyakwazi ukufunda nokubhala!” wacinga uMary. Ngoku ndiyakwazi ukufunda amabali eBhayibhile ngokwam!”

Noko ke, ngaloo mihla iincwadi zazixabisa kakhulu. Unkosikazi Evans, owayehlala kufutshane, waba nethamsanqa lokuba neBhayibhile yakhe. Wayeyazi indlela uMary awayewathanda ngayo amabali eBhayibhile. Ngenye imini, wamemela uMary endlwini yakhe ukuba eze kufunda iBhayibhile yakhe.

“Akwaba bendineBhayibhile yam!” Watsho uMary.

Emva koko, wagqiba kwelokuba enze nantoni na ukuze afumane iBhayibhile eyakhe.

UMary wasebenza nzima ukuze onge imali. Watheza iinkuni namaqanda, waza wawathengisa emarikeni. Ubuye walungisa iimpahla wagcina abantwana.

Ekugqibeleni, emva kweminyaka emithandathu, wayenemali eyaneleyo yokuthenga iBhayibhile. Kodwa, kwakungekho Bhayibhile kwidolophu yakhe awayenokuzithenga. UMary kwakuza kufuneka ahambe kude aye kwidolophu ebizwa ngokuba yiBala, ukuze athenge iBhayibhile. Ngezo mini, zazingekho iimoto okanye iibhasi, uMary kwakufuneka ahambe ngeenyawo.

Wayehamba enganxibanga zihlangu imini yonke kwiindledlana zeentaba, egcine izihlangu zakhe ekuphela kwazo xa efika. Ediniwe kwaye elambile, uMary wafika eBhala njengoko ilanga lalisele linyamalala emva kweenduli.

Ngentsasa elandelayo, uMary wabaleka esiya kubona uMfundisi uCharles owayeza kumthengisela iBhayibhile. “Ndize kuthenga iBhayibhile, ukuze ndifunde iBhayibhile nanini na ndifuna.”

“Ndiyaxolisa kakhulu sithandwa sam, kodwa andisenazo iiBhayibhile endinokuzithengisa,” waphendula uMfundisi Charles.

Yaba buhlungu intliziyo kaMary! Walila walila. “Kodwa ndize ngayo yonke le ndlela. Ndigcine imali iminyaka emithandathu.”

Umfundisi uCharles wayeyibona indlela iBhayibhile ebaluleke ngayo kuMary waza wagqiba ekubeni amncede. “Nantsi ke, Mary, unokuba nenye yeeBhayibhile zam.”

“Owu enkosi Mnumzana uCharles, enkosi, enkosi, enkosi!”

UMary owonwabe kakhulu wayisa iBhayibhile kubazali bakhe. Ngoku, kwakungeyomfuneko ukuba alinde iCawa ecaweni, wayekwazi ukufunda iBhayibhile nanini na efuna.

Emva kotyelelo lukaMary, uMfundisi Charles waya kwintlanganiso apho abefundisi belizwe lonke babehlanganisene khona. Apho, wabalisa ibali likaMary. Bonke abefundisi bagqiba kwelokuba bafumane iiBhayibhile ezingakumbi ngamaxabiso aphantsi ukwenzela abantu baseWales.

Omnye wabefundisi wathi, “Ukuba kukwiWales, kutheni ndingenzeli lonke ihlabathi?”

Waqala ngaloo ndlela ke uMbutho weBhayibhile wokuqala. Namhlanje, ehlabathini lonke kukho iMibutho YeBhayibhile engaphezu kwe-140 enceda abantu abafana noMary.

Activities: