Bible Reading Plan – Day 108

₁Inhliziyo yami iyachichima ngendaba enhle;

ngikhuluma igama engiliqambe ngenkosi;

ulimi lwami lulusiba loloba ngokushesha.

₂Umuhle wena kunabantwana babantu;

ubuhle buthululelwe ezindebeni zakho;

ngakho-ke uNkulunkulu ukubusisile kuze kube phakade.

₃Bophela inkemba yakho okhalweni lwakho wena qhawe,

kube ngukuphakama kwakho nobukhosi bakho.

₄Hlahlameleka ebukhosini bakho,

uqhubeke ngenxa yeqiniso nokuthobeka nokulunga;

isandla sakho sokunene siyakukufundisa izinto ezesabekayo.

₅Imicibisholo yakho ibukhali,

izizwe ziyawa phansi kwakho;

isenhliziyweni yezitha zenkosi.

₆Isihlalo sakho sobukhosi, Nkulunkulu,

singesaphakade naphakade;

intonga yobuqotho iyintonga yombuso wakho.

₇Ukuthandile ukulunga,

wakuzonda okubi:

ngakho-ke uNkulunkulu,

uNkulunkulu wakho,

ukugcobile ngamafutha enjabulo ngokungaphezu kwabangane bakho.

₈Zonke izingubo zakho ziqholiwe ngenhlaka, nenhlaba, nekasiya;*

ezindlini zobukhosi zophondo lwendlovu

ukubethwa kwezingubhu zezintambo kukujabulisile.

₉Amadodakazi amakhosi aphakathi kwabesifazane bakho abadumileyo;

inkosikazi imi ngakwesokunene sakho,

ihlobe igolide lase-Ofiri.

₁₀Mawuzwe-ke, ndodakazi,

uqaphele, ubeke indlebe yakho,

ukhohlwe isizwe sakini nendlu kayihlo,

₁₁yikhona inkosi izakubuthanda ubuhle bakho,

ngokuba yona iyinkosi yakho, woyikhothamela.

₁₂Indodakazi yaseTire, yebo, nabacebileyo babantu

bancenga umusa wakho ngesipho.

₁₃Indodakazi yenkosi inhle kakhulu, ilapho phakathi;

ingubo yayo yalukiwe ngegolide.

₁₄Iyiswa enkosini igqoke izingubo ezifekethisiweyo;

izintombi ezingabangane bayo ziyayilandela; ziyiswa kuwe.

₁₅Ziyiswa ngokujabula nangokwethaba,

zingena endlini yenkosi.

₁₆Amadodana akho ayakuba sesikhundleni sawoyihlo;

uyakuwabeka abe yizikhulu emhlabeni wonke.

₁₇Igama lakho ngiyakulenza likhunjulwe ezizukulwaneni zonke;

ngakho-ke izizwe ziyakukubonga kuze kube phakade naphakade.

₁UNkulunkulu uyisiphephelo sethu namandla ethu;

ufunyaniswa elusizo impela ekuhluphekeni.

₂Ngakho-ke asiyikwesaba

nokuba kuguquka umhlaba,

nezintaba zidilikela ekujuleni kolwandle,

₃nokuba amanzi alo ehlokoma,

ekhephuza,

nezintaba zizamazama ngokukhukhumala kwalo. Sela*

₄Ukhona umfula omanzi awo athokozisa umuzi kaNkulunkulu,

indlu engcwele yoPhezukonke.

₅UNkulunkulu uphakathi kwawo,

awuyikuzanyazanyiswa;

uNkulunkulu uyakuwusiza ngovivi lokusa.

₆Izizwe ziyaxokozela;

imibuso iyazamazama;

uphumisela izwi lakhe,

umhlaba uncibilike.

₇UJehova Sebawoti unathi;

uNkulunkulu kaJakobe uyinqaba yethu. Sela*

₈Wozani nibone izenzo zikaJehova,

izincithakalo azenzileyo emhlabeni.

₉Uphelisa ukulwa kuze kube semikhawulweni yomhlaba;

uyaphula umnsalo,

anqume umkhonto,

izinqola zempi azishise ngomlilo.

₁₀Thulani, niqonde ukuthi mina nginguNkulunkulu;

ngiyakuphakama phakathi kwabezizwe,

ngiphakame emhlabeni.

₁₁UJehova Sebawoti unathi;

uNkulunkulu kaJakobe uyinqaba yethu. Sela*

₁Shayani izandla, zizwe zonke;

hlokomani kuNkulunkulu ngezwi lokuhalalisa.

₂Ngokuba uJehova oPhezukonke uyesabeka;

uyinkosi enkulu phezu komhlaba wonke.

₃Wathobisa abantu phansi kwethu,

nezizwe phansi kwezinyawo zethu.

₄Wasikhethela ifa lethu,

udumo lukaJakobe amthandayo. Sela*

₅UNkulunkulu wenyukile ngokuhlokoma,

uJehova ngokukhala kwecilongo.

₆Hubelani uNkulunkulu, hubani!

Hubelani iNkosi yethu, hubani!

₇Ngokuba uNkulunkulu uyinkosi yomhlaba wonke;

hubani ihubo!

₈UNkulunkulu uyabusa izizwe;

uNkulunkulu uhlezi esihlalweni sakhe esingcwele sobukhosi.

₉Izikhulu zabantu zibuthene,

zibe yisizwe sikaNkulunkulu ka-Abrahama,

ngokuba izihlangu zomhlaba zingezikaNkulunkulu;

uphakeme kakhulu.

₁Mkhulu uJehova, udunyiswa kakhulu

emzini kaNkulunkulu wethu entabeni yakhe engcwele.

₂Inhle ngokuphakama,

ingukuthokoza komhlaba wonke

intaba yaseSiyoni emaceleni asenyakatho,

umuzi weNkosi enkulu.

₃UNkulunkulu uyaziwa ezindlini zawo zobukhosi

ukuthi uyinqaba.

₄Ngokuba bheka, amakhosi abuthana;

aqhubeka kanyekanye.

₅Abona, ayesemangala;

ashaywa luvalo, aphaphatheka.

₆Ehlelwa lapho ngukuthuthumela,

yivuso njengakobelethayo.

₇Ngomoya wasempumalanga

waphula imikhumbi yaseTharishishi.

₈Njengalokho sizwile,

kanjalo sikubonile

emzini kaJehova Sebawoti,

emzini kaNkulunkulu wethu;

uNkulunkulu uyakuwumisa kuze kube phakade. Sela*

₉Siyazindla ngomusa wakho, Jehova,

siphakathi ethempelini lakho.

₁₀Njengalo igama lakho, Nkulunkulu,

kunjalo ukubongwa kwakho kuze kube semikhawulweni yomhlaba;

isandla sakho sokunene sigcwele ukulunga.

₁₁Mayijabule intaba yaseSiyoni,

kwethabe amadodakazi akwaJuda ngenxa yezahlulelo zakho.

₁₂Zungezani iSiyoni, nilikake,

nibale imibhoshongo yalo.

₁₃Qaphelani izindonga zalo,

nidabule izindlu zalo zobukhosi,

ukuze nilandisele isizukulwane esizayo.

₁₄Ngokuba lo Nkulunkulu, unguNkulunkulu wethu phakade naphakade;

uzakusihola kuze kube sekufeni.

₁Yizwani lokhu nonke nina bantu;

bekani indlebe nina nonke enakhileyo ezweni,

₂abantukazana nezikhulu,

abacebileyo nabampofu.

₃Umlomo wami uzakukhuluma ukuhlakanipha,

ukuzindla kwenhliziyo yami kuzakuba ngokokuqonda.

₄Ngizakubeka indlebe yami kuso isaga,

ngiphenye imfumbe yami ngehabhu.*

₅Bengizakwesabelani ezinsukwini ezimbi,

lapha ububi babangizingelayo bungihaqa,

₆labo abathemba imfuyo yabo

bezigabisa ngomcebo wabo omkhulu, na?

₇Umuntu angemhlenge umfowabo,

angemnike uNkulunkulu ihlawulo ngaye.

₈Ngokuba ukuhlengwa komphefumulo wabo kubiza kakhulu;

akunakuphela nanini

₉ukuba aphile njalo, angaboni ukubola.

₁₀Qha, uyakubona ukuthi abahlakaniphileyo bayafa

nokuthi isiwula kanye nesiphukuphuku ziyabhubha,

imfuyo yabo bayishiyele abanye.

₁₁Ukucabanga kwabo kuthi izindlu zabo

zizakuma kuze kube phakade,

nemizi yabo ezizukulwaneni ngezizukulwane;

amazwe abo bawabiza ngamagama abo.

₁₂Kepha umuntu, nokuba enodumo, akayikuma;

ufana nezilwane ezibhubhayo.

₁₃Le ndlela yabo ingubuwula babo,

balandelwa ngabavumela umlomo wabo. Sela*

₁₄Baqhutshelwa endaweni yabafileyo njengezimvu;

ukufa kuyakubalusa,

abaqotho babuse phezu kwabo ngakusasa,

isimo sabo siqedwe yindawo yabafileyo,

bangabe besaba nandlu.

₁₅Kepha uNkulunkulu uyakuwukhulula umphefumulo wami

esandleni sendawo yabafileyo, ngokuba uyakungamukela. Sela*

₁₆Ungesabi, nxa umuntu eceba,

nxa ubukhosi bendlu yakhe banda.

₁₇Ngokuba ekufeni kwakhe akayikuphatha lutho;

ubukhosi bakhe abuyikwehla naye.

₁₈Noma ebusisa umphefumulo wakhe esaphila,

futhi abantu bekudumisa,

ngokuba uzondle kahle,

₁₉nokho uyakuya esizukulwaneni sawoyise;

abayikukubona ukukhanya naphakade.

₂₀Umuntu onodumo engenakuqonda unjengezilwane ezibhubhayo.

₁UNkulunkulu uMninimandla onke,

uJehova, uyakhuluma, ubiza umhlaba

kusukela ekuphumeni kwelanga kuze kube sekushoneni kwalo.

₂ESiyoni eliphelele ebuhleni

uNkulunkulu uqhamile ekukhanyeni.

₃UNkulunkulu wethu uyeza, akayikuthula;

umlilo udla phambi kwakhe;

uphahlwe yisivunguvungu esikhulu.

₄Ubiza izulu ngaphezulu

kanye nomhlaba ukuba ahlulele isizwe sakhe:

₅“Buthelani kimi abangcwele bami

abenza isivumelwano nami ngomhlatshelo.”

₆Izulu lishumayela ukulunga kwakhe,

ngokuba uNkulunkulu ungumahluleli. Sela*

₇“Yizwa, sizwe sami, ngiyakukhuluma;

Israyeli, ngizakufakaza kuwe ukuthi:

NginguNkulunkulu,

uNkulunkulu wakho.

₈Angiyikukujezisa ngenxa yemihlatshelo yakho;

iminikelo yakho yokushiswa iphambi kwami njalo.

₉Angiyikuthatha nkunzi endlini yakho

nampongo ezibayeni zakho.

₁₀Ngokuba zingezami zonke izilwane zehlathi,

nezinkomo zasezintabeni eziyizinkulungwane.

₁₁Ngiyazazi zonke izinyoni zasezintabeni,

nezilwane zasendle zaziwa yimi.

₁₂Uma bengilambile,

bengingekutshele wena,

ngokuba ungowami umhlaba wonke nokugcwala kwawo.

₁₃Ngiyakudla yini inyama yezinkunzi,

ngiphuze igazi lezimpongo, na?

₁₄Nikela kuNkulunkulu umnikelo wokubonga,

uzigcwalise izithembiso zakho koPhezukonke;

₁₅ngibize ngosuku lwenhlupheko;

ngiyakukukhulula,

wena uyakungidumisa.”

₁₆Kepha komubi uNkulunkulu uthi:

“Yini ukuba ushumayele izimiso zami,

uphathe isivumelwano sami ngomlomo wakho,

₁₇ingani uyazonda ukuqondiswa,

amazwi ami uwalahla emva kwakho, na?

₁₈Uma ubona isela, uvumelana nalo;

neziphingi uhlanganyela nazo.

₁₉Umlomo wakho uwuyekela ebubini;

ulimi lwakho luqamba inkohliso.

₂₀Uhlala uhleba umfowenu;

unyevuza indodana kanyoko.

₂₁Lokho ukwenzile, ngathula;

ushaye sengathi nginjengawe;

ngizakukulaya, ngikubeke phambi kwamehlo akho.

₂₂“Qaphelani lokho nina enikhohlwa uNkulunkulu,

funa nginidwengule,

kungabikho osindisayo.

₂₃Onikela ngomnikelo wokubonga uyangidumisa;

oqaphela indlela yakhe

ngiyakumbonisa insindiso kaNkulunkulu.”