Bible Reading Plan – Day 111

₁Mhubeleni ngenjabulo uNkulunkulu, mhlaba wonke.

₂Hlabelelelani inkazimulo yegama lakhe,

nibabaze ukudunyiswa kwakhe.

₃Yishoni kuNkulunkulu, nithi:

“Yeka ukwesabeka kwemisebenzi yakho.

Ngenxa yobukhulu bamandla akho

izitha zakho ziyakuzithoba phansi kwakho.

₄Umhlaba wonke uyakukhuleka kuwe, ukudumise;

bayakuhubela igama lakho.” Sela*

₅Wozani nibone izenzo zikaNkulunkulu;

uyesabeka ekwenzeni kwakhe kubantwana babantu.

₆Ulwandle waluguqula lwaba yizwe elomileyo;

bawela umfula ngezinyawo;

lapho sathokoza kuye.

₇Ubusa ngamandla akhe kuze kube phakade;

amehlo akhe ayahlozinga izizwe;

abanenkani mabangaziphakamisi. Sela*

₈Bongani uNkulunkulu wethu nina zizwe,

nizwakalise izwi lokudunyiswa kwakhe

₉ogcina umphefumulo wethu ekuphileni,

engaluvumeli unyawo lwethu lushelele.

₁₀Ngokuba wena Nkulunkulu usilingile,

wasihlanza njengokuhlanzwa kwesiliva.

₁₁Wasingenisa enetheni;

wabeka umthwalo onzima ezinkalweni zethu.

₁₂Wavumela abantu ukuba bakhwele phezu kwamakhanda ethu;

sangena emlilweni nasemanzini;

kepha wasikhiphela ekubuseni.

₁₃Ngiyakungena endlini yakho ngineminikelo yokushiswa;

ngizakugcwalisa kuwe izithembiso zami

₁₄ezaphinyiselwa yizindebe zami,

zakhulunywa ngumlomo wami ngisekuhluphekeni.

₁₅Ngiyakunikela kuwe iminikelo yokushiswa yezinonileyo

kanye nephunga lezinqama;

ngiyakunikela ngezinkunzi nangezimpongo. Sela*

₁₆Wozani nizwe nina nonke enesaba uNkulunkulu;

ngizakulandisa akwenzele umphefumulo wami.

₁₇Ngakhala kuye ngomlomo wami;

ukudumisa kwakuphansi kolimi lwami.

₁₈Uma bengiqonde ububi enhliziyweni yami,

ibingayikungizwa iNkosi.

₁₉Ngempela uNkulunkulu uzwile,

walalela izwi lomkhuleko wami.

₂₀Makabongwe uNkulunkulu

ongalahlanga umkhuleko wami nomusa wakhe kimi.

₁UNkulunkulu makabe nomusa kithina, asibusise;

makakhanyise ubuso bakhe phezu kwethu, Sela*

₂ukuze indlela yakho yaziwe emhlabeni,

insindiso yakho kubo bonke abezizwe.

₃Abantu mabakubonge, Nkulunkulu;

mabakubonge abantu bonke.

₄Izizwe mazijabule, zethabe;

ngokuba izizwe uzahlulela ngokulunga,

uzihola izizwe emhlabeni. Sela*

₅Abantu mabakubonge, Nkulunkulu;

mabakubonge abantu bonke.

₆Umhlaba uthelile izithelo zawo;

uNkulunkulu, uNkulunkulu wethu, uyasibusisa.

₇UNkulunkulu uyasibusisa;

imikhawulo yonke yomhlaba iyakumesaba.

₁Makavuke uNkulunkulu,

zihlakazeke izitha zakhe;

abamzondayo babaleka phambi kwakhe.

₂Bamukiswa njengokumukiswa komusi;

njengokuncibilika kwengcina phambi komlilo

ababi bachithwa phambi kukaNkulunkulu.

₃Kepha abalungileyo bayajabula;

bayethaba phambi kukaNkulunkulu

bethokoza nokuthokoza.

₄Hlabelelani kuNkulunkulu,

nidumise igama lakhe;

menzeleni umendo lowo odabula amahlane;

igama lakhe linguJehova;

yethabani phambi kwakhe,

₅uyise wezintandane,

umahluleli wabafelokazi,

uNkulunkulu endlini yakhe engcwele,

₆uNkulunkulu ohlalisa imihlalaqha ezindlini,

akhiphele iziboshwa ekubuseni;

ngabahlubukileyo bodwa abakhe ezweni elomileyo.

₇Nkulunkulu, ekuphumeni kwakho phambi kwabantu bakho,

ekudabuleni kwakho ihlane, Sela*

₈umhlaba wazamazama,

izulu laconsa phambi kukaNkulunkulu,

neSinayi lazamazama phambi kukaNkulunkulu,

uNkulunkulu ka-Israyeli.

₉Wanisa imvula enkulu, Nkulunkulu;

ifa lakho selahlulekile, waliqinisa.

₁₀Ibandla lakho lakha kulo;

ngobuhle bakho wabalungisela abahluphekayo, Nkulunkulu.

₁₁INkosi iphumisa izwi;

abesifazane ababika indaba ejabulisayo bayisixuku esikhulu.

₁₂Amakhosi ezimpi ayabaleka; ayabaleka wona;

isifazane esihlezi ekhaya sabela impango.

₁₃Nxa nilala phakathi kwezibaya,

kunjengamaphiko ejuba asibekelwa ngesiliva,

izimpaphe zamaphiko alo ngegolide elikhazimulayo.

₁₄Nxa uSomandla ehlakaza amakhosi kulo,

likhithika iqhwa eSalimoni.

₁₅Intaba yaseBashani iyintaba kaNkulunkulu;

intaba yaseBashani iyintaba eneziqongo.

₁₆Nina zintaba ezineziqongo,

yini ukuba niyibuke ngomhawu intaba

uNkulunkulu athanda ukuhlala kuyo na?

Yebo, uJehova uyakuhlala kuyo kuze kube phakade.

₁₇Izinqola zikaNkulunkulu ziyizinkulungwane ezingamashumi amabili,

izinkulungwane nezinkulungwane;

iNkosi iphakathi kwazo;

iSinayi lisendaweni engcwele.

₁₈Wena wenyukela phezulu,

wathumba izithunjwa,

wamukela izipho kubantu nakwabahlubukileyo,

ukuze uJehova uNkulunkulu ahlale khona.

₁₉Mayibongwe iNkosi.

Iyasithwala imihla ngemihla;

uNkulunkulu uyinsindiso yethu. Sela*

₂₀Kithina uNkulunkulu unguNkulunkulu wezinkululo;

ukukhipha ekufeni kungokukaJehova iNkosi.

₂₁Impela uNkulunkulu uyakuliphohloza ikhanda lezitha zakhe,

ukhakhayi olunesihluthu lwalowo osahamba ezonweni zakhe.

₂₂INkosi yathi: “Ngiyakubabuyisa eBashani,

ngibabuyise ekujuleni kolwandle

₂₃ukuba unyawo lwakho ulucwilise egazini,

ulimi lwezinja zakho lube nesabelo salo ezitheni.”

₂₄Bayazibona izindwendwe zakho, Nkulunkulu,

izindwendwe zikaNkulunkulu wami,

iNkosi yami, ziya endlini engcwele.

₂₅Ngaphambili kuhamba abahlabeleli,

ngasemuva abashaya ugubhu,

ngaphakathi izintombi ezishaya izingubhu.

₂₆Bongani uNkulunkulu emihlanganweni;

bongani iNkosi, nina bomthombo ka-Israyeli.

₂₇Nango uBenjamini, omncane, umbusi wabo,

neviyo lezikhulu zakwaJuda,

izikhulu zakwaZebuloni nezikhulu zakwaNafetali.

₂₈UNkulunkulu wakho ukumisele amandla akho;

qinisa, Nkulunkulu,

lokho ozenzela khona.

₂₉Ngenxa yethempeli lakho eJerusalema

amakhosi ayakukulethela izipho.

₃₀Zikhuze izilwane zasemhlangeni,

umhlambi wezinkunzi kanye namankonyane abantu,

azithobise phansi ngezinqamu zesiliva;

uyazihlakaza izizwe ezithanda ukulwa.

₃₁Izikhulu ziyakuvela eGibithe;

amaKushe ayakwelulela ngokushesha

izandla zawo kuNkulunkulu.

₃₂Nina mibuso yomhlaba mhubeleni uNkulunkulu,

nidumise iNkosi, Sela*

₃₃yona ekhwela phezu kwamazulu ezulu asendulo;

bhekani, iyezwakalisa izwi layo,

izwi elinamandla.

₃₄Nikani uNkulunkulu amandla;

ubukhosi bakhe buphezu kuka-Israyeli;

amandla akhe asemafwini.

₃₅Nkulunkulu, uyesabeka ezindaweni zakho ezingcwele;

uNkulunkulu ka-Israyeli nguyena owenzela abantu amandla nokuqina;

makadunyiswe uNkulunkulu.

₁Ngisindise, Nkulunkulu,

ngokuba amanzi afikile emphefumulweni.

₂Ngishone odakeni lobishi olujulileyo, kungekho kuma;

ngingene emanzini alutwa;

imisinga iyangicwilisa.

₃Ngikhathele ukukhala kwami, umphimbo wami ushile;

amehlo ami ayafiphala ekulindeleni uNkulunkulu wami.

₄Abangizonda ngeze baningi kunezinwele zekhanda lami;

baningi abafuna ukungiqeda beyizitha zami kungekho sici;

nengingakuphanganga ngakubuyisela.

₅Nkulunkulu, wena uyabazi ubuwula bami,

nezono zami azifihlakele kuwe.

₆Mabangajabhiswa ngami abakulindeleyo,

Nkosi Jehova Sebawoti;

mabangahlazeki ngami abakufunayo,

Nkulunkulu ka-Israyeli.

₇Ngokuba ngithwele isihlamba ngenxa yakho;

ihlazo lisibekela ubuso bami.

₈Sengaba ngumfokazi kubafowethu,

nowezizwe kubantwana bakamame.

₉Ngokuba ukushisekela indlu yakho kungidlile;

izithuko zabakuthukayo zingehlele.

₁₀Ngakhala, umphefumulo wami wazila;

kwaba ngukudunyazwa kwami.

₁₁Isaka ngalenza isambatho sami;

ngaba yisaga kubo.

₁₂Abahlezi esangweni bakhuluma ngami;

izidakwa ziyangihaya.

₁₃Kodwa mina, umkhuleko wami ukuwe Jehova

esikhathini sokuzwelwa, Nkulunkulu;

ngenxa yomusa wakho omkhulu

ngiphendule eqinisweni lensindiso yakho.

₁₄Ngikhiphe odakeni, mangingashoni;

mangisindiswe kubo abangizondayo,

nasemanzini alutwa.

₁₅Isikhukhula samanzi masingangicwilisi,

utwa lungangigwinyi,

umgodi ungangivaleli emlonyeni wawo.

₁₆Ngiphendule, Jehova,

ngokuba umusa wakho ulungile;

uphendukele kimi ngokobubele bakho obukhulu.

₁₇Ungayifihleli inceku yakho ubuso bakho,

ngokuba ngiyahlupheka;

shesha ungiphendule.

₁₈Sondela kuwo umphefumulo wami, uwuhlenge,

ngikhulule ngenxa yezitha zami.

₁₉Wena uyakwazi ukuthukwa kwami,

namahloni ami nokudunyazwa kwami;

zonke izitha zami ziphambi kwakho.

₂₀Ukuthukwa kuyaphulile inhliziyo yami,

ngigula kakhulu;

bengibheka ukuhawukelwa,

kepha akwabakho,

nabaduduzayo,

kepha angibatholanga.

₂₁Banginika inyongo ibe ngukudla kwami;

ekomeni kwami bangiphuzisa uviniga.

₂₂Itafula labo malibe yisihibe phambi kwabo,

libe lugibe kwabahlezi bezithulele.

₂₃Amehlo abo mawafiphale,

ukuze bangaboni;

izinkalo zabo zintengezele njalo.

₂₄Thela phezu kwabo ukunengwa kwakho;

intukuthelo yakho evuthayo mayibafice.

₂₅Umuzi wabo mawuchitheke;

makungabikho ohlala ematendeni abo.

₂₆Ngokuba oshaywe nguwe bayamzingela,

baxoxa ngobuhlungu bezinkubela zakho.

₂₇Yengezela ukona ekoneni kwabo;

mabangezi ekulungeni kwakho.

₂₈Mabesulwe encwadini yabaphilayo,

bangalotshwa kanye nabalungileyo.

₂₉Mina kodwa ngihluphekile, ngibuhlungu;

insindiso yakho,

Nkulunkulu mayingilondoloze.

₃₀Ngiyakulibonga ngehubo igama likaNkulunkulu,

ngimphakamise ngokubonga.

₃₁Kuyakuthandeka kuJehova kunenkomo,

kunenkunzi enezimpondo nezinselo.

₃₂Kuyakuthi abayizivi bekubona, bajabule;

nina enifuna uNkulunkulu,

inhliziyo yenu mayiphile.

₃₃Ngokuba uJehova uyabalalela abampofu,

neziboshwa zakhe akazideleli.

₃₄Uyakubongwa yizulu nomhlaba,

yizilwandle nakho konke okuphila kuzo.

₃₅Ngokuba uNkulunkulu uzakulisindisa iSiyoni,

akhe imizi yakwaJuda;

bazakuhlala khona, ibe yifa labo.

₃₆Inzalo yezinceku zakhe iyakulidla ifa;

abathanda igama lakhe bayakuhlala kuyo.