Bible Reading Plan – Day 120

₁Haleluya!

Ubusisiwe umuntu omesabayo uJehova,

othokoza kakhulu ngemithetho yakhe.

₂Inzalo yakhe iyakuba namandla emhlabeni;

isizukulwane sabaqotho siyakubusiswa.

₃Ingcebo nemfuyo kusendlini yakhe;

ukulunga kwakhe kumi phakade.

₄Kuyabaphumela abalungileyo ukukhanya ebumnyameni:

umusa, nobubele, nokulunga.

₅Umuntu omuhle nguye onomusa, otshelekayo,

esekela izindaba zakhe ngokulunga.

₆Ngokuba akayikugudluka kuze kube phakade;

olungileyo uyakukhunjulwa kuze kube phakade.

₇Akesabi imibiko emibi;

inhliziyo yakhe iqinile, iyethemba uJehova.

₈Imisekile inhliziyo yakhe, ayesabi,

aze azibuke izitha zakhe ziphansi.

₉Uyaphana, uyabanika abampofu;

ukulunga kwakhe kumi kuze kube phakade;

uphondo lwakhe luyakuphakama ngodumo.

₁₀Omubi uyakukubona, acunuke,

agedle amazinyo akhe, abesephela;

isifiso sababi siyakubhubha.

₁Haleluya!

Dumisani nina zinceku zikaJehova,

nidumise igama likaJehova.

₂Malibongwe igama likaJehova

kusukela kulesi sikhathi kuze kube phakade.

₃Kusukela ekuphumeni kwelanga kuze

kube sekushoneni kwalo

igama likaJehova malidunyiswe.

₄UJehova uphakeme phezu kwezizwe zonke,

inkazimulo yakhe iphezu kwezulu.

₅Ngubani onjengoJehova uNkulunkulu wethu,

ohlezi phezulu,

₆ozithoba ukubona ezulwini nasemhlabeni, na?

₇Uyavusa odingayo othulini,

aphakamise ompofu ezaleni,

₈ukuze amhlalise nezikhulu,

yebo, izikhulu zabantu bakhe.

₉Inyumba uyayipha ukuphatha umuzi,

ibe ngunina othokozayo wabantwana.

Haleluya!

₁Kwathi ukuba u-Israyeli aphume eGibithe,

indlu kaJakobe kubantu bolunye ulimi,

₂khona uJuda waba yindlu yakhe engcwele,

u-Israyeli waba ngumbuso wakhe.

₃Ulwandle lwakubona, lwabaleka,

iJordani labuyiselwa emuva.

₄Izintaba zatshekula njengezinqama,

amagquma njengamawundlu.

₅Unani wena lulwandle ukuba ubaleke,

nawe Jordani ukuba ubuyiselwe emuva,

₆nani zintaba ukuba nitshekule njengezinqama,

nani magquma eninjengamawundlu, na?

₇Thuthumela, mhlaba,

ebusweni beNkosi,

ebusweni bukaNkulunkulu kaJakobe,

₈yena ophendula idwala libe yichibi lamanzi,

insengetsha ibe ngumthombo wamanzi.

₁Ungasiphi thina, Jehova,

ungasiphi thina,

kepha uliphe igama lakho inkazimulo

ngenxa yomusa wakho nangenxa yeqiniso lakho.

₂Abezizwe bayakusho ngani ukuthi:

“Uphi manje uNkulunkulu wabo na?”

₃Kepha uNkulunkulu wethu usezulwini;

wenza konke akuthandayo.

₄Izithombe zabo ziyisiliva negolide,

umsebenzi wezandla zomuntu.

₅Umlomo zinawo, kepha azikhulumi;

amehlo zinawo, kepha aziboni.

₆Izindlebe zinazo, kepha azizwa;

zinamakhala, kepha azihogeli.

₇Zinezandla, kepha aziphathi;

zinezinyawo, kepha azihambi;

azikhulumi ngomphimbo wazo.

₈Abazenzayo bayafana nazo,

bonke abazethembayo.

₉Israyeli, themba kuJehova;

yena ulusizo lwabo nesihlangu sabo.

₁₀O wena ndlu ka-Aroni,

themba kuJehova;

yena ulusizo lwabo nesihlangu sabo.

₁₁Nina enimesabayo uJehova thembani kuJehova;

yena ulusizo lwabo nesihlangu sabo.

₁₂UJehova usikhumbulile; uyakubusisa,

abusise indlu ka-Israyeli,

abusise indlu ka-Aroni.

₁₃Uyakubusisa abamesabayo uJehova,

abancane nabakhulu.

₁₄UJehova uyakunandisa,

nina nabantwana benu.

₁₅Manibe ngababusisiweyo bakaJehova

owenzile izulu nomhlaba.

₁₆Izulu liyizulu likaJehova,

kepha umhlaba wawunika abantwana babantu.

₁₇Abafileyo abamdumnisi uJehova,

qha, noyedwa kwabehlelayo ekuthuleni.

₁₈Kepha thina siyakumbonga uJehova

kusukela kulesi sikhathi kuze kube phakade.

Haleluya!

₁Ngiyamthanda uJehova,

ngokuba uyezwa izwi lokukhuleka kwami.

₂Ngokuba ubekile indlebe kimi

ngiyakukhuleka kuye zonke izinsuku zami.

₃Izintambo zokufa zangizungeza,

nobuhlungu bendawo yabafileyo bangibamba;

ngafumana ukuhlupheka nosizi.

₄Kepha ngabiza igama likaJehova, ngathi:

“Ngiyakuncenga, Jehova,

khulula umphefumulo wami.”

₅Unomusa uJehova, ulungile;

uNkulunkulu wethu unobubele.

₆UJehova uyalondoloza ongenabuqili;

ngithotshisiwe phansi wangisindisa.

₇Buyela ekuphumuleni kwakho, mphefumulo wami,

ngokuba uJehova ukuphathe ngomusa.

₈Yebo, ukhululile umphefumulo wami ekufeni,

amehlo ami ezinyembezini,

nezinyawo zami ekuweni.

₉Ngiyakuhamba ebusweni bukaJehova ezweni labaphilayo.

₁₀Ngiyakholwa,

ngalokho ngiyakhuluma;

ngahlushwa kakhulu.

₁₁Ngathi osizini lwami:

“Bonke abantu banamanga.”

₁₂Ngiyakubuyiselani kuJehova

ngazo zonke izenzo zakhe ezinhle kimina na?

₁₃Ngiyakuthatha indebe yensindiso,

ngibize igama likaJehova.

₁₄Izithembiso zami kuJehova ngiyakuzigcwalisa,

yebo, nasebusweni babantu bakhe bonke.

₁₅Kuyigugu emehlweni kaJehova

ukufa kwabangcwele bakhe.

₁₆Ngiyinceku yakho impela, Jehova;

ngiyinceku yakho,

indodana yencekukazi yakho;

uthukululile izintambo zami.

₁₇Ngiyakunikela kuwe umnikelo wokubonga,

ngibize igama likaJehova.

₁₈Izithembiso zami kuJehova ngiyakuzigcwalisa

yebo, nasebusweni babantu bakhe bonke,

₁₉emagcekeni endlu kaJehova,

phakathi kwakho, Jerusalema.

Haleluya!

₁Dumisani uJehova nina bezizwe zonke,

nimbabaze nina bantu bonke.

₂Ngokuba umusa wakhe mkhulu kithina;

iqiniso likaJehova limi phakade.

Haleluya!

₁Bongani uJehova, ngokuba muhle,

₂Makathi u-Israyeli:

₃Mayithi indlu ka-Aroni:

₄Mabathi abamesabayo uJehova:

₅Engcingweni yami ngakhuleka kuJehova,

uJehova wangiphendula endaweni ebanzi.

₆UJehova ungakimi, angiyikwesaba;

umuntu angangenzani na?

₇UJehova ungakimi ekanye nabangisizayo;

ngalokho ngiyakubabuka bephansi abangizondayo.

₈Kuhle ukuphephela kuJehova

kunokwethemba umuntu.

₉Kuhle ukuphephela kuJehova

kunokwethemba izikhulu.

₁₀Bonke abezizwe bayangizungeza;

egameni likaJehova ngiyakubachitha.

₁₁Bayangikaka, yebo, bayangizungeza;

egameni likaJehova ngiyakubachitha.

₁₂Bayangibunganyela njengezinyosi,

bacimeka njengomlilo wameva;

egameni likaJehova ngiyakubachitha.

₁₃Bayangihlohloloza ukuba ngiwe,

kepha uJehova uyangisiza.

₁₄UJehova ungamandla ami nesihlabelelo sami,

waba yinsindiso yami.

₁₅Izwi lokwethaba nelokusindiswa lisezindlini zabalungileyo;

esokunene sikaJehova senza okwamandla.

₁₆Esokunene sikaJehova siphakeme,

esokunene sikaJehova sisebenza ngamandla.

₁₇Angiyikufa, kepha ngiyakuphila,

ngishumayele imisebenzi kaJehova.

₁₈UJehova wangilaya nokungilaya,

kodwa akanginikelanga ekufeni.

₁₉Ngivuleleni amasango okulunga,

ngingene ngawo,

ngimdumise uJehova.

₂₀Yileli isango likaJehova;

olungileyo uyakungena ngalo.

₂₁Ngiyakukudumisa,

ngokuba ungizwile,

waba yinsindiso yami.

₂₂Itshe abalinqabayo abakhi

selaba yinhloko yegumbi.

₂₃Lona lavela kuJehova;

liyisimangaliso emehlweni ethu.

₂₄Yilolu usuku alwenzileyo uJehova;

siyakwethaba, sithokoze ngalo.

₂₅Sindisa, Jehova! ngiyakuncenga;

hlahlamelisa, Jehova! ngiyakucela.

₂₆Makabusiswe ozayo egameni likaJehova;

siyanibusisa sisendlini kaJehova.

₂₇UJehova unguNkulunkulu, usikhanyisele;

hlobisani umkhosi ngamahlamvu kuze kube sezimpondweni ze-altare.

₂₈Wena unguNkulunkulu wami, ngiyakukubonga;

Nkulunkulu wami, ngiyakukuphakamisa.

₂₉Bongani uJehova, ngokuba muhle,

₁Babusisiwe abaqotho endleleni,

abahamba ngemithetho kaJehova.

₂Babusisiwe abagcina ubufakazi bakhe,

abamfuna ngenhliziyo yonke,

₃abangenzi ukungalungi,

kepha behamba ezindleleni zakhe;

₄wena usiyalezile

ukuba sizigcine ngokwempela.

₅Sengathi zingaqondiswa izindlela zami

ukuba ngigcine izimiso zakho.

₆Khona angiyikujabha;

ngiyakuhlonipha iziyalezo zonke zakho.

₇Ngiyakukubonga ngobuqotho benhliziyo,

lapho ngifunda izahlulelo zakho ezilungileyo.

₈Izimiso zakho ngiyakuzigcina;

ungangishiyi nakanci.

₉Insizwa iyakuyihlanza kanjani indlela yayo na?

Ngokuqaphela okwezwi lakho.

₁₀Ngikufunile ngenhliziyo yami yonke;

mangingaphambuki emiyalweni yakho.

₁₁Enhliziyweni yami ngiyalonda izwi lakho,

ukuze ngingoni kuwe.

₁₂Mawubongwe wena Jehova,

ungifundise izimiso zakho.

₁₃Ngomlomo wami ngimemezele

zonke izahlulelo zomlomo wakho.

₁₄Ngithokoza ngendlela yobufakazi bakho njengemfuyo.

₁₅Ngiyakuzindla ngeziyalezo zakho,

ngihloniphe izindlela zakho.

₁₆Ngiyakuthokoza ngezimiso zakho;

angiyikukhohlwa izwi lakho.

₁₇Yenzele okuhle inceku yakho

ukuba ngiphile, ngigcine izwi lakho.

₁₈Vula amehlo ami

ukuba ngibone izimangaliso zasemthethweni wakho.

₁₉Ngingumfokazi emhlabeni;

ungangifihleli imiyalo yakho.

₂₀Umphefumulo wami waphukile

ngokulangazelela njalo izahlulelo zakho.

₂₁Uyakhuza abazidlayo, abaqalekisiweyo,

abaduka emiyalweni yakho.

₂₂Susa kimi isihlamba nokudelelwa,

ngokuba ngiyaqaphela ubufakazi bakho.

₂₃Yebo, izikhulu zihlezi zikhuluma ngami;

inceku yakho iyazindla ngezimiso zakho.

₂₄Ubufakazi bakho buyintokozo yami,

bungumluleki wami.

₂₅Umphefumulo wami unamathela othulini;

ngiphilise ngokwezwi lakho.

₂₆Ngimemezele izindlela zami,

wena wangizwa;

ngifundise izimiso zakho.

₂₇Ngiqondise indlela yeziyalezo zakho

ukuba ngikhulume ngezimangaliso zakho.

₂₈Umphefumulo wami uyakhala ngosizi;

ngivuse ngokwezwi lakho.

₂₉Susa kimi indlela yamanga,

ungiphe ngomusa umthetho wakho.

₃₀Ngikhethile indlela yeqiniso;

izahlulelo zakho ngizibekile phambi kwami.

₃₁Ngibambelele ebufakazini bakho;

ungangijabhisi, Jehova.

₃₂Ngiyakugijima ngendlela yemiyalo yakho,

ngokuba uyakwandisa inhliziyo yami.