Bible Reading Plan – Day 124

₁Jehova, ngiyakhala kuwe, ngiphuthume;

lalela izwi lami, nxa ngikhuleka kuwe.

₂Umkhuleko wami mawube njengempepho ebusweni bakho,

nokuphakanyiswa kwezandla zami njengomnikelo wakusihlwa.

₃Jehova, bekela umlomo wami umlindi,

ugcine umnyango wezindebe zami.

₄Ungaphenduleli inhliziyo yami entweni embi

ukuba ngenze imisebenzi yobubi

kanye nabantu abenza okubi,

ngingadli izibilebile zabo.

₅Olungileyo makangishaye, kungumusa kimi;

angisole, kungamafutha ekhanda;

ikhanda lami malingawenqabi,

ngokuba nasebubini babo umkhuleko

wami uyobe usekhona.

₆Abahluleli babo bayakuphonswa eweni;

bayakuzwa ukuthi amazwi ami amnandi.

₇Njengalokhu umuntu elima,

eklaya umhlabathi,

amathambo ethu ahlakazekile ngasemlonyeni wendawo yabafileyo.

₈Kepha amehlo ami akuwe Jehova Nkosi yami;

ngiyakwethemba wena;

ungathululi umphefumulo wami.

₉Ngihlenge ogibeni abangibekele lona,

nasezihibeni zabenza okubi.

₁₀Ababi mabawele emanetheni abo,

mina ngidlule kuwo.

₁Ngiyakhala kuJehova ngezwi lami,

ngincenga uJehova ngezwi lami.

₂Ngiyathulula ebusweni bakhe isikhalo sami,

ngibonakalisa kuye inhlupheko yami.

₃Lapho umoya wami udangala phakathi kwami,

wena uyawazi umkhondo wami;

endleleni engihamba ngayo

bangifihlele ugibe.

₄Bheka ngakwesokunene sami,

ubone ukuthi akakho onginakekelayo;

isiphephelo singiphuthele,

akakho okhathalela umphefumulo wami.

₅Ngikhala kuwe Jehova, ngithi:

“Wena uyisiphephelo sami

nesabelo sami ezweni labaphilayo.”

₆Lalela ukukhala kwami,

ngokuba ngicindezelekile kakhulu;

ngikhulule kubo abangizingelayo,

ngokuba banamandla kunami.

₇Khipha umphefumulo wami etilongweni

ukuba ngibonge igama lakho;

abalungileyo bayakungizungeza,

ngokuba uyakungiphatha kahle.

₁Jehova, yizwa umkhuleko wami,

ubeke indlebe ekuncengeni kwami;

ungiphendule ngokuthembeka kwakho nokulunga kwakho.

₂Ungangeni ekwahluleleni nenceku yakho,

ngokuba akukho muntu okhona olungile emehlweni akho.

₃Ngokuba isitha siyazingela umphefumulo wami,

sicindezela phansi emhlabathini ukuphila kwami;

singihlalisile ebumnyameni njengabakade bafa.

₄Umoya wami uphelile kimi;

inhliziyo yami igongobele phakathi kwami.

₅Ngiyakhumbula izinsuku zasendulo,

ngizindla ngemisebenzi yakho yonke,

ngicabange ngezenzo zezandla zakho.

₆Ngiyazelulela izandla zami kuwe;

umphefumulo wami womela wena

njengomhlaba owomileyo. Sela*

₇Shesha ungiphendule, Jehova;

umoya wami uyaphela;

ungangifihleli ubuso bakho,

funa ngifane nabashona egodini.

₈Ngizwise umusa wakho ekuseni,

ngokuba ngiyethemba kuwe;

ngazise indlela engifanele ukuhamba ngayo,

ngokuba ngiphakamisela kuwe umphefumulo wami.

₉Ngikhulule ezitheni zami;

Jehova, ngicashe kuwe.

₁₀Ngifundise ukwenza intando yakho,

ngokuba wena unguNkulunkulu wami;

umoya wakho omuhle mawungihole emhlabathini olelezekileyo.

₁₁Jehova, ngiphilise ngenxa yegama lakho,

ngokulunga kwakho uwukhiphe umphefumulo wami ekuhluphekeni.

₁₂Zinqume izitha zami ngomusa wakho,

ubabhubhise bonke abahlupha umphefumulo wami,

ngokuba ngiyinceku yakho.

₁Makabongwe uJehova, idwala lami,

ofundisa izandla zami ukuhlasela

neminwe yami ukulwa,

₂umusa wami nenqaba yami,

umbhoshongo wami ophakemeyo nomkhululi wami,

isihlangu sami, nengiphephela kuye,

nothobisa abantu bami phansi kwami.

₃Jehova, uyini umuntu ukuba umazi,

nendodana yomuntu ukuba uyikhumbule, na?

₄Umuntu ufana nomoya;

izinsuku zakhe zinjengethunzi elidlulayo.

₅Thobisa amazulu akho, Jehova, wehle;

thinta izintaba, zithunqe.

₆Imibani mayinyazime, ubahlakaze;

thuma imicibisholo yakho, ubaphithizise.

₇Yelula isandla sakho phezulu,

ungikhulule, ungophule emanzini amakhulu

nasesandleni sabafokazi

₈abamlomo wabo ukhuluma inkohliso,

nesandla sabo sokunene singesokunene samanga.

₉Ngiyakuhlabelela kuwe Nkulunkulu isihlabelelo esisha;

ngogubhu olunezintambo eziyishumi ngiyakukuhubela.

₁₀Nguye onika amakhosi insindiso,

okhulula inceku yakhe uDavide enkembeni elimazayo.

₁₁Ngikhulule, ungophule esandleni sabafokazi

abamlomo wabo ukhuluma inkohliso,

nesandla sabo sokunene singesokunene samanga.

₁₂Lapho amadodana ethu enjengezithombo ezikhulileyo ebusheni bazo,

namadodakazi ethu enjengamatshe amagumbi abaziwe ngendlela yokwakhiwa kwezindlu zamakhosi;

₁₃lapho izingobo zethu zigcwele,

ziveza izinhlobo ngezinhlobo,

nezimvu zethu zizala ngezinkulungwane,

yebo, ngezinkulungwane eziyishumi emadlelweni ethu;

₁₄lapho izinkabi zethu zithweswe kakhulu,

nalapho kungekho ukufohla kwesitha nokungena empini nezikhalo ezitaladini zethu,

₁₅babusisiwe abantu abanjalo;

babusisiwe abantu abaNkulunkulu

wabo unguJehova.

₁Ngiyakukuphakamisa wena Nkulunkulu wami, Nkosi,

ngilituse igama lakho phakade naphakade.

₂Imihla yonke ngiyakukubonga,

ngilidumise igama lakho phakade naphakade.

₃Mkhulu uJehova, umelwe ukudunyiswa kakhulu;

ubukhulu bakhe abuphenyisiseki.

₄Isizukulwane siyakubabaza kwesinye imisebenzi yakho,

simemezele izenzo zakho zamandla.

₅Ngiyakuzindla ngenkazimulo nodumo lobukhosi bakho

nangezimangaliso zakho.

₆Abantu bayakukhuluma ngamandla ezenzo zakho ezesabekayo;

ubukhulu bakho ngiyakubumemezela.

₇Bayakweneka kakhulu inkumbulo yobuhle bakho obukhulu,

bahube ngokulunga kwakho.

₈UJehova unesihe nobumnene;

uyephuza ukuthukuthela,

mkhulu ngomusa.

₉UJehova muhle kubo bonke;

uyayihawukela imisebenzi yakhe yonke.

₁₀Yonke imisebenzi yakho iyakukudumisa,

abangcwele bakho bakubonge.

₁₁Ngenkazimulo yombuso wakho bayakukhuluma,

bashumayele ngamandla akho

₁₂ukuba babazise abantwana babantu izenzo zakho zamandla

nenkazimulo yobukhosi bombuso wakho.

₁₃Umbuso wakho ungumbuso kuze kube phakade;

ubukhosi bakho busezizukulwaneni ngezizukulwane.

₁₄UJehova uyaphasa bonke abawayo,

abavuse bonke abathotshisiweyo.

₁₅Amehlo abo bonke alinda wena;

uyabanika ukudla ngesikhathi esiyiso.

₁₆Uyavula isandla sakho,

usuthise ukufisa kwakho konke okuphilayo.

₁₇UJehova ulungile ezindleleni zakhe zonke,

unomusa emisebenzini yakhe yonke.

₁₈UJehova useduze nabo bonke abambizayo,

bonke abambizayo ngeqiniso.

₁₉Uyasuthisa ukufisa kwabamesabayo;

uyezwa ukukhala kwabo, abasindise.

₂₀UJehova uyalondoloza bonke abamthandayo,

kepha ababi bonke uyakubabhubhisa.

₂₁Umlomo wami uyakukhuluma udumo lukaJehova,

inyama yonke ibonge igama lakhe elingcwele kuze kube phakade.

₁Haleluya!

Dumisa uJehova, mphefumulo wami.

₂Ngisaphila ngiyakumdumisa uJehova,

ngihube kuNkulunkulu wami ngisekhona.

₃Ningethembi ezikhulwini nasendodaneni yomuntu

okungekho kuyo ukusiza.

₄Umoya wakhe uyaphuma,

yena abuyele emhlabathini wakhe;

ngalona lolo suku amacebo akhe ayaphela.

₅Ubusisiwe yena omsizi wakhe unguNkulunkulu kaJakobe,

othemba lakhe likuJehova uNkulunkulu wakhe

₆owenzile izulu nomhlaba,

nolwandle, nakho konke okuphakathi kwakho,

ogcina iqiniso kuze kube phakade;

₇obenzela abacindezelweyo ukwahlulela,

obapha abalambileyo ukudla;

uJehova uyakhulula iziboshwa.

₈UJehova uyenza ukuba izimpumputhe zibone;

uJehova uyavusa abathotshisiweyo;

uJehova uyathanda abalungileyo.

₉UJehova uyalondoloza abafokazi;

uyaphasa intandane nomfelokazi;

kepha indlela yababi uyayiphambanisa.

₁₀UJehova uyabusa kuze kube phakade,

uNkulunkulu wakho, Siyoni, ezizukulwaneni ngezizukulwane.

Haleluya!

₁Haleluya!

Ngokuba kuhle ukuhlabelela kuNkulunkulu wethu, yebo, kumnandi;

ukudumisa kufanele.

₂UJehova uyalakha iJerusalema;

abaxoshiweyo bakwa-Israyeli uyababutha.

₃Uyaphilisa abenhliziyo echobozekileyo;

izilonda zabo uyazibopha.

₄Uyabala inani lezinkanyezi,

azibize zonke ngamagama.

₅INkosi yethu inkulu,

makhulu amandla ayo;

ukuqonda kwakhe akunakulinganiswa.

₆UJehova uyaphakamisa abathobekileyo;

ababi uyabawisa phansi emhlabathini.

₇Hubelani uJehova ngokubonga,

nimdumise uNkulunkulu wethu ngehabhu,*

₈osibekela izulu ngamafu,

olungisela umhlaba imvula,

ohlumisa utshani ezintabeni.

₉Unika izinkomo ukudla kwazo,

namazinyane egwababa akhalayo.

₁₀Akathokozi ngamandla ehhashi,

akajabuleli imilenze yomuntu.

₁₁UJehova uyathokoza ngabamesabayo,

abathemba umusa wakhe.

₁₂Jerusalema, mbabaze uJehova;

Siyoni, mdumise uNkulunkulu wakho.

₁₃Ngokuba uqinisile imigoqo yamasango;

ubusisile abantwana bakho phakathi kwakho.

₁₄Uyenza ukuthula emikhawulweni yakho;

uyakusuthisa ngokolweni omuhle.

₁₅Uyathumela umyalo wakhe emhlabeni;

izwi lakhe ligijima ngejubane elikhulu.

₁₆Uyanika iqhwa njengoboya;

uhlakaza isithwathwa njengomlotha.

₁₇Uyaphonsa isichotho sakhe njengezinhlamvu;

ngubani ongema phambi kwamakhaza akhe na?

₁₈Uyathuma izwi lakhe, likuncibilikise;

uyavusa umoya wakhe,

amanzi agobhoze.

₁₉Uyatshengisa izwi lakhe kuJakobe,

izimiso zakhe nezahlulelo zakhe ku-Israyeli.

₂₀Akenzanga njalo kwesinye isizwe nesisodwa:

izahlulelo zakhe asizazi.

Haleluya!

₁Haleluya!

Dumisani uJehova ezulwini,

nimdumise kweliphezulu.

₂Mdumiseni nina zingelosi zakhe zonke,

nimdumise nina mabandla akhe onke.

₃Mdumiseni nina langa nenyanga,

nimdumise nina zinkanyezi zonke ezikhanyayo.

₄Mdumiseni nina mazulu amazulu,

nina manzi aphezu kwezulu.

₅Makuthathe kudumise igama likaJehova,

ngokuba wayaleza, kwadaleka.

₆Futhi wakumisa kuze kube phakade;

washaya umthetho ongenakweqiwa.

₇Mdumiseni uJehova emhlabeni

nina mikhomo nezintwa zonke,

₈nawe mlilo nesichotho,

liqhwa nenkwezane,

nawe siphepho esenza okwezwi lakhe,

₉nani zintaba namagquma onke,

nani mithi ethelayo nayo yonke imisedari,*

₁₀nani zilwane nezinkomo zonke,

nani eninwabuzelayo nezinyoni ezindizayo,

₁₁nani makhosi omhlaba nabantu bonke,

nani zikhulu nabahluleli bonke bomhlaba,

₁₂nani zinsizwa nezintombi,

nani maxhegu nabafana.

₁₃Mabadumise igama likaJehova,

ngokuba ngelakhe igama lodwa eliphakeme;

inkazimulo yakhe iphezu komhlaba nezulu.

₁₄Usephakamisile uphondo lwabantu bakhe;

ngalokho bayamdumisa abangcwele bakhe,

abantwana bakwa-Israyeli,

abantu abaseduze naye.

Haleluya!

₁Haleluya!

Hlabelelani kuJehova igama elisha,

indumiso yakhe emhlanganweni wabangcwele.

₂U-Israyeli makathokoze ngowamEnzayo,

abantwana baseSiyoni bethabele iNkosi yabo.

₃Mabadumise igama lakhe ngokusina,

bamhubele ngesigubhu nehabhu.*

₄Ngokuba uJehova uyathokoza ngabantu bakhe;

abathobekileyo uyabahlobisa ngensindiso.

₅Abalungileyo mabethabe ngobukhosi,

₆Ukumphakamisa uNkulunkulu makube semlonyeni wabo,

nenkemba esika nhlangothi zombili esandleni sabo,

₇ukuba benze impindiselo kubo abezizwe

nezijeziso kubantu,

₈babophe amakhosi abo ngamaketanga

nabadumileyo babo ngezibopho zensimbi,

₉bafeze phezu kwabo isahlulelo esilotshiweyo;

kuludumo kubo bonke abangcwele bakhe.

Haleluya!

₁Haleluya!

Dumisani uNkulunkulu endlini yakhe engcwele,

nimdumise emkhathini wakhe wamandla.

₂Mdumiseni ngenxa yezenzo zakhe zamandla,

nimdumise ngenxa yobukhosi bakhe obukhulu.

₃Mdumiseni ngezwi lecilongo,

nimdumise ngogubhu nehabhu.*

₄Mdumiseni ngesigubhu nokusina,

nimdumise ngezingubhu ezinezintambo eziyishumi nemitshingo.

₅Mdumiseni ngamasimbali* ancencethayo,

nimdumise ngezinsimbi ezikhencezayo.

₆Konke okuphefumulayo makudumise uJehova.

Haleluya!