Bible Reading Plan – Day 134

₁Zwanini, madodana ami, ukulaya kukayise,

nilalele, ukuze nazi ukuqonda.

₂Ngokuba ngiyaninika izifundiso ezinhle;

ningawushiyi umthetho wami.

₃Ngokuba ngangiyindodana kubaba,

ethambileyo neyodwa emehlweni kamame.

₄Wangifundisa, wathi kimi:

“Inhliziyo yakho mayibambe amazwi ami;

gcina imiyalo yami, uphile.

₅Zuza ukuhlakanipha, zuza ukuqonda;

ungakhohlwa, ungachezuki emazwini omlomo wami;

₆ungakushiyi, kuyakukugcina;

kuthande, kuyakukulondoloza.

₇Ukuqala kokuhlakanipha yilokhu:

Zuza ukuhlakanipha;

yebo, ngakho konke okutholileyo zuza ukuhlakanipha.

₈Kukhulise, kuyakukuphakamisa;

kuyakukudumisa, lapho ukugona.

₉Kuyakunika ikhanda lakho umgexo womusa,

kunikeze kuwe umqhele wodumo.”

₁₀Yizwa, ndodana yami,

wamukele izwi lami;

kuyakuthi iminyaka yokuphila kwakho ibe miningi.

₁₁Ngikufundisa ngendlela yokuhlakanipha;

ngikuhola emikhondweni yobuqotho.

₁₂Ekuhambeni kwakho isinyathelo asiyikuvinjelwa,

nasekugijimeni kwakho awuyikukhubeka.

₁₃Bambelela ekulayweni, ungakuyeki;

kulonde,

ngokuba kungukuphila kwakho.

₁₄Ungangeni emkhondweni wababi,

ungahambi endleleni yabonakeleyo.

₁₅Yixwaye, ungadluli ngayo;

chezuka kuyo, udlule.

₁₆Ngokuba abalali,

uma bengenzanga okubi;

ubuthongo buyasuswa,

uma bengakhubekisanga muntu.

₁₇Ngokuba badla isinkwa sobubi,

baphuza iwayini lobudlwangudlwangu.

₁₈Umkhondo wabalungileyo unjengokukhanya kokusa

okuqhubeka ngokukhanya njalo kuze kube semini.

₁₉Indlela yababi injengobumnyama;

abazi ukuthi bakhubeka ngani.

₂₀Ndodana yami, lalela amazwi ami,

ubeke indlebe yakho kukho ukukhuluma kwami.

₂₁Makungachezuki emehlweni akho,

ukugcine phakathi kwenhliziyo yakho,

₂₂ngokuba kungukuphila kwabakufumanayo

nempilo yomzimba wonke wabo.

₂₃Phezu kwakho konke okugcinayo,

gcina inhliziyo yakho,

ngokuba kuyilapho kuvela khona ukuphila.

₂₄Susa kuwe ukuphambana komlomo,

nezindebe eziyisigwegwe uzidedisele kude nawe.

₂₅Amehlo akho mawabheke phambili,

nezinkophe zakho maziqonde phambi kwakho.

₂₆Yenza umkhondo wonyawo lwakho ukuba ulingane,

ziqine zonke izindlela zakho.

₂₇Ungaphambuki ngakwesokunene nangakwesokhohlo;

chezukisa unyawo lwakho ebubini.

₁Ndodana yami, lalela ukuhlakanipha kwami,

ubeke indlebe yakho ekuqondeni kwami

₂ukuba ugcine amasu,

nezindebe zakho zilonde ukwazi.

₃Ngokuba izindebe zowesifazane ondindayo ziconsa izinyosi;

umlomo wakhe ubushelezi kunamafutha.

₄Kepha ekugcineni umunyu njengomhlonyane,

ubukhali njengenkemba enezinhlangothi ezimbili.

₅Izinyawo zakhe ziyehlela ekufeni;

izinyathelo zakhe zibambelela endaweni yabafileyo.

₆Akanaki umkhondo wokuphila;

imikhondo yakhe iyaguquguquka,

engazi.

₇Ngalokho, madodana ami, ngizweni,

ningachezuki emazwini omlomo wami.

₈Dedisela kude naye indlela yakho,

ungasondeli emnyango wendlu yakhe,

₉funa unike abanye udumo lwakho,

naye ononya iminyaka yakho,

₁₀funa abezizwe basuthe ngamandla akho,

umshikashika wakho ube sendlini yomfokazi,

₁₁uze ububule ekugcineni,

lapho umzimba wakho nenyama yakho kuqediwe,

₁₂ngokuthi: “Yeka ukuzonda kwami ukulaywa

nokudelela kwenhliziyo yami ukusolwa!

₁₃Angilalelanga izwi labafundisi bami,

angibekanga indlebe yami kubo abangifundisayo.

₁₄Ngacishe ngaba sebubini bonke

phakathi kwebandla nasemhlanganweni.”

₁₅Phuza amanzi emgodini wakho,

amanzi agobhozayo emthonjeni wakho.

₁₆Imithombo iyaphalala ngaphandle yini,

nemifula yamanzi ezigcawini, na?

₁₇Mayibe ngeyakho wena wedwa,

ingabi ngeyabafokazi kanye nawe.

₁₈Mawubusiswe umthombo wakho,

uthokoze ngomfazi wobusha bakho.

₁₉Uyindluzelekazi ethandayo negogokazi elihle;

amabele akhe mawakudelise ngesikhathi sonke,

weqiwe njalo luthando lwakhe.

₂₀Ubuyakweqelwani ngowesifazane ondindayo, ndodana yami,

ugone isifuba somfokazi, na?

₂₁Ngokuba izindlela zomuntu

ziphambi kwamehlo kaNkulunkulu;

uyenza yonke imikhondo yakhe ukuba ilingane.

₂₂Omubi uyakubanjwa ngububi bakhe,

abhajwe ngezintambo zezono zakhe.

₂₃Uyakufa yena ngokuswela ukulaywa,

nangobuningi bobuwula bakhe uyakuduka.

₁Ndodana yami, uma uyisibambiso somakhelwane wakho,

uma uxhawulene nomfokazi,

₂ucushiwe ngamazwi omlomo wakho,

ubanjiwe ngamazwi omlomo wakho,

₃yenza lokhu phela, ndodana yami,

uzophule,

lokhu ungene esandleni somakhelwane wakho:

khothama phambi kwakhe,

umncengisise.

₄Unganiki amehlo akho ubuthongo,

nezinkophe zakho ukozela.

₅Zophule njengensephe kumzingeli

nanjengenyoni esandleni somthiyi wezinyoni.

₆Yana entuthwaneni, vilandini,

ubone izindlela zayo, uhlakaniphe,

₇yona ethi ingenamahluleli,

nambonisi, nambusi,

₈ilungisa nokho ehlobo isinkwa sayo,

ibuthe ngesikhathi sokuvuna ukudla kwayo.

₉Uyakulala kuze kube nini, vilandini?

Uyakuvuka nini ebuthongweni bakho na?

₁₀Ubuthongo obuncane,

ukozela okuncane,

ukusonga izandla kancane kuze kulalwe,

₁₁bese kuthi ubumpofu bakho bufike njengomhambuma,

nokuswela kwakho njengomuntu wesihlangu.

₁₂Umuntu omubi, umuntu wokona,

nguye ohamba nomlomo ophambeneyo,

₁₃oqwayiza amehlo,

eshudula ngezinyawo zakhe,

ekhomba ngeminwe.

₁₄Ubuphoxo busenhliziyweni yakhe;

uceba okubi ngesikhathi sonke;

ususa ukuxabana.

₁₅Ngalokho ingozi yakhe iyakufika ngokuzumayo;

ngokuphazima kweso uyakwaphulwa,

kungabikho ukuphiliswa.

₁₆Kukhona izinto eziyisithupha azizondayo uJehova,

yebo, eziyisikhombisa eziyizinengiso emphefumulweni wakhe:

₁₇amehlo azidlayo, nolimi lwamanga,

nezandla ezichitha igazi elingenacala,

₁₈nenhliziyo eceba imicabango emibi,

nezinyawo ezishesha ukugijimela ebubini,

₁₉nofakazi wamanga ophafuza inkohliso,

obanga ukuxabana phakathi kwabazalwane.

₂₀Ndodana yami,

gcina umyalo kayihlo,

ungawushiyi umthetho kanyoko.

₂₁Yibophe enhliziyweni yakho njalo,

uyithekeleze entanyeni yakho.

₂₂Mayikuhole ekuhambeni kwakho,

ikulondoloze ekulaleni kwakho,

ikhulume kuwe ekuvukeni kwakho.

₂₃Ngokuba imiyalo iyisibani,

nomthetho ungukukhanya,

nokusola ngokulaya kuyindlela yokuphila,

₂₄ukuze ugcinwe kowesifazane omubi,

nasekuthopheni kolimi lowesifazane ondindayo.

₂₅Ungakhanuki ubuhle bakhe enhliziyweni yakho,

angakubambi ngezinkophe zakhe.

₂₆Ngokuba intengo yowesifazane

oyisiphingi iyiqebelengwane

lesinkwa, kepha umfazi

womuntu uzingela umphefumulo onqabileyo.

₂₇Umuntu angaphatha umlilo esifubeni sakhe,

izingubo zakhe zingashi, na?

₂₈Umuntu angahamba phezu

kwamalahle avuthayo,

izinyawo zakhe zingahanguki, na?

₂₉Unjalo yena ongena kumkamakhelwane:

akuyikuthiwa ongenacala noma yimuphi omthintileyo.

₃₀Abamdeleli yini oyisela ukuthi uyeba ukuba azisuthise lapho elambile na?

₃₁Uma efunyanwa,

uyakubuyisa kasikhombisa,

anikeze yonke impahla yendlu yakhe.

₃₂Ophinga nowesifazane akanakho ukuqonda;

wenza lokho okuchitha umphefumulo wakhe.

₃₃Uyakuthola imivimbo nehlazo,

nenhlamba yakhe ayiyikwesulwa.

₃₄Ngokuba isikhwele sendoda singukufutheka;

ayiyikuyeka ngosuku lokuphindisela.

₃₅Ayiyikunaka neze ihlawulo;

ayaneliswa, noma uphana ngezipho eziningi.

₁Ndodana yami, gcina amazwi ami,

uzibekelele imiyalo yami.

₂Gcina imiyalo yami, uphile,

nomthetho wami njengenhlamvu yeso lakho.

₃Yibophe eminweni yakho,

uyilobe esibhebheni senhliziyo yakho.

₄Yisho kukho ukuhlakanipha:

“Ungudadewethu,”

ubize ukuqonda ngokuthi owazana nawe,

₅ukuze bakugcine kowesifazane ondindayo,

kumfokazi owenza bushelezi amazwi akhe.

₆Ngokuba efasiteleni lendlu yami ngalunguza eheleni lami,

₇ngabheka phakathi kwabangenalwazi,

ngabona phakathi kwabasha insizwa engenakuqonda,

₈edlula esitaladini eduze negumbi lakhe.

iya endleleni yendlu yakhe,

₉sekuhwelela kusihlwa,

esigayegayeni sobusuku nobumnyama.

₁₀Bheka,

isihlangabezwa ngowesifazane;

izingubo zakhe zingezesifebe,

enobuqili enhliziyweni.

₁₁Uyanyakaza engenakuthula;

izinyawo zakhe azihlali endlini yakhe;

₁₂manje usemigwaqweni,

nangu usezigcawini,

uqamekela emagumbini onke.

₁₃Useyayibamba, uyayanga;

uthwala amehlo, uthi kuyo:

₁₄“Imihlatshelo yeminikelo yokuthula yayingifanele;

namuhla sengigcwalisile izithembiso zami.

₁₅Ngalokho ngiphumile ukukuhlangabeza

ukuba ngifunisise ubuso bakho;

sengikutholile.

₁₆Ngendlele umbhede wami ngezindwangu zokumboza,

nelineni elinemishwe laseGibithe.

₁₇Ngifafazile umbhede wami ngemure,* nangomhlaba,

nangokinamona.*

₁₈Woza sizanelise ngothando kuze kuse,

sijabule ngokuthandana.

₁₉Ngokuba indoda yami ayikho ekhaya;

ihambile uhambo olude;

₂₀yaphatha isikhwama semali ngesandla sayo;

iyakubuyela ekhaya ngosuku lokuhlangana kwenyanga.”

₂₁Uyamphambukisa ngamazwi akhe amaningi amahle;

ngokuthopha kwezindebe zakhe uyamyenga.

₂₂Uyamlandela masinyane njengenkabi iya ekuhlatshweni

nanjengamaketanga ehlela isiboshwa esiyisiwula,

₂₃umcibisholo uze uhlabe isibindi sakhe

njengenyoni isheshela ogibeni,

ingazi ukuthi lubekelwe ukuphila kwayo.

₂₄Ngalokho, bantwana, ngizweni,

nilalele amazwi omlomo wami.

₂₅Inhliziyo yakho mayingaphambukeli ezindleleni zakhe,

ungahambi emikhondweni yakhe.

₂₆Ngokuba uwisile phansi abaningi abalimeleyo;

ababuleweyo bakhe bayisixuku esikhulu.

₂₇Indlu yakhe iyindlela eya endawemi yabafileyo,

yehlela emakamelweni okufa.