Bible Reading Plan – Day 142

₁Umuntu osolwayo,

onentamo elukhuni kodwa,

uyakwaphulwa ngokuphazima kweso, engenakuphulukiswa.

₂Abantu bayathokoza ngokwanda kwabalungileyo,

kepha ngokubusa kwababi abantu bayabubula.

₃Umuntu othanda ukuhlakanipha uthokozisa uyise,

kepha umngane wezifebe uchitha imfuyo yakhe.

₄Inkosi iqinisa izwe ngokwahlulela,

kepha umuntu olithelisayo uyalichitha.

₅Umuntu othopha umakhelwane wakhe

wenekela izinyawo zakhe inetha.

₆Esiphambekweni somuntu omubi kukhona ugibe,

kepha olungileyo uyenanela, athokoze.

₇Olungileyo uyazi indaba yabampofu,

kepha omubi akayiqondi.

₈Abantu abayizideleli bavusa umuzi,

kepha abahlakaniphileyo babuyisa ulaka.

₉Uma ohlakaniphileyo ephikisene nesiwula,

siyadlova sihleke, nokuthula akukho.

₁₀Abantu begazi bayazonda opheleleyo,

kepha abaqotho banaka umphefumulo wakhe.

₁₁Isiwula sikhipha lonke ulaka lwaso,

kepha ohlakaniphileyo uyalugodla ekugcineni.

₁₂Uma umbusi elalela indaba yamanga,

zonke izinceku zakhe zimbi.

₁₃Ompofu nocindezelayo bandawonye;

uJehova ukhanyisa amehlo abo bobabili.

₁₄Inkosi eyahlulela abampofu ngeqiniso,

isihlalo sayo sobukhosi siyakuma phakade.

₁₅Uswazi nokusola kuyanika ukuhlakanipha,

kepha umntwana oyekwayo uyahlazisa unina.

₁₆Ngokwanda kwababi kuyanda iziphambeko,

kepha abalungileyo bayakubuka ukuwa kwabo.

₁₇Yilaye indodana yakho,

iyakukuphumuza,

yebo, iyakuthokozisa umphefumulo wakho.

₁₈Lapho kungekho mbono khona,

abantu bayadlubulunda,

kepha ogcina umthetho ubusisiwe.

₁₉Inceku ayisolwa ngamazwi,

ngokuba noma iqonda ayilaleli.

₂₀Uyabona umuntu oshesha ngamazwi na?

Kukhona ithemba ngesiwula kunangaye.

₂₁Inceku ekhuliswa kahle kwasebuntwaneni

iyakuba yindodana ekugcineni.

₂₂Umuntu onolaka uvusa ukuxabana,

nomuntu ofuthekayo uvama ukuphambeka.

₂₃Ukuzidla komuntu kuyamthobisa,

kepha onomoya othobekileyo uyazuza udumo.

₂₄Ohlanganyela nesela uzonda umphefumulo wakhe;

uyezwa isifungo, kepha akasidaluli.

₂₅Ukwesaba abantu kubeka ugibe,

kepha owethemba uJehova uyalondeka.

₂₆Abaningi bafuna ubuso bombusi,

kepha ukwahlulelwa komuntu kuvela kuJehova.

₂₇Umuntu owonakeleyo uyisinengiso kwabalungileyo,

noqotho endleleni uyisinengiso komubi.

₂“Impela ngiyisiwula kunabanye abantu,

anginakuqonda komuntu.

₃Angifundanga ukuhlakanipha,

ukuze ngazi oNgcwele.

₄Ngubani owenyukele ezulwini,

wabuye wehla na?

Ngubani oqoqele umoya ezandleni zakhe na?

Ngubani obophile amanzi engutsheni yakhe na?

Ngubani omisile yonke imikhawulo yomhlaba na?

Ngubani igama lakhe,

ngubani igama lendodana yakhe, uma ulazi, na?

₅“Onke amazwi kaNkulunkulu acwebile;

uyisihlangu kwabaphephela kuye.

₆Ungenezeli emazwini akhe,

funa akusole, ufunyanwe ungumqambimanga.

₇“Yizinto ezimbili engizicela kuwe:

unganginqabeli nazo, ngingakafi.

₈Dedisela kude nami okuyize namanga,

unganginiki ubumpofu nengcebo,

kepha ngiphe isinkwa engisimiselweyo,

₉funa ngisuthe, ngikuphike ngithi:

‘UJehova ungubani na’ ”

funa ngibe mpofu, ngebe,

ngilone igama likaNkulunkulu wami.

₁₀“Ungahlebi inceku enkosini yayo,

funa ikuthuke, ube necala.

₁₁“Kukhona isizukulwane esithuka uyise,

esingabusisi unina.

₁₂Kukhona isizukulwane esimhlophe emehlweni aso,

esingahlanzwanga ensileni yaso.

₁₃Kukhona isizukulwane yeka ukuzidla kwaso!

Nezinkophe zaso ziphakanyisiwe.

₁₄Kukhona isizukulwane esimazinyo aso ayizinkemba

namazinyo emihlathi angomese

bokuqeda abampofu emhlabeni,

nabaswelayo phakathi kwabantu.

₁₅“Umnyundu unamadodakazi amabili athi:

‘Siphe, siphe.’

“Kukhona izinto ezintathu ezingasuthi,

nezine ezingasho ukuthi: ‘Kwanele!’:

₁₆indawo yabafileyo,

nesizalo esiyinyumba,

nomhlaba ongasuthi ngamanzi,

nomlilo ongasho ukuthi: ‘Kwanele!’

₁₇“Iso eliklolodela uyise

nelidelela ukulalela unina

liyakukhishwa ngamagwababa angasemfuleni,

lidliwe ngamazinyane okhozi.

₁₈“Kukhona izinto ezintathu ezingahlula ngokumangalisa,

yebo, ezine engingazaziyo:

₁₉indlela yokhozi emoyeni,

nendlela yenyoka edwaleni,

nendlela yomkhumbi phakathi kolwandle,

nendlela yendoda entombini.

₂₀“Inje indlela yowesifazane ophingayo:

uyadla, abesesula umlomo wakhe,

athi: ‘Angenzanga isono.’

₂₁“Phansi kwezinto ezintathu umhlaba uyazamazama,

yebo, phansi kwezine ongezithwale:

₂₂phansi kwenceku ekubekweni kwayo inkosi,

nesiwula uma sisuthile ngokudla,

₂₃naphansi kwesaliwakazi ekuganeni kwaso,

nencekukazi ekulidleni ifa lenkosikazi yayo.

₂₄“Kukhona izinto ezine ezincane emhlabeni,

kepha zihlakaniphile kakhulu:

₂₅izintuthwane ziyisizwe esingenamandla,

kanti ziyalungisa ukudla kwazo ehlobo;

₂₆izimbila ziyisizwe esibuthakathaka,

kanti ziyakha izindlu zazo edwaleni;

₂₇izinkumbi azinankosi,

kanti ziyaphuma zonke ngamaviyo;

₂₈isibankwa ungasibamba ngezandla zombili,

kanti sisendlini yenkosi.

₂₉“Kukhona izinto ezintathu ezinyathela ngesizotha,

yebo, ezine ezihamba ngesithunzi:

₃₀ingonyama, iqhawe ezilwaneni;

ayihlehli nakusiphi;

₃₁nehhashi lempi kanye nempongo,

nenkosi phambi kwempi yayo.

₃₂“Uma wenzile ubuwula ngokuziphakamisa,

wacabanga okubi,

beka isandla emlonyeni wakho.

₃₃Ngokuba ukuphehla ubisi kuveza iphehlwa,

nokucindezelwa kwempumulo kuveza igazi;

kanjalo ukucindezela ulaka kuveza ukuxabana.”

₂“Yini, ndodana yami,

yini, ndodana yesizalo sami,

yini, ndodana yezithembiso zami, na?

₃Unganiki abesifazane amandla akho,

nezindlela zakho kwababhubhisa amakhosi.

₄“Akusikho okwamakhosi, Lemuweli,

akusikho okwamakhosi ukuphuza iwayini,

nokwababusi ukufisa uphuzo olunamandla,

₅funa baphuze, bakhohlwe izimiso,

baguqule ukwahlulelwa kwabantwana bokuhlupheka.

₆Mnike obhubhayo uphuzo olunamandla

nomunyu enhliziyweni iwayini.

₇Makaphuze akhohlwe ubumpofu bakhe,

angabe esakhumbula usizi lwakhe.

₈“Sivulele isimungulu umlomo wakho,

umele bonke abantwana abayizintandane.

₉Vula umlomo wakho,

wahlulele ngokulunga,

umele abahluphekayo nabampofu.”

₁₀Ngubani ongathola umfazi okhutheleyo na?

Ngokuba inani lakhe lidlula kakhulu amarubi.*

₁₁Inhliziyo yendoda yakhe iyethemba kuye;

ayiyikuswela inzuzo.

₁₂Uyayenzela okuhle, kungabi ngokubi,

zonke izinsuku zokuphila kwakhe.

₁₃Ufuna uboya bezimvu nefilakisi;*

usebenza ngezandla ezivumayo.

₁₄Unjengemikhumbi yabathengi;

ulanda kude ukudla kwakhe.

₁₅Uyavuka kuse sebusuku,

aphe abendlu yakhe ukudla

namantombazana akhe imisebenzi yawo.

₁₆Ucabanga ngensimu, ayithenge;

ngesithelo sezandla zakhe utshala isivini,

₁₇Uyabhinca okhalweni amandla;

uyaqinisa izingalo zakhe.

₁₈Uyabona ukuthi ukuphatha kwakhe kunenzuzo;

isibani sakhe asicimeki nasebusuku.

₁₉Uyabeka izandla zakhe othini lokuphotha izintambo,

neminwe yakhe ibamba insimbi.

₂₀Ohluphekayo uyamvulela isandla sakhe,

yebo, uzelulela abampofu izandla zakhe.

₂₁Akesatshiswa ngabendlu yakhe ngungqoqwane;

ngokuba bonke abendlu yakhe bembathiswa okubomvu.

₂₂Uyazenzela izindwangu ezimbozayo;

izambatho zakhe ziyilineni elicolekileyo nokububende.

₂₃Indoda yakhe iyaziwa emasangweni,

lapho ihlezi namalunga ezwe.

₂₄Wenza izingubo zelineni,

athengise ngazo,

anikele kubathengi amabhande.*

₂₅Amandla nesithunzi kungukwembatha kwakhe;

uhleka usuku oluzayo.

₂₆Uyawuvula umlomo wakhe ngokuhlakanipha,

nomthetho womusa usolimini lwakhe.

₂₇Uyaqaphela okwenziwayo endlini yakhe,

akadli isinkwa sobuvila.

₂₈Abantwana bakhe bayasukuma, bambusise;

nendoda yakhe iyamdumisa ngokuthi:

₂₉“Baningi abafazi abakhutheleyo,

kepha wena ubadlula bonke.”

₃₀Ubuhle buyinkohliso,

nokubukeka kuyize,

kepha owesifazane owesaba uJehova uyakudunyiswa.

₃₁Muphe ezithelweni zezandla zakhe,

izenzo zakhe zimdumise emasangweni.