Bible Reading Plan – Day 170

₁“Yizwani lokhu nina bapristi,

nilalele nina ndlu ka-Israyeli,

nibeke indlebe nina ndlu yenkosi,

ngokuba ukwahlulela kukinina,

lokhu nanilugibe eMispa nenetha elenekwe eThabori.

₂Abahlubuki bashone phansi ngokuhlaba kwabo,

kepha ngingumlayi wabo bonke.

₃Ngiyamazi mina u-Efrayimi,

u-Israyeli akafihlekile kimi,

ngokuba manje, Efrayimi, ufebile,

u-Israyeli uzingcolisile.

₄“Abenzi izenzo zokuba babuyele kuNkulunkulu,

ngokuba umoya wobufebe uphakathi kwabo,

noJehova abamazi.

₅Ukuzidla kuka-Israyeli kuyafakaza ebusweni bakhe;

o-Israyeli no-Efrayimi bayakukhubeka ngobubi babo;

naye uJuda uyakukhubeka kanye nabo.

₆Bayakuhamba nezimvu zabo nezinkomo zabo

ukuyofuna uJehova;

kepha abayikumfumana;

umonyukile kubo.

₇Bamkhohlisile uJehova,

ngokuba bazalile abantwana abangabafokazi;

manje inyanga eyethwasayo iyakubadla kanye nezabelo zabo.

₈“Bethani umtshingo eGibeya necilongo eRama;

hlabani umkhosi eBeti Aveni:

basemva kwakho, Benjamini!

₉U-Efrayimi uyakuba yincithakalo ngosuku lokujeziswa,

ngazisile izizwe zakwa-Israyeli okuqinisekileyo.

₁₀Izikhulu zakwaJuda zinjengabasusa imincele;

ngiyakuthulula phezu kwazo intukuthelo yami njengamanzi.

₁₁U-Efrayimi ucindezelekile,

uchotshoziwe ekwahlulelweni,

ngokuba wavuma ukulandela umyalo oyize.

₁₂Mina-ke senginjengenundu ku-Efrayimi,

nanjengokubola kuyo indlu yakwaJuda.

₁₃“Lapho u-Efrayimi abona isifo sakhe

noJuda isilonda sakhe,

u-Efrayimi waya e-Asiriya,

wathumela enkosini uJarebi;

kepha ingeniphulukise,

ayinakusipholisa isilonda senu.

₁₄Ngokuba ngiyakuba njengengonyama ku-Efrayimi,

nebhongo lengonyama kuyo indlu yakwaJuda;

mina yebo, mina ngiyakudwengula,

besengimuka;

ngiyakususa, kungekho owophulayo.

₁₅Ngiyakuhamba, ngibuyele endaweni yami,

baze bazithwese icala labo,

bafune ubuso bami;

osizini lwabo bayakungifunisisa.”

₁“Wozani sibuyele kuJehova,

ngokuba yena usidwengulile;

uyakusiphulukisa;

usishayile, uyakusibopha.

₂Uyakusiphilisa ngezinsuku ezimbili,

asivuse ngosuku lwesithathu,

siphile phambi kwakhe.

₃Masimazi, sijonge ukumazi uJehova;

ukuphuma kwakhe kuqinisekile njengokusa;

uyakufika kithi njengemvula,

njengemvula yamuva enethisa umhlaba.

₄“Ngiyakwenzani kuwe Efrayimi,

ngiyakwenzani kuwe Juda, na?

Uthando lwenu lunjengefu lokusa nanjengamazolo amuka ekuseni.

₅Ngalokho ngiyabashaya ngabaprofethi,

ngibabulale ngamazwi omlomo wami,

ukwahlulelwa kwakho kuqhame ekukhanyeni.

₆Ngokuba ngifuna uthando,

hhayi umhlatshelo;

ngifuma ukumazi uNkulunkulu kuneminikelo yokushiswa.

₇Kepha baseqile isivumelwano njengo-Adamu;

bangikhohlisa ngalokho.

₈IGileyadi lingumuzi wabenza okubi,

linemikhondo yegazi.

₉Njengabaphangi beqamekela umuntu,

isigaba sabapristi siyabulala endleleni eya eShekemi,

yebo, benza okunengekayo.

₁₀Endlini yakwa-Israyeli ngibonile into eyesabekayo:

kukhona ubufebe kwa-Efrayimi,

u-Israyeli ungcolile.

₁₁“Nawe Juda ulungiselwe ukuvunwa,

lapho ngibuyisa ukuthunjwa kwabantu bami.

₁“Lapho bengiyakumphulukisa u-Israyeli,

bambulelwa ububi buka-Efrayimi nokubi kweSamariya,

ngokuba benza inkohliso,

amasela ayafohla,

nabaphangi baphanga ngaphandle.

₂Abacabangi ezinhliziyweni zabo

ukuthi ngiyakhumbula konke okubi kwabo;

sebezungeziwe yizenzo zabo,

ziphambi kobuso bami.

₃“Ngobubi babo bayathokozisa inkosi,

nezikhulu ngamanga abo.

₄Bayiziphingi bonke;

banjengeziko elishiswa ngumphekisinkwa

oyeka ukukhwezela kusukela ekuxovweni kwenhlama

kuze kube sekubileni kwayo.

₅Ngosuku lwenkosi yethu

izikhulu zazigulisa ngokushisa kwewayini;

yona yayiselulela izideleli isandla.

₆Lapho sebeshisile izinhliziyo zabo ngamacebo zibe njengeziko,

umphekisinkwa wabo ulala ubusuku bonke;

ekuseni liyavutha njengomlilo wamalangabi.

₇Bonke bashisa njengeziko,

badla abahluleli babo;

onke amakhosi abo ayawa,

kungekho phakathi kwabo ongibizayo.

₈“U-Efrayimi uyazihlanganisa nabanye abantu:

u-Efrayimi uyiqebelengwane elingaphendulwanga.

₉Abafokazi badlile amandla akhe,

kepha yena akazi;

izimvi zikhahlele kuye,

kepha yena akazi.

₁₀Ukuzidla kuka-Israyeli kuyafakaza ebusweni bakhe,

nokho ababuyelanga kuJehova uNkulunkulu wabo,

abamfunanga kukho konke lokhu.

₁₁“U-Efrayimi unjengejuba elidukiswayo lingenangqondo;

bayabiza iGibithe, baya e-Asiriya.

₁₂Lapho sebehamba,

ngiyabenekela inetha lami,

ngibehlise njengezinyoni zezulu,

ngibajezise njengokuzwakeleyo ebandleni labo.

₁₃Maye kubo, ngokuba bangibalekele!

Makube ngukuchithwa kubo,

ngokuba baphambukile kimi!

Bengiyakubahlenga mina

labo abakhulume amanga ngami na?

₁₄Abakhalanga kimi ngezinhliziyo zabo,

kepha bahhewula emibhedeni yabo;

banovalo ngamabele abo nangewayini labo,

kepha mina bayangihlubuka.

₁₅Mina-ke ngafundisa,

ngaqinisa izingalo zabo,

nokho baceba okubi ngami.

₁₆Bayabuyela, kepha hhayi kongaPhezulu,

bafana nomnsalo ogejayo;

izikhulu ziyakuwa ngenkemba

ngenxa yolaka lolimi lwabo.

Lokhu kuyakuba yinhlekiso yabo ezweni laseGibithe.

₁“Beka icilongo emlonyeni wakho;

onjengokhozi wehlela indlu kaJehova;

ngokuba beqile isivumelwano sami,

baphambuka emthethweni wami.

₂Bakhala kimi ngokuthi:

‘Nkulunkulu wethu,

thina Israyeli siyakwazi.’

₃U-Israyeli ukulahlile okuhle;

isitha siyakumxosha.

₄Bona bazibekela amakhosi engavelanga kimi;

bamisa izikhulu, ngingazi;

isiliva labo negolide labo bakwenza kwaba yizithombe zabo,

ukuze banqunywe.

₅Ithole lakho, Samariya, linengekile;

intukuthelo yami iyabavuthela;

koze kube nini bengakwazi ukuba msulwa na?

₆Ngokuba livela ku-Israyeli;

umkhandi walenza, alisiye uNkulunkulu;

yebo, ithole laseSamariya liyakuba yizihlephu.

₇“Ngokuba bahlwanyele umoya,

bayakuvuna isivunguvungu;

izele alinahlumela, alivezi impuphu;

uma liyiveza,

iyakuqedwa ngabafokazi.

₈U-Israyeli uyagwinywa;

manje sebephakathi kwabezizwe

njengesitsha okungekho intokozo kuso.

₉Ngokuba benyukele e-Asiriya

bezihambele njengezimbongolo zasendle;

u-Efrayimi uyaqasha ngenkokhelo yothando.

₁₀Noma beqasha phakathi kwabezizwe,

manje sengiyakubabutha,

bakhululwe kancane emthwalweni wenkosi yezikhulu.

₁₁“Ngokuba u-Efrayimi wandisile ama-altare aba ngukona;

ama-altare ayakuba ngukona kuye.

₁₂Noma ngimlobela imithetho yami kaningi,

iyashaywa okungaziwayo.

₁₃Imihlatshelo yeminikelo yami bayihlaba,

bayidle inyama,

kepha uJehova akayenameli.

Useyakhumbula ububi babo,

abahambele ngezono zabo,

babuyele eGibithe.

₁₄Ngokuba u-Israyeli ukhohliwe uMdali wakhe,

wakha izindlu zamakhosi,

noJuda wandisile imizi ebiyelweyo,

ngiyakuthuma umlilo emizini yakhe,

uqede izindlu zayo zobukhosi.”

₁Ungajabuli, Israyeli,

kube ngukuthokoza njengokwabezizwe,

ngokuba umukile kuNkulunkulu wakho ngokufeba,

wathanda inkokhelo kuzo zonke izibuya zamabele.

₂Isibuya nesikhamo sewayini akuyikubafunza,

iwayini elisha liyakumkhohlisa.

₃Abayikuhlala ezweni likaJehova;

u-Efrayimi uyakubuyela eGibithe,

nase-Asiriya bayakudla okungcolileyo.

₄Abayikuthululela uJehova iwayini;

imihlatshelo yabo ayiyikuba mihle kuye,

isinkwa sabo sibe njengesinkwa sabalilayo;

bonke abasidlayo bayakungcola,

ngokuba isinkwa sabo siyakuba ngesephango,

singangeni endlini kaJehova.

₅Niyakwenze njani ngosuku lomhlangano

nangosuku lomkhosi kaJehova na?

₆Bhekani,

ngokuba bemukile ekuchithweni

iGibithe liyakubabutha,

iNofi libembele;

izinto zabo zamagugu zesiliva ziyakudliwa yizimbabazane,

kube ngameva ematendeni abo.

₇Ziyafika izinsuku zokuhanjelwa,

izinsuku zempindiselo zisondele;

u-Israyeli uyakukwazi.

Umprofethi uyakuba njengesiwula,

umuntu onomoya ahlanye ngenxa yobuningi bobubi bakho

nangobutha obukhulu;

₈umprofethi engumlindi ka-Efrayimi kanye noNkulunkulu wami,

ugibe lomthiyi wezinyoni lukuzo zonke izindlela zakhe,

nobutha busendlini kaNkulunkulu wakhe.

₉Bazonakalisile ngokujulileyo njengasezinsukwini zaseGibeya;

uyakhumbula ububi babo,

uyabahambela ngezono zabo.