Bible Reading Plan – Day 179

₂₀Kuyakuthi ngalolo suku insali yakwa-Israyeli

nabasindileyo bendlu kaJakobe

bangasenciki kobashayileyo,

kepha bencike ngeqiniso kuJehova oNgcwele ka-Israyeli.

₂₁Insali iyakubuya, insali kaJakobe,

ibuyele kuNkulunkulu onamandla.

₂₂Ngokuba noma abantu bakho, Israyeli,

bengangesihlabathi solwandle,

kuyakubuya phakathi kwabo insali nje;

ukuchithwa kunqunyiwe, okuchichima ukulunga.

₂₃Ngokuba iNkosi uJehova Sebawoti

iyakwenza ukubhujiswa okunqunyiweyo

phakathi kwawo wonke umhlaba.

“We bantu bami, enakhe eSiyoni,

ningalesabi i-Asiriya,

lapho likushaya ngentonga yalo,

liphakamisele kuwe udondolo lwalo ngendlela yaseGibithe.

₂₅Ngokuba kusezakuba yisikhashana nje

kuze kuphele ukufutheka kwami,

intukuthelo yami ibe sekuchithweni kwalo.”

₂₆UJehova Sebawoti uyakulivusela isiswebhu

njengasekubulaweni kwabakwaMidiyani ngasedwaleni lika-Orebi,

nentonga yakhe iyakuba phezu kolwandle,

ayiphakamise ngendlela yaseGibithe.

₂₇Kuyakuthi ngalolo suku umthwalo walo

ususwe emahlombe akho nejoka lalo entanyeni yakho.

Liyakhuphuka eRimoni,

₂₈liyeza e-Ayati,

lidlula eMigroni;

lethula impahla yalo eMikimashi;

₂₉badlula esikhaleni,

ebusuku bahlala eGeba;

iRama liyaqhaqhazela,

iGibeya likaSawule liyabaleka.

₃₀Zamuluka ngezwi lakho,

ndodakazi yaseGalimi;

qaphela, Layishi,

yiphendule, Anathoti.

₃₁IMadimena selibalekile,

abakhileyo eGebimi bathutha impahla.

₃₂Namhla nje liyema ngaseNobi,

linikinele isandla salo intaba yendodakazi yaseSiyoni,

intaba yaseJerusalema.

₃₃Bheka, iNkosi uJehova Sebawoti

iyanquma amagatsha ngokwesabekayo,

kugawulwe abaphakemeyo,

nabazikhukhumezayo behliswe.

₃₄Izihlahla zehlathi ziyacatshwa ngensimbi,

neLebanoni liyawa ngoNamandla.

₁Kuyakuvela ihlumela esiqwini sikaJese,

kuphume igatsha ezimpandeni zakhe.

₂UMoya kaJehova uyakuhlala phezu kwakhe,

umoya wokuhlakanipha nowokuqonda,

umoya wamasu nowamandla,

umoya wokwazi nowokumesaba uJehova.

₃Intokozo yakhe iyakuba sekumesabeni uJehova;

akayikwahlulela ngokubona kwamehlo akhe,

anganqumi ngokuzwa kwezindlebe zakhe.

₄Kepha uyakwahlulela abampofu ngokulunga,

anqume ngokufaneleyo abathobileyo bomhlaba,

awushaye umhlaba ngentonga yomlomo wakhe,

abulale ababi ngokuphefumula kwezindebe zakhe.

₅Ukulunga kuyakuba yibhande* lezinkalo zakhe,

ukuthembeka kube yibhande lamanyonga akhe.

₆Impisi iyakuhlala newundlu,

ingwe ibuthise ndawonye nezinyane lembuzi,

ithole nebhongo lengonyama kukhuluphaliswe kanyekanye,

nomntwana omncane uyakukuqhuba.

₇Inkomo nebhere* kuyakuklaba,

amazinyane akho abuthise ndawonye,

ingonyama idle utshani njengenkabi.

₈Umntwana oncelayo uyakudlala ngasemgodini webululu,

olunyuliweyo elulele isandla sakhe

esiseleni sikamantshingeyana.

₉Abayikwenza okubi,

bangachithi entabeni yonke yami engcwele,

ngokuba umhlaba uyakugcwala ukumazi uJehova

njengamanzi asibekela ulwandle.

₁₂Iyakuphakamisela abezizwe ibhandela,*

ibuthe abaxoshiweyo bakwa-Israyeli,

iqoqe abahlakazekileyo bakwaJuda emagumbini omane omhlaba.

₁₃Umhawu ka-Efrayimi uyakusuka,

nabacindezela uJuda bayakunqunywa;

u-Efrayimi akayikuba namhawu ngoJuda,

noJuda kayikucindezela u-Efrayimi.

₁₄Kepha bayakundizela ehlombe lamaFilisti ngasentshonalanga,

baphange kanyekanye abantu basempumalanga,

belulele izandla zabo ngaku-Edomi noMowabi,

abakwa-Amoni babalalele.

₁₅UJehova uyakuqalekisa itheku lolwandle lwaseGibithe,

anikine isandla sakhe phezu koMfula*

ngokuhwamula komoya wakhe,

awushaye ube yiminonjana eyisikhombisa,

ukuze kuhanjwe ngezicathulo.

₁₆Kuyakuba khona umgwaqo wensali yabantu bakhe,

eyakusala e-Asiriya,

njengalokho kwakunjalo ku-Israyeli

ngosuku lokukhuphuka kwakhe ezweni laseGibithe.

“Ngiyakubonga, Jehova,

ngokuba wangithukuthelela,

kepha intukuthelo yakho isibuyile, uyangiduduza.

₂Bheka, uNkulunkulu uyinsindiso yami;

nginethemba, angesabi,

ngokuba uJehova, uJehova ungamandla ami nehubo lami,

waba yinsindiso yami.”

₃Ngalokho niyakukha amanzi ngokujabula

emithonjeni yensindiso.

₄Niyakusho ngalolo suku ukuthi:

“Bongani uJehova,

nibize igama lakhe,

nizazise izenzo zakhe phakathi kwezizwe,

nimemezele ukuthi igama lakhe liphakeme.

₅Hlabelelani kuJehova,

ngokuba wenzile izinto ezinkulu;

lokhu makwazeke emhlabeni wonke.

₆Memeza, ujabule wena ohlezi eSiyoni,

ngokuba mkhulu oNgcwele ka-Israyeli phakathi kwakho.”

₂Misani ibhanela* entabeni elucwatha,

nibaphakamisele izwi,

nibaqhwebe ngezandla ukuba bangene emasangweni abakhulu.

₃Mina uqobo ngibayalile abangcwele bami,

yebo, ngibizele amaqhawe ami okwentukuthelo yami,

bona labo abami abajabula ngokuziqhenya.

₄Umsindo wesixuku ezintabeni

kungathi ngowabantu abaningi!

Umsindo wokuxokozela kwemibuso

yabezizwe ihlangene!

UJehova Sebawoti uyabutha impi yakhe.

₅Bavela ezweni elikude

nasekugcineni kwezulu

uJehova nezikhali zentukuthelo yakhe,

ukuba bachithe umhlaba wonke.

₆Klewulani, ngokuba usuku lukaJehova lusondele;

njengencithakalo evela kuSomandla luyafika.

₇Ngalokho izandla zonke ziyadangala,

nezinhliziyo zonke ziyaphela amandla.

₈Bayashaqeka, babanjwa yiminjunju nobuhlungu,

bazibinya njengababelethayo.

Babhekana omunye nomunye bemangala.

Ubuso babo bungubuso bamalangabi.

₉Bheka, usuku lukaJehova luyeza,

lunonya, lunokufutheka,

lunokuvutha kolaka,

ukuba lwenz'ize umhlaba,

luchithe izoni zawo kuwo.

₁₀Ngokuba izinkanyezi zezulu nawondwenjana bazo

akuyikukhanya;

ilanga liyakuba mnyama ekuphumeni kwalo,

nenyanga ayisayikukhipa ukukhanya kwayo.

₁₁Ngiyakulijezisa izwe ngobubi balo,

nababi ngezono zabo,

ngenze ukuba kuphele ukuzidla kwabaziqhenyayo,

ngithobise ukuziphakamisa kwabacindezeli.

₁₂Ngiyakwenza umuntu abe yigugu kunegolide elihle,

yebo, umuntukazana kunegolide elicwengekileyo.

₁₃Ngalokho ngiyakuzamazamisa izulu,

umhlaba unyakaziswe endaweni yawo,

ngentukuthelo kaJehova Sebawoti

ngosuku lokuvutha kwentukuthelo yakhe.

₁₄Kuyakuthi njengensephe exoshwayo nezimvu ezingaqoqwa muntu,

baphendukele, kube yilowo nalowo kubantu bakubo,

babalekele, kube yilowo ezweni lakubo.

₁₅Bonke abatholwayo bayakugwazwa,

nabo bonke ababanjwayo bayakuwa ngenkemba.

₁₆Izingane zabo ziyakuchotshozwa emehlweni abo,

izindlu zabo ziphangwe,

omkabo baphoqwe.

₁₇Bhekani, ngiyakubavusela amaMede angayikunaka isiliva,

negolide angathokozi ngalo.

₁₈Iminsalo iyakuwisa phansi izinsizwa zabo;

abayikuhawukela isithelo esisesizalweni,

amehlo abo angabi nasihe kubantwana.

₁₉IBabele, umhlobiso wemibuso,

isivunulo sokuzikhukhumeza kwamaKaledi,

liyakuba njengokuchitha kukaNkulunkulu iSodoma neGomora.

₂₀Alisoze labuye lakhiwa,

akusayikuhlalwa kulo ezizukulwaneni ngezizukulwane;

umArabiya akayikumisa khona,

nabelusi abayikulala lapho nemihlambi yabo.

₂₁Kepha izilwane zasehlane ziyakubuthisa khona,

nezindlu zalo ziyakugcwala izikhova;

kuyakuhlala lapho izintshe,

namademoni ayakungqabashiya khona.

₂₂Izimpungushe ziyakukhala ezinqabeni zalo,

namakhanka ezindlini zamakhosi;

siseduze ukufika isikhathi salo,

nezinsuku zalo aziyikwandiswa.

₁Ngokuba uJehova uyakumhawukela uJakobe,

abuye amkhethe u-Israyeli,

ababeke ezweni lakubo;

nabafokazi bayakuzihlanganisa nabo,

banamathele endlini kaJakobe.

₂Abantu bayakubathatha,

babayise ezindaweni zabo;

indlu yakwa-Israyeli iyakubenza ifa ezweni likaJehova,

babe yizinceku nezincekukazi,

babathumbe labo abakade bethunjiwe yibo,

babuse phezu kwabacindezeli babo.

“Yeka ukuphela komcindezeli

nokugcina kokubhensa!

₅UJehova waphulile udondolo lwababi

nentonga yababusi

₆eyashaya abantu ngentukuthelo ngokushaya okunganqamukiyo,

eyabusa izizwe ngolaka

ngokuzingela okunganqandwanga.

₇Wonke umhlaba uyaphumula, usenokuthula;

baqhumuka ngokuhlabelela.

₈Yebo, nemisayipuresi* ithokoza ngawe,

kanye nemisedari* yaseLebanoni, ngokuthi:

‘Selokhu walaliswa phansi,

akakho umgawuli okhuphukela kithina.’

₉Indawo yabafileyo ngaphansi inyakazisiwe

ukuba ikuhlangabeze ekufikeni kwakho,

ikuvusele izithunzi,

zonke izikhulu zomhlaba,

isukumise onke amakhosi ezizwe

ezihlalweni zawo zobukhosi.

₁₀Onke ayakuthatha athi kuwe:

Nawe usubuthakathaka njengathi,

usufana nathi, na?

₁₁Ubukhosi bakho sebehliselwe endaweni yabafileyo,

umsindo wezingubhu zenu;

izimpethu zenekiwe ngaphansi kwakho,

nezibungu ziyakusibekela.

₁₂“Yeka ukuwa kwakho ezulwini,

khwezi elikhanyayo, ndodana yokusa,

nokunqunyelwa kwakho phansi,

wena owawuthobisa izizwe.

₁₃Wena wathi enhliziyweni yakho:

‘Ngiyakukhuphukela ezulwini,

ngiphakamise isihlalo sami sobukhosi

phezu kwezinkanyezi zikaNkulunkulu,

ngihlale entabeni yomhlangano

ngasekugcineni kwasenyakatho.

₁₄Ngiyakukhuphuka phezu kwezindawo

eziphakemeyo zamafu,

ngizenze ngibe ngangoPhezukonke.’

₁₅Kepha uyakwehliselwa endaweni yabafileyo,

ekugcineni komgodi.

₁₆“Abakubonayo bayakugqolozela,

bakuqaphele, bathi:

‘Nguye lo muntu owawuzamazamisa umhlaba,

wanyakazisa imibuso,

₁₇owenza izwe laba yihlane,

wayichitha imizi yalo,

akavumela iziboshwa zakhe

ukuba zigoduke, na?’

₁₈Onke amakhosi ezizwe,

onke alala ngodumo,

yileyo naleyo endlini yayo.

₁₉Kepha wena ulahliwe ngaphandle kwethuna lakho

njengegatsha elinengekayo,

ligqokwe ngababuleweyo,

abahlatshwe yinkemba,

abehlela ematsheni omgodi

njengesidumbu esinyathelweyo.

₂₀Awuyikuhlanganiswa nabo ekumbelweni,

ngokuba uchithile izwe lakho,

wabulala abantu bakho;

inzalo yababi ayisayikubizwa ngegama naphakade.

₂₁Lungiselani abantwana bakhe ukubulawa

ngobubi bawoyise,

ukuze bangavuki, badle ifa lomhlaba,

bagcwalise ubuso bezwe ngemizi.”

₂₂“Ngiyakubavukela,” usho uJehova Sebawoti,

“nginqume eBabele igama, nensali,

nendodana, nomzukulwana,” usho uJehova.

₂₃“Ngiyakulenza libe yifa likanondwebu

namachibi amanzi,

ngilishanele ngomshanelo wencithakalo,”

usho uJehova Sebawoti.