Bible Reading Plan – Day 268

₂“Kuphila kukaNkulunkulu osusile ukwahlulelwa kwami,

noSomandla owenze munyu umphefumulo wami,

₃kusekhona ukuphefumula kimi,

nomoya kaNkulunkulu usemakhaleni ami,

₄izindebe zami aziyikukhuluma okubi,

nolimi lwami aluyikukhipha inkohliso.

₅Makube kude nami ukuba nginivumele;

angiyikuzaphuca ukuphelela kwami ngize ngife.

₆Ngibambelela ekulungeni kwami, angikuyeki;

inhliziyo yami ayisoli nowodwa wemihla yami.

₇“Isitha sami masibe njengomubi,

nongisukelayo njengowonileyo.

₈Liyini ithemba longenaNkulunkulu,

nxa enqunywa,

lapho uNkulunkulu esusa umphefumulo wakhe, na?

₉UNkulunkulu uyakuzwa ukukhala kwakhe,

lapho ehlelwa lusizi, na?

₁₀Uyakuthokoza ngoSomandla,

ambize uNkulunkulu ngezikhathi zonke, na?

₁₁“Ngiyakunifundisa ngesandla sikaNkulunkulu;

okukuSomandla angiyikukufihla.

₁₂Bhekani, nina nonke nikubonile;

kungani ukuba nizenze ize na?

₁₃“Lokhu kuyisabelo somuntu omubi kuNkulunkulu,

nefa lezidlwangudlwangu ezilamukela kuSomandla.

₁₄Uma abantwana bakhe banda, bandela inkemba;

inzalo yakhe ayiyikusutha ngokudla.

₁₅Abasele kuye bayakumbelwa ekufeni,

abafelokazi babo bangalili.

₁₆Noma enqwabela isiliva njengothuli,

alungise izambatho njengodaka,

₁₇makakulungise,

kepha kuyakwembathwa ngolungileyo,

ongenacala abele isiliva.

₁₈Uyakha indlu yakhe njengenundu,

ibe njengedlangala elakhiwa ngumlindi.

₁₉Uyalala enothile,

angakuphindi kodwa;

uyavula amehlo akhe, abe engasekho.

₂₀Ingebhe iyamehlela njengamanzi;

isivunguvungu siyamphephula ebusuku.

₂₁Umoya wasempumalanga uyamthatha, amuke;

uyambhengula endaweni yakhe.

₂₂Uyacibishelwa engahawukelwa;

uyabaleka nokubaleka esandleni sakhe.

₂₃Abantu bayakumshayela ihlombe,

bamncimfele ukuba asuke endaweni yakhe.

₁“Impela ukhona umthapho wesiliva,

nendawo yegolide abalicwengayo.

₂Insimbi iyakhishwa emhlabathini;

amatshe ayancibilikiswa abe yithusi.

₃Ubumnyama bubekelwa umkhawulo;

kuyacingwa kuze kube sekupheleni konke

amatshe esigayegaye nethunzi lokufa.

₄Baqhekeza umgodi kude nalapho behlala khona abantu,

lapho bekhohlakele khona lunyawo;

bayalenga, bajikajika kude nabantu.

₅Umhlaba-ke, kuwona kuvela ukudla,

kepha ngaphansi kwawo uyaphendukezelwa njengangomlilo.

₆Amatshe awo ayindawo yamasafire;*

inothuli lwegolide.

₇Lowo mgudu awaziwa yinqe,

neso loheshe aliwubonanga.

₈Izilwane ezinkulu azihambanga ngawo,

nengonyama ayidlulanga ngawo.

₉Uyelulela isandla sakhe etsheni lensengetsha,

agumbuqele izintaba kwasezimpandeni zazo.

₁₀Uqhekeza imihohoba emadwaleni;

iso lakhe liyabona konke okuyigugu.

₁₁Uyavimba imifula ukuba ingaconsi;

imfihlakalo uyayikhiphela ekukhanyeni.

₁₂“Kepha ukuhlakanipha kufumanisekaphi?

Iphi indawo yokuqonda na?

₁₃Umuntu kalazi inani lakho;

akutholakali ezweni labaphilayo.

₁₄Utwa luthi: ‘Akukho kimi;’

ulwandle luthi: ‘Akukho kimi.’

₁₅Akunakuzuzwa ngegolide;

intengo yakho ayinakulinganiswa nesiliva.

₁₆Kungelingane negolide lase-Ofiri,

neshohamu* eliyigugu, nesafire.*

₁₇Igolide nengilazi kungelingane nakho;

akunakwenaniswa ngezinto zegolide elicwengekileyo.

₁₈Akunakukhulunywa ngekorali* nangekristalu;*

intengo yakho iphezu kwamarubi.*

₁₉Itopazi* laseKushe alinakulinganiswa nakho,

kungelingane negolide elicwengekileyo.

₂₀“Ukuhlakanipha kuvelaphi na?

Indawo yokuqonda iphi na?

₂₁Kusithekile emehlweni abo bonke abaphilayo,

kufihliwe ezinyonini zezulu.

₂₂Ukubhujiswa nokufa kuthi:

‘Ngezindlebe zethu sizwile amahemuhemu akho.’

₂₃UNkulunkulu uyaqonda indlela yakho;

yena uyazi indawo yakho.

₂₄Ngokuba uyabeka imikhawulo yomhlaba,

abone konke okuphansi kwezulu.

₂₅Lapho emisela umoya ukusinda kwawo,

elinganisa amanzi ngezilinganiso,

₂₆lapho enzela imvula isimiso,

nonyazi lokuduma indlela,

₂₇khona wakubona, walanda ngakho,

wakuhlela, wakuphenya.

₂₈Wathi kubantu: ‘Bhekani, ukwesaba

iNkosi lokhu kungukuhlakanipha;

ukusuka ebubini kungukuqonda.’ ”

₂“Sengathi nga

nginjengasezinyangeni zakuqala,

njengasemihleni uNkulunkulu angigcina ngayo,

₃lapho isibani sakhe sasikhanya phezu kwekhanda lami,

ngihamba ebumnyameni ngokukhanya kwakhe,

₄yebo, njengasezinsukwini zokuvuthwa kwami,

lapho ubuhlobo bukaNkulunkulu babuphezu kwetende lami;

₅lapho uSomandla wabe esenami,

nabantwana bami babe besangizungeza;

₆lapho izinyathelo zami zagezwa ngamangqanga,

nedwala elalingakimi langithelela imifula yamafutha.

₇“Lapho ngaphuma ngaya esangweni ngasemzini,

ngalungisa isihlalo sami esigcawini,

₈izinsizwa zangibona, zacasha,

nezimpunga zasuka zema,

₉izikhulu zayeka ukukhuluma,

zabeka izandla emilonyeni yazo;

₁₀izwi labakhulu lathuliswa;

izilimi zabo zanamathela olwangeni lwabo.

₁₁Lapho indlebe yangizwa, yangibusisa,

nalapho iso langibona, langifakazela.

₁₂Ngokuba ngakhulula abampofu abakhalayo

kanye nentandane engenamsizi.

₁₃Isibusiso sobezakubhubha safika phezu kwami;

ngenza inhliziyo yomfelokazi ukuba ihube ngokujabula.

₁₄Ngembatha ukulunga,

kwaba yisambatho kimi;

ukwahlulelwa kwami kwakunjengengubo nomqhele kimi.

₁₅Ngaba ngamehlo ezimpumputhe nezinyawo zezinyonga.

₁₆Nganginguyise wabampofu;

indaba yengingamaziyo ngayiphenya.

₁₇Ngaphula imihlathi yowonayo,

ngahlwitha impango emazinyweni akhe.

₁₈“Ngase ngithi:

‘Ngiyakufa esidlekeni sami,

ngandise izinsuku zami zibe ngangesihlabathi.

₁₉Impande yami iyazivulela amanzi;

amazolo alala ubusuku bonke egatsheni lami;

₂₀udumo lwami lusha njalo kimi,

umnsalo wami wenziwa musha esandleni sami.’

₂₁“Abantu bangilalela belinda;

bathula ngesiluleko sami.

₂₂Emva kwamazwi ami ababe besakhuluma;

amazwi ami aconsela phezu kwabo.

₂₃Bangilindela njengemvula;

bangikhamisela imilomo yabo

njengokukhamisela imvula yamuva.

₂₄Ngabahleka bengenakukholwa;

ukukhanya kobuso bami kabakufiphazanga.

₂₅Uma ngangikhethile izindlela zabo,

ngangiyakuhlala emqoka,

ngahlalisa okwenkosi empini,

njengoduduza abalilayo.

₁“Kepha manje abancane

ngeminyaka kunami bayangihleka,

oyise babo engangibadelela

ukuba ngingababeki naphakathi kwezinja zezimvu zami.

₂Yebo, namandla ezandla zabo angangisiza kanjani,

abantu abaphelile iziphika, na?

₃Bondile ngokuswela nangendlala;

baququda ugwadule oluyize, olwaluyilohle nakuqala.

₄Bayakha imifino kasawoti ezihlahleni;

izimpande zezinwele zingukudla kwabo.

₅Bayaxoshwa phakathi kwabantu;

bamemeza emva kwabo njengasemva kwamasela.

₆Bahlala ezigodini ezesabekayo,

nesemihumeni yomhlaba, naseziweni.

₇Bayakhonya phakathi kwezihlahla;

phansi kwezimbabazane bayabuthana,

₈bengabantwana beziwula,

abantwana babangenamagama,

beshaywa, bexoshwa ezweni.

₉“Manje sengihaywa yibo,

yebo, sengiyisaga sabo.

₁₀Bayanengwa yimi, bemi kude nami;

abayeki ukungikhafulela ngamathe.

₁₁Bakhululile imichilo yabo,

bangithobisa;

balahlile itomu phambi kwami.

₁₂Ngakwesokunene kuvuka amachwensa;

agudlumeza izinyawo zami,

anginqwabelela izindlela zokubhubhisa.

₁₃Achitha umkhondo wami;

asebenzela ukubhujiswa kwami engazibambi.

₁₄Angena kungathi ngesikhala esibanzi;

phakathi kwencithakalo atheleka phezu kwami.

₁₅Ingebhe ithululwa phezu kwami;

njengomoya luyaxoshwa udumo lwami;

inhlalakahle yami iyadlula njengefu.

₁₆“Manje umphefumulo wami uthululiwe phakathi kwami;

izinsuku zosizi zingibambile.

₁₇Ebusuku amathambo ami ayabhotshozwa, asuke kimi;

ubuhlungu obungigedlayo abuphumuli.

₁₈Ngamandla amakhulu umzimba wami wonakele;

unamathela kimi njengentamo yesambatho sami.

₁₉Ungiphonsile odakeni;

sengifana nothuli nomlotha.

₂₀“Ngikhala kuwe,

kepha awungiphenduli;

ngimi lapha, uyangibuka nje.

₂₁Uyaguquka ukuze ungiphathe ngonya;

ngamandla esandla sakho uyangizingela.

₂₂Uyangiphakamisela emoyeni, ungikhwelisa kuwo,

wenze ukuba ngincibilike ngokuhlokoma kwesivunguvungu.

₂₃Ngokuba ngiyazi ukuthi ungiyisa ekufeni

nasendlini yokubuthana kwabaphilayo bonke.

₂₄“Kepha umuntu angelule isandla sakhe encithakalweni,

akhale uma esengozini, na?

₂₅Angimkhalelanga yini ozinsuku zakhe zazilukhuni na?

Umphefumulo wami awuhawukelanga abampofu na?

₂₆Lapho ngabheka okuhle,

kwafika okubi;

ngalindela ukukhanya,

kwafika ubumnyama.

₂₇Izibilini zami ziyaxhuxhuzela,

aziphumuli;

izinsuku zosizi zingehlele.

₂₈Ngihamba ngimnyama,

kungenziwanga yilanga;

ngisukuma ebandleni ngikhala.

₂₉Ngingumfowabo wamakhanka,

nomngane wezintshe.

₃₀Isikhumba sami simnyama,

siyebuza kimi;

amathambo ami ashile ngokushisa.

₃₁Ihabhu* lami seliphenduke isililo,

nomtshingo wami uyizwi labakhalayo.