To The Word – Day 103

₁“Kepha yizwa manje, Jakobe, nceku yami,

wena Israyeli engikukhethileyo.

₂Usho kanje uJehova owakudalayo,

wakubumba kwasesiwini, oyakukusiza, uthi:

Ungesabi, Jakobe, nceku yami,

wena Jeshuruni engikukhethileyo.

₃Ngokuba ngiyakuthela amanzi phezu kokomileyo,

nezikhukhula phezu kokushileyo,

ngithulule uMoya wami phezu kwenzalo yakho,

nesibusiso sami phezu kwabantwana bakho;

₄bayakuhluma phakathi kotshani

njengeminyezane ngasemifudlaneni yamanzi.

₅Omunye uyakuthi: ‘NgingokaJehova;’

omunye uyakuzibiza ngegama likaJakobe,

omunye azilobele uJehova esandleni sakhe,

azidumise ngegama lika-Israyeli.”

₆“Usho kanje uJehova,

iNkosi ka-Israyeli,

noMhlengi wakhe, uJehova Sebawoti, uthi:

Ngingowokuqala, ngingowokugcina,

ngaphandle kwami akakho uNkulunkulu.

₇Ngubani ongabiza njengami, akumemezele,

akubeke phambi kwami,

kusukela ekusekeleni kwami abantu basendulo, na?

Yebo, okuzayo nokuyakwenzeka mabakumemezele.

₈Ningesabi, ningabi naluvalo;

angithi ngikuzwisile kusukela endulo,

ngakumemezela, na?

Nina ningofakazi bami.

Kukhona uNkulunkulu ngaphandle kwami na?

Cha, alikho iDwala; angilazi.”

₉Abenza isithombe esibaziweyo bayize bonke;

izinto zabo ezithandekayo aziyikusiza;

ofakazi babo ababoni, futhi abazi;

bayakujabhiswa.

₁₀Ngubani owenzile uNkulunkulu,

ngubani obumbile isithombe esibaziweyo

esingesokusiza na?

₁₁Bheka, bonke abangane bakhe bayakujabha,

nezisebenzi zingabantu nje.

Mabahlangane bonke, beme;

bayakwesaba, bajabhe kanyekanye.

₁₂Umkhandi wensimbi wenza imbazo,

asebenze emalahleni,

ayibumbe ngezando,

ayisebenze ngamandla ezingalo zakhe;

uyalamba, angabikho amandla;

akaphuzi amanzi, uyadangala.

₁₃Umbazi uyelula intambo,

adwebe umuthi ngokubomvu,

awenze ngezibazo,

adwebe ngekompasi,*

awenze ngomfanekiso womuntu,

ngobuhle bomuntu,

ukuba uhlale endlini.

₁₄Uyazigawulela imisedari,*

athathe imikhoba nama-oki,*

awaqinise phakathi kwemithi yehlathi;

uyatshala umfire,* imvula iwukhulise.

₁₅Bese kuba ngokomuntu ukuba abase ngakho;

uthatha kuwo, othe;

uyawuphemba, enze isinkwa;

wenza unkulunkulu, akhuleke kuye,

enze nesithombe esibaziweyo,

akhothambele kuso.

₁₆Ushisa inxenye yawo emlilweni;

phezu kwale nxenye uyadla inyama,

ose izoso, asuthe;

yebo, uyotha athi:

“Halala! Sengifudumele,

ngibonile umlilo.”

₁₇Ngokuseleyo kuwo uyakwenza unkulunkulu nesithombe;

uyakhothamela kuso, akhuleke kuso,

athandaze kuso, athi:

“Ngophule; ungunkulunkulu wami.”

₁₈Abazi, abaqondi,

ngokuba unamekile amehlo abo ukuze bangaboni,

nezinhliziyo zabo ukuze bangaqondi.

₁₉Akakho okhumbulayo,

nokwazi nokuqonda akukho kokuba kuthiwe:

“Ngishisile inxenye yawo ngomlilo,

ngenzile isinkwa phezu kwamalahle awo,

ngosile inyama, ngayidla;

ngingenza okuseleyo kuwo kube yisinengiso,

ngikhothamele umbhuku womuthi,” na?

₂₀Udla umlotha;

inhliziyo ekhohlisiweyo imdukisile;

akanakophula umphefumulo wakhe nokuba athi:

“Akukho yini amanga kwesokunene sami na?”

₂₁“Khumbula lezi zinto, Jakobe,

wena Israyeli, ngokuba uyinceku yami;

ngikubumbile, uyinceku yami;

Israyeli, angiyikukhohlwa.

₂₂Ngesulile iziphambeko zakho njengefu,

nezono zakho njengemilaza;

buyela kimi, ngokuba ngikuhlengile.”

₂₃Thokozani, mazulu,

ngokuba uJehova ukwenzile,

nijabule nina zindawo eziphansi zomhlaba,

niqhumuke ngokuhlabelela nina zintaba,

nawe hlathi nayo yonke imithi ekuwe,

ngokuba uJehova umhlengile uJakobe,

ngokuhlabelela wazidumisa ngo-Israyeli.

₂₄Usho kanje uJehova uMhlengi wakho

nowakubumba kwasesiswini, uthi:

“NginguJehova owenza konke,

oweneka izulu yedwa,

nowendlala umhlaba ngokwakhe,

₂₅oshafisa izibonakaliso zabaprofethi bamanga,

enze ababhuli ukuba bahlanye,

obuyisela emuva abahlakaniphileyo,

enze ukwazi kwabo kube ngubuwula;

₂₆ogcwalisa izwi lenceku yakhe,

afeze ukululekana kwezithunywa zakhe,

oshoyo ngalo iJerusalema, athi:

‘Liyakuba nabantu,’

nangemizi yakwaJuda ukuthi:

‘Iyakwakhiwa,

ngibuye ngivuse incithakalo yakhona;’

₂₇oshoyo kuwo umsinga ukuthi:

‘Yisha, ngiyakomisa imifula yakho;’

₂₈oshoyo ngoKoresi ukuthi:

‘Ungumalusi wami,

uyakufeza konke okwentando yami,

athi ngeJerusalema: Liyakwakhiwa,

nakulo ithempeli:

Isisekelo sakho siyakubekwa.’ ”

₁“Usho kanje uJehova kogcotshiweyo wakhe, kuKoresi,

osandla sakhe sokunene ngisibambile

ukuba ngahlule izizwe phambi kwakhe,

ngithukulule izinkalo zamakhosi,

ngivule iminyango phambi kwakhe,

amasango angabe esavalwa.

₂Mina ngiyakuhamba phambi kwakho,

ngihlelembe amagebhugebhu,

ngaphule izivalo zethusi,

nginqume imigoqo yensimbi.

₃Ngiyakukunika ingcebo yobumnyama,

nemfuyo ethukusiweyo ezindaweni ezisithekileyo,

ukuba wazi ukuthi nginguJehova

okubiza ngegama lakho,

uNkulunkulu ka-Israyeli.

₄Ngenxa yenceku yami uJakobe,

u-Israyeli okhethiweyo wami,

ngikubizile ngegama lakho,

ngikunikile igama lodumo, ungakangazi.

₅Mina nginguJehova, akakho omunye;

ngaphandle kwami akakho uNkulunkulu;

ngiyakubhincisa ungakangazi,

₆ukuze bazi kusukela empumalanga nasentshonalanga

ukuthi akakho ngaphandle kwami;

mina nginguJehova, akakho omunye;

₇yimi engenza ukukhanya nengidala ubumnyama,

ngenza ukuthula, ngidala okubi;

nginguJehova owenza konke lokho.

₈“Consani, mazulu, phezulu,

amafu athuntulule ukulunga;

umhlaba mawuvuleke,

kuthelwe ukusindiswa,

kumile nokulunga;

mina Jehova ngikudalile.

₉“Wo kuye olwa noMenzi,

udengezi phakathi kwezindengezi zomhlaba!

Ibumba liyakusho kolibumbayo ukuthi:

‘Wenzani na?’

nomsebenzi wakho ukuthi:

‘Akanazo izandla,’ na?

₁₀Wo kuye osho kuyise ukuthi:

‘Uzalani na?’

nakowesifazane ukuthi:

‘Unemihelo ngani na?’

₁₁“Usho kanje uJehova,

oNgcwele ka-Israyeli noMenzi wakhe, uthi:

Ningibuza ngezinto ezizayo, ngabantwana bami,

ningiyaleze ngomsebenzi wezandla zami, na?

₁₂Yimi engiwenzile umhlaba,

ngadala abantu phezu kwawo;

mina ngezandla zami ngeneka izulu,

nebandla lalo lonke ngiliyalezile.

₁₃Mina ngimvusile lona ngokulunga;

ngiyakuhlelemba zonke izindlela zakhe;

yena uyakuwakha umuzi wami,

avumele abathunjwa bami ukuba bahambe,

kungabi ngenkokhelo nangesipho,

usho uJehova Sebawoti.”

“Okukhandlekelweyo kwaseGibithe

nokuzuziweyo kwaseKushe,

nangamaSheba, abantu abade,

kuyakungena kuwe,

kube ngokwakho;

bayakukulandela, bafike beboshwe

ngamaketanga,

bakhothamele kuwe, bakhuleke kuwe, bathi:

‘UNkulunkulu ukuwe kuphela,

akakho omunye,

akakho ngaphandle kukaNkulunkulu.’ ”

₁₅Impela unguNkulunkulu ozifihlayo,

wena Nkulunkulu, Msindisi.

₁₆Bayakujabha, babe namahloni bonke

kanyekanye;

bayakuhamba benamahloni bonke abenza izithombe.

₁₇Kepha u-Israyeli uyakusindiswa nguJehova

ngokusindiswa okuphakade;

aniyikujabha, aniyikuba namahloni

kuze kube phakade.

₁₈Ngokuba usho kanje uJehova,

owalidala izulu, onguNkulunkulu,

owawubumba umhlaba, wawenza,

wawumisa, engawudalelanga ize,

wawubumba ukuba kuhlalwe kuwo, uthi:

“NginguJehova, akakho omunye.

₁₉Angikhulumanga ekusithekeni,

endaweni emnyama emhlabeni;

angishongo enzalweni kaJakobe ukuthi:

‘Ngifuneni ngeze.’

Mina Jehova ngikhuluma ukulunga,

ngimemezela okuqotho.

₂₀“Buthanani nize,

nisondelane ndawonye

nina bakhululekileyo bezizwe;

abawuthwala umuthi wezithombe zabo ezibaziweyo abanakwazi,

bakhuleka kunkulunkulu ongenakusindisa.

₂₁Kumemezeleni, nikuveze;

yebo, balulekane kanyekanye.

Ngubani owakuzwisa lokhu endulo,

wakumemezela kwasesikhathini samandulo na?

Akusimina Jehova na?

Akakho uNkulunkulu ngaphandle kwami,

uNkulunkulu olungileyo noMsindisi,

akakho ngaphandle kwami.

₂₂“Phendukelani kini, nisindiswe,

nonke nina majukujuku omhlaba,

ngokuba nginguNkulunkulu,

akakho omunye.

₂₃Ngizifungile mina,

kuphumile izwi emlonyeni wami ngokulunga,

aliyikubuya,

lokuthi: Kimina ayakuguqa onke amadolo,

nezilimi zonke ziyakufunga.

₂₄Kuyakuthiwa:

‘KuJehova kuphela

nginokulunga namandla.’ ”

Bayakufika kuye,

bajabhe bonke abamvuthelayo.

₂₅KuJehova yonke inzalo kaJakobe yakwa-Israyeli

iyakulungisiswa, ibe nodumo.

₁UBeli uyaguqa, uNebo uyakhothama;

izithombe zabo zingezezilwane nezezinkomo;

enibathweleyo bangumthwalo,

banzima ezilwaneni eziyethileyo.

₂Ziyakhothama, ziguqa kanyekanye,

azinakuwukhulula umthwalo;

nabo uqobo baya ekuthunjweni.

₃“Ngilalele wena ndlu kaJakobe,

yonke insali yendlu yakwa-Israyeli

engiyithwesiweyo kwasesiswini,

yabekwa phezu kwami kwasesizalweni.

₄Noze niguge, nginguye,

yebo, noze nibe yizimpunga,

ngiyakunithwala;

ngikwenzile lokhu,

futhi ngiyakunetshatha,

yebo, ngiyakunithwala, nginikhulule.

₅“Niyakungifanisa,

ningilinganise nobani,

ningiqathanise nobani ukuba sifanane na?

₆Abathulula igolide esikhwameni yini,

balinganise isiliva esilinganisweni,

baqashe umkhandi wesiliva ukuba enze unkulunkulu,

bese bekhothama, bakhuleke, na?

₇Bamthwala ehlombe, bametshathe,

bambeke endaweni yakhe ukuba eme khona,

angabe esasuka endaweni yakhe;

kepha uma umuntu ekhala kuye,

akayikumphendula,

angamsindisi osizini lwakhe.

₈“Khumbulani lokhu, nime niqinile,

nibuye nicabange ezinhliziyweni zenu nina benzi bokubi.

₉Khumbulani izinto zakuqala zamandulo,

ngokuba nginguNkulunkulu,

akakho omunye,

yebo, nginguNkulunkulu,

akakho onjengami,

₁₀engimemezela ngaphambili okuyakuza,

nasendulo izinto ezingakenziwa, ngokuthi:

Icebo lami liyakuma,

ngiyakwenza yonke intando yami,

₁₁mina engibiza inqe empumalanga

nomuntu wecebo lami ezweni elikude;

yebo, ngikhulumile, ngiyakukufikisa;

nginqumile, ngiyakukwenza.

₁₂Ngilaleleni nina enilukhuni ngenhliziyo,

enikude nokulunga.

₁₃Ngiyakusondeza ukulunga kwami, akukude,

insindiso yami ayiyikulibala;

ngibeka insindiso eSiyoni

nodumo lwami kwa-Israyeli.

₁“Yehla, uhlale othulini wena ntombi,

ndodakazi yaseBabele,

uhlale emhlabathini,

kungekho sihlalo sobukhosi,

wena ndodakazi yamaKaledi,

ngokuba awusayikubizwa ngokuthi uthambile

nokuthi uyatetema.

₂Thatha amatshe okugaya,

ugaye impuphu,

uyisuse imvakazi yakho,

uwukhumule umhushuzo wakho,

wambule umlenze, uwele imifula.

₃Ubuze bakho buyakwambulwa,

yebo, ubunqunu bakho buyakubonakala;

ngiyakuphindisa, ngingayeki muntu.

₄Igama loMhlengi wethu linguJehova Sebawoti,

oNgcwele ka-Israyeli.

₅“Hlala uzithulele,

ungene ebumnyameni,

wena ndodakazi yamaKaledi,

ngokuba awusayikubizwa ngokuthi iNkosikazi Yemibuso.

₆Ngabathukuthelela abantu bami,

ngalingcolisa ifa lami,

ngalinikela esandleni sakho;

awubahawukelanga,

walenza ijoka lakho ukuba lisinde kakhulu

phezu kwabadala.

₇Wathi wena: ‘Ngiyakuba yinkosikazi njalonjalo.’

Ngalokho awubekanga lezi zinto enhliziyweni yakho,

awukhumbulanga ukugcina kwazo.

₈“Manje yizwa lokhu wena ozijabulisayo,

ohlala ulondekile,

othi enhliziweni yakho:

Yimi, akakho omunye;

angiyikuhlalisa okomfelokazi,

nokufelwa abantwana angiyikukwazi.

₉Kodwa lokhu kokubili kuyakufika kuwe

ngokuphazima kweso ngalusuku lunye,

ukufelwa, kwabantwana nobufelokazi

kufike phezu kwakho ngokugcweleyo

phakathi kobuningi bamalumbo akho,

nobuningi beziphonso zakho.

₁₀Wethembile ebubini bakho, wathi:

‘Akakho ongibonayo.’

Ukuhlakanipha kwakho nokwazi kwakho kukudukisile;

wathi enhliziyweni yakho:

‘Yimi, akakho omunye.’

₁₁Kepha ububi buyakukwehlela,

awuyikwazi lapho buvela khona;

nengozi iyakuwela phezu kwakho,

awuyikuba namandla okuyichezukisa,

incithakalo ifike phezu kwakho ngokuzumayo,

ungazi.

₁₂“Yima manje neziphonso zakho

nobuningi bamalumbo akho

okhandlekile kukho kwasebusheni bakho;

mhlawumbe uyakusizakala,

mhlawumbe uyakubanga uvalo.

₁₃Ukhathele ngobuningi bamacebo akho;

mabasukume, bakusindise abadabula izulu,

nababheka izinkanyezi,

nabazisa ngezinyanga ezintsha ukuthi

kuphi lapho kuzakuvela khona lokhu okuzakukwehlela.

₁₄Bheka, bayakuba njengamabibi ashiswa ngumlilo,

abayikuzophula emandleni elangabi;

akusilo ilahle lokotha,

akusiwo umlilo wokuba kuhlalwe phambi kwawo.

₁₅Ziyakuba njalo kuwe izinto okhandleke kuzo,

zihambisene nawe kwasebusheni bakho;

seziyakuzulazula,

kube yileyo naleyo ngendlela yayo,

ekusindisayo ingabikho.

₁₈“Bheka, inceku yami engiyikhethileyo,

othandiweyo wami othokoza ngaye umphefumulo wami,

ngiyakuzisa uMoya wami phezu kwakhe,

amemezele ukwahlulela kubo abezizwe.

₁₉Akayikubanga, akayikubangalasa,

akakho oyakulizwa izwi lakhe ezitaladini.

₂₀Umhlanga ofecekileyo akayikuwaphula,

umongo othunqayo akayikuwucima,

aze aphumelelise ukwahlulela,

kunqobe.

₂₁Izizwe ziyakwethembela egameni

lakhe.”

“ ‘Ngokuzwa niyakuzwa,

ningaze naqonda;

ngokubona niyakubona,

ningaze nabonisisa;

₁₅ngokuba inhliziyo yalesi sizwe isiyaba lukhuni,

bezwa kanzima ngezindlebe,

amehlo abo bawacimezile,

funa mhlawumbe babone ngamehlo,

bezwe ngezindlebe,

baqonde ngenhliziyo, baphenduke,

ngibaphulukise.’

“Ngizakuvula umlomo wami ngemifanekiso,

ngiphimisele okufihlakeleyo,

selokhu kwasekelwa umhlaba.”