To The Word – Day 105

₁Vuka, vuka,

wembathe amandla akho, Siyoni,

uzigqoke izingubo zakho ezinhle,

Jerusalema, muzi ongcwele,

ngokuba akusayikungena kuwe

ongasokile nongcolileyo.

₂Zithintithe uthuli,

usukume, uhlale, Jerusalema elithunjiweyo;

zikhulule eziboshweni zentamo yakho

wena ndodakazi yaseSiyoni ethunjiweyo.

“Nathengiswa ngento engelutho;

niyakuhlengwa ngaphandle kwemali.”

Abantu bami behlela kuqala eGibithe

ukuba bagogobale khona;

i-Asiriya lamcindezela ngaphandle kwesizathu.

₅“Manje nginantoni lapha,” usho uJehova,

“lapho abantu bami besusiwe ngeze na?

Ababusa phezu kwabo bayaklabalasa,” usho uJehova,

“negama lami liyahlanjalazwa njalo usuku lonke.

₆Ngalokho abantu bami bayakulazi igama lami;

ngalokho bayakuqonda ngalolo suku

ukuthi yimi engikhulumileyo;

bhekani, ngilapha.”

₇Zimnandi kangakanani ezintabeni

izinyawo zoletha izindaba ezinhle,

nomemezela ukuthula,

obika izindaba ezinhle, ezwakalise ukusindiswa,

oshoyo kulo iSiyoni ukuthi:

“UNkulunkulu wakho uyinkosi.”

₈Izwi labalindi bakho,

bayaliphakamisa izwi,

bajabule kanyekanye,

ngokuba bayakubona iso neso,

lapho uJehova ebuyela eSiyoni.

₉Qhumukani ngokuhlabelela,

nihlabelele kanyekanye,

nina zindawo ezichithekileyo zaseJerusalema,

ngokuba uJehova ubaduduzile abantu bakhe,

ulihlengile iJerusalema.

₁₀UJehova wambulile ingalo yakhe engcwele

emehlweni ezizwe zonke,

namajukujuku onke omhlaba

ayakubona insindiso kaNkulunkulu wethu.

₁₁Mukani, mukani, niphume lapha,

ningathinti okungcolileyo,

niphume phakathi kwalo, nizihlambulule

nina eniphatha izitsha zikaJehova.

₁₂Ngokuba aniyikuphuma ngokushesha,

ningahambi ngokubaleka,

ngokuba uJehova uyakuhamba phambi kwenu,

noNkulunkulu ka-Israyeli uyakuba semva kwenu.

₁₃Bheka, inceku yami iyakuphumelela kahle;

iyakukhuliswa, iphakanyiswe, iphakame kakhulu.

₁₄Njengalokhu abaningi bamangala ngayo

ubuso bayo babonakele kunobabantu,

nesimo sayo kunesamadodana abantu

₁₅kanjalo iyakwethusa izizwe eziningi;

amakhosi ayakuvala imilomo yawo ngenxa yayo,

ngokuba lokho angatshelwanga khona ayakukubona,

nalokho angakuzwanga ayakukuqonda.

₁Ngubani owakholwa ngesikuzwileyo;

ingalo kaJehova yambulelwa bani na?

₂Ngokuba yakhula njengehlumela phambi kwakhe,

nanjengempande emhlabathini owomileyo;

yayingenasimo nabuhle ukuba siyibuke,

yayingabukeki ukuba siyifune.

₃Yayideleliwe, yashiywa ngabantu,

umuntu wobuhlungu owazi ukugula;

yeyiswa injengosithezelwa ubuso ngabantu,

asiyishayanga nto yalutho.

₄Kepha yazithwala izifo zethu,

yabetshatha ubuhlungu bethu,

kodwa thina sathi ijezisiwe,

ishaywe nguNkulunkulu, ihlushiwe.

₅Yebo, yalinyazwa ngenxa yeziphambeko zethu,

yachotshozwa ngobubi bethu;

isijeziso sasiphezu kwayo ukuba sibe nokuthula,

nangemivimbo yayo siphilisiwe thina.

₆Thina sonke sidukile njengezimvu;

yilowo nalowo uphendukele endleleni yakhe;

uJehova wehlisela phezu kwayo ububi bethu sonke.

₇Yacindezelwa, kepha noma yathotshiswa,

ayivulanga umlomo wayo;

njengewundlu eliyiswa ekuhlatshweni,

nanjengemvu ethule phambi kwabagundi bayo,

ayiwuvulanga umlomo wayo.

₈Yasuswa ekucindezelweni nasekwahlulelweni;

ngubani esizukulwaneni sayo owacabanga

ukuthi yahlwithwa ezweni labaphilayo,

ishaywa ngesiphambeko sabantu bami, na?

₉Babeka ithuna layo kanye nababi;

ekufeni yayinabenza okubi,

noma ingenzanga indluzula,

kungekho nankohliso emlonyeni wayo.

₁₀Nokho uJehova wathanda ukuyishaya ngezifo;

lapho wenza umphefumulo wayo ube ngumnikelo wecala,

iyakubona inzalo yayo, yenze izinsuku zayo zibe ziningi,

nentando kaJehova iyakuphumelela esandleni sayo.

₁₁Ngokuhlupheka komphefumulo wayo

iyakukubona, yaneliswe.

Ngokwazi kwayo inceku yami, elungileyo,

iyakulungisisa abaningi,

ithwale izono zabo.

₁₂Ngalokho ngiyakuyabela kanye nabakhulu,

yahlukanise impango nabanamandla,

ngokuba yawuthulula umphefumulo wayo ekufeni,

yabalwa kanye nezelelesi;

yathwala nokho izono zabaningi,

yakhulekela aboni.

₁“Jabula wena nyumba, wena ongazalanga,

uqhumuke ngokuhlabelela,

umemeze wena ongabanga namihelo,

ngokuba abantwana boyisikhwebu baningi

kunabantwana bonendoda,” usho uJehova.

₂“Yenza ibe banzi indawo yetende lakho;

mabazelule izindwangu zamakhaya akho,

ungazibambezeli, welule izintambo zakho,

uziqinise izikhonkwane zakho.

₃Ngokuba uyakusabalala ngakwesokunene nangakwesokhohlo,

nengalo yakho iyakuqeda abezizwe,

yakhe imizi echithekileyo.

₄“Ungesabi, ngokuba awuyikujabha,

ungabi namahloni,

ngokuba awuyikujabhiswa,

ngokuba uyakukhohlwa ihlazo lobusha bakho,

ungabe usawakhumbula amahloni obufelokazi bakho.

₅Ngokuba uMenzi wakho ungumyeni wakho,

nguJehova Sebawoti igama lakhe;

oNgcwele ka-Israyeli unguMhlengi wakho,

uyakubizwa ngokuthi uNkulunkulu womhlaba wonke.

₆Ngokuba uJehova ukubizile

njengomfazi oshiyiweyo nodabukileyo emoyeni;

umfazi wobusha ukhona omalayo na?”

usho uNkulunkulu wakho.

₇“Umzuzwana omncane ngakushiya,

kepha ngobumnene obukhulu ngiyakukubutha.

₈Ngentukuthelo echichimayo

ngabusitheza ubuso bami kuwe isikhashana,

kepha ngomusa ongapheliyo ngiyakukuhawukela,”

usho uJehova uMhlengi wakho.

₉“Ngokuba lokhu kunjengezinsuku zikaNowa kimi,

ngokuba njengalokho ngafunga

ukuthi amanzi kaNowa awayikube esadlula emhlabeni,

kanjalo sengifungile ukuthi angisayikukuthukuthelela,

ngikusole.

₁₀Yebo, izintaba zingamuka, namagquma angasuswa,

kepha umusa wami awuyikumuka kuwe,

nesivumelwano sami sokuthula asiyikususwa,”

usho uJehova okuhawukelayo.

₁₁“Wena ohluphekayo,

ohlukunyeziwe ungaduduzwanga,

bheka, ngiyakufaka amatshe akho abe mahle,

ngizibeke izisekelo zakho ngamasafire.*

₁₂Ngiyakwenza imibhoshongo yakho ngamarubi,*

namasango akho ngekristalo,*

nayo yonke imikhawulo yakho ngamatshe amahle.

₁₃Bonke abantwana bakho

bayakuba ngabafundi bakaJehova,

nokuthula kwabantwana bakho kuyakuba kukhulu.

₁₄Uyakumiswa ngokulunga;

uyakuba kude nokucindezelwa,

ngokuba awuyikwesaba,

nanovalo, ngokuba aluyikusondela kuwe.

₁₅Bheka, uma bebuthana,

kungaphandle kwami,

noma ngubani obuthanela wena,

uyakuwa ngenxa yakho.

₁₆“Bheka, mina ngidalile umkhandi

ofutha umlilo wamalahle,

azikhiphele isikhali somsebenzi wakhe;

mina ngidalile futhi umchithi wokuba abhubhise.

₁₇Asikho isikhali esenzelwa wena esiyakuphumelela,

nalo lonke ulimi olukuvukelayo luyakwahlulelwa;

lokhu kuyifa lezinceku zikaJehova

nokulunga kwazo okuvela kimi, usho uJehova.

₁“We nina nonke enomileyo,

wozani emanzini;

nani eningenamali

wozani nithenge, nidle;

wozani nithenge ngaphandle kwemali,

yebo, iwayini nobisi,

kungabizwa lutho.

₂Niyichithelani imali kukho okungesiso isinkwa,

nenzuzo yenu kukho okunganelisiyo, na?

Ngilaleleni nokungilalela,

nidle okuhle,

umphefumulo wenu ujabule ngamanoni.

₃Bekani izindlebe, nize kimi,

nizwe, uyakuphila umphefumulo wenu;

ngiyakwenza nani isivumelwano esiphakade,

izenzo zomusa oqinisekileyo zikaDavide.

₄Bheka, ngimnike abe ngufakazi kubantu,

umholi nomyali kubantu.

₅Bheka, uyakubiza izizwe ongazaziyo,

nezizwe ebezingakwazi ziyakugijimela kuwe

ngenxa kaJehova uNkulunkulu wakho

nangenxa yoNgcwele ka-Israyeli,

ngokuba ukudumisile.”

₆Mfuneni uJehova esenokutholwa,

nimbize eseseduze.

₇Omubi makashiye indlela yakhe,

nomuntu owenza okubi imicabango yakhe,

abuyele kuJehova,

uyakuba nomusa kuye,

yebo, abuyele kuNkulunkulu wethu,

ngokuba uyakwenza ukuthethelela kube kukhulu.

₈“Ngokuba imicabango yami

ayisiyo imicabango yenu,

nezindlela zenu

azisizo izindlela zami,” usho uJehova.

₉“Ngokuba njengamazulu ephakeme kunomhlaba,

kanjalo izindlela zami ziphakeme kunezindlela zenu,

nemicabango yami kunemicabango yenu.

₁₀Ngokuba njengokwehla kwemvula neqhwa ezulwini,

kungabuyeli khona,

kepha kuwunethisa umhlaba,

kuwenze ukuba uthele, uhlume,

unike ohlwanyelayo inhlwanyelo nodlayo isinkwa,

₁₁liyakuba njalo izwi lami

eliphuma emlonyeni wami:

aliyikubuyela ze kimi,

lingakafezi lokhu engikufunayo,

liphumelele kulokhu engilithumele kukho.

₁₂Ngokuba niyakuphuma ngokuthokoza,

niholwe ngokuthula;

izintaba namagquma kuyakuqhumuka

ngokuhlabelela phambi kwenu,

nemithi yonke yasendle iyakushaya ihlombe.

₁₃Esikhundleni sogagane kuyakumila umsayipuresi,*

nasesikhundleni samakhakhasi kuyakumila umbomvana.

Kuyakuba yigama kuJehova,

nesibonakaliso esingapheliyo esingayikunqunywa.”